| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. பட²மஸங்கா³மஸுத்தவண்ணனா
4. Paṭhamasaṅgāmasuttavaṇṇanā
125. சதுத்தே² வேதே³ஹிபுத்தோதி வேதே³ஹீதி பண்டி³தாதி⁴வசனமேதங், பண்டி³தித்தி²யா புத்தோதி அத்தோ². சதுரங்கி³னிந்தி ஹத்தி²அஸ்ஸரத²பத்திஸங்கா²தேஹி சதூஹி அங்கே³ஹி ஸமன்னாக³தங். ஸன்னய்ஹித்வாதி சம்மபடிமுஞ்சனாதீ³ஹி ஸன்னாஹங் காரெத்வா. ஸங்கா³மேஸுந்தி யுஜ்ஜி²ங்ஸு. கேன காரணேன? மஹாகோஸலரஞ்ஞா கிர பி³ம்பி³ஸாரஸ்ஸ தீ⁴தரங் தெ³ந்தேன த்³வின்னங் ரஜ்ஜானங் அந்தரே ஸதஸஹஸ்ஸுட்டா²னோ காஸிகா³மோ நாம தீ⁴து தி³ன்னோ. அஜாதஸத்துனா ச பிதரி மாரிதே மாதாபிஸ்ஸ ரஞ்ஞோ வியோக³ஸோகேன நசிரஸ்ஸேவ மதா. ததோ ராஜா பஸேனதி³ கோஸலோ – ‘‘அஜாதஸத்துனா மாதாபிதரோ மாரிதா, மய்ஹங் பிது ஸந்தகோ கா³மோ’’தி தஸ்ஸத்தா²ய அட்³ட³ங் கரோதி. அஜாதஸத்துபி ‘‘மய்ஹங் மாது ஸந்தகோ’’தி தஸ்ஸ கா³மஸ்ஸத்தா²ய த்³வேபி மாதுலபா⁴கி³னெய்யா யுஜ்ஜி²ங்ஸு.
125. Catutthe vedehiputtoti vedehīti paṇḍitādhivacanametaṃ, paṇḍititthiyā puttoti attho. Caturaṅgininti hatthiassarathapattisaṅkhātehi catūhi aṅgehi samannāgataṃ. Sannayhitvāti cammapaṭimuñcanādīhi sannāhaṃ kāretvā. Saṅgāmesunti yujjhiṃsu. Kena kāraṇena? Mahākosalaraññā kira bimbisārassa dhītaraṃ dentena dvinnaṃ rajjānaṃ antare satasahassuṭṭhāno kāsigāmo nāma dhītu dinno. Ajātasattunā ca pitari mārite mātāpissa rañño viyogasokena nacirasseva matā. Tato rājā pasenadi kosalo – ‘‘ajātasattunā mātāpitaro māritā, mayhaṃ pitu santako gāmo’’ti tassatthāya aḍḍaṃ karoti. Ajātasattupi ‘‘mayhaṃ mātu santako’’ti tassa gāmassatthāya dvepi mātulabhāgineyyā yujjhiṃsu.
பாபா தே³வத³த்தாத³யோ மித்தா அஸ்ஸாதி பாபமித்தோ. தேயேவஸ்ஸ ஸஹாயாதி பாபஸஹாயோ. தெஸ்வேவஸ்ஸ சித்தங் நின்னங் ஸம்பவங்கந்தி பாபஸம்பவங்கோ. பஸேனதி³ஸ்ஸ ஸாரிபுத்தத்தே²ராதீ³னங் வஸேன கல்யாணமித்தாதி³தா வேதி³தப்³பா³. து³க்க²ங் ஸேதீதி ஜிதானி ஹத்தி²ஆதீ³னி அனுஸோசந்தோ து³க்க²ங் ஸயிஸ்ஸதி. இத³ங் ப⁴க³வா புன தஸ்ஸ ஜயகாரணங் தி³ஸ்வா ஆஹ. ஜயங் வேரங் பஸவதீதி ஜினந்தோ வேரங் பஸவதி, வேரிபுக்³க³லங் லப⁴தி. சதுத்த²ங்.
Pāpā devadattādayo mittā assāti pāpamitto. Teyevassa sahāyāti pāpasahāyo. Tesvevassa cittaṃ ninnaṃ sampavaṅkanti pāpasampavaṅko. Pasenadissa sāriputtattherādīnaṃ vasena kalyāṇamittāditā veditabbā. Dukkhaṃ setīti jitāni hatthiādīni anusocanto dukkhaṃ sayissati. Idaṃ bhagavā puna tassa jayakāraṇaṃ disvā āha. Jayaṃ veraṃ pasavatīti jinanto veraṃ pasavati, veripuggalaṃ labhati. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. பட²மஸங்கா³மஸுத்தங் • 4. Paṭhamasaṅgāmasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. பட²மஸங்கா³மஸுத்தவண்ணனா • 4. Paṭhamasaṅgāmasuttavaṇṇanā
