| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
10. பட²மஸங்க⁴பே⁴த³ஸிக்கா²பத³வண்ணனா
10. Paṭhamasaṅghabhedasikkhāpadavaṇṇanā
410. த³ஸமே ப³ஹூனந்தி து³ப்³ப³லதாய அரஞ்ஞாதி³ஸேவாய சித்தங் ஸமாஹிதங் காதுங் அஸக்கொந்தானங். து³க்க²ஸ்ஸந்தகிரியாய தஸ்மிங் அத்தபா⁴வே பு³த்³த⁴வசனக்³க³ஹணதா⁴ரணாதி³ஸங்கா²தங் ப்³யஞ்ஜனபத³மேவ பரமங் அஸ்ஸ, ந மக்³க³லாபோ⁴தி பத³பரமோ. அபி⁴ஸம்பு⁴ணித்வாதி நிப்பா²தெ³த்வா. த⁴ம்மதோ அபேதங் உத்³த⁴ம்மங். படிக்கி²த்தமேவாதி ‘‘ந, பி⁴க்க²வே, அஸேனாஸனிகேன வஸ்ஸங் உபக³ந்தப்³ப³’’ந்தி (மஹாவ॰ 204) வசனதோ வுத்தங், இத³மேவ வசனங் ஸந்தா⁴ய பாளியம்பி ‘‘அட்ட² மாஸே’’திஆதி³ (பாரா॰ 409) வுத்தங்.
410. Dasame bahūnanti dubbalatāya araññādisevāya cittaṃ samāhitaṃ kātuṃ asakkontānaṃ. Dukkhassantakiriyāya tasmiṃ attabhāve buddhavacanaggahaṇadhāraṇādisaṅkhātaṃ byañjanapadameva paramaṃ assa, na maggalābhoti padaparamo. Abhisambhuṇitvāti nipphādetvā. Dhammato apetaṃ uddhammaṃ. Paṭikkhittamevāti ‘‘na, bhikkhave, asenāsanikena vassaṃ upagantabba’’nti (mahāva. 204) vacanato vuttaṃ, idameva vacanaṃ sandhāya pāḷiyampi ‘‘aṭṭha māse’’tiādi (pārā. 409) vuttaṃ.
தீஹி கோடீஹீதி அஸுத்³த⁴மூலேஹி. எத்த² ச பி⁴க்கூ²னங் சதூஸு குலேஸு பக்கபிண்டி³யாலோபபோ⁴ஜனநிஸ்ஸிததாய, மச்ச²மங்ஸபோ⁴ஜனவிரஹிதஸ்ஸ ச குலஸ்ஸ து³ல்லப⁴தாய தத்த² லத்³தே⁴ஸு ப⁴த்தப்³யஞ்ஜனேஸு மச்ச²மங்ஸஸங்ஸக்³க³ஸங்காய, து³ன்னிவாரணதாய ச பி⁴க்கூ²னங் ஸரீரயாபனம்பி ந ஸியாதி ப⁴க³வதா மச்ச²மங்ஸங் ஸப்³ப³தா² அப்படிக்கி²பித்வா தீஹி கோடீஹி அபரிஸுத்³த⁴மேவ படிக்கி²த்தங். யதி³ ஹி தங் ப⁴க³வா ஸப்³ப³தா² படிக்கி²பெய்ய, பி⁴க்கூ² மரமானாபி மச்சா²தி³ஸங்ஸக்³க³ஸங்கிதங் ப⁴த்தங் ந பு⁴ஞ்ஜெய்யுங், ததோ தண்டு³லத⁴ஞ்ஞாதி³ங் படிக்³க³ஹெத்வா நித³ஹித்வா ஸயங் பசித்வா பு⁴ஞ்ஜிதுங் தது³பகரணபூ⁴தங் தா³ஸிதா³ஸங், உது³க்க²லமுஸலாதி³கஞ்ச பி⁴க்கூ²னங் பத்தாதி³ விய அவஸ்ஸங் க³ஹேதுங் அனுஜானிதப்³ப³ங் ஸியாதி தித்தி²யானங் விய க³ஹட்டா²வாஸோ ஏவ ஸியா, ந பி⁴க்கு²ஆவாஸோதி வேதி³தப்³ப³ங். ஜாலங் மச்ச²ப³ந்த⁴னங். வாகு³ரா மிக³ப³ந்த⁴னீ. கப்பதீதி யதி³ தேஸங் வசனேன ஸங்கா ந வத்ததி, வட்டதி, ந தங் வசனங் லேஸகப்பங் காதுங் வட்டதி. தேனேவ வக்க²தி ‘‘யத்த² ச நிப்³பே³மதிகோ ஹோதி, தங் ஸப்³ப³ங் கப்பதீ’’தி.
Tīhi koṭīhīti asuddhamūlehi. Ettha ca bhikkhūnaṃ catūsu kulesu pakkapiṇḍiyālopabhojananissitatāya, macchamaṃsabhojanavirahitassa ca kulassa dullabhatāya tattha laddhesu bhattabyañjanesu macchamaṃsasaṃsaggasaṅkāya, dunnivāraṇatāya ca bhikkhūnaṃ sarīrayāpanampi na siyāti bhagavatā macchamaṃsaṃ sabbathā appaṭikkhipitvā tīhi koṭīhi aparisuddhameva paṭikkhittaṃ. Yadi hi taṃ bhagavā sabbathā paṭikkhipeyya, bhikkhū maramānāpi macchādisaṃsaggasaṅkitaṃ bhattaṃ na bhuñjeyyuṃ, tato taṇḍuladhaññādiṃ paṭiggahetvā nidahitvā sayaṃ pacitvā bhuñjituṃ tadupakaraṇabhūtaṃ dāsidāsaṃ, udukkhalamusalādikañca bhikkhūnaṃ pattādi viya avassaṃ gahetuṃ anujānitabbaṃ siyāti titthiyānaṃ viya gahaṭṭhāvāso eva siyā, na bhikkhuāvāsoti veditabbaṃ. Jālaṃ macchabandhanaṃ. Vāgurā migabandhanī. Kappatīti yadi tesaṃ vacanena saṅkā na vattati, vaṭṭati, na taṃ vacanaṃ lesakappaṃ kātuṃ vaṭṭati. Teneva vakkhati ‘‘yattha ca nibbematiko hoti, taṃ sabbaṃ kappatī’’ti.
பவத்தமங்ஸந்தி ஆபணாதீ³ஸு பவத்தங் விக்காயிகங் மதமங்ஸங். பி⁴க்கூ²னங்யேவ அத்தா²ய அகதந்தி எத்த² அட்டா²னப்பயுத்தோ ஏவ-ஸத்³தோ³, பி⁴க்கூ²னங் அத்தா²ய அகதமேவாதி ஸம்ப³ந்தி⁴தப்³ப³ங், தஸ்மா பி⁴க்கூ²னஞ்ச மங்க³லாதீ³னஞ்சாதி மிஸ்ஸெத்வா கதம்பி ந வட்டதீதி வேதி³தப்³ப³ங். கேசி பன யதா²டி²தவஸேன அவதா⁴ரணங் க³ஹெத்வா ‘‘வட்டதீ’’தி வத³ந்தி, தங் ந ஸுந்த³ரங். ‘‘வத்த’’ந்தி இமினா ஆபத்தி நத்தீ²தி த³ஸ்ஸேதி.
Pavattamaṃsanti āpaṇādīsu pavattaṃ vikkāyikaṃ matamaṃsaṃ. Bhikkhūnaṃyeva atthāya akatanti ettha aṭṭhānappayutto eva-saddo, bhikkhūnaṃ atthāya akatamevāti sambandhitabbaṃ, tasmā bhikkhūnañca maṅgalādīnañcāti missetvā katampi na vaṭṭatīti veditabbaṃ. Keci pana yathāṭhitavasena avadhāraṇaṃ gahetvā ‘‘vaṭṭatī’’ti vadanti, taṃ na sundaraṃ. ‘‘Vatta’’nti iminā āpatti natthīti dasseti.
