| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā |
2. ஸங்கா⁴தி³ஸேஸகண்ட³ங் (பி⁴க்கு²னீவிப⁴ங்க³வண்ணனா)
2. Saṅghādisesakaṇḍaṃ (bhikkhunīvibhaṅgavaṇṇanā)
1. பட²மஸங்கா⁴தி³ஸேஸஸிக்கா²பத³வண்ணனா
1. Paṭhamasaṅghādisesasikkhāpadavaṇṇanā
பாராஜிகானந்தரஸ்ஸ , அயங் தா³னி ப⁴விஸ்ஸதி;
Pārājikānantarassa , ayaṃ dāni bhavissati;
ஸங்கா⁴தி³ஸேஸகண்ட³ஸ்ஸ, அனுத்தானத்த²வண்ணனா.
Saṅghādisesakaṇḍassa, anuttānatthavaṇṇanā.
678. உதோ³ஸிதந்தி ப⁴ண்ட³ஸாலா. மாய்யோ ஏவங் அவசாதி அய்யோ மா ஏவங் அவச. அபினாய்யாதி அபினு அய்யா. அச்சாவத³தா²தி அதிக்கமித்வா வத³த²; அக்கோஸதா²தி வுத்தங் ஹோதி.
678.Udositanti bhaṇḍasālā. Māyyo evaṃ avacāti ayyo mā evaṃ avaca. Apināyyāti apinu ayyā. Accāvadathāti atikkamitvā vadatha; akkosathāti vuttaṃ hoti.
679. உஸ்ஸயவாதி³காதி மானுஸ்ஸயவஸேன கோது⁴ஸ்ஸயவஸேன விவத³மானா. யஸ்மா பன ஸா அத்த²தோ அட்டகாரிகா ஹோதி, தஸ்மா ‘‘உஸ்ஸயவாதி³கா நாம அட்³ட³காரிகா வுச்சதீ’’தி பத³பா⁴ஜனே வுத்தங். எத்த² ச அட்³டோ³தி வோஹாரிகவினிச்ச²யோ வுச்சதி, யங் பப்³ப³ஜிதா ‘‘அதி⁴கரண’’ந்திபி வத³ந்தி. து³தியங் வா பரியேஸதீதி ஸக்கி²ங் வா ஸஹாயங் வா பரியேஸதி, து³க்கடங். க³ச்ச²தி வாதி உபஸ்ஸயோ வா ஹோது பி⁴க்கா²சாரமக்³கோ³ வா, யத்த² டி²தாய ‘‘அட்³ட³ங் கரிஸ்ஸாமீ’’தி சித்தங் உப்பஜ்ஜதி, ததோ வோஹாரிகானங் ஸந்திகங் க³ச்ச²ந்தியா பத³வாரே பத³வாரே து³க்கடங். ஏகஸ்ஸ ஆரோசேதீதி த்³வீஸு ஜனேஸு யஸ்ஸ கஸ்ஸசி ஏகஸ்ஸ கத²ங் யோ கோசி வோஹாரிகானங் ஆரோசேதி. து³தியஸ்ஸ ஆரோசேதீதி எத்தா²பி ஏஸேவ நயோ.
679.Ussayavādikāti mānussayavasena kodhussayavasena vivadamānā. Yasmā pana sā atthato aṭṭakārikā hoti, tasmā ‘‘ussayavādikā nāma aḍḍakārikā vuccatī’’ti padabhājane vuttaṃ. Ettha ca aḍḍoti vohārikavinicchayo vuccati, yaṃ pabbajitā ‘‘adhikaraṇa’’ntipi vadanti. Dutiyaṃ vā pariyesatīti sakkhiṃ vā sahāyaṃ vā pariyesati, dukkaṭaṃ. Gacchati vāti upassayo vā hotu bhikkhācāramaggo vā, yattha ṭhitāya ‘‘aḍḍaṃ karissāmī’’ti cittaṃ uppajjati, tato vohārikānaṃ santikaṃ gacchantiyā padavāre padavāre dukkaṭaṃ. Ekassa ārocetīti dvīsu janesu yassa kassaci ekassa kathaṃ yo koci vohārikānaṃ āroceti. Dutiyassa ārocetīti etthāpi eseva nayo.
அயங் பனெத்த² அஸம்மோஹத்தா²ய வித்தா²ரகதா² – யத்த² கத்த²சி அந்தமஸோ பி⁴க்கு²னுபஸ்ஸயங் ஆக³தேபி வோஹாரிகே தி³ஸ்வா பி⁴க்கு²னீ அத்தனோ கத²ங் ஆரோசேதி, பி⁴க்கு²னியா து³க்கடங். உபாஸகோ அத்தனோ கத²ங் ஆரோசேதி, பி⁴க்கு²னியா து²ல்லச்சயங். பட²மங் உபாஸகோ அத்தனோ கத²ங் ஆரோசேதி , பி⁴க்கு²னியா து³க்கடங். அத² ஸா அத்தனோ கத²ங் ஆரோசேதி, து²ல்லச்சயங். பி⁴க்கு²னீ உபாஸகங் வத³தி – ‘‘மம ச தவ ச கத²ங் த்வங்யேவ ஆரோசேஹீ’’தி, ஸோ அத்தனோ வா கத²ங் பட²மங் ஆரோசேது பி⁴க்கு²னியா வா, பட²மாரோசனே து³க்கடங், து³தியாரோசனே து²ல்லச்சயங். உபாஸகோ பி⁴க்கு²னிங் வத³தி – ‘‘மம ச தவ ச கத²ங் த்வங்யேவ ஆரோசேஹீ’’தி, எத்தா²பி ஏஸேவ நயோ.
