| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. পঠমসঙ্গামসুত্তং
4. Paṭhamasaṅgāmasuttaṃ
১২৫. সাৰত্থিনিদানং। অথ খো রাজা মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা রাজানং পসেনদিং কোসলং অব্ভুয্যাসি যেন কাসি। অস্সোসি খো রাজা পসেনদি কোসলো – ‘‘রাজা কির মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা মমং অব্ভুয্যাতো যেন কাসী’’তি। অথ খো রাজা পসেনদি কোসলো চতুরঙ্গিনিং সেনং সন্নয্হিত্ৰা রাজানং মাগধং অজাতসত্তুং ৰেদেহিপুত্তং পচ্চুয্যাসি যেন কাসি। অথ খো রাজা চ মাগধো অজাতসত্তু ৰেদেহিপুত্তো রাজা চ পসেনদি কোসলো সঙ্গামেসুং। তস্মিং খো পন সঙ্গামে রাজা মাগধো অজাতসত্তু ৰেদেহিপুত্তো রাজানং পসেনদিং কোসলং পরাজেসি। পরাজিতো চ রাজা পসেনদি কোসলো সকমেৰ 1 রাজধানিং সাৰত্থিং পচ্চুয্যাসি 2।
125. Sāvatthinidānaṃ. Atha kho rājā māgadho ajātasattu vedehiputto caturaṅginiṃ senaṃ sannayhitvā rājānaṃ pasenadiṃ kosalaṃ abbhuyyāsi yena kāsi. Assosi kho rājā pasenadi kosalo – ‘‘rājā kira māgadho ajātasattu vedehiputto caturaṅginiṃ senaṃ sannayhitvā mamaṃ abbhuyyāto yena kāsī’’ti. Atha kho rājā pasenadi kosalo caturaṅginiṃ senaṃ sannayhitvā rājānaṃ māgadhaṃ ajātasattuṃ vedehiputtaṃ paccuyyāsi yena kāsi. Atha kho rājā ca māgadho ajātasattu vedehiputto rājā ca pasenadi kosalo saṅgāmesuṃ. Tasmiṃ kho pana saṅgāme rājā māgadho ajātasattu vedehiputto rājānaṃ pasenadiṃ kosalaṃ parājesi. Parājito ca rājā pasenadi kosalo sakameva 3 rājadhāniṃ sāvatthiṃ paccuyyāsi 4.
অথ খো সম্বহুলা ভিক্খূ পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পৰিসিংসু। সাৰত্থিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ভিক্খূ ভগৰন্তং এতদৰোচুং –
Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisiṃsu. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ –
‘‘ইধ, ভন্তে, রাজা মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা রাজানং পসেনদিং কোসলং অব্ভুয্যাসি যেন কাসি। অস্সোসি খো, ভন্তে, রাজা পসেনদি কোসলো – ‘রাজা কির মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা মমং অব্ভুয্যাতো যেন কাসী’তি। অথ খো, ভন্তে, রাজা পসেনদি কোসলো চতুরঙ্গিনিং সেনং সন্নয্হিত্ৰা রাজানং মাগধং অজাতসত্তুং ৰেদেহিপুত্তং পচ্চুয্যাসি যেন কাসি। অথ খো, ভন্তে, রাজা চ মাগধো অজাতসত্তু ৰেদেহিপুত্তো রাজা চ পসেনদি কোসলো সঙ্গামেসুং। তস্মিং খো পন, ভন্তে, সঙ্গামে রাজা মাগধো অজাতসত্তু ৰেদেহিপুত্তো রাজানং পসেনদিং কোসলং পরাজেসি। পরাজিতো চ, ভন্তে, রাজা পসেনদি কোসলো সকমেৰ রাজধানিং সাৰত্থিং পচ্চুয্যাসী’’তি।
‘‘Idha, bhante, rājā māgadho ajātasattu vedehiputto caturaṅginiṃ senaṃ sannayhitvā rājānaṃ pasenadiṃ kosalaṃ abbhuyyāsi yena kāsi. Assosi kho, bhante, rājā pasenadi kosalo – ‘rājā kira māgadho ajātasattu vedehiputto caturaṅginiṃ senaṃ sannayhitvā mamaṃ abbhuyyāto yena kāsī’ti. Atha kho, bhante, rājā pasenadi kosalo caturaṅginiṃ senaṃ sannayhitvā rājānaṃ māgadhaṃ ajātasattuṃ vedehiputtaṃ paccuyyāsi yena kāsi. Atha kho, bhante, rājā ca māgadho ajātasattu vedehiputto rājā ca pasenadi kosalo saṅgāmesuṃ. Tasmiṃ kho pana, bhante, saṅgāme rājā māgadho ajātasattu vedehiputto rājānaṃ pasenadiṃ kosalaṃ parājesi. Parājito ca, bhante, rājā pasenadi kosalo sakameva rājadhāniṃ sāvatthiṃ paccuyyāsī’’ti.
‘‘রাজা, ভিক্খৰে, মাগধো অজাতসত্তু ৰেদেহিপুত্তো পাপমিত্তো পাপসহাযো পাপসম্পৰঙ্কো; রাজা চ খো, ভিক্খৰে, পসেনদি কোসলো কল্যাণমিত্তো কল্যাণসহাযো কল্যাণসম্পৰঙ্কো। অজ্জেৰ 5, ভিক্খৰে , রাজা পসেনদি কোসলো ইমং রত্তিং দুক্খং সেতি পরাজিতো’’তি। ইদমৰোচ…পে॰…
‘‘Rājā, bhikkhave, māgadho ajātasattu vedehiputto pāpamitto pāpasahāyo pāpasampavaṅko; rājā ca kho, bhikkhave, pasenadi kosalo kalyāṇamitto kalyāṇasahāyo kalyāṇasampavaṅko. Ajjeva 6, bhikkhave , rājā pasenadi kosalo imaṃ rattiṃ dukkhaṃ seti parājito’’ti. Idamavoca…pe…
‘‘জযং ৰেরং পসৰতি, দুক্খং সেতি পরাজিতো।
‘‘Jayaṃ veraṃ pasavati, dukkhaṃ seti parājito;
উপসন্তো সুখং সেতি, হিত্ৰা জযপরাজয’’ন্তি॥
Upasanto sukhaṃ seti, hitvā jayaparājaya’’nti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. পঠমসঙ্গামসুত্তৰণ্ণনা • 4. Paṭhamasaṅgāmasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. পঠমসঙ্গামসুত্তৰণ্ণনা • 4. Paṭhamasaṅgāmasuttavaṇṇanā