கப்பந்தி அஸங்கெ²ய்யகப்பங், ‘‘ஆயுகப்ப’’ந்திபி (ஸாரத்த²॰ டீ॰ 2.410) கேசி. மஹாகப்பஸ்ஸ ஹி சதுத்த²பா⁴கோ³ அஸங்கெ²ய்யகப்போ, ததோ வீஸதிமோ பா⁴கோ³ ஸங்க⁴பே⁴த³கஸ்ஸ ஆயுகப்பந்தி வத³ந்தி, தங் அட்ட²கதா²ஸு கப்பட்ட²கதா²ய ந ஸமேதி ‘‘கப்பவினாஸே ஏவ முச்சதீ’’திஆதி³ (விப⁴॰ அட்ட²॰ 809) வசனதோ. ப்³ரஹ்மங் புஞ்ஞந்தி ஸெட்ட²ங் புஞ்ஞங். கப்பங் ஸக்³க³ம்ஹீதி எத்த² படிஸந்தி⁴பரம்பராய கப்பட்ட²தா வேதி³தப்³பா³.
Kappanti asaṅkheyyakappaṃ, ‘‘āyukappa’’ntipi (sārattha. ṭī. 2.410) keci. Mahākappassa hi catutthabhāgo asaṅkheyyakappo, tato vīsatimo bhāgo saṅghabhedakassa āyukappanti vadanti, taṃ aṭṭhakathāsu kappaṭṭhakathāya na sameti ‘‘kappavināse eva muccatī’’tiādi (vibha. aṭṭha. 809) vacanato. Brahmaṃ puññanti seṭṭhaṃ puññaṃ. Kappaṃ saggamhīti ettha paṭisandhiparamparāya kappaṭṭhatā veditabbā.
411. லத்³தி⁴னானாஸங்வாஸகேனாதி உக்கி²த்தானுவத்தகபா⁴வேன பா⁴வப்பதா⁴னத்தா நித்³தே³ஸஸ்ஸ. கம்மனானாஸங்வாஸகேனாதி உக்கி²த்தபா⁴வேன. ‘‘பே⁴தா³ய பரக்கமெய்யா’’தி விஸுங் வுத்தத்தா பே⁴த³னஸங்வத்தனிகஸ்ஸ அதி⁴கரணஸ்ஸ ஸமாதா³ய பக்³க³ண்ஹனதோ புப்³பே³பி பக்க²பரியேஸனாதி³வஸேன ஸங்க⁴பே⁴தா³ய பரக்கமந்தஸ்ஸ ஸமனுபா⁴ஸனகம்மங் காதுங் வட்டதீதி வேதி³தப்³ப³ங். யோபி சாயங் ஸங்க⁴பே⁴தோ³ ஹோதீதி ஸம்ப³ந்தோ⁴.
411.Laddhinānāsaṃvāsakenāti ukkhittānuvattakabhāvena bhāvappadhānattā niddesassa. Kammanānāsaṃvāsakenāti ukkhittabhāvena. ‘‘Bhedāya parakkameyyā’’ti visuṃ vuttattā bhedanasaṃvattanikassa adhikaraṇassa samādāya paggaṇhanato pubbepi pakkhapariyesanādivasena saṅghabhedāya parakkamantassa samanubhāsanakammaṃ kātuṃ vaṭṭatīti veditabbaṃ. Yopi cāyaṃ saṅghabhedo hotīti sambandho.
கம்மேனாதி அபலோகனாதி³னா. உத்³தே³ஸேனாதி பாதிமொக்கு²த்³தே³ஸேன. வோஹாரேனாதி தாஹி தாஹி உபபத்தீஹி ‘‘அத⁴ம்மங் த⁴ம்மோ’’திஆதி³னா (அ॰ நி॰ 3.10-39, 42; சூளவ॰ 352) வோஹாரேன, பரேஸங் பஞ்ஞாபனேனாதி அத்தோ². அனுஸாவனாயாதி அத்தனோ லத்³தி⁴யா க³ஹணத்த²மேவ அனு புனப்புனங் கண்ணமூலே மந்தஸாவனாய, கத²னேனாதி அத்தோ². ஸலாகக்³கா³ஹேனாதி ஏவங் அனுஸாவனாய தேஸங் சித்தங் உபத்த²ம்பெ⁴த்வா அத்தனோ பக்கே² பவிட்ட²பா⁴வஸ்ஸ ஸஞ்ஞாணத்த²ங் ‘‘க³ண்ஹத² இமங் ஸலாக’’ந்தி ஸலாகக்³கா³ஹேன. எத்த² ச கம்மமேவ, உத்³தே³ஸோ வா ஸங்க⁴பே⁴தே³ பதா⁴னங் காரணங், வோஹாராத³யோ பன ஸங்க⁴பே⁴த³ஸ்ஸ புப்³ப³பா⁴கா³தி வேதி³தப்³பா³. அப்³பு⁴ஸ்ஸிதந்தி அப்³பு⁴க்³க³தங். அச்செ²ய்யாதி விஹரெய்ய.
