| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౪. పఠమసఙ్గామసుత్తం
4. Paṭhamasaṅgāmasuttaṃ
౧౨౫. సావత్థినిదానం. అథ ఖో రాజా మాగధో అజాతసత్తు వేదేహిపుత్తో చతురఙ్గినిం సేనం సన్నయ్హిత్వా రాజానం పసేనదిం కోసలం అబ్భుయ్యాసి యేన కాసి. అస్సోసి ఖో రాజా పసేనది కోసలో – ‘‘రాజా కిర మాగధో అజాతసత్తు వేదేహిపుత్తో చతురఙ్గినిం సేనం సన్నయ్హిత్వా మమం అబ్భుయ్యాతో యేన కాసీ’’తి. అథ ఖో రాజా పసేనది కోసలో చతురఙ్గినిం సేనం సన్నయ్హిత్వా రాజానం మాగధం అజాతసత్తుం వేదేహిపుత్తం పచ్చుయ్యాసి యేన కాసి. అథ ఖో రాజా చ మాగధో అజాతసత్తు వేదేహిపుత్తో రాజా చ పసేనది కోసలో సఙ్గామేసుం. తస్మిం ఖో పన సఙ్గామే రాజా మాగధో అజాతసత్తు వేదేహిపుత్తో రాజానం పసేనదిం కోసలం పరాజేసి. పరాజితో చ రాజా పసేనది కోసలో సకమేవ 1 రాజధానిం సావత్థిం పచ్చుయ్యాసి 2.
125. Sāvatthinidānaṃ. Atha kho rājā māgadho ajātasattu vedehiputto caturaṅginiṃ senaṃ sannayhitvā rājānaṃ pasenadiṃ kosalaṃ abbhuyyāsi yena kāsi. Assosi kho rājā pasenadi kosalo – ‘‘rājā kira māgadho ajātasattu vedehiputto caturaṅginiṃ senaṃ sannayhitvā mamaṃ abbhuyyāto yena kāsī’’ti. Atha kho rājā pasenadi kosalo caturaṅginiṃ senaṃ sannayhitvā rājānaṃ māgadhaṃ ajātasattuṃ vedehiputtaṃ paccuyyāsi yena kāsi. Atha kho rājā ca māgadho ajātasattu vedehiputto rājā ca pasenadi kosalo saṅgāmesuṃ. Tasmiṃ kho pana saṅgāme rājā māgadho ajātasattu vedehiputto rājānaṃ pasenadiṃ kosalaṃ parājesi. Parājito ca rājā pasenadi kosalo sakameva 3 rājadhāniṃ sāvatthiṃ paccuyyāsi 4.
అథ ఖో సమ్బహులా భిక్ఖూ పుబ్బణ్హసమయం నివాసేత్వా పత్తచీవరమాదాయ సావత్థిం పిణ్డాయ పవిసింసు. సావత్థియం పిణ్డాయ చరిత్వా పచ్ఛాభత్తం పిణ్డపాతపటిక్కన్తా యేన భగవా తేనుపసఙ్కమింసు; ఉపసఙ్కమిత్వా భగవన్తం అభివాదేత్వా ఏకమన్తం నిసీదింసు. ఏకమన్తం నిసిన్నా ఖో తే భిక్ఖూ భగవన్తం ఏతదవోచుం –
Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisiṃsu. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ –
‘‘ఇధ, భన్తే, రాజా మాగధో అజాతసత్తు వేదేహిపుత్తో చతురఙ్గినిం సేనం సన్నయ్హిత్వా రాజానం పసేనదిం కోసలం అబ్భుయ్యాసి యేన కాసి. అస్సోసి ఖో, భన్తే, రాజా పసేనది కోసలో – ‘రాజా కిర మాగధో అజాతసత్తు వేదేహిపుత్తో చతురఙ్గినిం సేనం సన్నయ్హిత్వా మమం అబ్భుయ్యాతో యేన కాసీ’తి. అథ ఖో, భన్తే, రాజా పసేనది కోసలో చతురఙ్గినిం సేనం సన్నయ్హిత్వా రాజానం మాగధం అజాతసత్తుం వేదేహిపుత్తం పచ్చుయ్యాసి యేన కాసి. అథ ఖో, భన్తే, రాజా చ మాగధో అజాతసత్తు వేదేహిపుత్తో రాజా చ పసేనది కోసలో సఙ్గామేసుం. తస్మిం ఖో పన, భన్తే, సఙ్గామే రాజా మాగధో అజాతసత్తు వేదేహిపుత్తో రాజానం పసేనదిం కోసలం పరాజేసి. పరాజితో చ, భన్తే, రాజా పసేనది కోసలో సకమేవ రాజధానిం సావత్థిం పచ్చుయ్యాసీ’’తి.
‘‘Idha, bhante, rājā māgadho ajātasattu vedehiputto caturaṅginiṃ senaṃ sannayhitvā rājānaṃ pasenadiṃ kosalaṃ abbhuyyāsi yena kāsi. Assosi kho, bhante, rājā pasenadi kosalo – ‘rājā kira māgadho ajātasattu vedehiputto caturaṅginiṃ senaṃ sannayhitvā mamaṃ abbhuyyāto yena kāsī’ti. Atha kho, bhante, rājā pasenadi kosalo caturaṅginiṃ senaṃ sannayhitvā rājānaṃ māgadhaṃ ajātasattuṃ vedehiputtaṃ paccuyyāsi yena kāsi. Atha kho, bhante, rājā ca māgadho ajātasattu vedehiputto rājā ca pasenadi kosalo saṅgāmesuṃ. Tasmiṃ kho pana, bhante, saṅgāme rājā māgadho ajātasattu vedehiputto rājānaṃ pasenadiṃ kosalaṃ parājesi. Parājito ca, bhante, rājā pasenadi kosalo sakameva rājadhāniṃ sāvatthiṃ paccuyyāsī’’ti.
‘‘రాజా, భిక్ఖవే, మాగధో అజాతసత్తు వేదేహిపుత్తో పాపమిత్తో పాపసహాయో పాపసమ్పవఙ్కో; రాజా చ ఖో, భిక్ఖవే, పసేనది కోసలో కల్యాణమిత్తో కల్యాణసహాయో కల్యాణసమ్పవఙ్కో. అజ్జేవ 5, భిక్ఖవే , రాజా పసేనది కోసలో ఇమం రత్తిం దుక్ఖం సేతి పరాజితో’’తి. ఇదమవోచ…పే॰…
‘‘Rājā, bhikkhave, māgadho ajātasattu vedehiputto pāpamitto pāpasahāyo pāpasampavaṅko; rājā ca kho, bhikkhave, pasenadi kosalo kalyāṇamitto kalyāṇasahāyo kalyāṇasampavaṅko. Ajjeva 6, bhikkhave , rājā pasenadi kosalo imaṃ rattiṃ dukkhaṃ seti parājito’’ti. Idamavoca…pe…
‘‘జయం వేరం పసవతి, దుక్ఖం సేతి పరాజితో;
‘‘Jayaṃ veraṃ pasavati, dukkhaṃ seti parājito;
ఉపసన్తో సుఖం సేతి, హిత్వా జయపరాజయ’’న్తి.
Upasanto sukhaṃ seti, hitvā jayaparājaya’’nti.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౪. పఠమసఙ్గామసుత్తవణ్ణనా • 4. Paṭhamasaṅgāmasuttavaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౪. పఠమసఙ్గామసుత్తవణ్ణనా • 4. Paṭhamasaṅgāmasuttavaṇṇanā
