| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
10. பட²மஸங்க⁴பே⁴த³ஸிக்கா²பத³வண்ணனா
10. Paṭhamasaṅghabhedasikkhāpadavaṇṇanā
410. த³ஸமே யே து³ப்³ப³லா ஹொந்தி அப்பதா²மா, ந ஸக்கொந்தி அரஞ்ஞகாதீ³னி ஸேவந்தா து³க்க²ஸ்ஸந்தங் காதுங், தே ஸந்தா⁴யாஹ ‘‘ப³ஹூனங் குலபுத்தானங் மக்³க³ந்தராயாய ஸங்வத்தந்தீ’’தி. அதி⁴வாஸனக²ந்திஸம்பன்னோதி ‘‘க²மோ ஹோதி ஸீதஸ்ஸா’’திஆதி³னா வுத்தஸீதுண்ஹாதி³ஸஹனலக்க²ணாய க²ந்தியா ஸமன்னாக³தோ. ப்³யஞ்ஜனபத³மேவ பரமங் அஸ்ஸாதி பத³பரமோ. யஸ்ஸ ஹி புக்³க³லஸ்ஸ ப³ஹும்பி ஸுணதோ ப³ஹும்பி ப⁴ணதோ ப³ஹும்பி தா⁴ரயதோ ப³ஹும்பி வாசயதோ ந தாய ஜாதியா த⁴ம்மாபி⁴ஸமயோ ஹோதி , அயங் ‘‘பத³பரமோ’’தி வுச்சதி. அபி⁴ஸம்பு⁴ணித்வாதி நிப்பா²தெ³த்வா. நாபி⁴ஸம்பு⁴ணாதீதி ந ஸம்பாதே³தி, அரஞ்ஞவாஸங் ஸம்பாதே³துங் ந ஸக்கோதீதி வுத்தங் ஹோதி. த⁴ம்மதோ அபேதங் உத்³த⁴ம்மங். அஸப்³ப³ஞ்ஞூ அஸ்ஸாதி தேஸங் அனுரூபஸ்ஸ அஜானநதோ அஸப்³ப³ஞ்ஞூ ப⁴வெய்ய. ‘‘ந, பி⁴க்க²வே, அஸேனாஸனிகேன வஸ்ஸங் உபக³ந்தப்³ப³’’ந்தி (மஹாவ॰ 204) வசனதோ ‘‘சத்தாரோ பன…பே॰… படிக்கி²த்தமேவா’’தி வுத்தங். இத³மேவ வசனங் ஸந்தா⁴ய பாளியம்பி ‘‘அட்ட² மாஸே கோ² மயா தே³வத³த்த ருக்க²மூலஸேனாஸனங் அனுஞ்ஞாத’’ந்தி வுத்தங்.
410. Dasame ye dubbalā honti appathāmā, na sakkonti araññakādīni sevantā dukkhassantaṃ kātuṃ, te sandhāyāha ‘‘bahūnaṃ kulaputtānaṃ maggantarāyāya saṃvattantī’’ti. Adhivāsanakhantisampannoti ‘‘khamo hoti sītassā’’tiādinā vuttasītuṇhādisahanalakkhaṇāya khantiyā samannāgato. Byañjanapadameva paramaṃ assāti padaparamo. Yassa hi puggalassa bahumpi suṇato bahumpi bhaṇato bahumpi dhārayato bahumpi vācayato na tāya jātiyā dhammābhisamayo hoti , ayaṃ ‘‘padaparamo’’ti vuccati. Abhisambhuṇitvāti nipphādetvā. Nābhisambhuṇātīti na sampādeti, araññavāsaṃ sampādetuṃ na sakkotīti vuttaṃ hoti. Dhammato apetaṃ uddhammaṃ. Asabbaññū assāti tesaṃ anurūpassa ajānanato asabbaññū bhaveyya. ‘‘Na, bhikkhave, asenāsanikena vassaṃ upagantabba’’nti (mahāva. 204) vacanato ‘‘cattāro pana…pe… paṭikkhittamevā’’ti vuttaṃ. Idameva vacanaṃ sandhāya pāḷiyampi ‘‘aṭṭha māse kho mayā devadatta rukkhamūlasenāsanaṃ anuññāta’’nti vuttaṃ.