Kammenāti apalokanādinā. Uddesenāti pātimokkhuddesena. Vohārenāti tāhi tāhi upapattīhi ‘‘adhammaṃ dhammo’’tiādinā (a. ni. 3.10-39, 42; cūḷava. 352) vohārena, paresaṃ paññāpanenāti attho. Anusāvanāyāti attano laddhiyā gahaṇatthameva anu punappunaṃ kaṇṇamūle mantasāvanāya, kathanenāti attho. Salākaggāhenāti evaṃ anusāvanāya tesaṃ cittaṃ upatthambhetvā attano pakkhe paviṭṭhabhāvassa saññāṇatthaṃ ‘‘gaṇhatha imaṃ salāka’’nti salākaggāhena. Ettha ca kammameva, uddeso vā saṅghabhede padhānaṃ kāraṇaṃ, vohārādayo pana saṅghabhedassa pubbabhāgāti veditabbā. Abbhussitanti abbhuggataṃ. Accheyyāti vihareyya.
‘‘லஜ்ஜீ ரக்கி²ஸ்ஸதீ’’தி (விஸுத்³தி⁴॰ 1.42; பாரா॰ அட்ட²॰ 1.45) வசனதோ ஆபத்திப⁴யேன ஆரோசனங் லஜ்ஜீனங் ஏவ பா⁴ரோதி ஆஹ ‘‘லஜ்ஜீஹி பி⁴க்கூ²ஹீ’’தி, அலஜ்ஜிஸ்ஸபி அனாரோசெந்தஸ்ஸ ஆபத்தியேவ. அப்படினிஸ்ஸஜ்ஜதோ து³க்கடந்தி விஸுங் விஸுங் வத³ந்தானங் க³ணனாய து³க்கடங். பஹொந்தேனாதி க³ந்துங் ஸமத்தே²ன, இச்ச²ந்தேனாதி அத்தோ². ஆபத்தி பன அட்³ட⁴யோஜனப்³ப⁴ந்தரேனேவ அகி³லானஸ்ஸ வஸேன வேதி³தப்³பா³.
‘‘Lajjī rakkhissatī’’ti (visuddhi. 1.42; pārā. aṭṭha. 1.45) vacanato āpattibhayena ārocanaṃ lajjīnaṃ eva bhāroti āha ‘‘lajjīhi bhikkhūhī’’ti, alajjissapi anārocentassa āpattiyeva. Appaṭinissajjato dukkaṭanti visuṃ visuṃ vadantānaṃ gaṇanāya dukkaṭaṃ. Pahontenāti gantuṃ samatthena, icchantenāti attho. Āpatti pana aḍḍhayojanabbhantareneva agilānassa vasena veditabbā.
