| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൫. പഠമസന്ദിട്ഠികസുത്തം
5. Paṭhamasandiṭṭhikasuttaṃ
൪൭. അഥ ഖോ മോളിയസീവകോ 1 പരിബ്ബാജകോ യേന ഭഗവാ തേനുപസങ്കമി; ഉപസങ്കമിത്വാ ഭഗവതാ സദ്ധിം സമ്മോദി. സമ്മോദനീയം കഥം സാരണീയം വീതിസാരേത്വാ ഏകമന്തം നിസീദി. ഏകമന്തം നിസിന്നോ ഖോ മോളിയസീവകോ പരിബ്ബാജകോ ഭഗവന്തം ഏതദവോച – ‘‘‘സന്ദിട്ഠികോ ധമ്മോ, സന്ദിട്ഠികോ ധമ്മോ’തി, ഭന്തേ, വുച്ചതി. കിത്താവതാ നു ഖോ, ഭന്തേ, സന്ദിട്ഠികോ ധമ്മോ ഹോതി അകാലികോ ഏഹിപസ്സികോ ഓപനേയ്യികോ പച്ചത്തം വേദിതബ്ബോ വിഞ്ഞൂഹീ’’തി?
47. Atha kho moḷiyasīvako 2 paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho moḷiyasīvako paribbājako bhagavantaṃ etadavoca – ‘‘‘sandiṭṭhiko dhammo, sandiṭṭhiko dhammo’ti, bhante, vuccati. Kittāvatā nu kho, bhante, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti?
‘‘തേന ഹി, സീവക, തഞ്ഞേവേത്ഥ പടിപുച്ഛാമി. യഥാ തേ ഖമേയ്യ തഥാ നം ബ്യാകരേയ്യാസി. തം കിം മഞ്ഞസി, സീവക, സന്തം വാ അജ്ഝത്തം ലോഭം ‘അത്ഥി മേ അജ്ഝത്തം ലോഭോ’തി പജാനാസി, അസന്തം വാ അജ്ഝത്തം ലോഭം ‘നത്ഥി മേ അജ്ഝത്തം ലോഭോ’തി പജാനാസീ’’തി? ‘‘ഏവം, ഭന്തേ’’. ‘‘യം ഖോ ത്വം, സീവക, സന്തം വാ അജ്ഝത്തം ലോഭം ‘അത്ഥി മേ അജ്ഝത്തം ലോഭോ’തി പജാനാസി, അസന്തം വാ അജ്ഝത്തം ലോഭം ‘നത്ഥി മേ അജ്ഝത്തം ലോഭോ’തി പജാനാസി – ഏവമ്പി ഖോ, സീവക, സന്ദിട്ഠികോ ധമ്മോ ഹോതി…പേ॰….
‘‘Tena hi, sīvaka, taññevettha paṭipucchāmi. Yathā te khameyya tathā naṃ byākareyyāsi. Taṃ kiṃ maññasi, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsi – evampi kho, sīvaka, sandiṭṭhiko dhammo hoti…pe….
‘‘തം കിം മഞ്ഞസി, സീവക, സന്തം വാ അജ്ഝത്തം ദോസം…പേ॰… സന്തം വാ അജ്ഝത്തം മോഹം…പേ॰… സന്തം വാ അജ്ഝത്തം ലോഭധമ്മം…പേ॰… സന്തം വാ അജ്ഝത്തം ദോസധമ്മം…പേ॰… സന്തം വാ അജ്ഝത്തം മോഹധമ്മം ‘അത്ഥി മേ അജ്ഝത്തം മോഹധമ്മോ’തി പജാനാസി, അസന്തം വാ അജ്ഝത്തം മോഹധമ്മം ‘നത്ഥി മേ അജ്ഝത്തം മോഹധമ്മോ’തി പജാനാസീ’’തി? ‘‘ഏവം, ഭന്തേ’’. ‘‘യം ഖോ ത്വം, സീവക, സന്തം വാ അജ്ഝത്തം മോഹധമ്മം ‘അത്ഥി മേ അജ്ഝത്തം മോഹധമ്മോ’തി പജാനാസി, അസന്തം വാ അജ്ഝത്തം മോഹധമ്മം ‘നത്ഥി മേ അജ്ഝത്തം മോഹധമ്മോ’തി പജാനാസി – ഏവം ഖോ, സീവക, സന്ദിട്ഠികോ ധമ്മോ ഹോതി അകാലികോ ഏഹിപസ്സികോ ഓപനേയ്യികോ പച്ചത്തം വേദിതബ്ബോ വിഞ്ഞൂഹീ’’തി.
‘‘Taṃ kiṃ maññasi, sīvaka, santaṃ vā ajjhattaṃ dosaṃ…pe… santaṃ vā ajjhattaṃ mohaṃ…pe… santaṃ vā ajjhattaṃ lobhadhammaṃ…pe… santaṃ vā ajjhattaṃ dosadhammaṃ…pe… santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsi – evaṃ kho, sīvaka, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti.
‘‘അഭിക്കന്തം, ഭന്തേ, അഭിക്കന്തം, ഭന്തേ…പേ॰… ഉപാസകം മം, ഭന്തേ, ഭഗവാ ധാരേതു അജ്ജതഗ്ഗേ പാണുപേതം സരണം ഗത’’ന്തി. പഞ്ചമം.
‘‘Abhikkantaṃ, bhante, abhikkantaṃ, bhante…pe… upāsakaṃ maṃ, bhante, bhagavā dhāretu ajjatagge pāṇupetaṃ saraṇaṃ gata’’nti. Pañcamaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൫-൬. സന്ദിട്ഠികസുത്തദ്വയവണ്ണനാ • 5-6. Sandiṭṭhikasuttadvayavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൩-൬. ഇണസുത്താദിവണ്ണനാ • 3-6. Iṇasuttādivaṇṇanā
