| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
10. பட²மஸங்க⁴பே⁴த³ஸிக்கா²பத³வண்ணனா
10. Paṭhamasaṅghabhedasikkhāpadavaṇṇanā
409. தேன ஸமயேன பு³த்³தோ⁴ ப⁴க³வாதி ஸங்க⁴பே⁴த³ஸிக்கா²பத³ங். தத்த² அத² கோ² தே³வத³த்தோதிஆதீ³ஸு யோ ச தே³வத³த்தோ, யதா² ச பப்³ப³ஜிதோ, யேன ச காரணேன கோகாலிகாத³யோ உபஸங்கமித்வா ‘‘ஏத² மயங் ஆவுஸோ ஸமணஸ்ஸ கோ³தமஸ்ஸ ஸங்க⁴பே⁴த³ங் கரிஸ்ஸாம சக்கபே⁴த³’’ந்தி ஆஹ. தங் ஸப்³ப³ங் ஸங்க⁴பே⁴த³க்க²ந்த⁴கே (சூளவ॰ 343) ஆக³தமேவ. பஞ்சவத்து²யாசனா பன கிஞ்சாபி தத்தே²வ ஆக³மிஸ்ஸதி. அத² கோ² இதா⁴பி ஆக³தத்தா யதெ³த்த² வத்தப்³ப³ங், தங் வத்வாவ க³மிஸ்ஸாம.
409.Tenasamayena buddho bhagavāti saṅghabhedasikkhāpadaṃ. Tattha atha kho devadattotiādīsu yo ca devadatto, yathā ca pabbajito, yena ca kāraṇena kokālikādayo upasaṅkamitvā ‘‘etha mayaṃ āvuso samaṇassa gotamassa saṅghabhedaṃ karissāma cakkabheda’’nti āha. Taṃ sabbaṃ saṅghabhedakkhandhake (cūḷava. 343) āgatameva. Pañcavatthuyācanā pana kiñcāpi tattheva āgamissati. Atha kho idhāpi āgatattā yadettha vattabbaṃ, taṃ vatvāva gamissāma.
ஸாது⁴ ப⁴ந்தேதி ஆயாசனா. பி⁴க்கூ² யாவஜீவங் ஆரஞ்ஞிகா அஸ்ஸூதி ஆரஞ்ஞிகது⁴தங்க³ங் ஸமாதா³ய ஸப்³பே³பி பி⁴க்கூ² யாவ ஜீவந்தி தாவ ஆரஞ்ஞிகா ஹொந்து , அரஞ்ஞேயேவ வஸந்து. யோ கா³மந்தங் ஓஸரெய்ய வஜ்ஜங் நங் பு²ஸெய்யாதி யோ ஏகபி⁴க்கு²பி அரஞ்ஞங் பஹாய நிவாஸத்தா²ய கா³மந்தங் ஓஸரெய்ய, வஜ்ஜங் தங் பு²ஸெய்ய நங் பி⁴க்கு²ங் தோ³ஸோ பு²ஸது, ஆபத்தியா நங் ப⁴க³வா காரேதூ’’தி அதி⁴ப்பாயேன வத³தி. ஏஸ நயோ ஸேஸவத்தூ²ஸுபி.
Sādhu bhanteti āyācanā. Bhikkhū yāvajīvaṃ āraññikā assūti āraññikadhutaṅgaṃ samādāya sabbepi bhikkhū yāva jīvanti tāva āraññikā hontu , araññeyeva vasantu. Yo gāmantaṃ osareyya vajjaṃ naṃ phuseyyāti yo ekabhikkhupi araññaṃ pahāya nivāsatthāya gāmantaṃ osareyya, vajjaṃ taṃ phuseyya naṃ bhikkhuṃ doso phusatu, āpattiyā naṃ bhagavā kāretū’’ti adhippāyena vadati. Esa nayo sesavatthūsupi.
410. ஜனங் ஸஞ்ஞாபெஸ்ஸாமாதி ஜனங் அம்ஹாகங் அப்பிச்ச²தாதி³பா⁴வங் ஜானாபெஸ்ஸாம, அத² வா பரிதோஸெஸ்ஸாம பஸாதெ³ஸ்ஸாமாதி வுத்தங் ஹோதி.
410.Janaṃ saññāpessāmāti janaṃ amhākaṃ appicchatādibhāvaṃ jānāpessāma, atha vā paritosessāma pasādessāmāti vuttaṃ hoti.
இமானி பன பஞ்ச வத்தூ²னி யாசதோ தே³வத³த்தஸ்ஸ வசனங் ஸுத்வாவ அஞ்ஞாஸி ப⁴க³வா ‘‘ஸங்க⁴பே⁴த³த்தி²கோ ஹுத்வா அயங் யாசதீ’’தி. யஸ்மா பன தானி அனுஜானியமானானி ப³ஹூனங் குலபுத்தானங் மக்³க³ந்தராயாய ஸங்வத்தந்தி, தஸ்மா ப⁴க³வா ‘‘அலங் தே³வத³த்தா’’தி படிக்கி²பித்வா ‘‘யோ இச்ச²தி ஆரஞ்ஞிகோ ஹோதூ’’திஆதி³மாஹ.
Imāni pana pañca vatthūni yācato devadattassa vacanaṃ sutvāva aññāsi bhagavā ‘‘saṅghabhedatthiko hutvā ayaṃ yācatī’’ti. Yasmā pana tāni anujāniyamānāni bahūnaṃ kulaputtānaṃ maggantarāyāya saṃvattanti, tasmā bhagavā ‘‘alaṃ devadattā’’ti paṭikkhipitvā ‘‘yo icchati āraññiko hotū’’tiādimāha.
எத்த² பன ப⁴க³வதோ அதி⁴ப்பாயங் விதி³த்வா குலபுத்தேன அத்தனோ பதிரூபங் வேதி³தப்³ப³ங். அயஞ்ஹெத்த² ப⁴க³வதோ அதி⁴ப்பாயோ – ‘‘ஏகோ பி⁴க்கு² மஹஜ்ஜா²ஸயோ ஹோதி மஹுஸ்ஸாஹோ, ஸக்கோதி கா³மந்தஸேனாஸனங் படிக்கி²பித்வா அரஞ்ஞே விஹரந்தோ து³க்க²ஸ்ஸந்தங் காதுங். ஏகோ து³ப்³ப³லோ ஹோதி அப்பதா²மோ அரஞ்ஞே ந ஸக்கோதி, கா³மந்தேயேவ ஸக்கோதி. ஏகோ மஹப்³ப³லோ ஸமப்பவத்ததா⁴துகோ அதி⁴வாஸனக²ந்திஸம்பன்னோ இட்டா²னிட்டே²ஸு ஸமசித்தோ அரஞ்ஞேபி கா³மந்தேபி ஸக்கோதியேவ. ஏகோ நேவ கா³மந்தே ந அரஞ்ஞே ஸக்கோதி பத³பரமோ ஹோதி.
Ettha pana bhagavato adhippāyaṃ viditvā kulaputtena attano patirūpaṃ veditabbaṃ. Ayañhettha bhagavato adhippāyo – ‘‘eko bhikkhu mahajjhāsayo hoti mahussāho, sakkoti gāmantasenāsanaṃ paṭikkhipitvā araññe viharanto dukkhassantaṃ kātuṃ. Eko dubbalo hoti appathāmo araññe na sakkoti, gāmanteyeva sakkoti. Eko mahabbalo samappavattadhātuko adhivāsanakhantisampanno iṭṭhāniṭṭhesu samacitto araññepi gāmantepi sakkotiyeva. Eko neva gāmante na araññe sakkoti padaparamo hoti.
தத்ர ய்வாயங் மஹஜ்ஜா²ஸயோ ஹோதி மஹுஸ்ஸாஹோ, ஸக்கோதி கா³மந்தஸேனாஸனங் படிக்கி²பித்வா அரஞ்ஞே விஹரந்தோ து³க்க²ஸ்ஸந்தங் காதுங், ஸோ அரஞ்ஞேயேவ வஸது, இத³மஸ்ஸ பதிரூபங். ஸத்³தி⁴விஹாரிகாத³யோபி சஸ்ஸ அனுஸிக்க²மானா அரஞ்ஞே விஹாதப்³ப³மேவ மஞ்ஞிஸ்ஸந்தி.