416. ஞத்தியாதீ³ஹி து³க்கடாதி³ஸப்³பா⁴வங் ஸந்தா⁴ய ‘‘ஸங்கா⁴தி³ஸேஸேன அனாபத்தீ’’தி வுத்தங். அஸ்ஸாதி தே³வத³த்தஸ்ஸ. அபஞ்ஞத்தே ஸிக்கா²பதே³ ஸமனுபா⁴ஸனகம்மஸ்ஸேவ அபா⁴வதோ ‘‘ந ஹி பஞ்ஞத்தங் ஸிக்கா²பத³ங் வீதிக்கமந்தஸ்ஸா’’தி வுத்தங். ஸிக்கா²பத³ங் பஞ்ஞபெந்தேனேவ ஹி ஸமனுபா⁴ஸனகம்மங் அனுஞ்ஞாதங். உத்³தி³ஸ்ஸ அனுஞ்ஞாததோதி ‘‘அனுஜானாமி, பி⁴க்க²வே, ரோமந்த²கஸ்ஸ ரோமந்த²ன’’ந்திஆதி³ங் (சூளவ॰ 273) உத்³தி³ஸ்ஸானுஞ்ஞாதங் ஸந்தா⁴ய வத³தி. அனாபத்தியந்தி அனாபத்திவாரே. ஆபத்திங் ரோபேதப்³போ³தி ஸமனுபா⁴ஸனாய பாசித்தியஆபத்திங் ரோபேதப்³போ³. ஆபத்தியேவ ந ஜாதாதி ஸங்கா⁴தி³ஸேஸாபத்தி ந ஜாதா ஏவ.
416. Ñattiyādīhi dukkaṭādisabbhāvaṃ sandhāya ‘‘saṅghādisesena anāpattī’’ti vuttaṃ. Assāti devadattassa. Apaññatte sikkhāpade samanubhāsanakammasseva abhāvato ‘‘na hi paññattaṃ sikkhāpadaṃ vītikkamantassā’’ti vuttaṃ. Sikkhāpadaṃ paññapenteneva hi samanubhāsanakammaṃ anuññātaṃ. Uddissa anuññātatoti ‘‘anujānāmi, bhikkhave, romanthakassa romanthana’’ntiādiṃ (cūḷava. 273) uddissānuññātaṃ sandhāya vadati. Anāpattiyanti anāpattivāre. Āpattiṃ ropetabboti samanubhāsanāya pācittiyaāpattiṃ ropetabbo. Āpattiyeva na jātāti saṅghādisesāpatti na jātā eva.
‘‘ந படினிஸ்ஸஜ்ஜாமீ’’தி ஸஞ்ஞாய அபா⁴வேன முச்சனதோ ஸஞ்ஞாவிமொக்க²ங். ஸசித்தகந்தி ‘‘ந படினிஸ்ஸஜ்ஜாமீ’’தி ஜானநசித்தேன ஸசித்தகங். யோ விஸஞ்ஞீ வா பீ⁴தோ வா விக்கி²த்தோ வா ‘‘படினிஸ்ஸஜ்ஜிதப்³ப³’’ந்திபி, ‘‘கம்மங் கரிஸ்ஸதீ’’தி வா ந ஜானாதி, தஸ்ஸ அனாபத்தி. பே⁴தா³ய பரக்கமனங், த⁴ம்மகம்மேன ஸமனுபா⁴ஸனங், கம்மவாசாபரியோஸானங், ந படினிஸ்ஸஜ்ஜாமீதி சித்தேன அப்படினிஸ்ஸஜ்ஜனந்தி இமானெத்த² சத்தாரி அங்கா³னி.
‘‘Na paṭinissajjāmī’’ti saññāya abhāvena muccanato saññāvimokkhaṃ. Sacittakanti ‘‘na paṭinissajjāmī’’ti jānanacittena sacittakaṃ. Yo visaññī vā bhīto vā vikkhitto vā ‘‘paṭinissajjitabba’’ntipi, ‘‘kammaṃ karissatī’’ti vā na jānāti, tassa anāpatti. Bhedāya parakkamanaṃ, dhammakammena samanubhāsanaṃ, kammavācāpariyosānaṃ, na paṭinissajjāmīti cittena appaṭinissajjananti imānettha cattāri aṅgāni.
பட²மஸங்க⁴பே⁴த³ஸிக்கா²பத³வண்ணனா நிட்டி²தா.
Paṭhamasaṅghabhedasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 10. ஸங்க⁴பே⁴த³ஸிக்கா²பத³ங் • 10. Saṅghabhedasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. பட²மஸங்க⁴பே⁴த³ஸிக்கா²பத³வண்ணனா • 10. Paṭhamasaṅghabhedasikkhāpadavaṇṇanā