தீஹி கோடீஹீதி தீஹி ஆகாரேஹி, தீஹி காரணேஹீதி அத்தோ². தது³ப⁴யவிமுத்தபரிஸங்கிதந்தி தி³ட்ட²ங் ஸுதந்தி இத³ங் உப⁴யங் அனிஸ்ஸாய ‘‘கிங் நு கோ² இத³ங் பி⁴க்கு²ங் உத்³தி³ஸ்ஸ வதி⁴த்வா ஸம்பாதி³த’’ந்தி கேவலமேவ பரிஸங்கிதங். மச்ச²ப³ந்த⁴னங் ஜாலங், வாகு³ரா மிக³ப³ந்த⁴னீ. கப்பதீதி யதி³ தேஸங் வசனேன ஆஸங்கா உபச்சி²ன்னா ஹோதி, வட்டதி. பவத்தமங்ஸந்தி விக்காயிகமங்ஸங். மங்க³லாதீ³னந்தி ஆதி³-ஸத்³தே³ன ஆஹுனபாஹுனாதி³கே ஸங்க³ண்ஹாதி. பி⁴க்கூ²னங்யேவ அத்தா²யாதி எத்த² அட்டா²னப்பயுத்தோ ஏவ-ஸத்³தோ³, பி⁴க்கூ²னங் அத்தா²ய அகதமேவாதி ஸம்ப³ந்தி⁴தப்³ப³ங். தஸ்மா ‘‘பி⁴க்கூ²னஞ்ச த³ஸ்ஸாம, மங்க³லாதீ³னஞ்ச அத்தா²ய ப⁴விஸ்ஸதீ’’தி மிஸ்ஸெத்வா கதம்பி ந வட்டதீதி வேதி³தப்³ப³ங். கேசி பன ‘‘பி⁴க்கூ²னங்யேவாதி அவதா⁴ரணேன பி⁴க்கூ²னஞ்ச அஞ்ஞேஸஞ்ச அத்தா²ய கதங் வட்டதீ’’தி வத³ந்தி, தங் ந ஸுந்த³ரங். யத்த² ச நிப்³பே³மதிகோ ஹோதீதி பி⁴க்கூ²னங் அத்தா²ய கதேபி ஸப்³பே³ன ஸப்³ப³ங் பரிஸங்கிதாபா⁴வமாஹ. தமேவத்த²ங் ஆவிகாதுங் ‘‘ஸசே பனா’’திஆதி³ வுத்தங். இதரேஸங் வட்டதீதி அஜானந்தானங் வட்டதி, ஜானதோ ஏவெத்த² ஆபத்தி ஹோதீதி. தேயேவாதி யே உத்³தி³ஸ்ஸ கதங், தேயேவ. உத்³தி³ஸகதமங்ஸபரிபோ⁴க³தோ அகப்பியமங்ஸபரிபோ⁴க³ஸ்ஸ விஸேஸங் த³ஸ்ஸேதுங் ‘‘அகப்பியமங்ஸங் பனா’’திஆதி³ வுத்தங். புரிமஸ்மிங் ஸசித்தகா ஆபத்தி, இதரஸ்மிங் அசித்தகா. தேனாஹ ‘‘அகப்பியமங்ஸங் அஜானித்வா பு⁴ஞ்ஜந்தஸ்ஸபி ஆபத்தியேவா’’தி. ‘‘பரிபோ⁴க³காலே புச்சி²த்வா பரிபு⁴ஞ்ஜிஸ்ஸாமீதி வா க³ஹெத்வா புச்சி²த்வா பரிபு⁴ஞ்ஜிதப்³ப³’’ந்தி வசனதோ அகப்பியமங்ஸங் அஜானித்வா க³ண்ஹந்தஸ்ஸ படிக்³க³ஹணேன அனாபத்தி ஸியா. அஜானித்வாபி பு⁴ஞ்ஜந்தஸ்ஸேவ ஹி ஆபத்தி வுத்தா. வத்தந்தி வத³ந்தீதி இமினா ஆபத்தி நத்தீ²தி த³ஸ்ஸேதி.
