| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
10. பட²மஸங்க⁴பே⁴த³ஸிக்கா²பத³வண்ணனா
10. Paṭhamasaṅghabhedasikkhāpadavaṇṇanā
409. ‘‘வஜ்ஜங் ந பு²ஸெய்யா’’தி ச பாடோ².
409. ‘‘Vajjaṃ na phuseyyā’’ti ca pāṭho.
410. தேஸங் அனுரூபாஜானநதோ அஸப்³ப³ஞ்ஞூ அஸ்ஸ. ‘‘ந, பி⁴க்க²வே, அஸேனாஸனிகேன வஸ்ஸங் உபக³ந்தப்³ப³’’ந்தி (மஹாவ॰ 204) வுத்தத்தா படிக்கி²த்தமேவ. திகோடிபரிஸுத்³த⁴ந்தி பரஸ்ஸ பாபபஸங்க³னிவாரணத்த²ங் வுத்தங், ந படிச்சகம்மனிவாரணத்த²ங் கோடீஹீதி ஆகாரேஹி. பரிஸுத்³த⁴ந்தி விமுத்தங். த³ஸஹி லேஸேஹி உத்³தி³ஸ்ஸ கதங் ஸமணா பரிபு⁴ஞ்ஜந்தி, அஸ்ஸமணா இமேதி ஸாஸனஸ்ஸ க³ரஹபா⁴வோ ஆக³ச்செ²ய்ய , க³ரஹபச்சயா லோகோ வா அபுஞ்ஞங் அரியூபவாத³ங் பஸவெய்ய, தேஹி விமுத்தந்தி அத்தோ². வாகு³ரந்தி மிக³ஜாலங். அத்தனோ அத்தா²ய வாதிஆதி³னா பரேஸங் அத்தா²ய கதே கப்பியபா⁴வங் த³ஸ்ஸெத்வா பி⁴க்கூ²னஞ்ச அஞ்ஞேஸஞ்ச அத்தா²ய கதே தங் த³ஸ்ஸேதுங் ‘‘மதானங் பேதகிச்சத்தா²யா’’திஆதி³மாஹ.
410.Tesaṃ anurūpājānanato asabbaññū assa. ‘‘Na, bhikkhave, asenāsanikena vassaṃ upagantabba’’nti (mahāva. 204) vuttattā paṭikkhittameva. Tikoṭiparisuddhanti parassa pāpapasaṅganivāraṇatthaṃ vuttaṃ, na paṭiccakammanivāraṇatthaṃ koṭīhīti ākārehi. Parisuddhanti vimuttaṃ. Dasahi lesehi uddissa kataṃ samaṇā paribhuñjanti, assamaṇā imeti sāsanassa garahabhāvo āgaccheyya , garahapaccayā loko vā apuññaṃ ariyūpavādaṃ pasaveyya, tehi vimuttanti attho. Vāguranti migajālaṃ. Attano atthāya vātiādinā paresaṃ atthāya kate kappiyabhāvaṃ dassetvā bhikkhūnañca aññesañca atthāya kate taṃ dassetuṃ ‘‘matānaṃ petakiccatthāyā’’tiādimāha.
யங் யங் ஹீதிஆதி³ தஸ்ஸ காரணஸ்ஸ த³ஸ்ஸனத்த²ங் வுத்தங். புன பஞ்சன்னங் ஸஹத⁴ம்மிகானங் அத்தா²ய கதங் ந கப்பதீதி வுத்தந்தி கிர த⁴ம்மஸிரித்தே²ரோ. க³ண்டி²பதே³ ‘‘பி⁴க்கூ²னமேவ ஸுத்³தா⁴னங் அத்தா²ய கதங் ந வட்டதீ’’தி லிகி²தங். அபரேஹி பன ‘‘மதானங் பேதகிச்சத்தா²யாதிஆதி³னா வுத்தேபி கப்பதி, பி⁴க்கூ²னங்யேவ அத்தா²யாதி இமினா ‘பி⁴க்கூ²னம்பி த³த்வா மயங் பு⁴ஞ்ஜிஸ்ஸாமா’தி கதம்பி வுத்தங். புன ‘பஞ்சஸு ஏகங் உத்³தி³ஸ்ஸகதங் இதரேஸங் ந கப்பதீ’தி த³ஸ்ஸனத்த²ங் ‘பஞ்சஸு ஹி ஸஹத⁴ம்மிகேஸூதிஆதி³ வுத்த’ந்தி வத³ந்தீ’’தி வுத்தங். அஞ்ஞதரஸ்மிங் பன க³ண்டி²பதே³ ‘‘அம்ஹாகந்தி ச ராஜயுத்தாதீ³னந்தி ச வுத்தே வட்டதீதி வத்வா ‘தும்ஹாக’ந்தி அவத்வா ‘பேதகிச்சத்தா²யாதி வுத்தேபி வட்டதீ’தி ச த³ஸ்ஸெத்வா