| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২. সঙ্ঘাদিসেসকণ্ডং
2. Saṅghādisesakaṇḍaṃ
১. পঠমসঙ্ঘাদিসেসসিক্খাপদ-অত্থযোজনা
1. Paṭhamasaṅghādisesasikkhāpada-atthayojanā
পারাজিকানন্তরস্সাতি পারাজিকানং অনন্তরে ঠপিতস্স, সঙ্গীতস্স ৰা, সঙ্ঘাদিসেসকণ্ডস্সাতি সম্বন্ধো। অযং ঈদিসা অনুত্তানত্থৰণ্ণনা অনুত্তানানং পদানং অত্থস্স ৰণ্ণনা দানি ইমস্মিংকালে ভৰিস্সতীতি যোজনা।
Pārājikānantarassāti pārājikānaṃ anantare ṭhapitassa, saṅgītassa vā, saṅghādisesakaṇḍassāti sambandho. Ayaṃ īdisā anuttānatthavaṇṇanā anuttānānaṃ padānaṃ atthassa vaṇṇanā dāni imasmiṃkāle bhavissatīti yojanā.
৬৭৮. পঠমে উদকং ৰসিতং অচ্ছাদনং অনেন কতন্তি উদোসিতোতি ৰচনত্থেন ভণ্ডসালা উদোসিতং নামাতি দস্সেন্তো আহ ‘‘উদোসিতন্তি ভণ্ডসালা’’তি। এত্থ হি উদসদ্দো উদকপরিযাযো। সংযোগো ন য্দ্ত্তোযেৰ। ভণ্ডসালাতি যানাদীনং ভণ্ডানং ঠপনসালা। অচ্চাৰদথাতি এত্থ অতীত্যূপসগ্গো অতিক্কমনত্থো, আত্যূপসগ্গো ধাত্ৰত্থানুৰত্তকোতি আহ ‘‘অতিক্কমিত্ৰা ৰদথা’’তি।
678. Paṭhame udakaṃ vasitaṃ acchādanaṃ anena katanti udositoti vacanatthena bhaṇḍasālā udositaṃ nāmāti dassento āha ‘‘udositanti bhaṇḍasālā’’ti. Ettha hi udasaddo udakapariyāyo. Saṃyogo na ydttoyeva. Bhaṇḍasālāti yānādīnaṃ bhaṇḍānaṃ ṭhapanasālā. Accāvadathāti ettha atītyūpasaggo atikkamanattho, ātyūpasaggo dhātvatthānuvattakoti āha ‘‘atikkamitvā vadathā’’ti.
৬৭৯. উস্সযৰসেন ৰদনং উস্সযৰাদো, সোযেৰ উস্সযৰাদিকাতি দস্সেন্তো আহ ‘‘উস্সযৰাদিকা’’তিআদি। ‘‘মানুস্সযৰসেন কোধুস্সযৰসেনা’’তি ইমিনা উস্সযভেদং দস্সেতি। সাতি উস্সযৰাদিকা। অত্থতোতি সরূপতো। এত্থাতি পদভাজনে। অড্ডনং অভিযুঞ্জনং অড্ডোতি কত্ৰা দ্ৰিন্নং জনানং অড্ডো ৰোহারিকানং ৰিনিচ্ছযকারণং হোতি, তস্মা ৰুত্তং ‘‘অড্ডোতি ৰোহারিকৰিনিচ্ছযো ৰুচ্চতী’’তি, মুদ্ধজততিযক্খরোযেৰ। যন্তি অড্ডং। যত্থাতি যস্মিং কিস্মিংচি ঠানে। দ্ৰিন্নং অড্ডকারকানং ৰোহারং জানন্তীতি ৰোহারিকা, অক্খদস্সা, তেসং। দ্ৰীসু জনেসূতি অড্ডকারকেসু জনেসু দ্ৰীসু। যো কোচীতি অড্ডকারকো ৰা অঞ্ঞো ৰা যো কোচি।
679. Ussayavasena vadanaṃ ussayavādo, soyeva ussayavādikāti dassento āha ‘‘ussayavādikā’’tiādi. ‘‘Mānussayavasena kodhussayavasenā’’ti iminā ussayabhedaṃ dasseti. Sāti ussayavādikā. Atthatoti sarūpato. Etthāti padabhājane. Aḍḍanaṃ abhiyuñjanaṃ aḍḍoti katvā dvinnaṃ janānaṃ aḍḍo vohārikānaṃ vinicchayakāraṇaṃ hoti, tasmā vuttaṃ ‘‘aḍḍoti vohārikavinicchayo vuccatī’’ti, muddhajatatiyakkharoyeva. Yanti aḍḍaṃ. Yatthāti yasmiṃ kismiṃci ṭhāne. Dvinnaṃ aḍḍakārakānaṃ vohāraṃ jānantīti vohārikā, akkhadassā, tesaṃ. Dvīsu janesūti aḍḍakārakesu janesu dvīsu. Yo kocīti aḍḍakārako vā añño vā yo koci.
