| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
২. সঙ্ঘাদিসেসকণ্ডং (ভিক্খুনীৰিভঙ্গো)
2. Saṅghādisesakaṇḍaṃ (bhikkhunīvibhaṅgo)
১. পঠমসঙ্ঘাদিসেসসিক্খাপদং
1. Paṭhamasaṅghādisesasikkhāpadaṃ
ইমে খো পনায্যাযো সত্তরস সঙ্ঘাদিসেসা
Ime kho panāyyāyo sattarasa saṅghādisesā
ধম্মা উদ্দেসং আগচ্ছন্তি।
Dhammā uddesaṃ āgacchanti.
৬৭৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অঞ্ঞতরো উপাসকো ভিক্খুনিসঙ্ঘস্স উদোসিতং 1 দত্ৰা কালঙ্কতো হোতি। তস্স দ্ৰে পুত্তা হোন্তি – একো অস্সদ্ধো অপ্পসন্নো, একো সদ্ধো পসন্নো। তে পেত্তিকং সাপতেয্যং ৰিভজিংসু। অথ খো সো অস্সদ্ধো অপ্পসন্নো তং সদ্ধং পসন্নং এতদৰোচ – ‘‘অম্হাকং উদোসিতো, তং ভাজেমা’’তি। এৰং ৰুত্তে সো সদ্ধো পসন্নো তং অস্সদ্ধং অপ্পসন্নং এতদৰোচ – ‘‘মায্যো, এৰং অৰচ। অম্হাকং পিতুনা ভিক্খুনিসঙ্ঘস্স দিন্নো’’তি। দুতিযম্পি খো সো অস্সদ্ধো অপ্পসন্নো তং সদ্ধং পসন্নং এতদৰোচ – ‘‘অম্হাকং উদোসিতো, তং ভাজেমা’’তি। অথ খো সো সদ্ধো পসন্নো তং অস্সদ্ধং অপ্পসন্নং এতদৰোচ – ‘‘মায্যো, এৰং অৰচ। অম্হাকং পিতুনা ভিক্খুনিসঙ্ঘস্স দিন্নো’’তি। ততিযম্পি খো সো অস্সদ্ধো অপ্পসন্নো তং সদ্ধং পসন্নং এতদৰোচ – ‘‘অম্হাকং উদোসিতো, তং ভাজেমা’’তি। অথ খো সো সদ্ধো পসন্নো – ‘‘সচে ময্হং ভৰিস্সতি, অহম্পি ভিক্খুনিসঙ্ঘস্স দস্সামী’’তি – তং অস্সদ্ধং অপ্পসন্নং এতদৰোচ – ‘‘ভাজেমা’’তি। অথ খো সো উদোসিতো তেহি ভাজীযমানো তস্স অস্সদ্ধস্স অপ্পসন্নস্স পাপুণাতি 2। অথ খো সো অস্সদ্ধো অপ্পসন্নো ভিক্খুনিযো উপসঙ্কমিত্ৰা এতদৰোচ – ‘‘নিক্খমথায্যে, অম্হাকং উদোসিতো’’তি।
678. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro upāsako bhikkhunisaṅghassa udositaṃ 3 datvā kālaṅkato hoti. Tassa dve puttā honti – eko assaddho appasanno, eko saddho pasanno. Te pettikaṃ sāpateyyaṃ vibhajiṃsu. Atha kho so assaddho appasanno taṃ saddhaṃ pasannaṃ etadavoca – ‘‘amhākaṃ udosito, taṃ bhājemā’’ti. Evaṃ vutte so saddho pasanno taṃ assaddhaṃ appasannaṃ etadavoca – ‘‘māyyo, evaṃ avaca. Amhākaṃ pitunā bhikkhunisaṅghassa dinno’’ti. Dutiyampi kho so assaddho appasanno taṃ saddhaṃ pasannaṃ etadavoca – ‘‘amhākaṃ udosito, taṃ bhājemā’’ti. Atha kho so saddho pasanno taṃ assaddhaṃ appasannaṃ etadavoca – ‘‘māyyo, evaṃ avaca. Amhākaṃ pitunā bhikkhunisaṅghassa dinno’’ti. Tatiyampi kho so assaddho appasanno taṃ saddhaṃ pasannaṃ etadavoca – ‘‘amhākaṃ udosito, taṃ bhājemā’’ti. Atha kho so saddho pasanno – ‘‘sace mayhaṃ bhavissati, ahampi bhikkhunisaṅghassa dassāmī’’ti – taṃ assaddhaṃ appasannaṃ etadavoca – ‘‘bhājemā’’ti. Atha kho so udosito tehi bhājīyamāno tassa assaddhassa appasannassa pāpuṇāti 4. Atha kho so assaddho appasanno bhikkhuniyo upasaṅkamitvā etadavoca – ‘‘nikkhamathāyye, amhākaṃ udosito’’ti.
এৰং ৰুত্তে থুল্লনন্দা ভিক্খুনী তং পুরিসং এতদৰোচ – ‘‘মায্যো, এৰং অৰচ, তুম্হাকং পিতুনা ভিক্খুনিসঙ্ঘস্স দিন্নো’’তি। ‘‘দিন্নো ন দিন্নো’’তি ৰোহারিকে মহামত্তে পুচ্ছিংসু। মহামত্তা এৰমাহংসু – ‘‘কো, অয্যে, জানাতি ভিক্খুনিসঙ্ঘস্স দিন্নো’’তি? এৰং ৰুত্তে থুল্লনন্দা ভিক্খুনী তে মহামত্তে এতদৰোচ – ‘‘অপি নায্যো 5 তুম্হেহি দিট্ঠং ৰা সুতং ৰা সক্খিং ঠপযিত্ৰা দানং দিয্যমান’’ন্তি ? অথ খো তে মহামত্তা – ‘‘সচ্চং খো অয্যা আহা’’তি তং উদোসিতং ভিক্খুনিসঙ্ঘস্স অকংসু। অথ খো সো পুরিসো পরাজিতো উজ্ঝাযতি খিয্যতি ৰিপাচেতি – ‘‘অস্সমণিযো ইমা মুণ্ডা বন্ধকিনিযো। কথঞ্হি নাম অম্হাকং উদোসিতং অচ্ছিন্দাপেস্সন্তী’’তি! থুল্লনন্দা ভিক্খুনী মহামত্তানং এতমত্থং আরোচেসি। মহামত্তা তং পুরিসং দণ্ডাপেসুং। অথ খো সো পুরিসো দণ্ডিতো ভিক্খুনূপস্সযস্স অৰিদূরে আজীৰকসেয্যং কারাপেত্ৰা আজীৰকে উয্যোজেসি – ‘‘এতা ভিক্খুনিযো অচ্চাৰদথা’’তি।
Evaṃ vutte thullanandā bhikkhunī taṃ purisaṃ etadavoca – ‘‘māyyo, evaṃ avaca, tumhākaṃ pitunā bhikkhunisaṅghassa dinno’’ti. ‘‘Dinno na dinno’’ti vohārike mahāmatte pucchiṃsu. Mahāmattā evamāhaṃsu – ‘‘ko, ayye, jānāti bhikkhunisaṅghassa dinno’’ti? Evaṃ vutte thullanandā bhikkhunī te mahāmatte etadavoca – ‘‘api nāyyo 6 tumhehi diṭṭhaṃ vā sutaṃ vā sakkhiṃ ṭhapayitvā dānaṃ diyyamāna’’nti ? Atha kho te mahāmattā – ‘‘saccaṃ kho ayyā āhā’’ti taṃ udositaṃ bhikkhunisaṅghassa akaṃsu. Atha kho so puriso parājito ujjhāyati khiyyati vipāceti – ‘‘assamaṇiyo imā muṇḍā bandhakiniyo. Kathañhi nāma amhākaṃ udositaṃ acchindāpessantī’’ti! Thullanandā bhikkhunī mahāmattānaṃ etamatthaṃ ārocesi. Mahāmattā taṃ purisaṃ daṇḍāpesuṃ. Atha kho so puriso daṇḍito bhikkhunūpassayassa avidūre ājīvakaseyyaṃ kārāpetvā ājīvake uyyojesi – ‘‘etā bhikkhuniyo accāvadathā’’ti.
থুল্লনন্দা ভিক্খুনী মহামত্তানং এতমত্থং আরোচেসি। মহামত্তা তং পুরিসং বন্ধাপেসুং। মনুস্সা উজ্ঝাযন্তি খিয্যন্তি ৰিপাচেন্তি – ‘‘পঠমং ভিক্খুনিযো উদোসিতং অচ্ছিন্দাপেসুং, দুতিযং দণ্ডাপেসুং, ততিযং বন্ধাপেসুং। ইদানি ঘাতাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা উস্সযৰাদিকা ৰিহরিস্সতী’’তি! অথ খো তা ভিক্খুনিযো ভিক্খূনং এতমত্থং আরোচেসুং…পে॰… সচ্চং কির, ভিক্খৰে, থুল্লনন্দা ভিক্খুনী উস্সযৰাদিকা ৰিহরতীতি। ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী উস্সযৰাদিকা ৰিহরিস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
Thullanandā bhikkhunī mahāmattānaṃ etamatthaṃ ārocesi. Mahāmattā taṃ purisaṃ bandhāpesuṃ. Manussā ujjhāyanti khiyyanti vipācenti – ‘‘paṭhamaṃ bhikkhuniyo udositaṃ acchindāpesuṃ, dutiyaṃ daṇḍāpesuṃ, tatiyaṃ bandhāpesuṃ. Idāni ghātāpessantī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā ussayavādikā viharissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ…pe… saccaṃ kira, bhikkhave, thullanandā bhikkhunī ussayavādikā viharatīti. ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī ussayavādikā viharissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৬৭৯. ‘‘যা পন ভিক্খুনী উস্সযৰাদিকা ৰিহরেয্য গহপতিনা ৰা গহপতিপুত্তেন ৰা দাসেন ৰা কম্মকারেন 7 ৰা অন্তমসো সমণপরিব্বাজকেনাপি, অযং ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেস’’ন্তি।
679.‘‘Yā pana bhikkhunī ussayavādikā vihareyya gahapatinā vā gahapatiputtena vā dāsena vā kammakārena 8 vā antamaso samaṇaparibbājakenāpi, ayaṃ bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
৬৮০. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
680.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
উস্সযৰাদিকা নাম অড্ডকারিকা ৰুচ্চতি।
Ussayavādikā nāma aḍḍakārikā vuccati.