Tīhi koṭīhīti tīhi ākārehi, tīhi kāraṇehīti attho. Tadubhayavimuttaparisaṅkitanti diṭṭhaṃ sutanti idaṃ ubhayaṃ anissāya ‘‘kiṃ nu kho idaṃ bhikkhuṃ uddissa vadhitvā sampādita’’nti kevalameva parisaṅkitaṃ. Macchabandhanaṃ jālaṃ, vāgurā migabandhanī. Kappatīti yadi tesaṃ vacanena āsaṅkā upacchinnā hoti, vaṭṭati. Pavattamaṃsanti vikkāyikamaṃsaṃ. Maṅgalādīnanti ādi-saddena āhunapāhunādike saṅgaṇhāti. Bhikkhūnaṃyeva atthāyāti ettha aṭṭhānappayutto eva-saddo, bhikkhūnaṃ atthāya akatamevāti sambandhitabbaṃ. Tasmā ‘‘bhikkhūnañca dassāma, maṅgalādīnañca atthāya bhavissatī’’ti missetvā katampi na vaṭṭatīti veditabbaṃ. Keci pana ‘‘bhikkhūnaṃyevāti avadhāraṇena bhikkhūnañca aññesañca atthāya kataṃ vaṭṭatī’’ti vadanti, taṃ na sundaraṃ. Yattha ca nibbematiko hotīti bhikkhūnaṃ atthāya katepi sabbena sabbaṃ parisaṅkitābhāvamāha. Tamevatthaṃ āvikātuṃ ‘‘sace panā’’tiādi vuttaṃ. Itaresaṃ vaṭṭatīti ajānantānaṃ vaṭṭati, jānato evettha āpatti hotīti. Teyevāti ye uddissa kataṃ, teyeva. Uddisakatamaṃsaparibhogato akappiyamaṃsaparibhogassa visesaṃ dassetuṃ ‘‘akappiyamaṃsaṃ panā’’tiādi vuttaṃ. Purimasmiṃ sacittakā āpatti, itarasmiṃ acittakā. Tenāha ‘‘akappiyamaṃsaṃ ajānitvā bhuñjantassapi āpattiyevā’’ti. ‘‘Paribhogakāle pucchitvā paribhuñjissāmīti vā gahetvā pucchitvā paribhuñjitabba’’nti vacanato akappiyamaṃsaṃ ajānitvā gaṇhantassa paṭiggahaṇena anāpatti siyā. Ajānitvāpi bhuñjantasseva hi āpatti vuttā. Vattanti vadantīti iminā āpatti natthīti dasseti.
ஸல்லேகா² வுத்தி ஏதேஸந்தி ஸல்லேக²வுத்தினோ. பா³ஹுலிகோதி ஏகஸ்ஸ ல-காரஸ்ஸ லோபங் கத்வா வுத்தங். கப்பந்தி ஆயுகப்பங். ஸங்க⁴பே⁴த³கோ ஹி ஏகங் கப்பங் அஸீதிபா⁴கே³ கத்வா ததோ ஏகபா⁴க³மத்தங் காலங் நிரயே திட்டெ²ய்யாதி ஆயுகப்பங் ஸந்தா⁴ய ‘‘கப்பங் நிரயம்ஹி பச்சதீ’’தி வுத்தங். கப்பட்ட²கதா²யங் (விப⁴॰ அட்ட²॰ 809) பன ‘‘ஸண்ட²ஹந்தே ஹி கப்பே கப்பவேமஜ்ஜே² வா ஸங்க⁴பே⁴த³ங் கத்வா கப்பவினாஸேயேவ முச்சதி. ஸசேபி ஹி ஸ்வே கப்போ வினஸ்ஸிஸ்ஸதீதி அஜ்ஜ ஸங்க⁴பே⁴த³ங் கரோதி, ஸ்வேவ முச்சதி, ஏகதி³வஸமேவ நிரயே பச்சதீ’’தி வுத்தங். தத்தா²பி கப்பவினாஸேயேவாதி ஆயுகப்பவினாஸேயேவாதி அத்தே² ஸதி நத்தி² விரோதோ⁴. ஸண்ட²ஹந்தேதி இத³ம்பி ‘‘ஸ்வே வினஸ்ஸிஸ்ஸதீ’’தி விய அபூ⁴தபரிகப்பனவஸேன வுத்தங். ‘‘ஏகதி³வஸமேவ நிரயே பச்சதீ’’தி எத்தா²பி ததோ பரங் கப்பாபா⁴வே ஆயுகப்பஸ்ஸபி அபா⁴வதோதி அவிரோத⁴தோ அத்த²யோஜனா த³ட்ட²ப்³பா³. ப்³ரஹ்மங் புஞ்ஞந்தி ஸெட்ட²ங் புஞ்ஞங். கப்பங் ஸக்³க³ம்ஹி மோத³தீதி எத்தா²பி ஆயுகப்பமேவ.