এত্থাতি ‘‘একস্স আরোচেতী’’তিআদিৰচনে। যত্থ কত্থচীতি যংকিঞ্চি ঠানং আগতেপীতি সম্বন্ধো। অথাতি পচ্ছা। সাতি ভিক্খুনী। সোতি উপাসকো।
Etthāti ‘‘ekassa ārocetī’’tiādivacane. Yattha katthacīti yaṃkiñci ṭhānaṃ āgatepīti sambandho. Athāti pacchā. Sāti bhikkhunī. Soti upāsako.
‘‘কপ্পিযকারকেনা’’তিপদং ‘‘কথাপেতী’’তিপদে কারিতকম্মং। তত্থাতি কপ্পিযকারকইতরেসু । ৰোহারিকেহি কতেতি সম্বন্ধো। গতিগতন্তি চিরকালপত্তং। সুতপুব্বন্তি পুব্বে সুতং। অথাতি সুতপুব্বত্তা এৰ। তেতি ৰোহারিকা, দেন্তীতি সম্বন্ধো।
‘‘Kappiyakārakenā’’tipadaṃ ‘‘kathāpetī’’tipade kāritakammaṃ. Tatthāti kappiyakārakaitaresu . Vohārikehi kateti sambandho. Gatigatanti cirakālapattaṃ. Sutapubbanti pubbe sutaṃ. Athāti sutapubbattā eva. Teti vohārikā, dentīti sambandho.
পঠমন্তি সমনুভাসনতো পুব্বং। আপত্তীতি আপজ্জনং। এতস্সাতি সঙ্ঘাদিসেসস্স। অযং হীতি অযং এৰ, ৰক্খমানো এৰাতি অত্থো। এত্থাতি পদভাজনে। সহ ৰত্থুজ্ঝাচারাতি ৰত্থুজ্ঝাচারেন সহ, ৰাক্যমেৰ, ন সমাসো। ৰত্থুজ্ঝাচারাতি করণত্থে নিস্সক্কৰচনং দট্ঠব্বং । তেন ৰুত্তং ‘‘সহ ৰত্থুজ্ঝাচারেনা’’তি। ভিক্খুনিন্তি আপত্তিমাপন্নং ভিক্খুনিং। সঙ্ঘতোতি ভিক্খুনিসঙ্ঘম্হা। অনীযসদ্দো হেতুকত্তাভিধাযকোতি আহ ‘‘নিস্সারেতীতি নিস্সারণীযো’’তি। ভিক্খুনিসঙ্ঘতো নিস্সরতি, নিস্সারিযতি ৰা অনেনাতি নিস্সারণীযোতি করণত্থোপি যুত্তোযেৰ। তত্থাতি পদভাজনে। যন্তি সঙ্ঘাদিসেসং। সোতি সঙ্ঘাদিসেসো। পদভাজনস্স অত্থো কারণোপচারেন দট্ঠব্বো। হীতি সচ্চং। কেনচীতি পুগ্গলেন, ন নিস্সারীযতীতি সম্বন্ধো। তেন ধম্মেন করণভূতেন, হেতুভূতেন ৰা। সোতি ধম্মো।
Paṭhamanti samanubhāsanato pubbaṃ. Āpattīti āpajjanaṃ. Etassāti saṅghādisesassa. Ayaṃ hīti ayaṃ eva, vakkhamāno evāti attho. Etthāti padabhājane. Saha vatthujjhācārāti vatthujjhācārena saha, vākyameva, na samāso. Vatthujjhācārāti karaṇatthe nissakkavacanaṃ daṭṭhabbaṃ . Tena vuttaṃ ‘‘saha vatthujjhācārenā’’ti. Bhikkhuninti āpattimāpannaṃ bhikkhuniṃ. Saṅghatoti bhikkhunisaṅghamhā. Anīyasaddo hetukattābhidhāyakoti āha ‘‘nissāretīti nissāraṇīyo’’ti. Bhikkhunisaṅghato nissarati, nissāriyati vā anenāti nissāraṇīyoti karaṇatthopi yuttoyeva. Tatthāti padabhājane. Yanti saṅghādisesaṃ. Soti saṅghādiseso. Padabhājanassa attho kāraṇopacārena daṭṭhabbo. Hīti saccaṃ. Kenacīti puggalena, na nissārīyatīti sambandho. Tena dhammena karaṇabhūtena, hetubhūtena vā. Soti dhammo.
অড্ডকারকমনুস্সেহি ৰুচ্চমানাতি যোজনা। সযন্তি সামং। ততোতি গমনতো, পরন্তি সম্বন্ধো। ভিক্খুনিযা ৰা কতং আরোচেতূতি যোজনা।
Aḍḍakārakamanussehi vuccamānāti yojanā. Sayanti sāmaṃ. Tatoti gamanato, paranti sambandho. Bhikkhuniyā vā kataṃ ārocetūti yojanā.
ধম্মিকন্তি ধম্মেন সভাৰেন যুত্তং। যথাতি যেনাকারেন। তন্তি আকারং। তত্থাতি ‘‘অনোদিস্স আচিক্খতী’’তি ৰচনে।
Dhammikanti dhammena sabhāvena yuttaṃ. Yathāti yenākārena. Tanti ākāraṃ. Tatthāti ‘‘anodissa ācikkhatī’’ti vacane.
ধুত্তাদযোতি আদিসদ্দেন চোরাদযো সঙ্গণ্হাতি। সাতি আচিক্খনা। তন্তি আচিক্খনং। তেসন্তি গামদারকাদীনং। দণ্ডন্তি ধনদণ্ডং। গীৰা হোতীতি ইণং হোতি। অধিপ্পাযে সতিপীতি যোজনা। তস্সাতি অনাচারং চরন্তস্স।
Dhuttādayoti ādisaddena corādayo saṅgaṇhāti. Sāti ācikkhanā. Tanti ācikkhanaṃ. Tesanti gāmadārakādīnaṃ. Daṇḍanti dhanadaṇḍaṃ. Gīvā hotīti iṇaṃ hoti. Adhippāye satipīti yojanā. Tassāti anācāraṃ carantassa.
কেৰলং হীতি কেৰলমেৰ। তন্তি রক্খং। কারকেতি অনাচারস্স কারকে। তেস+?ন্তি কারকানং।
Kevalaṃ hīti kevalameva. Tanti rakkhaṃ. Kāraketi anācārassa kārake. Tesa+?Nti kārakānaṃ.