গহপতি নাম যো কোচি অগারং অজ্ঝাৰসতি।
Gahapati nāma yo koci agāraṃ ajjhāvasati.
গহপতিপুত্তো নাম যে কেচি পুত্তভাতরো।
Gahapatiputto nāma ye keci puttabhātaro.
দাসো নাম অন্তোজাতো ধনক্কীতো করমরানীতো ।
Dāso nāma antojāto dhanakkīto karamarānīto .
কম্মকারো নাম ভটকো আহতকো।
Kammakāro nāma bhaṭako āhatako.
সমণপরিব্বাজকো নাম ভিক্খুঞ্চ ভিক্খুনিঞ্চ সিক্খমানঞ্চ সামণেরঞ্চ সামণেরিঞ্চ ঠপেত্ৰা যো কোচি পরিব্বাজকসমাপন্নো।
Samaṇaparibbājako nāma bhikkhuñca bhikkhuniñca sikkhamānañca sāmaṇerañca sāmaṇeriñca ṭhapetvā yo koci paribbājakasamāpanno.
অড্ডং করিস্সামীতি দুতিযং ৰা পরিযেসতি গচ্ছতি ৰা, আপত্তি দুক্কটস্স। একস্স আরোচেতি, আপত্তি দুক্কটস্স। দুতিযস্স আরোচেতি, আপত্তি থুল্লচ্চযস্স। অড্ডপরিযোসানে আপত্তি সঙ্ঘাদিসেসস্স।
Aḍḍaṃ karissāmīti dutiyaṃ vā pariyesati gacchati vā, āpatti dukkaṭassa. Ekassa āroceti, āpatti dukkaṭassa. Dutiyassa āroceti, āpatti thullaccayassa. Aḍḍapariyosāne āpatti saṅghādisesassa.
পঠমাপত্তিকন্তি সহ ৰত্থুজ্ঝাচারা আপজ্জতি অসমনুভাসনায।
Paṭhamāpattikanti saha vatthujjhācārā āpajjati asamanubhāsanāya.
নিস্সারণীযন্তি সঙ্ঘম্হা নিস্সারীযতি।
Nissāraṇīyanti saṅghamhā nissārīyati.
সঙ্ঘাদিসেসন্তি সঙ্ঘোৰ তস্সা আপত্তিযা মানত্তং দেতি মূলায পটিকস্সতি অব্ভেতি, ন সম্বহুলা ন একা ভিক্খুনী। তেন ৰুচ্চতি ‘‘সঙ্ঘাদিসেসো’’তি। তস্সেৰ আপত্তিনিকাযস্স নামকম্মং অধিৰচনং। তেনপি ৰুচ্চতি ‘‘সঙ্ঘাদিসেসো’’তি।
Saṅghādisesanti saṅghova tassā āpattiyā mānattaṃ deti mūlāya paṭikassati abbheti, na sambahulā na ekā bhikkhunī. Tena vuccati ‘‘saṅghādiseso’’ti. Tasseva āpattinikāyassa nāmakammaṃ adhivacanaṃ. Tenapi vuccati ‘‘saṅghādiseso’’ti.
৬৮১. অনাপত্তি মনুস্সেহি আকড্ঢীযমানা গচ্ছতি, আরক্খং যাচতি, অনোদিস্স আচিক্খতি, উম্মত্তিকায…পে॰… আদিকম্মিকাযাতি।
681. Anāpatti manussehi ākaḍḍhīyamānā gacchati, ārakkhaṃ yācati, anodissa ācikkhati, ummattikāya…pe… ādikammikāyāti.
পঠমসঙ্ঘাদিসেসসিক্খাপদং নিট্ঠিতং।
Paṭhamasaṅghādisesasikkhāpadaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ১. পঠমসঙ্ঘাদিসেসসিক্খাপদৰণ্ণনা • 1. Paṭhamasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. পঠমসঙ্ঘাদিসেসসিক্খাপদৰণ্ণনা • 1. Paṭhamasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. পঠমসঙ্ঘাদিসেসসিক্খাপদৰণ্ণনা • 1. Paṭhamasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমসঙ্ঘাদিসেসসিক্খাপদৰণ্ণনা • 1. Paṭhamasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. পঠমসঙ্ঘাদিসেসসিক্খাপদ-অত্থযোজনা • 1. Paṭhamasaṅghādisesasikkhāpada-atthayojanā
