| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༥. པཋམསནྡིཊྛིཀསུཏྟཾ
5. Paṭhamasandiṭṭhikasuttaṃ
༤༧. ཨཐ ཁོ མོལི༹ཡསཱིཝཀོ 1 པརིབྦཱཛཀོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝཏཱ སདྡྷིཾ སམྨོདི། སམྨོདནཱིཡཾ ཀཐཾ སཱརཎཱིཡཾ ཝཱིཏིསཱརེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ མོལི༹ཡསཱིཝཀོ པརིབྦཱཛཀོ བྷགཝནྟཾ ཨེཏདཝོཙ – ‘‘‘སནྡིཊྛིཀོ དྷམྨོ, སནྡིཊྛིཀོ དྷམྨོ’ཏི, བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ, སནྡིཊྛིཀོ དྷམྨོ ཧོཏི ཨཀཱལིཀོ ཨེཧིཔསྶིཀོ ཨོཔནེཡྻིཀོ པཙྩཏྟཾ ཝེདིཏབྦོ ཝིཉྙཱུཧཱི’’ཏི?
47. Atha kho moḷiyasīvako 2 paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho moḷiyasīvako paribbājako bhagavantaṃ etadavoca – ‘‘‘sandiṭṭhiko dhammo, sandiṭṭhiko dhammo’ti, bhante, vuccati. Kittāvatā nu kho, bhante, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti?
‘‘ཏེན ཧི, སཱིཝཀ, ཏཉྙེཝེཏྠ པཊིཔུཙྪཱམི། ཡཐཱ ཏེ ཁམེཡྻ ཏཐཱ ནཾ བྱཱཀརེཡྻཱསི། ཏཾ ཀིཾ མཉྙསི, སཱིཝཀ, སནྟཾ ཝཱ ཨཛ྄ཛྷཏྟཾ ལོབྷཾ ‘ཨཏྠི མེ ཨཛ྄ཛྷཏྟཾ ལོབྷོ’ཏི པཛཱནཱསི, ཨསནྟཾ ཝཱ ཨཛ྄ཛྷཏྟཾ ལོབྷཾ ‘ནཏྠི མེ ཨཛ྄ཛྷཏྟཾ ལོབྷོ’ཏི པཛཱནཱསཱི’’ཏི? ‘‘ཨེཝཾ, བྷནྟེ’’། ‘‘ཡཾ ཁོ ཏྭཾ, སཱིཝཀ, སནྟཾ ཝཱ ཨཛ྄ཛྷཏྟཾ ལོབྷཾ ‘ཨཏྠི མེ ཨཛ྄ཛྷཏྟཾ ལོབྷོ’ཏི པཛཱནཱསི, ཨསནྟཾ ཝཱ ཨཛ྄ཛྷཏྟཾ ལོབྷཾ ‘ནཏྠི མེ ཨཛ྄ཛྷཏྟཾ ལོབྷོ’ཏི པཛཱནཱསི – ཨེཝམྤི ཁོ, སཱིཝཀ, སནྡིཊྛིཀོ དྷམྨོ ཧོཏི…པེ॰…།
‘‘Tena hi, sīvaka, taññevettha paṭipucchāmi. Yathā te khameyya tathā naṃ byākareyyāsi. Taṃ kiṃ maññasi, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsi – evampi kho, sīvaka, sandiṭṭhiko dhammo hoti…pe….
‘‘ཏཾ ཀིཾ མཉྙསི, སཱིཝཀ, སནྟཾ ཝཱ ཨཛ྄ཛྷཏྟཾ དོསཾ…པེ॰… སནྟཾ ཝཱ ཨཛ྄ཛྷཏྟཾ མོཧཾ…པེ॰… སནྟཾ ཝཱ ཨཛ྄ཛྷཏྟཾ ལོབྷདྷམྨཾ…པེ॰… སནྟཾ ཝཱ ཨཛ྄ཛྷཏྟཾ དོསདྷམྨཾ…པེ॰… སནྟཾ ཝཱ ཨཛ྄ཛྷཏྟཾ མོཧདྷམྨཾ ‘ཨཏྠི མེ ཨཛ྄ཛྷཏྟཾ མོཧདྷམྨོ’ཏི པཛཱནཱསི, ཨསནྟཾ ཝཱ ཨཛ྄ཛྷཏྟཾ མོཧདྷམྨཾ ‘ནཏྠི མེ ཨཛ྄ཛྷཏྟཾ མོཧདྷམྨོ’ཏི པཛཱནཱསཱི’’ཏི? ‘‘ཨེཝཾ, བྷནྟེ’’། ‘‘ཡཾ ཁོ ཏྭཾ, སཱིཝཀ, སནྟཾ ཝཱ ཨཛ྄ཛྷཏྟཾ མོཧདྷམྨཾ ‘ཨཏྠི མེ ཨཛ྄ཛྷཏྟཾ མོཧདྷམྨོ’ཏི པཛཱནཱསི, ཨསནྟཾ ཝཱ ཨཛ྄ཛྷཏྟཾ མོཧདྷམྨཾ ‘ནཏྠི མེ ཨཛ྄ཛྷཏྟཾ མོཧདྷམྨོ’ཏི པཛཱནཱསི – ཨེཝཾ ཁོ, སཱིཝཀ, སནྡིཊྛིཀོ དྷམྨོ ཧོཏི ཨཀཱལིཀོ ཨེཧིཔསྶིཀོ ཨོཔནེཡྻིཀོ པཙྩཏྟཾ ཝེདིཏབྦོ ཝིཉྙཱུཧཱི’’ཏི།
‘‘Taṃ kiṃ maññasi, sīvaka, santaṃ vā ajjhattaṃ dosaṃ…pe… santaṃ vā ajjhattaṃ mohaṃ…pe… santaṃ vā ajjhattaṃ lobhadhammaṃ…pe… santaṃ vā ajjhattaṃ dosadhammaṃ…pe… santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsi – evaṃ kho, sīvaka, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti.
‘‘ཨབྷིཀྐནྟཾ, བྷནྟེ, ཨབྷིཀྐནྟཾ, བྷནྟེ…པེ॰… ཨུཔཱསཀཾ མཾ, བྷནྟེ, བྷགཝཱ དྷཱརེཏུ ཨཛྫཏགྒེ པཱཎུཔེཏཾ སརཎཾ གཏ’’ནྟི། པཉྩམཾ།
‘‘Abhikkantaṃ, bhante, abhikkantaṃ, bhante…pe… upāsakaṃ maṃ, bhante, bhagavā dhāretu ajjatagge pāṇupetaṃ saraṇaṃ gata’’nti. Pañcamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༥-༦. སནྡིཊྛིཀསུཏྟདྭཡཝཎྞནཱ • 5-6. Sandiṭṭhikasuttadvayavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༣-༦. ཨིཎསུཏྟཱདིཝཎྞནཱ • 3-6. Iṇasuttādivaṇṇanā
