| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৫. পঠমসন্দিট্ঠিকসুত্তং
5. Paṭhamasandiṭṭhikasuttaṃ
৪৭. অথ খো মোল়িযসীৰকো 1 পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো মোল়িযসীৰকো পরিব্বাজকো ভগৰন্তং এতদৰোচ – ‘‘‘সন্দিট্ঠিকো ধম্মো, সন্দিট্ঠিকো ধম্মো’তি, ভন্তে, ৰুচ্চতি। কিত্তাৰতা নু খো, ভন্তে, সন্দিট্ঠিকো ধম্মো হোতি অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি?
47. Atha kho moḷiyasīvako 2 paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho moḷiyasīvako paribbājako bhagavantaṃ etadavoca – ‘‘‘sandiṭṭhiko dhammo, sandiṭṭhiko dhammo’ti, bhante, vuccati. Kittāvatā nu kho, bhante, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti?
‘‘তেন হি, সীৰক, তঞ্ঞেৰেত্থ পটিপুচ্ছামি। যথা তে খমেয্য তথা নং ব্যাকরেয্যাসি। তং কিং মঞ্ঞসি, সীৰক, সন্তং ৰা অজ্ঝত্তং লোভং ‘অত্থি মে অজ্ঝত্তং লোভো’তি পজানাসি, অসন্তং ৰা অজ্ঝত্তং লোভং ‘নত্থি মে অজ্ঝত্তং লোভো’তি পজানাসী’’তি? ‘‘এৰং, ভন্তে’’। ‘‘যং খো ত্ৰং, সীৰক, সন্তং ৰা অজ্ঝত্তং লোভং ‘অত্থি মে অজ্ঝত্তং লোভো’তি পজানাসি, অসন্তং ৰা অজ্ঝত্তং লোভং ‘নত্থি মে অজ্ঝত্তং লোভো’তি পজানাসি – এৰম্পি খো, সীৰক, সন্দিট্ঠিকো ধম্মো হোতি…পে॰…।
‘‘Tena hi, sīvaka, taññevettha paṭipucchāmi. Yathā te khameyya tathā naṃ byākareyyāsi. Taṃ kiṃ maññasi, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsi – evampi kho, sīvaka, sandiṭṭhiko dhammo hoti…pe….
‘‘তং কিং মঞ্ঞসি, সীৰক, সন্তং ৰা অজ্ঝত্তং দোসং…পে॰… সন্তং ৰা অজ্ঝত্তং মোহং…পে॰… সন্তং ৰা অজ্ঝত্তং লোভধম্মং…পে॰… সন্তং ৰা অজ্ঝত্তং দোসধম্মং…পে॰… সন্তং ৰা অজ্ঝত্তং মোহধম্মং ‘অত্থি মে অজ্ঝত্তং মোহধম্মো’তি পজানাসি, অসন্তং ৰা অজ্ঝত্তং মোহধম্মং ‘নত্থি মে অজ্ঝত্তং মোহধম্মো’তি পজানাসী’’তি? ‘‘এৰং, ভন্তে’’। ‘‘যং খো ত্ৰং, সীৰক, সন্তং ৰা অজ্ঝত্তং মোহধম্মং ‘অত্থি মে অজ্ঝত্তং মোহধম্মো’তি পজানাসি, অসন্তং ৰা অজ্ঝত্তং মোহধম্মং ‘নত্থি মে অজ্ঝত্তং মোহধম্মো’তি পজানাসি – এৰং খো, সীৰক, সন্দিট্ঠিকো ধম্মো হোতি অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি।
‘‘Taṃ kiṃ maññasi, sīvaka, santaṃ vā ajjhattaṃ dosaṃ…pe… santaṃ vā ajjhattaṃ mohaṃ…pe… santaṃ vā ajjhattaṃ lobhadhammaṃ…pe… santaṃ vā ajjhattaṃ dosadhammaṃ…pe… santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsi – evaṃ kho, sīvaka, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti.
‘‘অভিক্কন্তং, ভন্তে, অভিক্কন্তং, ভন্তে…পে॰… উপাসকং মং, ভন্তে, ভগৰা ধারেতু অজ্জতগ্গে পাণুপেতং সরণং গত’’ন্তি। পঞ্চমং।
‘‘Abhikkantaṃ, bhante, abhikkantaṃ, bhante…pe… upāsakaṃ maṃ, bhante, bhagavā dhāretu ajjatagge pāṇupetaṃ saraṇaṃ gata’’nti. Pañcamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৫-৬. সন্দিট্ঠিকসুত্তদ্ৰযৰণ্ণনা • 5-6. Sandiṭṭhikasuttadvayavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৩-৬. ইণসুত্তাদিৰণ্ণনা • 3-6. Iṇasuttādivaṇṇanā