ஸப்³ப³த்த² வுத்தானங், ஆதி³ஸத்³தே³ன ஸங்க³ஹிதானஞ்ச லக்க²ணங் ட²பெந்தேன ‘பி⁴க்கூ²னங்யேவா’திஆதி³ வுத்தங். தத்த² ‘பி⁴க்கூ²னங் உத்³தி³ட்டே² ஏவாதி அதி⁴ப்பாயேனா’தி வுத்தங். ந ‘தும்ஹாகங், அம்ஹாகஞ்சாதி வுத்தே அனாபத்தீ’தி த³ஸ்ஸனத்த²ங். கஸ்மா? மிஸ்ஸகவாரஸ்ஸ அபா⁴வா. லக்க²ணங் நாம வுத்தானங், வுத்தஸதி³ஸானஞ்ச ஹோதி. ‘ஸசே பேதகிச்சத்தா²யாதி வுத்தட்டா²னே பி⁴க்கூ²னங் போ⁴ஜனங் ஸந்தா⁴ய கரொந்தீ’தி வத³ந்தி மஹாஅட்ட²கதா²யஞ்ச ‘தஸ்மிங் வாரே ச ந தும்ஹாகந்தி வுத்தே வட்டதீ’தி வுத்தத்தா. தேனேவ இதா⁴பி ‘பேதகிச்சத்தா²ய, மங்க³லாதீ³னங் வா அத்தா²ய கதேபி ஏஸேவ நயோ’தி புப்³பே³ வுத்தத்த²வஸேன வுத்தங். ‘அவதா⁴ரணத்தே²ன மிஸ்ஸகே வட்டதீ’தி சே? ‘கப்பியமங்ஸஸ்ஸ ஹி படிக்³க³ஹணே ஆபத்தி நத்தீ²’தி வசனேன அகப்பியபடிக்³க³ஹணே ஆபத்தீதி ஆபன்னங், ‘தஞ்ச க³ஹேதப்³ப³ங் ஸியா’தி படிக்கி²பிதப்³பா³’’தி வுத்தங், தங் ஸுந்த³ரங் விய தி³ஸ்ஸதி, விசாரெத்வா க³ஹேதப்³ப³ங். யத்த² சாதி பி⁴க்கூ²னங் அத்தா²ய கதேபி. தமத்த²ங் ஆவி காதுங் ‘‘ஸசே பனா’’திஆதி³ வுத்தங் . எத்த² பன ‘‘பி⁴க்கு²னீனங் து³க்கடங், இதரேஸங் த³ண்ட³கம்மவத்தூ²’’தி வத³ந்தி. கப்பங் நிரயம்ஹீதி அஸங்க்²யெய்யகப்பங். விவட்டட்டா²யிகாலேயேவ ஸங்க⁴பே⁴தோ³ ஹோதீதி. கப்பந்தி ஆயுகப்பங்.
Yaṃ yaṃ hītiādi tassa kāraṇassa dassanatthaṃ vuttaṃ. Puna pañcannaṃ sahadhammikānaṃ atthāya kataṃ na kappatīti vuttanti kira dhammasiritthero. Gaṇṭhipade ‘‘bhikkhūnameva suddhānaṃ atthāya kataṃ na vaṭṭatī’’ti likhitaṃ. Aparehi pana ‘‘matānaṃ petakiccatthāyātiādinā vuttepi kappati, bhikkhūnaṃyeva atthāyāti iminā ‘bhikkhūnampi datvā mayaṃ bhuñjissāmā’ti katampi vuttaṃ. Puna ‘pañcasu ekaṃ uddissakataṃ itaresaṃ na kappatī’ti dassanatthaṃ ‘pañcasu hi sahadhammikesūtiādi vutta’nti vadantī’’ti vuttaṃ. Aññatarasmiṃ pana gaṇṭhipade ‘‘amhākanti ca rājayuttādīnanti ca vutte vaṭṭatīti vatvā ‘tumhāka’nti avatvā ‘petakiccatthāyāti vuttepi vaṭṭatī’ti ca dassetvā sabbattha vuttānaṃ, ādisaddena saṅgahitānañca lakkhaṇaṃ ṭhapentena ‘bhikkhūnaṃyevā’tiādi vuttaṃ. Tattha ‘bhikkhūnaṃ uddiṭṭhe evāti adhippāyenā’ti vuttaṃ. Na ‘tumhākaṃ, amhākañcāti vutte anāpattī’ti dassanatthaṃ. Kasmā? Missakavārassa abhāvā. Lakkhaṇaṃ nāma vuttānaṃ, vuttasadisānañca hoti. ‘Sace petakiccatthāyāti vuttaṭṭhāne bhikkhūnaṃ bhojanaṃ sandhāya karontī’ti vadanti mahāaṭṭhakathāyañca ‘tasmiṃ vāre ca na tumhākanti vutte vaṭṭatī’ti vuttattā. Teneva idhāpi ‘petakiccatthāya, maṅgalādīnaṃ vā atthāya katepi eseva nayo’ti pubbe vuttatthavasena vuttaṃ. ‘Avadhāraṇatthena missake vaṭṭatī’ti ce? ‘Kappiyamaṃsassa hi paṭiggahaṇe āpatti natthī’ti vacanena akappiyapaṭiggahaṇe āpattīti āpannaṃ, ‘tañca gahetabbaṃ siyā’ti paṭikkhipitabbā’’ti vuttaṃ, taṃ sundaraṃ viya dissati, vicāretvā gahetabbaṃ. Yattha cāti bhikkhūnaṃ atthāya katepi. Tamatthaṃ āvi kātuṃ ‘‘sace panā’’tiādi vuttaṃ . Ettha pana ‘‘bhikkhunīnaṃ dukkaṭaṃ, itaresaṃ daṇḍakammavatthū’’ti vadanti. Kappaṃ nirayamhīti asaṅkhyeyyakappaṃ. Vivaṭṭaṭṭhāyikāleyeva saṅghabhedo hotīti. Kappanti āyukappaṃ.
411. குஸலந்தி கே²மங். ஆபத்திப⁴யா கதா லஜ்ஜீஹீதி எத்த² ஆபத்திப⁴யேன அவஸ்ஸங் ஆரோசெந்தீதி த³ஸ்ஸனத்த²ங் ‘‘லஜ்ஜீ ரக்கி²ஸ்ஸதீ’’தி (விஸுத்³தி⁴॰ 1.42; பாரா॰ அட்ட²॰ 1.45) போராணவசனஸ்ஸானுரூபதோ ‘‘அஞ்ஞேஹி லஜ்ஜீஹீ’’தி வுத்தங். அலஜ்ஜிஸ்ஸபி அனாரோசெந்தஸ்ஸ ஆபத்தியேவ ‘‘யே பஸ்ஸந்தி யே ஸுணந்தீ’’தி வசனதோ.
411.Kusalanti khemaṃ. Āpattibhayā katā lajjīhīti ettha āpattibhayena avassaṃ ārocentīti dassanatthaṃ ‘‘lajjī rakkhissatī’’ti (visuddhi. 1.42; pārā. aṭṭha. 1.45) porāṇavacanassānurūpato ‘‘aññehi lajjīhī’’ti vuttaṃ. Alajjissapi anārocentassa āpattiyeva ‘‘ye passanti ye suṇantī’’ti vacanato.
416. அஸமனுபா⁴ஸந்தஸ்ஸாதி கம்மகாரகே கத்துனித்³தே³ஸோ, ஸமனுபா⁴ஸனகம்மங் அகரியமானஸ்ஸாதி அத்தோ². ஓதி³ஸ்ஸ அனுஞ்ஞாதோ நாம உம்மத்தககி²த்தசித்தவேத³னட்டாதி³கோ ‘‘அனாபத்தி ஆதி³கம்மிகஸ்ஸா’’தி அரிட்ட²ஸிக்கா²பதே³ ஆக³தத்தா அத்தீ²தி சே? யம்பீதிஆதி³. ஸா பனேஸா அனாபத்தி. ஸோ வுச்சதீதி தத்த² ஆக³தோபி ஸகம்மப்³யாவடோபி ஏவங் வுச்சதி. ஏதேனுபாயேனாதி அஸமனுபா⁴ஸந்தஸ்ஸ ச ஆதி³கம்மிகஸ்ஸ ச வுத்தத்த²வஸேன. ட²பெத்வா அரிட்ட²ஸிக்கா²பத³ந்தி தத்த² ஆதி³கம்மிகபதா³பா⁴வா.
416.Asamanubhāsantassāti kammakārake kattuniddeso, samanubhāsanakammaṃ akariyamānassāti attho. Odissa anuññāto nāma ummattakakhittacittavedanaṭṭādiko ‘‘anāpatti ādikammikassā’’ti ariṭṭhasikkhāpade āgatattā atthīti ce? Yampītiādi. Sā panesā anāpatti. So vuccatīti tattha āgatopi sakammabyāvaṭopi evaṃ vuccati. Etenupāyenāti asamanubhāsantassa ca ādikammikassa ca vuttatthavasena. Ṭhapetvā ariṭṭhasikkhāpadanti tattha ādikammikapadābhāvā.