তেসন্তি হরন্তানং। ‘‘অনত্থকামতাযা’’তি ইমিনা ভযাদিনা ৰুত্তে নত্থি দোসোতি দস্সেতি। হীতি লদ্ধদোসজোতকো। অত্তনো ৰচনকরং…পে॰… ৰত্তুং ৰট্টতীতি অত্তনো ৰচনং আদিযিস্সতীতি ৰুত্তে ৰচনং অনাদিযিত্ৰা দণ্ডে গহিতেপি নত্থি দোসো দণ্ডগহণস্স পটিক্খিত্তত্তা। দাসদাসীৰাপিআদীনন্তি আদিসদ্দেন খেত্তাদযো সঙ্গয্হন্তি।
Tesanti harantānaṃ. ‘‘Anatthakāmatāyā’’ti iminā bhayādinā vutte natthi dosoti dasseti. Hīti laddhadosajotako. Attano vacanakaraṃ…pe… vattuṃ vaṭṭatīti attano vacanaṃ ādiyissatīti vutte vacanaṃ anādiyitvā daṇḍe gahitepi natthi doso daṇḍagahaṇassa paṭikkhittattā. Dāsadāsīvāpiādīnanti ādisaddena khettādayo saṅgayhanti.
ৰুত্তনযেনেৰাতি অতীতং আরব্ভ আচিক্খনে ৰুত্তনযেন এৰ। ‘‘আযতিং অকরণত্থাযা’’তি ইমিনা অনাগতং আরব্ভ ওদিস্স আচিক্খনং দস্সেতি। ‘‘কেন এৰং কত’’ন্তি পুচ্ছায অতীতে কতপুব্বং পুচ্ছতি। সাপীতি পিসদ্দো ৰুত্তসম্পিণ্ডনত্থো। হীতি সচ্চং, যস্মা ৰা।
Vuttanayenevāti atītaṃ ārabbha ācikkhane vuttanayena eva. ‘‘Āyatiṃ akaraṇatthāyā’’ti iminā anāgataṃ ārabbha odissa ācikkhanaṃ dasseti. ‘‘Kena evaṃ kata’’nti pucchāya atīte katapubbaṃ pucchati. Sāpīti pisaddo vuttasampiṇḍanattho. Hīti saccaṃ, yasmā vā.
ৰোহারিকা দণ্ডেন্তীতি সম্বন্ধো। দণ্ডেন্তীতি ৰধদণ্ডেন চ ধনদণ্ডেন চ আণং করোন্তি।
Vohārikā daṇḍentīti sambandho. Daṇḍentīti vadhadaṇḍena ca dhanadaṇḍena ca āṇaṃ karonti.
যো চাযন্তি যো চ অযং। ভিক্খুনীনং যো অযং নযো ৰুত্তো, এসেৰ নযো ভিক্খূনম্পি নযোতি যোজনা। ‘‘এসেৰ নযো’’তি ৰুত্তৰচনমেৰ ৰিত্থারেন্তো আহ ‘‘ভিক্খুনোপি হী’’তিআদি। ‘‘তথা’’তিইমিনা ‘‘ওদিস্সা’’তিপদং অতিদিসতি। তে চাতি তে চ ৰোহারিকা। হীতি সচ্চং, যস্মা ৰাতি। পঠমং।
Yo cāyanti yo ca ayaṃ. Bhikkhunīnaṃ yo ayaṃ nayo vutto, eseva nayo bhikkhūnampi nayoti yojanā. ‘‘Eseva nayo’’ti vuttavacanameva vitthārento āha ‘‘bhikkhunopi hī’’tiādi. ‘‘Tathā’’tiiminā ‘‘odissā’’tipadaṃ atidisati. Te cāti te ca vohārikā. Hīti saccaṃ, yasmā vāti. Paṭhamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / ভিক্খুনীৰিভঙ্গ • Bhikkhunīvibhaṅga / ১. পঠমসঙ্ঘাদিসেসসিক্খাপদং • 1. Paṭhamasaṅghādisesasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ১. পঠমসঙ্ঘাদিসেসসিক্খাপদৰণ্ণনা • 1. Paṭhamasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. পঠমসঙ্ঘাদিসেসসিক্খাপদৰণ্ণনা • 1. Paṭhamasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমসঙ্ঘাদিসেসসিক্খাপদৰণ্ণনা • 1. Paṭhamasaṅghādisesasikkhāpadavaṇṇanā