Sallekhā vutti etesanti sallekhavuttino. Bāhulikoti ekassa la-kārassa lopaṃ katvā vuttaṃ. Kappanti āyukappaṃ. Saṅghabhedako hi ekaṃ kappaṃ asītibhāge katvā tato ekabhāgamattaṃ kālaṃ niraye tiṭṭheyyāti āyukappaṃ sandhāya ‘‘kappaṃ nirayamhi paccatī’’ti vuttaṃ. Kappaṭṭhakathāyaṃ (vibha. aṭṭha. 809) pana ‘‘saṇṭhahante hi kappe kappavemajjhe vā saṅghabhedaṃ katvā kappavināseyeva muccati. Sacepi hi sve kappo vinassissatīti ajja saṅghabhedaṃ karoti, sveva muccati, ekadivasameva niraye paccatī’’ti vuttaṃ. Tatthāpi kappavināseyevāti āyukappavināseyevāti atthe sati natthi virodho. Saṇṭhahanteti idampi ‘‘sve vinassissatī’’ti viya abhūtaparikappanavasena vuttaṃ. ‘‘Ekadivasameva niraye paccatī’’ti etthāpi tato paraṃ kappābhāve āyukappassapi abhāvatoti avirodhato atthayojanā daṭṭhabbā. Brahmaṃ puññanti seṭṭhaṃ puññaṃ. Kappaṃ saggamhi modatīti etthāpi āyukappameva.
411. லத்³தி⁴னானாஸங்வாஸகேனாதி பா⁴வப்பதா⁴னோயங் நித்³தே³ஸோ, லத்³தி⁴னானாஸங்வாஸகபா⁴வேனாதி அத்தோ². கம்மனானாஸங்வாஸகேனாதி எத்தா²பி ஏஸேவ நயோ. அஞ்ஞதா² நானாஸங்வாஸகேன ஸஹிதஸ்ஸ ஸமானஸங்வாஸகஸ்ஸபி ஸங்க⁴ஸ்ஸ அஸமானஸங்வாஸகத்தங் ஆபஜ்ஜெய்ய. தத்த² லத்³தி⁴னானாஸங்வாஸகோ நாம உக்கி²த்தானுவத்தகோ. ஸோ ஹி அத்தனோ லத்³தி⁴யா நானாஸங்வாஸகோ ஜாதோதி ‘‘லத்³தி⁴னானாஸங்வாஸகோ’’தி வுச்சதி. கம்மனானாஸங்வாஸகோ நாம உக்கே²பனீயகம்மகதோ. ஸோ ஹி உக்கே²பனீயகம்மவஸேன நானாஸங்வாஸகோ ஹோதீதி ‘‘கம்மனானாஸங்வாஸகோ’’தி வுச்சதி. விரஹிதோதி விமுத்தோ. காயஸாமக்³கீ³தா³னங் தேஸு தேஸு ஸங்க⁴கம்மேஸு ஹத்த²பாஸூபக³மனவஸேன வேதி³தப்³ப³ங்.