Tatra yvāyaṃ mahajjhāsayo hoti mahussāho, sakkoti gāmantasenāsanaṃ paṭikkhipitvā araññe viharanto dukkhassantaṃ kātuṃ, so araññeyeva vasatu, idamassa patirūpaṃ. Saddhivihārikādayopi cassa anusikkhamānā araññe vihātabbameva maññissanti.
யோ பன து³ப்³ப³லோ ஹோதி அப்பதா²மோ கா³மந்தேயேவ ஸக்கோதி து³க்க²ஸ்ஸந்தங் காதுங், ந அரஞ்ஞே ஸோ கா³மந்தேயேவ வஸது, ய்வாயங் மஹப்³ப³லோ ஸமப்பவத்ததா⁴துகோ அதி⁴வாஸனக²ந்திஸம்பன்னோ இட்டா²னிட்டே²ஸு ஸமசித்தோ அரஞ்ஞேபி கா³மந்தேபி ஸக்கோதியேவ, அயம்பி கா³மந்தஸேனாஸனங் பஹாய அரஞ்ஞே விஹரது, இத³மஸ்ஸ பதிரூபங் ஸத்³தி⁴விஹாரிகாபி ஹிஸ்ஸ அனுஸிக்க²மானா அரஞ்ஞே விஹாதப்³ப³ங் மஞ்ஞிஸ்ஸந்தி.
Yo pana dubbalo hoti appathāmo gāmanteyeva sakkoti dukkhassantaṃ kātuṃ, na araññe so gāmanteyeva vasatu, yvāyaṃ mahabbalo samappavattadhātuko adhivāsanakhantisampanno iṭṭhāniṭṭhesu samacitto araññepi gāmantepi sakkotiyeva, ayampi gāmantasenāsanaṃ pahāya araññe viharatu, idamassa patirūpaṃ saddhivihārikāpi hissa anusikkhamānā araññe vihātabbaṃ maññissanti.
யோ பனாயங் நேவ கா³மந்தே ந அரஞ்ஞே ஸக்கோதி பத³பரமோ ஹோதி. அயம்பி அரஞ்ஞேயேவ வஸது. அயங் ஹிஸ்ஸ து⁴தங்க³ஸேவனா கம்மட்டா²னபா⁴வனா ச ஆயதிங் மக்³க³ப²லானங் உபனிஸ்ஸயோ ப⁴விஸ்ஸதி. ஸத்³தி⁴விஹாரிகாத³யோ சஸ்ஸ அனுஸிக்க²மானா அரஞ்ஞே விஹாதப்³ப³ங் மஞ்ஞிஸ்ஸந்தீதி.
Yo panāyaṃ neva gāmante na araññe sakkoti padaparamo hoti. Ayampi araññeyeva vasatu. Ayaṃ hissa dhutaṅgasevanā kammaṭṭhānabhāvanā ca āyatiṃ maggaphalānaṃ upanissayo bhavissati. Saddhivihārikādayo cassa anusikkhamānā araññe vihātabbaṃ maññissantīti.
ஏவங் ய்வாயங் து³ப்³ப³லோ ஹோதி அப்பதா²மோ கா³மந்தேயேவ விஹரந்தோ ஸக்கோதி து³க்க²ஸ்ஸந்தங் காதுங் ந அரஞ்ஞே, இமங் புக்³க³லங் ஸந்தா⁴ய ப⁴க³வா ‘‘யோ இச்ச²தி கா³மந்தே விஹரதூ’’தி ஆஹ. இமினா ச புக்³க³லேன அஞ்ஞேஸம்பி த்³வாரங் தி³ன்னங்.
Evaṃ yvāyaṃ dubbalo hoti appathāmo gāmanteyeva viharanto sakkoti dukkhassantaṃ kātuṃ na araññe, imaṃ puggalaṃ sandhāya bhagavā ‘‘yo icchati gāmante viharatū’’ti āha. Iminā ca puggalena aññesampi dvāraṃ dinnaṃ.
யதி³ பன ப⁴க³வா தே³வத³த்தஸ்ஸ வாத³ங் ஸம்படிச்செ²ய்ய, ய்வாயங் புக்³க³லோ பகதியா து³ப்³ப³லோ ஹோதி அப்பதா²மோ, யோபி த³ஹரகாலே அரஞ்ஞவாஸங் அபி⁴ஸம்பு⁴ணித்வா ஜிண்ணகாலே வா வாதபித்தாதீ³ஹி ஸமுப்பன்னதா⁴துக்கோ²ப⁴காலே வா நாபி⁴ஸம்பு⁴ணாதி, கா³மந்தேயேவ பன விஹரந்தோ ஸக்கோதி து³க்க²ஸ்ஸந்தங் காதுங், தேஸங் அரியமக்³கு³பச்சே²தோ³ ப⁴வெய்ய, அரஹத்தப²லாதி⁴க³மோ ந ப⁴வெய்ய, உத்³த⁴ம்மங் உப்³பி³னயங் விலோமங் அனிய்யானிகங் ஸத்து² ஸாஸனங் ப⁴வெய்ய, ஸத்தா² ச தேஸங் அஸப்³ப³ஞ்ஞூ அஸ்ஸ ‘‘ஸகவாத³ங் ச²ட்³டெ³த்வா தே³வத³த்தவாதே³ பதிட்டி²தோ’’தி கா³ரய்ஹோ ச ப⁴வெய்ய. தஸ்மா ப⁴க³வா ஏவரூபே புக்³க³லே ஸங்க³ண்ஹந்தோ தே³வத³த்தஸ்ஸ வாத³ங் படிக்கி²பி. ஏதேனேவூபாயேன பிண்ட³பாதிகவத்து²ஸ்மிம்பி பங்ஸுகூலிகவத்து²ஸ்மிம்பி அட்ட² மாஸே ருக்க²மூலிகவத்து²ஸ்மிம்பி வினிச்ச²யோ வேதி³தப்³போ³. சத்தாரோ பன மாஸே ருக்க²மூலஸேனாஸனங் படிக்கி²த்தமேவ.
Yadi pana bhagavā devadattassa vādaṃ sampaṭiccheyya, yvāyaṃ puggalo pakatiyā dubbalo hoti appathāmo, yopi daharakāle araññavāsaṃ abhisambhuṇitvā jiṇṇakāle vā vātapittādīhi samuppannadhātukkhobhakāle vā nābhisambhuṇāti, gāmanteyeva pana viharanto sakkoti dukkhassantaṃ kātuṃ, tesaṃ ariyamaggupacchedo bhaveyya, arahattaphalādhigamo na bhaveyya, uddhammaṃ ubbinayaṃ vilomaṃ aniyyānikaṃ satthu sāsanaṃ bhaveyya, satthā ca tesaṃ asabbaññū assa ‘‘sakavādaṃ chaḍḍetvā devadattavāde patiṭṭhito’’ti gārayho ca bhaveyya. Tasmā bhagavā evarūpe puggale saṅgaṇhanto devadattassa vādaṃ paṭikkhipi. Etenevūpāyena piṇḍapātikavatthusmimpi paṃsukūlikavatthusmimpi aṭṭha māse rukkhamūlikavatthusmimpi vinicchayo veditabbo. Cattāro pana māse rukkhamūlasenāsanaṃ paṭikkhittameva.
மச்ச²மங்ஸவத்து²ஸ்மிங் திகோடிபரிஸுத்³த⁴ந்தி தீஹி கோடீஹி பரிஸுத்³த⁴ங், தி³ட்டா²தீ³ஹி அபரிஸுத்³தீ⁴ஹி விரஹிதந்தி அத்தோ². தேனேவாஹ – ‘‘அதி³ட்ட²ங், அஸுதங், அபரிஸங்கித’’ந்தி. தத்த² ‘‘அதி³ட்ட²ங்’’ நாம பி⁴க்கூ²னங் அத்தா²ய மிக³மச்சே² வதி⁴த்வா க³ய்ஹமானங் அதி³ட்ட²ங். ‘‘அஸுதங்’’ நாம பி⁴க்கூ²னங் அத்தா²ய மிக³மச்சே² வதி⁴த்வா க³ஹிதந்தி அஸுதங். ‘‘அபரிஸங்கிதங்’’ பன தி³ட்ட²பரிஸங்கிதங் ஸுதபரிஸங்கிதங் தது³ப⁴யவிமுத்தபரிஸங்கிதஞ்ச ஞத்வா தப்³பி³பக்க²தோ ஜானிதப்³ப³ங். கத²ங்? இத⁴ பி⁴க்கூ² பஸ்ஸந்தி மனுஸ்ஸே ஜாலவாகு³ராதி³ஹத்தே² கா³மதோ வ நிக்க²மந்தே அரஞ்ஞே வா விசரந்தே, து³தியதி³வஸே ச நேஸங் தங் கா³மங் பிண்டா³ய பவிட்டா²னங் ஸமச்ச²மங்ஸங் பிண்ட³பாதங் அபி⁴ஹரந்தி. தே தேன தி³ட்டே²ன பரிஸங்கந்தி ‘‘பி⁴க்கூ²னங் நுகோ² அத்தா²ய கத’’ந்தி இத³ங் தி³ட்ட²பரிஸங்கிதங், நாம ஏதங் க³ஹேதுங் ந வட்டதி. யங் ஏவங் அபரிஸங்கிதங் தங் வட்டதி. ஸசே பன தே மனுஸ்ஸா ‘‘கஸ்மா ப⁴ந்தே ந க³ண்ஹதா²’’தி புச்சி²த்வா தமத்த²ங் ஸுத்வா ‘‘நயித³ங் ப⁴ந்தே பி⁴க்கூ²னங் அத்தா²ய கதங், அம்ஹேஹி அத்தனோ அத்தா²ய வா ராஜயுத்தாதீ³னங் அத்தா²ய வா கத’’ந்தி வத³ந்தி கப்பதி.
Macchamaṃsavatthusmiṃ tikoṭiparisuddhanti tīhi koṭīhi parisuddhaṃ, diṭṭhādīhi aparisuddhīhi virahitanti attho. Tenevāha – ‘‘adiṭṭhaṃ, asutaṃ, aparisaṅkita’’nti. Tattha ‘‘adiṭṭhaṃ’’ nāma bhikkhūnaṃ atthāya migamacche vadhitvā gayhamānaṃ adiṭṭhaṃ. ‘‘Asutaṃ’’ nāma bhikkhūnaṃ atthāya migamacche vadhitvā gahitanti asutaṃ. ‘‘Aparisaṅkitaṃ’’ pana diṭṭhaparisaṅkitaṃ sutaparisaṅkitaṃ tadubhayavimuttaparisaṅkitañca ñatvā tabbipakkhato jānitabbaṃ. Kathaṃ? Idha bhikkhū passanti manusse jālavāgurādihatthe gāmato va nikkhamante araññe vā vicarante, dutiyadivase ca nesaṃ taṃ gāmaṃ piṇḍāya paviṭṭhānaṃ samacchamaṃsaṃ piṇḍapātaṃ abhiharanti. Te tena diṭṭhena parisaṅkanti ‘‘bhikkhūnaṃ nukho atthāya kata’’nti idaṃ diṭṭhaparisaṅkitaṃ, nāma etaṃ gahetuṃ na vaṭṭati. Yaṃ evaṃ aparisaṅkitaṃ taṃ vaṭṭati. Sace pana te manussā ‘‘kasmā bhante na gaṇhathā’’ti pucchitvā tamatthaṃ sutvā ‘‘nayidaṃ bhante bhikkhūnaṃ atthāya kataṃ, amhehi attano atthāya vā rājayuttādīnaṃ atthāya vā kata’’nti vadanti kappati.
நஹேவ கோ² பி⁴க்கூ² பஸ்ஸந்தி; அபிச ஸுணந்தி, மனுஸ்ஸா கிர ஜாலவாகு³ராதி³ஹத்தா² கா³மதோ வா நிக்க²மந்தி, அரஞ்ஞே வா விசரந்தீ’’தி. து³தியதி³வஸே ச நேஸங் தங் கா³மங் பிண்டா³ய பவிட்டா²னங் ‘‘பி⁴க்கூ²னங் நுகோ² அத்தா²ய கத’’ந்தி இத³ங் ‘‘ஸுதபரிஸங்கிதங்’’ நாம. ஏதங் க³ஹேதுங் ந வட்டதி, யங் ஏவங் அபரிஸங்கிதங் தங் வட்டதி. ஸசே பன தே மனுஸ்ஸா ‘‘கஸ்மா, ப⁴ந்தே, ந க³ண்ஹதா²’’தி புச்சி²த்வா தமத்த²ங் ஸுத்வா ‘‘நயித³ங், ப⁴ந்தே, பி⁴க்கூ²னங் அத்தா²ய கதங், அம்ஹேஹி அத்தனோ அத்தா²ய வா ராஜயுத்தாதீ³னங் அத்தா²ய வா கத’’ந்தி வத³ந்தி கப்பதி.
Naheva kho bhikkhū passanti; apica suṇanti, manussā kira jālavāgurādihatthā gāmato vā nikkhamanti, araññe vā vicarantī’’ti. Dutiyadivase ca nesaṃ taṃ gāmaṃ piṇḍāya paviṭṭhānaṃ ‘‘bhikkhūnaṃ nukho atthāya kata’’nti idaṃ ‘‘sutaparisaṅkitaṃ’’ nāma. Etaṃ gahetuṃ na vaṭṭati, yaṃ evaṃ aparisaṅkitaṃ taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ atthāya vā kata’’nti vadanti kappati.
நஹேவ கோ² பன பி⁴க்கூ² பஸ்ஸந்தி, ந ஸுணந்தி; அபிச கோ² தேஸங் கா³மங் பிண்டா³ய பவிட்டா²னங் பத்தங் க³ஹெத்வா ஸமச்ச²மங்ஸங் பிண்ட³பாதங் அபி⁴ஸங்க²ரித்வா அபி⁴ஹரந்தி, தே பரிஸங்கந்தி ‘‘பி⁴க்கூ²னங் நுகோ² அத்தா²ய கத’’ந்தி இத³ங் ‘‘தது³ப⁴யவிமுத்தபரிஸங்கிதங்’’ நாம. ஏதங் க³ஹேதுங் ந வட்டதி. யங் ஏவங் அபரிஸங்கிதங் தங் வட்டதி. ஸசே பன தே மனுஸ்ஸா ‘‘கஸ்மா, ப⁴ந்தே, ந க³ண்ஹதா²’’தி புச்சி²த்வா தமத்த²ங் ஸுத்வா ‘‘நயித³ங், ப⁴ந்தே, பி⁴க்கூ²னங் அத்தா²ய கதங் அம்ஹேஹி அத்தனோ அத்தா²ய வா ராஜயுத்தாதீ³னங் அத்தா²ய வா கதங் பவத்தமங்ஸங் வா கப்பியமேவ லபி⁴த்வா பி⁴க்கூ²னங் அத்தா²ய ஸம்பாதி³த’’ந்தி வத³ந்தி கப்பதி. மதானங் பேதகிச்சத்தா²ய மங்க³லாதீ³னங் வா அத்தா²ய கதேபி ஏஸேவ நயோ. யங் யஞ்ஹி பி⁴க்கூ²னங்யேவ அத்தா²ய அகதங், யத்த² ச நிப்³பே³மதிகோ ஹோதி, தங் ஸப்³ப³ங் கப்பதி.
Naheva kho pana bhikkhū passanti, na suṇanti; apica kho tesaṃ gāmaṃ piṇḍāya paviṭṭhānaṃ pattaṃ gahetvā samacchamaṃsaṃ piṇḍapātaṃ abhisaṅkharitvā abhiharanti, te parisaṅkanti ‘‘bhikkhūnaṃ nukho atthāya kata’’nti idaṃ ‘‘tadubhayavimuttaparisaṅkitaṃ’’ nāma. Etaṃ gahetuṃ na vaṭṭati. Yaṃ evaṃ aparisaṅkitaṃ taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ amhehi attano atthāya vā rājayuttādīnaṃ atthāya vā kataṃ pavattamaṃsaṃ vā kappiyameva labhitvā bhikkhūnaṃ atthāya sampādita’’nti vadanti kappati. Matānaṃ petakiccatthāya maṅgalādīnaṃ vā atthāya katepi eseva nayo. Yaṃ yañhi bhikkhūnaṃyeva atthāya akataṃ, yattha ca nibbematiko hoti, taṃ sabbaṃ kappati.
ஸசே பன ஏகஸ்மிங் விஹாரே பி⁴க்கூ² உத்³தி³ஸ்ஸ கதங் ஹோதி, தே ச அத்தனோ அத்தா²ய கதபா⁴வங் ந ஜானந்தி, அஞ்ஞே ஜானந்தி. யே ஜானந்தி, தேஸங் ந வட்டதி , இதரேஸங் வட்டதி. அஞ்ஞே ந ஜானந்தி, தேயேவ ஜானந்தி, தேஸங்யேவ ந வட்டதி, அஞ்ஞேஸங் வட்டதி. தேபி அம்ஹாகங் அத்தா²ய கதந்தி ஜானந்தி, அஞ்ஞேபி ஏதேஸங் அத்தா²ய கதந்தி ஜானந்தி, ஸப்³பே³ஸம்பி ந வட்டதி, ஸப்³பே³ ந ஜானந்தி, ஸப்³பே³ஸம்பி வட்டதி. பஞ்சஸு ஹி ஸஹத⁴ம்மிகேஸு யஸ்ஸ வா தஸ்ஸ வா அத்தா²ய உத்³தி³ஸ்ஸ கதங், ஸப்³பே³ஸங் ந கப்பதி.
Sace pana ekasmiṃ vihāre bhikkhū uddissa kataṃ hoti, te ca attano atthāya katabhāvaṃ na jānanti, aññe jānanti. Ye jānanti, tesaṃ na vaṭṭati , itaresaṃ vaṭṭati. Aññe na jānanti, teyeva jānanti, tesaṃyeva na vaṭṭati, aññesaṃ vaṭṭati. Tepi amhākaṃ atthāya katanti jānanti, aññepi etesaṃ atthāya katanti jānanti, sabbesampi na vaṭṭati, sabbe na jānanti, sabbesampi vaṭṭati. Pañcasu hi sahadhammikesu yassa vā tassa vā atthāya uddissa kataṃ, sabbesaṃ na kappati.
ஸசே பன கோசி ஏகங் பி⁴க்கு²ங் உத்³தி³ஸ்ஸ பாணங் வதி⁴த்வா தஸ்ஸ பத்தங் பூரெத்வா தே³தி, ஸோ ச அத்தனோ அத்தா²ய கதபா⁴வங் ஜானங்யேவ க³ஹெத்வா அஞ்ஞஸ்ஸ பி⁴க்கு²னோ தே³தி, ஸோ தஸ்ஸ ஸத்³தா⁴ய பரிபு⁴ஞ்ஜதி, கஸ்ஸ ஆபத்தீதி? த்³வின்னம்பி அனாபத்தி. யஞ்ஹி உத்³தி³ஸ்ஸ கதங் தஸ்ஸ அபு⁴த்ததாய அனாபத்தி, இதரஸ்ஸ அஜானநதாய. கப்பியமங்ஸஸ்ஸ ஹி படிக்³க³ஹணே ஆபத்தி நத்தி². உத்³தி³ஸ்ஸ கதஞ்ச அஜானித்வா பு⁴த்தஸ்ஸ பச்சா² ஞத்வா ஆபத்திதே³ஸனாகிச்சங் நாம நத்தி², அகப்பியமங்ஸங் பன அஜானித்வா பு⁴த்தேன பச்சா² ஞத்வாபி ஆபத்தி தே³ஸேதப்³பா³, உத்³தி³ஸ்ஸ கதஞ்ஹி ஞத்வா பு⁴ஞ்ஜதோவ ஆபத்தி. அகப்பியமங்ஸங் அஜானித்வா பு⁴ஞ்ஜந்தஸ்ஸாபி ஆபத்தியேவ. தஸ்மா ஆபத்திபீ⁴ருகேன ரூபங் ஸல்லக்கெ²ந்தேனபி புச்சி²த்வாவ மங்ஸங் படிக்³க³ஹேதப்³ப³ங். பரிபோ⁴க³காலே புச்சி²த்வா பரிபு⁴ஞ்ஜிஸ்ஸாமீதி வா க³ஹெத்வா புச்சி²த்வாவ பரிபு⁴ஞ்ஜிதப்³ப³ங். கஸ்மா? து³விஞ்ஞெய்யத்தா. அச்ச²மங்ஸங் ஹி ஸூகரமங்ஸஸதி³ஸங் ஹோதி, தீ³பிமங்ஸாதீ³னிபி மிக³மங்ஸாதி³ஸதி³ஸானி, தஸ்மா புச்சி²த்வா க³ஹணமேவ வத்தந்தி வத³ந்தி.
Sace pana koci ekaṃ bhikkhuṃ uddissa pāṇaṃ vadhitvā tassa pattaṃ pūretvā deti, so ca attano atthāya katabhāvaṃ jānaṃyeva gahetvā aññassa bhikkhuno deti, so tassa saddhāya paribhuñjati, kassa āpattīti? Dvinnampi anāpatti. Yañhi uddissa kataṃ tassa abhuttatāya anāpatti, itarassa ajānanatāya. Kappiyamaṃsassa hi paṭiggahaṇe āpatti natthi. Uddissa katañca ajānitvā bhuttassa pacchā ñatvā āpattidesanākiccaṃ nāma natthi, akappiyamaṃsaṃ pana ajānitvā bhuttena pacchā ñatvāpi āpatti desetabbā, uddissa katañhi ñatvā bhuñjatova āpatti. Akappiyamaṃsaṃ ajānitvā bhuñjantassāpi āpattiyeva. Tasmā āpattibhīrukena rūpaṃ sallakkhentenapi pucchitvāva maṃsaṃ paṭiggahetabbaṃ. Paribhogakāle pucchitvā paribhuñjissāmīti vā gahetvā pucchitvāva paribhuñjitabbaṃ. Kasmā? Duviññeyyattā. Acchamaṃsaṃ hi sūkaramaṃsasadisaṃ hoti, dīpimaṃsādīnipi migamaṃsādisadisāni, tasmā pucchitvā gahaṇameva vattanti vadanti.
ஹட்டோ² உத³க்³கோ³தி துட்டோ² சேவ உன்னதகாயசித்தோ ச ஹுத்வா. ஸோ கிர ‘‘ந ப⁴க³வா இமானி பஞ்ச வத்தூ²னி அனுஜானாதி, இதா³னி ஸக்கி²ஸ்ஸாமி ஸங்க⁴பே⁴த³ங் காது’’ந்தி கோகாலிகஸ்ஸ இங்கி³தாகாரங் த³ஸ்ஸெத்வா யதா² விஸங் வா கா²தி³த்வா ரஜ்ஜுயா வா உப்³ப³ந்தி⁴த்வா ஸத்த²ங் வா ஆஹரித்வா மரிதுகாமோ புரிஸோ விஸாதீ³ஸு அஞ்ஞதரங் லபி⁴த்வா தப்பச்சயா ஆஸன்னம்பி மரணது³க்க²ங் அஜானந்தோ ஹட்டோ² உத³க்³கோ³ ஹோதி; ஏவமேவ ஸங்க⁴பே⁴த³பச்சயா ஆஸன்னம்பி அவீசிம்ஹி நிப்³ப³த்தித்வா படிஸங்வேத³னீயங் து³க்க²ங் அஜானந்தோ ‘‘லத்³தோ⁴ தா³னி மே ஸங்க⁴பே⁴த³ஸ்ஸ உபாயோ’’தி ஹட்டோ² உத³க்³கோ³ ஸபரிஸோ உட்டா²யாஸனா தேனேவ ஹட்ட²பா⁴வேன ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி.
Haṭṭho udaggoti tuṭṭho ceva unnatakāyacitto ca hutvā. So kira ‘‘na bhagavā imāni pañca vatthūni anujānāti, idāni sakkhissāmi saṅghabhedaṃ kātu’’nti kokālikassa iṅgitākāraṃ dassetvā yathā visaṃ vā khāditvā rajjuyā vā ubbandhitvā satthaṃ vā āharitvā maritukāmo puriso visādīsu aññataraṃ labhitvā tappaccayā āsannampi maraṇadukkhaṃ ajānanto haṭṭho udaggo hoti; evameva saṅghabhedapaccayā āsannampi avīcimhi nibbattitvā paṭisaṃvedanīyaṃ dukkhaṃ ajānanto ‘‘laddho dāni me saṅghabhedassa upāyo’’ti haṭṭho udaggo sapariso uṭṭhāyāsanā teneva haṭṭhabhāvena bhagavantaṃ abhivādetvā padakkhiṇaṃ katvā pakkāmi.
தே மயங் இமேஹி பஞ்சஹி வத்தூ²ஹி ஸமாதா³ய வத்தாமாதி எத்த² பன ‘‘இமானி பஞ்ச வத்தூ²னீ’’தி வத்தப்³பே³பி தே மயங் இமேஹி பஞ்சஹி வத்தூ²ஹி ஜனங் ஸஞ்ஞாபெஸ்ஸாமாதி அபி⁴ண்ஹங் பரிவிதக்கவஸேன விப⁴த்திவிபல்லாஸங் அஸல்லக்கெ²த்வா அபி⁴ண்ஹங் பரிவிதக்கானுரூபமேவ ‘‘தே மயங் இமேஹி பஞ்சஹி வத்தூ²ஹீ’’தி ஆஹ, யதா² தங் விக்கி²த்தசித்தோ.
Te mayaṃ imehi pañcahi vatthūhi samādāya vattāmāti ettha pana ‘‘imāni pañca vatthūnī’’ti vattabbepi te mayaṃ imehi pañcahi vatthūhi janaṃ saññāpessāmāti abhiṇhaṃ parivitakkavasena vibhattivipallāsaṃ asallakkhetvā abhiṇhaṃ parivitakkānurūpameva ‘‘te mayaṃ imehi pañcahi vatthūhī’’ti āha, yathā taṃ vikkhittacitto.
து⁴தா ஸல்லேக²வுத்தினோதி யா படிபதா³ கிலேஸே து⁴னாதி, தாய ஸமன்னாக³தத்தா து⁴தா. யா ச கிலேஸே ஸல்லிக²தி, ஸா ஏதேஸங் வுத்தீதி ஸல்லேக²வுத்தினோ.
Dhutāsallekhavuttinoti yā paṭipadā kilese dhunāti, tāya samannāgatattā dhutā. Yā ca kilese sallikhati, sā etesaṃ vuttīti sallekhavuttino.
பா³ஹுலிகோதி சீவராதீ³னங் பச்சயானங் ப³ஹுலபா⁴வோ பா³ஹுல்லங், தங் பா³ஹுல்லமஸ்ஸ அத்தி², தஸ்மிங் வா பா³ஹுல்லே நியுத்தோ டி²தோதி பா³ஹுலிகோ. பா³ஹுல்லாய சேதேதீதி பா³ஹுலத்தாய சேதேதி கப்பேதி பகப்பேதி. கத²ஞ்ஹி நாம மய்ஹஞ்ச ஸாவகானஞ்ச சீவராதீ³னங் பச்சயானங் ப³ஹுலபா⁴வோ ப⁴வெய்யாதி ஏவங் உஸ்ஸுக்கமாபன்னோதி அதி⁴ப்பாயோ. சக்கபே⁴தா³யாதி ஆணாபே⁴தா³ய.
Bāhulikoti cīvarādīnaṃ paccayānaṃ bahulabhāvo bāhullaṃ, taṃ bāhullamassa atthi, tasmiṃ vā bāhulle niyutto ṭhitoti bāhuliko. Bāhullāya cetetīti bāhulattāya ceteti kappeti pakappeti. Kathañhi nāma mayhañca sāvakānañca cīvarādīnaṃ paccayānaṃ bahulabhāvo bhaveyyāti evaṃ ussukkamāpannoti adhippāyo. Cakkabhedāyāti āṇābhedāya.
த⁴ம்மிங் கத²ங் கத்வாதி க²ந்த⁴கே வுத்தனயேன ‘‘அலங், தே³வத³த்த, மா தே ருச்சி ஸங்க⁴பே⁴தோ³. க³ருகோ கோ², தே³வத³த்த, ஸங்க⁴பே⁴தோ³. யோ கோ², தே³வத³த்த, ஸமக்³க³ங் ஸங்க⁴ங் பி⁴ந்த³தி, கப்பட்டி²கங் கிப்³பி³ஸங் பஸவதி, கப்பங் நிரயம்ஹி பச்சதி, யோ ச கோ², தே³வத³த்த, பி⁴ன்னங் ஸங்க⁴ங் ஸமக்³க³ங் கரோதி, ப்³ரஹ்மங் புஞ்ஞங் பஸவதி, கப்பங் ஸக்³க³ம்ஹி மோத³தீ’’தி (சூளவ॰ 343) ஏவமாதி³கங் அனேகப்பகாரங் தே³வத³த்தஸ்ஸ ச பி⁴க்கூ²னஞ்ச தத³னுச்ச²விகங் தத³னுலோமிகங் த⁴ம்மிங் கத²ங் கத்வா.
Dhammiṃ kathaṃ katvāti khandhake vuttanayena ‘‘alaṃ, devadatta, mā te rucci saṅghabhedo. Garuko kho, devadatta, saṅghabhedo. Yo kho, devadatta, samaggaṃ saṅghaṃ bhindati, kappaṭṭhikaṃ kibbisaṃ pasavati, kappaṃ nirayamhi paccati, yo ca kho, devadatta, bhinnaṃ saṅghaṃ samaggaṃ karoti, brahmaṃ puññaṃ pasavati, kappaṃ saggamhi modatī’’ti (cūḷava. 343) evamādikaṃ anekappakāraṃ devadattassa ca bhikkhūnañca tadanucchavikaṃ tadanulomikaṃ dhammiṃ kathaṃ katvā.
411. ஸமக்³க³ஸ்ஸாதி ஸஹிதஸ்ஸ சித்தேன ச ஸரீரேன ச அவியுத்தஸ்ஸாதி அத்தோ². பத³பா⁴ஜனேபி ஹி அயமேவ அத்தோ² த³ஸ்ஸிதோ. ஸமானஸங்வாஸகோதி ஹி வத³தா சித்தேன அவியோகோ³ த³ஸ்ஸிதோ ஹோதி. ஸமானஸீமாயங் டி²தோதி வத³தா ஸரீரேன. கத²ங்? ஸமானஸங்வாஸகோ ஹி லத்³தி⁴னானாஸங்வாஸகேன வா கம்மனானாஸங்வாஸகேன வா விரஹிதோ ஸமசித்ததாய சித்தேன அவியுத்தோ ஹோதி. ஸமானஸீமாயங் டி²தோ காயஸாமக்³கி³தா³னதோ ஸரீரேன அவியுத்தோ.
411.Samaggassāti sahitassa cittena ca sarīrena ca aviyuttassāti attho. Padabhājanepi hi ayameva attho dassito. Samānasaṃvāsakoti hi vadatā cittena aviyogo dassito hoti. Samānasīmāyaṃ ṭhitoti vadatā sarīrena. Kathaṃ? Samānasaṃvāsako hi laddhinānāsaṃvāsakena vā kammanānāsaṃvāsakena vā virahito samacittatāya cittena aviyutto hoti. Samānasīmāyaṃ ṭhito kāyasāmaggidānato sarīrena aviyutto.
பே⁴த³னஸங்வத்தனிகங் வா அதி⁴கரணந்தி பே⁴த³னஸ்ஸ ஸங்க⁴பே⁴த³ஸ்ஸ அத்தா²ய ஸங்வத்தனிகங் காரணங். இமஸ்மிஞ்ஹி ஓகாஸே ‘‘காமஹேது காமனிதா³னங் காமாதி⁴கரண’’ந்திஆதீ³ஸு (ம॰ நி॰ 1.168) விய காரணங் அதி⁴கரணந்தி அதி⁴ப்பேதங். தஞ்ச யஸ்மா அட்டா²ரஸவித⁴ங் ஹோதி, தஸ்மா பத³பா⁴ஜனே ‘‘அட்டா²ரஸ பே⁴த³கரவத்தூ²னீ’’தி வுத்தங். தானி பன ‘‘இதூ⁴பாலி, பி⁴க்கு² அத⁴ம்மங் த⁴ம்மோதி தீ³பேதீ’’திஆதி³னா (சூளவ॰ 352) நயேன க²ந்த⁴கே ஆக³தானி, தஸ்மா தத்ரேவ நேஸங் அத்த²ங் வண்ணயிஸ்ஸாம. யோபி சாயங் இமானி வத்தூ²னி நிஸ்ஸாய அபரேஹிபி கம்மேன, உத்³தே³ஸேன, வோஹாரேன, அனுஸாவனாய, ஸலாகக்³கா³ஹேனாதி பஞ்சஹி காரணேஹி ஸங்க⁴பே⁴தோ³ ஹோதி, தம்பி ஆக³தட்டா²னேயேவ பகாஸயிஸ்ஸாம. ஸங்கே²பதோ பன பே⁴த³னஸங்வத்தனிகங் வா அதி⁴கரணங் ஸமாதா³யாதி எத்த² ஸங்க⁴பே⁴த³ஸ்ஸ அத்தா²ய ஸங்வத்தனிகங் ஸங்க⁴பே⁴த³னிப்ப²த்திஸமத்த²ங் காரணங் க³ஹெத்வாதி ஏவமத்தோ² வேதி³தப்³போ³. பக்³க³ய்ஹாதி பக்³க³ஹிதங் அப்³பு⁴ஸ்ஸிதங் பாகடங் கத்வா. திட்டெ²ய்யாதி யதா²ஸமாதி³ன்னங் யதா²பக்³க³ஹிதமேவ ச கத்வா அச்செ²ய்ய . யஸ்மா பன ஏவங் பக்³க³ண்ஹதா திட்ட²தா ச தங் தீ³பிதஞ்சேவ அப்படினிஸ்ஸட்ட²ஞ்ச ஹோதி, தஸ்மா பத³பா⁴ஜனே ‘‘தீ³பெய்யா’’தி ச ‘‘நப்படினிஸ்ஸஜ்ஜெய்யா’’தி ச வுத்தங்.
Bhedanasaṃvattanikaṃ vā adhikaraṇanti bhedanassa saṅghabhedassa atthāya saṃvattanikaṃ kāraṇaṃ. Imasmiñhi okāse ‘‘kāmahetu kāmanidānaṃ kāmādhikaraṇa’’ntiādīsu (ma. ni. 1.168) viya kāraṇaṃ adhikaraṇanti adhippetaṃ. Tañca yasmā aṭṭhārasavidhaṃ hoti, tasmā padabhājane ‘‘aṭṭhārasa bhedakaravatthūnī’’ti vuttaṃ. Tāni pana ‘‘idhūpāli, bhikkhu adhammaṃ dhammoti dīpetī’’tiādinā (cūḷava. 352) nayena khandhake āgatāni, tasmā tatreva nesaṃ atthaṃ vaṇṇayissāma. Yopi cāyaṃ imāni vatthūni nissāya aparehipi kammena, uddesena, vohārena, anusāvanāya, salākaggāhenāti pañcahi kāraṇehi saṅghabhedo hoti, tampi āgataṭṭhāneyeva pakāsayissāma. Saṅkhepato pana bhedanasaṃvattanikaṃ vā adhikaraṇaṃ samādāyāti ettha saṅghabhedassa atthāya saṃvattanikaṃ saṅghabhedanipphattisamatthaṃ kāraṇaṃ gahetvāti evamattho veditabbo. Paggayhāti paggahitaṃ abbhussitaṃ pākaṭaṃ katvā. Tiṭṭheyyāti yathāsamādinnaṃ yathāpaggahitameva ca katvā accheyya . Yasmā pana evaṃ paggaṇhatā tiṭṭhatā ca taṃ dīpitañceva appaṭinissaṭṭhañca hoti, tasmā padabhājane ‘‘dīpeyyā’’ti ca ‘‘nappaṭinissajjeyyā’’ti ca vuttaṃ.
பி⁴க்கூ²ஹி ஏவமஸ்ஸ வசனீயோதி அஞ்ஞேஹி லஜ்ஜீஹி பி⁴க்கூ²ஹி ஏவங் வத்தப்³போ³ ப⁴வெய்ய. பத³பா⁴ஜனே சஸ்ஸ யே பஸ்ஸந்தீதி யே ஸம்முகா² பக்³க³ய்ஹ திட்ட²ந்தங் பஸ்ஸந்தி. யே ஸுணந்தீதி யேபி ‘‘அஸுகஸ்மிங் நாம விஹாரே பி⁴க்கூ² பே⁴த³னஸங்வத்தனிகங் அதி⁴கரணங் ஸமாதா³ய பக்³க³ய்ஹ திட்ட²ந்தீ’’தி ஸுணந்தி.
Bhikkhūhi evamassa vacanīyoti aññehi lajjīhi bhikkhūhi evaṃ vattabbo bhaveyya. Padabhājane cassa ye passantīti ye sammukhā paggayha tiṭṭhantaṃ passanti. Ye suṇantīti yepi ‘‘asukasmiṃ nāma vihāre bhikkhū bhedanasaṃvattanikaṃ adhikaraṇaṃ samādāya paggayha tiṭṭhantī’’ti suṇanti.
ஸமேதாயஸ்மா ஸங்கே⁴னாதி ஆயஸ்மா ஸங்கே⁴ன ஸத்³தி⁴ங் ஸமேது ஸமாக³ச்ச²து ஏகலத்³தி⁴கோ ஹோதூதி அத்தோ². கிங் காரணா? ஸமக்³கோ³ ஹி ஸங்கோ⁴ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதீதி.
Sametāyasmā saṅghenāti āyasmā saṅghena saddhiṃ sametu samāgacchatu ekaladdhiko hotūti attho. Kiṃ kāraṇā? Samaggo hi saṅgho sammodamāno avivadamāno ekuddeso phāsu viharatīti.
தத்த² ஸம்மோத³மானோதி அஞ்ஞமஞ்ஞங் ஸம்பத்தியா ஸட்டு² மோத³மானோ. அவிவத³மானோதி ‘‘அயங் த⁴ம்மோ, நாயங் த⁴ம்மோ’’தி ஏவங் ந விவத³மானோ. ஏகோ உத்³தே³ஸோ அஸ்ஸாதி ஏகுத்³தே³ஸோ, ஏகதோ பவத்தபாதிமொக்கு²த்³தே³ஸோ, ந விஸுந்தி அத்தோ². பா²ஸு விஹரதீதி ஸுக²ங் விஹரதி.
Tattha sammodamānoti aññamaññaṃ sampattiyā saṭṭhu modamāno. Avivadamānoti ‘‘ayaṃ dhammo, nāyaṃ dhammo’’ti evaṃ na vivadamāno. Eko uddeso assāti ekuddeso, ekato pavattapātimokkhuddeso, na visunti attho. Phāsu viharatīti sukhaṃ viharati.
இச்சேதங் குஸலந்தி ஏதங் படினிஸ்ஸஜ்ஜனங் குஸலங் கே²மங் ஸொத்தி²பா⁴வோ தஸ்ஸ பி⁴க்கு²னோ. நோ சே படினிஸ்ஸஜ்ஜதி ஆபத்தி து³க்கடஸ்ஸாதி திக்க²த்துங் வுத்தஸ்ஸ அப்படினிஸ்ஸஜ்ஜதோ து³க்கடங். ஸுத்வா ந வத³ந்தி ஆபத்தி து³க்கடஸ்ஸாதி யே ஸுத்வா ந வத³ந்தி, தேஸம்பி து³க்கடங். கீவதூ³ரே ஸுத்வா அவத³ந்தானங் து³க்கடங்? ஏகவிஹாரே தாவ வத்தப்³ப³ங் நத்தி². அட்ட²கதா²யங் பன வுத்தங் ‘‘ஸமந்தா அத்³த⁴யோஜனே பி⁴க்கூ²னங் பா⁴ரோ. தூ³தங் வா பண்ணங் வா பேஸெத்வா வத³தோபி ஆபத்திமொக்கோ² நத்தி². ஸயமேவ க³ந்த்வா ‘க³ருகோ கோ², ஆவுஸோ, ஸங்க⁴பே⁴தோ³ , மா ஸங்க⁴பே⁴தா³ய, பரக்கமீ’தி நிவாரேதப்³போ³’’தி. பஹொந்தேன பன தூ³ரம்பி க³ந்தப்³ப³ங் அகி³லானானஞ்ஹி தூ³ரேபி பா⁴ரோயேவ.
Iccetaṃ kusalanti etaṃ paṭinissajjanaṃ kusalaṃ khemaṃ sotthibhāvo tassa bhikkhuno. No ce paṭinissajjati āpatti dukkaṭassāti tikkhattuṃ vuttassa appaṭinissajjato dukkaṭaṃ. Sutvā na vadanti āpatti dukkaṭassāti ye sutvā na vadanti, tesampi dukkaṭaṃ. Kīvadūre sutvā avadantānaṃ dukkaṭaṃ? Ekavihāre tāva vattabbaṃ natthi. Aṭṭhakathāyaṃ pana vuttaṃ ‘‘samantā addhayojane bhikkhūnaṃ bhāro. Dūtaṃ vā paṇṇaṃ vā pesetvā vadatopi āpattimokkho natthi. Sayameva gantvā ‘garuko kho, āvuso, saṅghabhedo , mā saṅghabhedāya, parakkamī’ti nivāretabbo’’ti. Pahontena pana dūrampi gantabbaṃ agilānānañhi dūrepi bhāroyeva.
இதா³னி ‘‘ஏவஞ்ச ஸோ பி⁴க்கு² பி⁴க்கூ²ஹி வுச்சமானோ’’திஆதீ³ஸு அத்த²மத்தமேவ த³ஸ்ஸேதுங் ‘‘ஸோ பி⁴க்கு² ஸங்க⁴மஜ்ஜ²ம்பி ஆகட்³டி⁴த்வா வத்தப்³போ³’’திஆதி³மாஹ. தத்த² ஸங்க⁴மஜ்ஜ²ம்பி ஆகட்³டி⁴த்வாதி ஸசே புரிமனயேன வுச்சமானோ ந படினிஸ்ஸஜ்ஜதி ஹத்தே²ஸு ச பாதே³ஸு ச க³ஹெத்வாபி ஸங்க⁴மஜ்ஜ²ங் ஆகட்³டி⁴த்வா புனபி ‘‘மா ஆயஸ்மா’’திஆதி³னா நயேன திக்க²த்துங் வத்தப்³போ³.
Idāni ‘‘evañca so bhikkhu bhikkhūhi vuccamāno’’tiādīsu atthamattameva dassetuṃ ‘‘so bhikkhu saṅghamajjhampi ākaḍḍhitvā vattabbo’’tiādimāha. Tattha saṅghamajjhampi ākaḍḍhitvāti sace purimanayena vuccamāno na paṭinissajjati hatthesu ca pādesu ca gahetvāpi saṅghamajjhaṃ ākaḍḍhitvā punapi ‘‘mā āyasmā’’tiādinā nayena tikkhattuṃ vattabbo.
யாவததியங் ஸமனுபா⁴ஸிதப்³போ³தி யாவ ததியங் ஸமனுபா⁴ஸனங் தாவ ஸமனுபா⁴ஸிதப்³போ³. தீஹி ஸமனுபா⁴ஸனகம்மவாசாஹி கம்மங் காதப்³ப³ந்தி வுத்தங் ஹோதி. பத³பா⁴ஜனே பனஸ்ஸ அத்த²மேவ க³ஹெத்வா ஸமனுபா⁴ஸனவிதி⁴ங் த³ஸ்ஸேதுங் ‘‘ஸோ பி⁴க்கு² ஸமனுபா⁴ஸிதப்³போ³. ஏவஞ்ச பன, பி⁴க்க²வே, ஸமனுபா⁴ஸிதப்³போ³’’திஆதி³ வுத்தங்.
Yāvatatiyaṃ samanubhāsitabboti yāva tatiyaṃ samanubhāsanaṃ tāva samanubhāsitabbo. Tīhi samanubhāsanakammavācāhi kammaṃ kātabbanti vuttaṃ hoti. Padabhājane panassa atthameva gahetvā samanubhāsanavidhiṃ dassetuṃ ‘‘so bhikkhu samanubhāsitabbo. Evañca pana, bhikkhave, samanubhāsitabbo’’tiādi vuttaṃ.
414. தத்த² ஞத்தியா து³க்கடங் த்³வீஹி கம்மவாசாஹி து²ல்லச்சயா படிப்பஸ்ஸம்ப⁴ந்தீதி யஞ்ச ஞத்திபரியோஸானே து³க்கடங் ஆபன்னோ, யே ச த்³வீஹி கம்மவாசாஹி து²ல்லச்சயே, தா திஸ்ஸோபி ஆபத்தியோ ‘‘யஸ்ஸ நக்க²மதி ஸோ பா⁴ஸெய்யா’’தி ஏவங் ய்ய-காரப்பத்தமத்தாய ததியகம்மவாசாய படிப்பஸ்ஸம்ப⁴ந்தி ஸங்கா⁴தி³ஸேஸோயேவ திட்ட²தி. கிங் பன ஆபன்னாபத்தியோ படிப்பஸ்ஸம்ப⁴ந்தி அனாபன்னாதி? மஹாஸுமத்தே²ரோ தாவ வத³தி ‘‘யோ அவஸானே படினிஸ்ஸஜ்ஜிஸ்ஸதி, ஸோ தா ஆபத்தியோ ந ஆபஜ்ஜதி, தஸ்மா அனாபன்னா படிப்பஸ்ஸம்ப⁴ந்தீ’’தி. மஹாபது³மத்தே²ரோ பன லிங்க³பரிவத்தேன அஸாதா⁴ரணாபத்தியோ விய ஆபன்னா படிப்பஸ்ஸம்ப⁴ந்தி, அனாபன்னானங் கிங் படிப்பஸ்ஸத்³தி⁴யா’’தி ஆஹ.
414. Tattha ñattiyā dukkaṭaṃ dvīhi kammavācāhi thullaccayā paṭippassambhantīti yañca ñattipariyosāne dukkaṭaṃ āpanno, ye ca dvīhi kammavācāhi thullaccaye, tā tissopi āpattiyo ‘‘yassa nakkhamati so bhāseyyā’’ti evaṃ yya-kārappattamattāya tatiyakammavācāya paṭippassambhanti saṅghādisesoyeva tiṭṭhati. Kiṃ pana āpannāpattiyo paṭippassambhanti anāpannāti? Mahāsumatthero tāva vadati ‘‘yo avasāne paṭinissajjissati, so tā āpattiyo na āpajjati, tasmā anāpannā paṭippassambhantī’’ti. Mahāpadumatthero pana liṅgaparivattena asādhāraṇāpattiyo viya āpannā paṭippassambhanti, anāpannānaṃ kiṃ paṭippassaddhiyā’’ti āha.
415. த⁴ம்மகம்மே த⁴ம்மகம்மஸஞ்ஞீதி தஞ்சே ஸமனுபா⁴ஸனகம்மங் த⁴ம்மகம்மங் ஹோதி, தஸ்மிங் த⁴ம்மகம்மஸஞ்ஞீதி அத்தோ². ஏஸ நயோ ஸப்³ப³த்த². இத⁴ ஸஞ்ஞா ந ரக்க²தி, கம்மஸ்ஸ த⁴ம்மிகத்தா ஏவ அப்படினிஸ்ஸஜ்ஜந்தோ ஆபஜ்ஜதி.
415.Dhammakamme dhammakammasaññīti tañce samanubhāsanakammaṃ dhammakammaṃ hoti, tasmiṃ dhammakammasaññīti attho. Esa nayo sabbattha. Idha saññā na rakkhati, kammassa dhammikattā eva appaṭinissajjanto āpajjati.
416. அஸமனுபா⁴ஸந்தஸ்ஸாதி அஸமனுபா⁴ஸியமானஸ்ஸ அப்படினிஸ்ஸஜ்ஜந்தஸ்ஸாபி ஸங்கா⁴தி³ஸேஸேன அனாபத்தி.
416.Asamanubhāsantassāti asamanubhāsiyamānassa appaṭinissajjantassāpi saṅghādisesena anāpatti.
படினிஸ்ஸஜ்ஜந்தஸ்ஸாதி ஞத்திதோ புப்³பே³ வா ஞத்திக்க²ணே வா ஞத்திபரியோஸானே வா பட²மாய வா அனுஸாவனாய து³தியாய வா ததியாய வா யாவ ய்ய-காரங் ந ஸம்பாபுணாதி, தாவ படினிஸ்ஸஜ்ஜந்தஸ்ஸ ஸங்கா⁴தி³ஸேஸேன அனாபத்தி.
Paṭinissajjantassāti ñattito pubbe vā ñattikkhaṇe vā ñattipariyosāne vā paṭhamāya vā anusāvanāya dutiyāya vā tatiyāya vā yāva yya-kāraṃ na sampāpuṇāti, tāva paṭinissajjantassa saṅghādisesena anāpatti.
ஆதி³கம்மிகஸ்ஸாதி. எத்த² பன ‘‘தே³வத³த்தோ ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமி, தஸ்மிங் வத்து²ஸ்மி’’ந்தி பரிவாரே (பரி॰ 17) ஆக³தத்தா தே³வத³த்தோ ஆதி³கம்மிகோ. ஸோ ச கோ² ஸங்க⁴பே⁴தா³ய பரக்கமனஸ்ஸேவ, ந அப்படினிஸ்ஸஜ்ஜனஸ்ஸ. ந ஹி தஸ்ஸ தங் கம்மங் கதங். கத²மித³ங் ஜானிதப்³ப³ந்தி சே? ஸுத்ததோ. யதா² ஹி ‘‘அரிட்டோ² பி⁴க்கு² க³த்³த⁴பா³தி⁴புப்³போ³ யாவததியங் ஸமனுபா⁴ஸனாய ந படினிஸ்ஸஜ்ஜி, தஸ்மிங் வத்து²ஸ்மி’’ந்தி பரிவாரே (பரி॰ 121) ஆக³தத்தா அரிட்ட²ஸ்ஸ கம்மங் கதந்தி பஞ்ஞாயதி, ந ததா² தே³வத³த்தஸ்ஸ. அதா²பிஸ்ஸ கதேன ப⁴விதப்³ப³ந்தி கோசி அத்தனோ ருசிமத்தேன வதெ³ய்ய, ததா²பி அப்படினிஸ்ஸஜ்ஜனே ஆதி³கம்மிகஸ்ஸ அனாபத்தி நாம நத்தி². ந ஹி பஞ்ஞத்தங் ஸிக்கா²பத³ங் வீதிக்கமந்தஸ்ஸ அஞ்ஞத்ர உத்³தி³ஸ்ஸ அனுஞ்ஞாததோ அனாபத்தி நாம தி³ஸ்ஸதி. யம்பி அரிட்ட²ஸிக்கா²பத³ஸ்ஸ அனாபத்தியங் ‘‘ஆதி³கம்மிகஸ்ஸா’’தி பொத்த²கேஸு லிகி²தங், தங் பமாத³லிகி²தங். பமாத³லிகி²தபா⁴வோ சஸ்ஸ ‘‘பட²மங் அரிட்டோ² பி⁴க்கு² சோதே³தப்³போ³, சோதெ³த்வா ஸாரேதப்³போ³, ஸாரெத்வா ஆபத்திங் ரோபேதப்³போ³’’தி (சூளவ॰ 65) ஏவங் கம்மக்க²ந்த⁴கே ஆபத்திரோபனவசனதோ வேதி³தப்³போ³.
Ādikammikassāti. Ettha pana ‘‘devadatto samaggassa saṅghassa bhedāya parakkami, tasmiṃ vatthusmi’’nti parivāre (pari. 17) āgatattā devadatto ādikammiko. So ca kho saṅghabhedāya parakkamanasseva, na appaṭinissajjanassa. Na hi tassa taṃ kammaṃ kataṃ. Kathamidaṃ jānitabbanti ce? Suttato. Yathā hi ‘‘ariṭṭho bhikkhu gaddhabādhipubbo yāvatatiyaṃ samanubhāsanāya na paṭinissajji, tasmiṃ vatthusmi’’nti parivāre (pari. 121) āgatattā ariṭṭhassa kammaṃ katanti paññāyati, na tathā devadattassa. Athāpissa katena bhavitabbanti koci attano rucimattena vadeyya, tathāpi appaṭinissajjane ādikammikassa anāpatti nāma natthi. Na hi paññattaṃ sikkhāpadaṃ vītikkamantassa aññatra uddissa anuññātato anāpatti nāma dissati. Yampi ariṭṭhasikkhāpadassa anāpattiyaṃ ‘‘ādikammikassā’’ti potthakesu likhitaṃ, taṃ pamādalikhitaṃ. Pamādalikhitabhāvo cassa ‘‘paṭhamaṃ ariṭṭho bhikkhu codetabbo, codetvā sāretabbo, sāretvā āpattiṃ ropetabbo’’ti (cūḷava. 65) evaṃ kammakkhandhake āpattiropanavacanato veditabbo.
இதி பே⁴தா³ய பரக்கமனே ஆதி³கம்மிகஸ்ஸ தே³வத³த்தஸ்ஸ யஸ்மா தங் கம்மங் ந கதங், தஸ்மாஸ்ஸ ஆபத்தியேவ ந ஜாதா. ஸிக்கா²பத³ங் பன தங் ஆரப்³ப⁴ பஞ்ஞத்தந்தி கத்வா ‘‘ஆதி³கம்மிகோ’’தி வுத்தோ. இதி ஆபத்தியா அபா⁴வதோயேவஸ்ஸ அனாபத்தி வுத்தா. ஸா பனேஸா கிஞ்சாபி அஸமனுபா⁴ஸந்தஸ்ஸாதி இமினாவ ஸித்³தா⁴, யஸ்மா பன அஸமனுபா⁴ஸந்தோ நாம யஸ்ஸ கேவலங் ஸமனுபா⁴ஸனங் ந கரொந்தி, ஸோ வுச்சதி, ந ஆதி³கம்மிகோ. அயஞ்ச தே³வத³த்தோ ஆதி³கம்மிகோயேவ, தஸ்மா ‘‘ஆதி³கம்மிகஸ்ஸா’’தி வுத்தங். ஏதேனுபாயேன ட²பெத்வா அரிட்ட²ஸிக்கா²பத³ங் ஸப்³ப³ஸமனுபா⁴ஸனாஸு வினிச்ச²யோ வேதி³தப்³போ³. ஸேஸங் ஸப்³ப³த்த² உத்தானமேவ.
Iti bhedāya parakkamane ādikammikassa devadattassa yasmā taṃ kammaṃ na kataṃ, tasmāssa āpattiyeva na jātā. Sikkhāpadaṃ pana taṃ ārabbha paññattanti katvā ‘‘ādikammiko’’ti vutto. Iti āpattiyā abhāvatoyevassa anāpatti vuttā. Sā panesā kiñcāpi asamanubhāsantassāti imināva siddhā, yasmā pana asamanubhāsanto nāma yassa kevalaṃ samanubhāsanaṃ na karonti, so vuccati, na ādikammiko. Ayañca devadatto ādikammikoyeva, tasmā ‘‘ādikammikassā’’ti vuttaṃ. Etenupāyena ṭhapetvā ariṭṭhasikkhāpadaṃ sabbasamanubhāsanāsu vinicchayo veditabbo. Sesaṃ sabbattha uttānameva.
ஸமுட்டா²னாதீ³ஸு திவங்கி³கங் ஏகஸமுட்டா²னங், ஸமனுபா⁴ஸனஸமுட்டா²னங் நாமமேதங், காயவாசாசித்ததோ ஸமுட்டா²தி. படினிஸ்ஸஜ்ஜாமீதி காயவிகாரங் வா வசீபே⁴த³ங் வா அகரொந்தஸ்ஸேவ பன ஆபஜ்ஜனதோ அகிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.
Samuṭṭhānādīsu tivaṅgikaṃ ekasamuṭṭhānaṃ, samanubhāsanasamuṭṭhānaṃ nāmametaṃ, kāyavācācittato samuṭṭhāti. Paṭinissajjāmīti kāyavikāraṃ vā vacībhedaṃ vā akarontasseva pana āpajjanato akiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
பட²மஸங்க⁴பே⁴த³ஸிக்கா²பத³வண்ணனா நிட்டி²தா.
Paṭhamasaṅghabhedasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 10. ஸங்க⁴பே⁴த³ஸிக்கா²பத³ங் • 10. Saṅghabhedasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
