Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā)

    ၄. ပဌမသင္ဂာမသုတ္တဝဏ္ဏနာ

    4. Paṭhamasaṅgāmasuttavaṇṇanā

    ၁၂၅. စတုတ္ထေ ဝေဒေဟိပုတ္တောတိ ဝေဒေဟီတိ ပဏ္ဍိတာဓိဝစနမေတံ, ပဏ္ဍိတိတ္ထိယာ ပုတ္တောတိ အတ္ထော။ စတုရင္ဂိနိန္တိ ဟတ္ထိအသ္သရထပတ္တိသင္ခာတေဟိ စတူဟိ အင္ဂေဟိ သမန္နာဂတံ။ သန္နယ္ဟိတ္ဝာတိ စမ္မပဋိမုဉ္စနာဒီဟိ သန္နာဟံ ကာရေတ္ဝာ။ သင္ဂာမေသုန္တိ ယုဇ္ဈိံသု။ ကေန ကာရဏေန? မဟာကောသလရညာ ကိရ ဗိမ္ဗိသာရသ္သ ဓီတရံ ဒေန္တေန ဒ္ဝိန္နံ ရဇ္ဇာနံ အန္တရေ သတသဟသ္သုဋ္ဌာနော ကာသိဂာမော နာမ ဓီတု ဒိန္နော။ အဇာတသတ္တုနာ စ ပိတရိ မာရိတေ မာတာပိသ္သ ရညော ဝိယောဂသောကေန နစိရသ္သေဝ မတာ။ တတော ရာဇာ ပသေနဒိ ကောသလော – ‘‘အဇာတသတ္တုနာ မာတာပိတရော မာရိတာ, မယ္ဟံ ပိတု သန္တကော ဂာမော’’တိ တသ္သတ္ထာယ အဍ္ဍံ ကရောတိ။ အဇာတသတ္တုပိ ‘‘မယ္ဟံ မာတု သန္တကော’’တိ တသ္သ ဂာမသ္သတ္ထာယ ဒ္ဝေပိ မာတုလဘာဂိနေယ္ယာ ယုဇ္ဈိံသု။

    125. Catutthe vedehiputtoti vedehīti paṇḍitādhivacanametaṃ, paṇḍititthiyā puttoti attho. Caturaṅgininti hatthiassarathapattisaṅkhātehi catūhi aṅgehi samannāgataṃ. Sannayhitvāti cammapaṭimuñcanādīhi sannāhaṃ kāretvā. Saṅgāmesunti yujjhiṃsu. Kena kāraṇena? Mahākosalaraññā kira bimbisārassa dhītaraṃ dentena dvinnaṃ rajjānaṃ antare satasahassuṭṭhāno kāsigāmo nāma dhītu dinno. Ajātasattunā ca pitari mārite mātāpissa rañño viyogasokena nacirasseva matā. Tato rājā pasenadi kosalo – ‘‘ajātasattunā mātāpitaro māritā, mayhaṃ pitu santako gāmo’’ti tassatthāya aḍḍaṃ karoti. Ajātasattupi ‘‘mayhaṃ mātu santako’’ti tassa gāmassatthāya dvepi mātulabhāgineyyā yujjhiṃsu.

    ပာပာ ဒေဝဒတ္တာဒယော မိတ္တာ အသ္သာတိ ပာပမိတ္တော။ တေယေဝသ္သ သဟာယာတိ ပာပသဟာယော။ တေသ္ဝေဝသ္သ စိတ္တံ နိန္နံ သမ္ပဝင္ကန္တိ ပာပသမ္ပဝင္ကော။ ပသေနဒိသ္သ သာရိပုတ္တတ္ထေရာဒီနံ ဝသေန ကလ္ယာဏမိတ္တာဒိတာ ဝေဒိတဗ္ဗာ။ ဒုက္ခံ သေတီတိ ဇိတာနိ ဟတ္ထိအာဒီနိ အနုသောစန္တော ဒုက္ခံ သယိသ္သတိ။ ဣဒံ ဘဂဝာ ပုန တသ္သ ဇယကာရဏံ ဒိသ္ဝာ အာဟ။ ဇယံ ဝေရံ ပသဝတီတိ ဇိနန္တော ဝေရံ ပသဝတိ, ဝေရိပုဂ္ဂလံ လဘတိ။ စတုတ္ထံ။

    Pāpā devadattādayo mittā assāti pāpamitto. Teyevassa sahāyāti pāpasahāyo. Tesvevassa cittaṃ ninnaṃ sampavaṅkanti pāpasampavaṅko. Pasenadissa sāriputtattherādīnaṃ vasena kalyāṇamittāditā veditabbā. Dukkhaṃ setīti jitāni hatthiādīni anusocanto dukkhaṃ sayissati. Idaṃ bhagavā puna tassa jayakāraṇaṃ disvā āha. Jayaṃ veraṃ pasavatīti jinanto veraṃ pasavati, veripuggalaṃ labhati. Catutthaṃ.







    Related texts:



    တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ပဌမသင္ဂာမသုတ္တံ • 4. Paṭhamasaṅgāmasuttaṃ

    ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄. ပဌမသင္ဂာမသုတ္တဝဏ္ဏနာ • 4. Paṭhamasaṅgāmasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact