| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
2. ஸங்கா⁴தி³ஸேஸகண்ட³ங் (பி⁴க்கு²னீவிப⁴ங்கோ³)
2. Saṅghādisesakaṇḍaṃ (bhikkhunīvibhaṅgo)
1. பட²மஸங்கா⁴தி³ஸேஸஸிக்கா²பத³ங்
1. Paṭhamasaṅghādisesasikkhāpadaṃ
இமே கோ² பனாய்யாயோ ஸத்தரஸ ஸங்கா⁴தி³ஸேஸா
Ime kho panāyyāyo sattarasa saṅghādisesā
த⁴ம்மா உத்³தே³ஸங் ஆக³ச்ச²ந்தி.
Dhammā uddesaṃ āgacchanti.
678. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ உபாஸகோ பி⁴க்கு²னிஸங்க⁴ஸ்ஸ உதோ³ஸிதங் 1 த³த்வா காலங்கதோ ஹோதி. தஸ்ஸ த்³வே புத்தா ஹொந்தி – ஏகோ அஸ்ஸத்³தோ⁴ அப்பஸன்னோ, ஏகோ ஸத்³தோ⁴ பஸன்னோ. தே பெத்திகங் ஸாபதெய்யங் விப⁴ஜிங்ஸு. அத² கோ² ஸோ அஸ்ஸத்³தோ⁴ அப்பஸன்னோ தங் ஸத்³த⁴ங் பஸன்னங் ஏதத³வோச – ‘‘அம்ஹாகங் உதோ³ஸிதோ, தங் பா⁴ஜேமா’’தி. ஏவங் வுத்தே ஸோ ஸத்³தோ⁴ பஸன்னோ தங் அஸ்ஸத்³த⁴ங் அப்பஸன்னங் ஏதத³வோச – ‘‘மாய்யோ, ஏவங் அவச. அம்ஹாகங் பிதுனா பி⁴க்கு²னிஸங்க⁴ஸ்ஸ தி³ன்னோ’’தி. து³தியம்பி கோ² ஸோ அஸ்ஸத்³தோ⁴ அப்பஸன்னோ தங் ஸத்³த⁴ங் பஸன்னங் ஏதத³வோச – ‘‘அம்ஹாகங் உதோ³ஸிதோ, தங் பா⁴ஜேமா’’தி. அத² கோ² ஸோ ஸத்³தோ⁴ பஸன்னோ தங் அஸ்ஸத்³த⁴ங் அப்பஸன்னங் ஏதத³வோச – ‘‘மாய்யோ, ஏவங் அவச. அம்ஹாகங் பிதுனா பி⁴க்கு²னிஸங்க⁴ஸ்ஸ தி³ன்னோ’’தி. ததியம்பி கோ² ஸோ அஸ்ஸத்³தோ⁴ அப்பஸன்னோ தங் ஸத்³த⁴ங் பஸன்னங் ஏதத³வோச – ‘‘அம்ஹாகங் உதோ³ஸிதோ, தங் பா⁴ஜேமா’’தி. அத² கோ² ஸோ ஸத்³தோ⁴ பஸன்னோ – ‘‘ஸசே மய்ஹங் ப⁴விஸ்ஸதி, அஹம்பி பி⁴க்கு²னிஸங்க⁴ஸ்ஸ த³ஸ்ஸாமீ’’தி – தங் அஸ்ஸத்³த⁴ங் அப்பஸன்னங் ஏதத³வோச – ‘‘பா⁴ஜேமா’’தி. அத² கோ² ஸோ உதோ³ஸிதோ தேஹி பா⁴ஜீயமானோ தஸ்ஸ அஸ்ஸத்³த⁴ஸ்ஸ அப்பஸன்னஸ்ஸ பாபுணாதி 2. அத² கோ² ஸோ அஸ்ஸத்³தோ⁴ அப்பஸன்னோ பி⁴க்கு²னியோ உபஸங்கமித்வா ஏதத³வோச – ‘‘நிக்க²மதா²ய்யே, அம்ஹாகங் உதோ³ஸிதோ’’தி.
678. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro upāsako bhikkhunisaṅghassa udositaṃ 3 datvā kālaṅkato hoti. Tassa dve puttā honti – eko assaddho appasanno, eko saddho pasanno. Te pettikaṃ sāpateyyaṃ vibhajiṃsu. Atha kho so assaddho appasanno taṃ saddhaṃ pasannaṃ etadavoca – ‘‘amhākaṃ udosito, taṃ bhājemā’’ti. Evaṃ vutte so saddho pasanno taṃ assaddhaṃ appasannaṃ etadavoca – ‘‘māyyo, evaṃ avaca. Amhākaṃ pitunā bhikkhunisaṅghassa dinno’’ti. Dutiyampi kho so assaddho appasanno taṃ saddhaṃ pasannaṃ etadavoca – ‘‘amhākaṃ udosito, taṃ bhājemā’’ti. Atha kho so saddho pasanno taṃ assaddhaṃ appasannaṃ etadavoca – ‘‘māyyo, evaṃ avaca. Amhākaṃ pitunā bhikkhunisaṅghassa dinno’’ti. Tatiyampi kho so assaddho appasanno taṃ saddhaṃ pasannaṃ etadavoca – ‘‘amhākaṃ udosito, taṃ bhājemā’’ti. Atha kho so saddho pasanno – ‘‘sace mayhaṃ bhavissati, ahampi bhikkhunisaṅghassa dassāmī’’ti – taṃ assaddhaṃ appasannaṃ etadavoca – ‘‘bhājemā’’ti. Atha kho so udosito tehi bhājīyamāno tassa assaddhassa appasannassa pāpuṇāti 4. Atha kho so assaddho appasanno bhikkhuniyo upasaṅkamitvā etadavoca – ‘‘nikkhamathāyye, amhākaṃ udosito’’ti.
ஏவங் வுத்தே து²ல்லனந்தா³ பி⁴க்கு²னீ தங் புரிஸங் ஏதத³வோச – ‘‘மாய்யோ, ஏவங் அவச, தும்ஹாகங் பிதுனா பி⁴க்கு²னிஸங்க⁴ஸ்ஸ தி³ன்னோ’’தி. ‘‘தி³ன்னோ ந தி³ன்னோ’’தி வோஹாரிகே மஹாமத்தே புச்சி²ங்ஸு. மஹாமத்தா ஏவமாஹங்ஸு – ‘‘கோ, அய்யே, ஜானாதி பி⁴க்கு²னிஸங்க⁴ஸ்ஸ தி³ன்னோ’’தி? ஏவங் வுத்தே து²ல்லனந்தா³ பி⁴க்கு²னீ தே மஹாமத்தே ஏதத³வோச – ‘‘அபி நாய்யோ 5 தும்ஹேஹி தி³ட்ட²ங் வா ஸுதங் வா ஸக்கி²ங் ட²பயித்வா தா³னங் தி³ய்யமான’’ந்தி ? அத² கோ² தே மஹாமத்தா – ‘‘ஸச்சங் கோ² அய்யா ஆஹா’’தி தங் உதோ³ஸிதங் பி⁴க்கு²னிஸங்க⁴ஸ்ஸ அகங்ஸு. அத² கோ² ஸோ புரிஸோ பராஜிதோ உஜ்ஜா²யதி கி²ய்யதி விபாசேதி – ‘‘அஸ்ஸமணியோ இமா முண்டா³ ப³ந்த⁴கினியோ. கத²ஞ்ஹி நாம அம்ஹாகங் உதோ³ஸிதங் அச்சி²ந்தா³பெஸ்ஸந்தீ’’தி! து²ல்லனந்தா³ பி⁴க்கு²னீ மஹாமத்தானங் ஏதமத்த²ங் ஆரோசேஸி. மஹாமத்தா தங் புரிஸங் த³ண்டா³பேஸுங். அத² கோ² ஸோ புரிஸோ த³ண்டி³தோ பி⁴க்கு²னூபஸ்ஸயஸ்ஸ அவிதூ³ரே ஆஜீவகஸெய்யங் காராபெத்வா ஆஜீவகே உய்யோஜேஸி – ‘‘ஏதா பி⁴க்கு²னியோ அச்சாவத³தா²’’தி.
Evaṃ vutte thullanandā bhikkhunī taṃ purisaṃ etadavoca – ‘‘māyyo, evaṃ avaca, tumhākaṃ pitunā bhikkhunisaṅghassa dinno’’ti. ‘‘Dinno na dinno’’ti vohārike mahāmatte pucchiṃsu. Mahāmattā evamāhaṃsu – ‘‘ko, ayye, jānāti bhikkhunisaṅghassa dinno’’ti? Evaṃ vutte thullanandā bhikkhunī te mahāmatte etadavoca – ‘‘api nāyyo 6 tumhehi diṭṭhaṃ vā sutaṃ vā sakkhiṃ ṭhapayitvā dānaṃ diyyamāna’’nti ? Atha kho te mahāmattā – ‘‘saccaṃ kho ayyā āhā’’ti taṃ udositaṃ bhikkhunisaṅghassa akaṃsu. Atha kho so puriso parājito ujjhāyati khiyyati vipāceti – ‘‘assamaṇiyo imā muṇḍā bandhakiniyo. Kathañhi nāma amhākaṃ udositaṃ acchindāpessantī’’ti! Thullanandā bhikkhunī mahāmattānaṃ etamatthaṃ ārocesi. Mahāmattā taṃ purisaṃ daṇḍāpesuṃ. Atha kho so puriso daṇḍito bhikkhunūpassayassa avidūre ājīvakaseyyaṃ kārāpetvā ājīvake uyyojesi – ‘‘etā bhikkhuniyo accāvadathā’’ti.
து²ல்லனந்தா³ பி⁴க்கு²னீ மஹாமத்தானங் ஏதமத்த²ங் ஆரோசேஸி. மஹாமத்தா தங் புரிஸங் ப³ந்தா⁴பேஸுங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘பட²மங் பி⁴க்கு²னியோ உதோ³ஸிதங் அச்சி²ந்தா³பேஸுங், து³தியங் த³ண்டா³பேஸுங், ததியங் ப³ந்தா⁴பேஸுங். இதா³னி கா⁴தாபெஸ்ஸந்தீ’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ உஸ்ஸயவாதி³கா விஹரிஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னங் ஏதமத்த²ங் ஆரோசேஸுங்…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ உஸ்ஸயவாதி³கா விஹரதீதி. ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ உஸ்ஸயவாதி³கா விஹரிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
Thullanandā bhikkhunī mahāmattānaṃ etamatthaṃ ārocesi. Mahāmattā taṃ purisaṃ bandhāpesuṃ. Manussā ujjhāyanti khiyyanti vipācenti – ‘‘paṭhamaṃ bhikkhuniyo udositaṃ acchindāpesuṃ, dutiyaṃ daṇḍāpesuṃ, tatiyaṃ bandhāpesuṃ. Idāni ghātāpessantī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā ussayavādikā viharissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ…pe… saccaṃ kira, bhikkhave, thullanandā bhikkhunī ussayavādikā viharatīti. ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī ussayavādikā viharissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
679. ‘‘யா பன பி⁴க்கு²னீ உஸ்ஸயவாதி³கா விஹரெய்ய க³ஹபதினா வா க³ஹபதிபுத்தேன வா தா³ஸேன வா கம்மகாரேன 7 வா அந்தமஸோ ஸமணபரிப்³பா³ஜகேனாபி, அயங் பி⁴க்கு²னீ பட²மாபத்திகங் த⁴ம்மங் ஆபன்னா நிஸ்ஸாரணீயங் ஸங்கா⁴தி³ஸேஸ’’ந்தி.
679.‘‘Yā pana bhikkhunī ussayavādikā vihareyya gahapatinā vā gahapatiputtena vā dāsena vā kammakārena 8 vā antamaso samaṇaparibbājakenāpi, ayaṃ bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
680. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
680.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
உஸ்ஸயவாதி³கா நாம அட்³ட³காரிகா வுச்சதி.
Ussayavādikā nāma aḍḍakārikā vuccati.
க³ஹபதி நாம யோ கோசி அகா³ரங் அஜ்ஜா²வஸதி.
Gahapati nāma yo koci agāraṃ ajjhāvasati.
க³ஹபதிபுத்தோ நாம யே கேசி புத்தபா⁴தரோ.
Gahapatiputto nāma ye keci puttabhātaro.
தா³ஸோ நாம அந்தோஜாதோ த⁴னக்கீதோ கரமரானீதோ .
Dāso nāma antojāto dhanakkīto karamarānīto .
கம்மகாரோ நாம ப⁴டகோ ஆஹதகோ.
Kammakāro nāma bhaṭako āhatako.
ஸமணபரிப்³பா³ஜகோ நாம பி⁴க்கு²ஞ்ச பி⁴க்கு²னிஞ்ச ஸிக்க²மானஞ்ச ஸாமணேரஞ்ச ஸாமணேரிஞ்ச ட²பெத்வா யோ கோசி பரிப்³பா³ஜகஸமாபன்னோ.
Samaṇaparibbājako nāma bhikkhuñca bhikkhuniñca sikkhamānañca sāmaṇerañca sāmaṇeriñca ṭhapetvā yo koci paribbājakasamāpanno.
அட்³ட³ங் கரிஸ்ஸாமீதி து³தியங் வா பரியேஸதி க³ச்ச²தி வா, ஆபத்தி து³க்கடஸ்ஸ. ஏகஸ்ஸ ஆரோசேதி, ஆபத்தி து³க்கடஸ்ஸ. து³தியஸ்ஸ ஆரோசேதி, ஆபத்தி து²ல்லச்சயஸ்ஸ. அட்³ட³பரியோஸானே ஆபத்தி ஸங்கா⁴தி³ஸேஸஸ்ஸ.
Aḍḍaṃ karissāmīti dutiyaṃ vā pariyesati gacchati vā, āpatti dukkaṭassa. Ekassa āroceti, āpatti dukkaṭassa. Dutiyassa āroceti, āpatti thullaccayassa. Aḍḍapariyosāne āpatti saṅghādisesassa.
பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.
Paṭhamāpattikanti saha vatthujjhācārā āpajjati asamanubhāsanāya.
நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.
Nissāraṇīyanti saṅghamhā nissārīyati.
ஸங்கா⁴தி³ஸேஸந்தி ஸங்கோ⁴வ தஸ்ஸா ஆபத்தியா மானத்தங் தே³தி மூலாய படிகஸ்ஸதி அப்³பே⁴தி, ந ஸம்ப³ஹுலா ந ஏகா பி⁴க்கு²னீ. தேன வுச்சதி ‘‘ஸங்கா⁴தி³ஸேஸோ’’தி. தஸ்ஸேவ ஆபத்தினிகாயஸ்ஸ நாமகம்மங் அதி⁴வசனங். தேனபி வுச்சதி ‘‘ஸங்கா⁴தி³ஸேஸோ’’தி.
Saṅghādisesanti saṅghova tassā āpattiyā mānattaṃ deti mūlāya paṭikassati abbheti, na sambahulā na ekā bhikkhunī. Tena vuccati ‘‘saṅghādiseso’’ti. Tasseva āpattinikāyassa nāmakammaṃ adhivacanaṃ. Tenapi vuccati ‘‘saṅghādiseso’’ti.
681. அனாபத்தி மனுஸ்ஸேஹி ஆகட்³டீ⁴யமானா க³ச்ச²தி, ஆரக்க²ங் யாசதி, அனோதி³ஸ்ஸ ஆசிக்க²தி, உம்மத்திகாய…பே॰… ஆதி³கம்மிகாயாதி.
681. Anāpatti manussehi ākaḍḍhīyamānā gacchati, ārakkhaṃ yācati, anodissa ācikkhati, ummattikāya…pe… ādikammikāyāti.
பட²மஸங்கா⁴தி³ஸேஸஸிக்கா²பத³ங் நிட்டி²தங்.
Paṭhamasaṅghādisesasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 1. பட²மஸங்கா⁴தி³ஸேஸஸிக்கா²பத³வண்ணனா • 1. Paṭhamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. பட²மஸங்கா⁴தி³ஸேஸஸிக்கா²பத³வண்ணனா • 1. Paṭhamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பட²மஸங்கா⁴தி³ஸேஸஸிக்கா²பத³வண்ணனா • 1. Paṭhamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மஸங்கா⁴தி³ஸேஸஸிக்கா²பத³வண்ணனா • 1. Paṭhamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பட²மஸங்கா⁴தி³ஸேஸஸிக்கா²பத³-அத்த²யோஜனா • 1. Paṭhamasaṅghādisesasikkhāpada-atthayojanā