411.Laddhinānāsaṃvāsakenāti bhāvappadhānoyaṃ niddeso, laddhinānāsaṃvāsakabhāvenāti attho. Kammanānāsaṃvāsakenāti etthāpi eseva nayo. Aññathā nānāsaṃvāsakena sahitassa samānasaṃvāsakassapi saṅghassa asamānasaṃvāsakattaṃ āpajjeyya. Tattha laddhinānāsaṃvāsako nāma ukkhittānuvattako. So hi attano laddhiyā nānāsaṃvāsako jātoti ‘‘laddhinānāsaṃvāsako’’ti vuccati. Kammanānāsaṃvāsako nāma ukkhepanīyakammakato. So hi ukkhepanīyakammavasena nānāsaṃvāsako hotīti ‘‘kammanānāsaṃvāsako’’ti vuccati. Virahitoti vimutto. Kāyasāmaggīdānaṃ tesu tesu saṅghakammesu hatthapāsūpagamanavasena veditabbaṃ.
‘‘பே⁴தா³ய பரக்கமெய்யா’’தி விஸுங் வுத்தத்தா பே⁴த³னஸங்வத்தனிகஸ்ஸ அதி⁴கரணஸ்ஸ ஸமாதா³ய பக்³க³ண்ஹதோ புப்³பே³பி பக்க²பரியேஸனாதி³வஸேன ஸங்க⁴பே⁴தா³ய பரக்கமந்தஸ்ஸ ஸமனுபா⁴ஸனகம்மங் காதப்³ப³ந்தி வேதி³தப்³ப³ங். இமானி வத்தூ²னீதி அட்டா²ரஸ பே⁴த³கரவத்தூ²னி. கம்மேனாதி அபலோகனாதீ³ஸு சதூஸு கம்மேஸு அஞ்ஞதரேன கம்மேன. உத்³தே³ஸேனாதி பஞ்சஸு பாதிமொக்கு²த்³தே³ஸேஸு அஞ்ஞதரேன உத்³தே³ஸேன. வோஹாரேனாதி தாஹி தாஹி உபபத்தீஹி ‘‘அத⁴ம்மங் த⁴ம்மோ’’திஆதி³அட்டா²ரஸபே⁴த³கரவத்து²தீ³பகேன வோஹாரேன. அனுஸ்ஸாவனாயாதி ‘‘நனு தும்ஹே ஜானாத² மய்ஹங் உச்சாகுலா பப்³ப³ஜிதபா⁴வங் ப³ஹுஸ்ஸுதபா⁴வஞ்ச, மாதி³ஸோ நாம உத்³த⁴ம்மங் உப்³பி³னயங் ஸத்து²ஸாஸனங் கா³ஹெய்யாதி சித்தம்பி உப்பாதே³துங் தும்ஹாகங் யுத்தங், கிங் மய்ஹங் அவீசி நீலுப்பலவனங் விய ஸீதலோ, கிமஹங் அபாயதோ ந பா⁴யாமீ’’திஆதி³னா நயேன கண்ணமூலே வசீபே⁴த³ங் கத்வா அனுஸ்ஸாவனேன. ஸலாகக்³கா³ஹேனாதி ஏவங் அனுஸ்ஸாவெத்வா தேஸங் சித்தங் உபத்த²ம்பெ⁴த்வா அனிவத்தித⁴ம்மே கத்வா ‘‘க³ண்ஹத² இமங் ஸலாக’’ந்தி ஸலாகக்³கா³ஹேன. பஞ்சஹி காரணேஹி ஸங்க⁴பே⁴தோ³ ஹோதீதி எத்த² கம்மமேவ உத்³தே³ஸோ வா ஸங்க⁴பே⁴தே³ பதா⁴னகாரணந்தி வேதி³தப்³ப³ங். வோஹாரானுஸ்ஸாவனஸலாகக்³கா³ஹா பன புப்³ப³பா⁴கா³. அட்டா²ரஸவத்து²தீ³பனவஸஏன ஹி வோஹரந்தேன தத்த² ருசிஜனநத்த²ங் அனுஸ்ஸாவெத்வா ஸலாகாய க³ஹிதாயபி அபி⁴ன்னோவ ஹோதி ஸங்கோ⁴. யதா³ பன ஏவங் சத்தாரோ வா அதிரேகா வா ஸலாகங் க³ஹெத்வா ஆவேணிககம்மங் வா உத்³தே³ஸங் வா கரொந்தி, ததா³ ஸங்கோ⁴ பி⁴ன்னோ நாம ஹோதி. அப்³பு⁴ஸ்ஸிதந்தி அப்³பு⁴க்³க³தங். அச்செ²ய்யாதி விஹரெய்ய, பவத்தெய்யாதி அத்தோ².
‘‘Bhedāya parakkameyyā’’ti visuṃ vuttattā bhedanasaṃvattanikassa adhikaraṇassa samādāya paggaṇhato pubbepi pakkhapariyesanādivasena saṅghabhedāya parakkamantassa samanubhāsanakammaṃ kātabbanti veditabbaṃ. Imāni vatthūnīti aṭṭhārasa bhedakaravatthūni. Kammenāti apalokanādīsu catūsu kammesu aññatarena kammena. Uddesenāti pañcasu pātimokkhuddesesu aññatarena uddesena. Vohārenāti tāhi tāhi upapattīhi ‘‘adhammaṃ dhammo’’tiādiaṭṭhārasabhedakaravatthudīpakena vohārena. Anussāvanāyāti ‘‘nanu tumhe jānātha mayhaṃ uccākulā pabbajitabhāvaṃ bahussutabhāvañca, mādiso nāma uddhammaṃ ubbinayaṃ satthusāsanaṃ gāheyyāti cittampi uppādetuṃ tumhākaṃ yuttaṃ, kiṃ mayhaṃ avīci nīluppalavanaṃ viya sītalo, kimahaṃ apāyato na bhāyāmī’’tiādinā nayena kaṇṇamūle vacībhedaṃ katvā anussāvanena. Salākaggāhenāti evaṃ anussāvetvā tesaṃ cittaṃ upatthambhetvā anivattidhamme katvā ‘‘gaṇhatha imaṃ salāka’’nti salākaggāhena. Pañcahi kāraṇehi saṅghabhedo hotīti ettha kammameva uddeso vā saṅghabhede padhānakāraṇanti veditabbaṃ. Vohārānussāvanasalākaggāhā pana pubbabhāgā. Aṭṭhārasavatthudīpanavasaena hi voharantena tattha rucijananatthaṃ anussāvetvā salākāya gahitāyapi abhinnova hoti saṅgho. Yadā pana evaṃ cattāro vā atirekā vā salākaṃ gahetvā āveṇikakammaṃ vā uddesaṃ vā karonti, tadā saṅgho bhinno nāma hoti. Abbhussitanti abbhuggataṃ. Accheyyāti vihareyya, pavatteyyāti attho.