திவங்கி³கந்தி எத்த² வாசாய ஏவ படினிஸ்ஸஜ்ஜந்தஸ்ஸ ஒட்ட²சலனாதி³காயவிஞ்ஞத்தி ஹோதி, தஸ்மா து³வித⁴ம்பி விஞ்ஞத்திங் கதெ²ந்தஸ்ஸ ஹோதி. வசீபே⁴த³ங் காதுங் அஸக்கொந்தஸ்ஸ காயவிகாரங் கரொந்தஸ்ஸ அனாபத்தியா ப⁴விதப்³ப³ங். கஸ்மா? திவங்கே³ஸு ஏகஸ்ஸ பரிஹீனத்தா, தஸ்மா திவங்க³பா⁴வோ ஆபத்தியா, அங்க³ஹானிபா⁴வோ அனாபத்தியாதி க³ஹேதப்³ப³ங். எத்த² ஸியா – யதி³ அங்க³ஹானிபா⁴வேன அனாபத்தி, ஏவங் ஸந்தேபி விகாரங் அகத்வா சித்தேனேவ விஸ்ஸஜ்ஜெந்தஸ்ஸ அனாபத்தியா ப⁴விதப்³ப³ந்தி? தங் ந, கஸ்மா? அட்ட²கதா²யங் ‘‘காயவிகாரங் வா வசீபே⁴த³ங் வா அகரொந்தஸ்ஸேவ பன ஆபஜ்ஜனதோ அகிரிய’’ந்தி ஹி வுத்தங், ‘‘சித்தங் வா அனுப்பாதெ³ந்தஸ்ஸ வா’’தி ந வுத்தங், தஸ்மா சித்தஞ்ச நாம விஞ்ஞத்திபடிப³த்³த⁴ங் ஏவாதி விஸுங் அங்க³பா⁴வேனேவ வுத்தத்தா ஜானிதப்³ப³ந்தி சே? தங் ந, த்³வின்னங்யேவ அகிரியாதி, தஸ்மா சித்தேன விஸ்ஸஜ்ஜெந்தஸ்ஸாபி ஆபத்தி விய தி³ஸ்ஸதி, உபபரிக்கி²த்வா க³ஹேதப்³ப³ங். தத்த² ‘‘அகுஸலசித்த’’ந்தி வுத்தந்தி சே? ‘‘சித்தபா³ஹுல்லதோ வுத்த’’ந்தி வத³ந்தி. தேபி கிர பா³ஹுல்லதோ வத³ந்தி.
Tivaṅgikanti ettha vācāya eva paṭinissajjantassa oṭṭhacalanādikāyaviññatti hoti, tasmā duvidhampi viññattiṃ kathentassa hoti. Vacībhedaṃ kātuṃ asakkontassa kāyavikāraṃ karontassa anāpattiyā bhavitabbaṃ. Kasmā? Tivaṅgesu ekassa parihīnattā, tasmā tivaṅgabhāvo āpattiyā, aṅgahānibhāvo anāpattiyāti gahetabbaṃ. Ettha siyā – yadi aṅgahānibhāvena anāpatti, evaṃ santepi vikāraṃ akatvā citteneva vissajjentassa anāpattiyā bhavitabbanti? Taṃ na, kasmā? Aṭṭhakathāyaṃ ‘‘kāyavikāraṃ vā vacībhedaṃ vā akarontasseva pana āpajjanato akiriya’’nti hi vuttaṃ, ‘‘cittaṃ vā anuppādentassa vā’’ti na vuttaṃ, tasmā cittañca nāma viññattipaṭibaddhaṃ evāti visuṃ aṅgabhāveneva vuttattā jānitabbanti ce? Taṃ na, dvinnaṃyeva akiriyāti, tasmā cittena vissajjentassāpi āpatti viya dissati, upaparikkhitvā gahetabbaṃ. Tattha ‘‘akusalacitta’’nti vuttanti ce? ‘‘Cittabāhullato vutta’’nti vadanti. Tepi kira bāhullato vadanti.
பட²மஸங்க⁴பே⁴த³ஸிக்கா²பத³வண்ணனா நிட்டி²தா.
Paṭhamasaṅghabhedasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 10. ஸங்க⁴பே⁴த³ஸிக்கா²பத³ங் • 10. Saṅghabhedasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