‘‘லஜ்ஜீ ரக்கி²ஸ்ஸதீ’’தி வசனதோ ஆபத்திப⁴யேன ஆரோசனங் லஜ்ஜீனங்யேவ பா⁴ரோதி ஆஹ ‘‘லஜ்ஜீஹி பி⁴க்கூ²ஹீ’’தி. அலஜ்ஜிஸ்ஸபி அனாரோசெந்தஸ்ஸ ஆபத்தியேவ ‘‘யே பஸ்ஸந்தி, யே ஸுணந்தீ’’தி வசனதோ. ஸமாக³ச்ச²தூதி ஏகீ ப⁴வது. ஏகீபா⁴வோ ச ஸமானலத்³தி⁴வஸேன ஹோதீதி ஆஹ ‘‘ஏகலத்³தி⁴கோ ஹோதூ’’தி. ஸம்பத்தியாதி ஸீலாதி³ஸம்பத்தியா. படினிஸ்ஸஜ்ஜந்தஸ்ஸ அனாபத்திபா⁴வதோ ‘‘ஸொத்தி²பா⁴வோ தஸ்ஸ பி⁴க்கு²னோ’’தி வுத்தங். அப்படினிஸ்ஸஜ்ஜதோ து³க்கடந்தி விஸுங் விஸுங் வத³ந்தானங் க³ணனாய து³க்கடங். பஹொந்தேனாதி க³ந்துங் ஸமத்தே²ன அகி³லானேன. ஸங்க⁴பே⁴த³ஸ்ஸ க³ருகபா⁴வதோ அவஸ்ஸங் கத்தப்³ப³தாத³ஸ்ஸனத்த²ங் ‘‘தூ³ரேபி பா⁴ரோயேவா’’தி வுத்தங், ஆபத்தி பன அத்³த⁴யோஜனப்³ப⁴ந்தரே க³ந்துங் ஸமத்த²ஸ்ஸ அகி³லானஸ்ஸேவ வேதி³தப்³பா³.
‘‘Lajjī rakkhissatī’’ti vacanato āpattibhayena ārocanaṃ lajjīnaṃyeva bhāroti āha ‘‘lajjīhi bhikkhūhī’’ti. Alajjissapi anārocentassa āpattiyeva ‘‘ye passanti, ye suṇantī’’ti vacanato. Samāgacchatūti ekī bhavatu. Ekībhāvo ca samānaladdhivasena hotīti āha ‘‘ekaladdhiko hotū’’ti. Sampattiyāti sīlādisampattiyā. Paṭinissajjantassa anāpattibhāvato ‘‘sotthibhāvo tassa bhikkhuno’’ti vuttaṃ. Appaṭinissajjato dukkaṭanti visuṃ visuṃ vadantānaṃ gaṇanāya dukkaṭaṃ. Pahontenāti gantuṃ samatthena agilānena. Saṅghabhedassa garukabhāvato avassaṃ kattabbatādassanatthaṃ ‘‘dūrepi bhāroyevā’’ti vuttaṃ, āpatti pana addhayojanabbhantare gantuṃ samatthassa agilānasseva veditabbā.
416. அஸமனுபா⁴ஸந்தஸ்ஸாதி கம்மகாரகே கத்துனித்³தே³ஸோதி ஆஹ ‘‘அஸமனுபா⁴ஸியமானஸ்ஸா’’தி. ததியகம்மவாசாய படினிஸ்ஸஜ்ஜந்தோ ஞத்தியா து³க்கடங் த்³வீஹி கம்மவாசாஹி து²ல்லச்சயே ச ஆபஜ்ஜதியேவாதி ஆஹ ‘‘படினிஸ்ஸஜ்ஜந்தஸ்ஸ ஸங்கா⁴தி³ஸேஸேன அனாபத்தீ’’தி. அஸ்ஸாதி தே³வத³த்தஸ்ஸ. கதேன ப⁴விதப்³ப³ந்தி ஸமனுபா⁴ஸனகம்மேன கதேன ப⁴விதப்³ப³ங். அத்தனோ ருசிமத்தேன வதெ³ய்யாதிஆதி³கம்மிகத்தா அப்படினிஸ்ஸஜ்ஜந்தஸ்ஸபி அனாபத்தீதி அதி⁴ப்பாயேன வதெ³ய்ய. அபஞ்ஞத்தே ஸிக்கா²பதே³ ஸமனுபா⁴ஸனகம்மஸ்ஸேவ அபா⁴வதோ ‘‘ந ஹி பஞ்ஞத்தங் ஸிக்கா²பத³ங் வீதிக்கமந்தஸ்ஸா’’தி வுத்தங். ஸிக்கா²பத³ங் பஞ்ஞபெந்தேனேவ ஹி ஸமனுபா⁴ஸனகம்மங் அனுஞ்ஞாதங். உத்³தி³ஸ்ஸ அனுஞ்ஞாததோதி ‘‘அனுஜானாமி, பி⁴க்க²வே, ரோமந்த²கஸ்ஸ ரோமந்த²ன’’ந்திஆதி³ங் (சூளவ॰ 273) உத்³தி³ஸ்ஸ அனுஞ்ஞாதங் ஸந்தா⁴ய வத³ந்தி. அனாபத்தியந்தி அனாபத்திவாரே. ஆபத்திங் ரோபேதப்³போ³தி அனிஸ்ஸஜ்ஜனபச்சயா ஆபன்னபாசித்தியாபத்திங் உக்கே²பனீயகம்மகரணத்த²ங் ஆரோபேதப்³போ³தி அத்தோ².
416.Asamanubhāsantassāti kammakārake kattuniddesoti āha ‘‘asamanubhāsiyamānassā’’ti. Tatiyakammavācāya paṭinissajjanto ñattiyā dukkaṭaṃ dvīhi kammavācāhi thullaccaye ca āpajjatiyevāti āha ‘‘paṭinissajjantassa saṅghādisesena anāpattī’’ti. Assāti devadattassa. Katena bhavitabbanti samanubhāsanakammena katena bhavitabbaṃ. Attano rucimattena vadeyyātiādikammikattā appaṭinissajjantassapi anāpattīti adhippāyena vadeyya. Apaññatte sikkhāpade samanubhāsanakammasseva abhāvato ‘‘na hi paññattaṃ sikkhāpadaṃ vītikkamantassā’’ti vuttaṃ. Sikkhāpadaṃ paññapenteneva hi samanubhāsanakammaṃ anuññātaṃ. Uddissa anuññātatoti ‘‘anujānāmi, bhikkhave, romanthakassa romanthana’’ntiādiṃ (cūḷava. 273) uddissa anuññātaṃ sandhāya vadanti. Anāpattiyanti anāpattivāre. Āpattiṃ ropetabboti anissajjanapaccayā āpannapācittiyāpattiṃ ukkhepanīyakammakaraṇatthaṃ āropetabboti attho.
ஆபத்தியேவ ந ஜாதாதி ஸங்கா⁴தி³ஸேஸாபத்தி ந ஜாதாயேவாதி அத்தோ². ஸா பனேஸாதி ஸா பன ஏஸா அனாபத்தி. திவங்கி³கந்தி காயவாசாசித்தவஸேன திவங்கி³கங், காயவாசாசித்ததோ ஸமுட்டா²தீதி வுத்தங் ஹோதி. ‘‘நப்படினிஸ்ஸஜ்ஜாமீ’’தி ஸஞ்ஞாய அபா⁴வேன முச்சனதோ ஸஞ்ஞாவிமொக்க²ங். ஸசித்தகந்தி ‘‘நப்படினிஸ்ஸஜ்ஜாமீ’’தி ஜானநசித்தேன ஸசித்தகங். பே⁴தா³ய பரக்கமனங், த⁴ம்மகம்மேன ஸமனுபா⁴ஸனங், கம்மவாசாபரியோஸானங், அப்படினிஸ்ஸஜ்ஜனந்தி இமானெத்த² சத்தாரி அங்கா³னி.
Āpattiyeva na jātāti saṅghādisesāpatti na jātāyevāti attho. Sā panesāti sā pana esā anāpatti. Tivaṅgikanti kāyavācācittavasena tivaṅgikaṃ, kāyavācācittato samuṭṭhātīti vuttaṃ hoti. ‘‘Nappaṭinissajjāmī’’ti saññāya abhāvena muccanato saññāvimokkhaṃ. Sacittakanti ‘‘nappaṭinissajjāmī’’ti jānanacittena sacittakaṃ. Bhedāya parakkamanaṃ, dhammakammena samanubhāsanaṃ, kammavācāpariyosānaṃ, appaṭinissajjananti imānettha cattāri aṅgāni.
பட²மஸங்க⁴பே⁴த³ஸிக்கா²பத³வண்ணனா நிட்டி²தா.
Paṭhamasaṅghabhedasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 10. ஸங்க⁴பே⁴த³ஸிக்கா²பத³ங் • 10. Saṅghabhedasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