Ayaṃ panettha asammohatthāya vitthārakathā – yattha katthaci antamaso bhikkhunupassayaṃ āgatepi vohārike disvā bhikkhunī attano kathaṃ āroceti, bhikkhuniyā dukkaṭaṃ. Upāsako attano kathaṃ āroceti, bhikkhuniyā thullaccayaṃ. Paṭhamaṃ upāsako attano kathaṃ āroceti , bhikkhuniyā dukkaṭaṃ. Atha sā attano kathaṃ āroceti, thullaccayaṃ. Bhikkhunī upāsakaṃ vadati – ‘‘mama ca tava ca kathaṃ tvaṃyeva ārocehī’’ti, so attano vā kathaṃ paṭhamaṃ ārocetu bhikkhuniyā vā, paṭhamārocane dukkaṭaṃ, dutiyārocane thullaccayaṃ. Upāsako bhikkhuniṃ vadati – ‘‘mama ca tava ca kathaṃ tvaṃyeva ārocehī’’ti, etthāpi eseva nayo.
பி⁴க்கு²னீ கப்பியகாரகேன கதா²பேதி, தத்த² கப்பியகாரகோ வா பி⁴க்கு²னியா கத²ங் பட²மங் ஆரோசேது, இதரோ வா அத்தனோ கத²ங், கப்பியகாரகோ வா உபி⁴ன்னம்பி கத²ங், இதரோ வா உபி⁴ன்னம்பி கத²ங் ஆரோசேது, யதா² வா ததா² வா ஆரோசியமானே பட²மே ஆரோசனே பி⁴க்கு²னியா து³க்கடங், து³தியே து²ல்லச்சயங். யதா² வா ததா² வா ஆரோசிதங் பன உபி⁴ன்னம்பி கத²ங் ஸுத்வா வோஹாரிகேஹி வினிச்ச²யே கதே அட்³ட³பரியோஸானங் நாம ஹோதி, தஸ்மிங் அட்³ட³பரியோஸானே பி⁴க்கு²னியா ஜயேபி பராஜயேபி ஸங்கா⁴தி³ஸேஸோ. ஸசே பன க³திக³தங் அதி⁴கரணங் ஹோதி, ஸுதபுப்³ப³ங் வோஹாரிகேஹி. அத² தே பி⁴க்கு²னிஞ்ச அட்³ட³காரகஞ்ச தி³ஸ்வாவ ‘‘தும்ஹாகங் கத²னகிச்சங் நத்தி², ஜானாம மயங் எத்த² பவத்தி’’ந்தி ஸயமேவ வினிச்சி²னித்வா தெ³ந்தி, ஏவரூபே அட்³ட³பரியோஸானேபி பி⁴க்கு²னியா அனாபத்தி.
Bhikkhunī kappiyakārakena kathāpeti, tattha kappiyakārako vā bhikkhuniyā kathaṃ paṭhamaṃ ārocetu, itaro vā attano kathaṃ, kappiyakārako vā ubhinnampi kathaṃ, itaro vā ubhinnampi kathaṃ ārocetu, yathā vā tathā vā ārociyamāne paṭhame ārocane bhikkhuniyā dukkaṭaṃ, dutiye thullaccayaṃ. Yathā vā tathā vā ārocitaṃ pana ubhinnampi kathaṃ sutvā vohārikehi vinicchaye kate aḍḍapariyosānaṃ nāma hoti, tasmiṃ aḍḍapariyosāne bhikkhuniyā jayepi parājayepi saṅghādiseso. Sace pana gatigataṃ adhikaraṇaṃ hoti, sutapubbaṃ vohārikehi. Atha te bhikkhuniñca aḍḍakārakañca disvāva ‘‘tumhākaṃ kathanakiccaṃ natthi, jānāma mayaṃ ettha pavatti’’nti sayameva vinicchinitvā denti, evarūpe aḍḍapariyosānepi bhikkhuniyā anāpatti.
பட²மங் ஆபத்தி ஏதஸ்ஸாதி பட²மாபத்திகோ; வீதிக்கமக்க²ணேயேவ ஆபஜ்ஜிதப்³போ³தி அத்தோ², தங் பட²மாபத்திகங். பத³பா⁴ஜனே பன அதி⁴ப்பாயமத்தங் த³ஸ்ஸேதுங் ‘‘ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாயா’’தி வுத்தங். அயஞ்ஹெத்த² அத்தோ² – ஸஹ வத்து²ஜ்ஜா²சாரா யங் பி⁴க்கு²னீ ஆபஜ்ஜதி, ந ததியாய ஸமனுபா⁴ஸனாய, அயங் பட²மமேவ ஸஹ வத்து²ஜ்ஜா²சாரேன ஆபஜ்ஜிதப்³ப³த்தா பட²மாபத்திகோதி. பி⁴க்கு²னிஸங்க⁴தோ நிஸ்ஸாரேதீதி நிஸ்ஸாரணீயோ; தங் நிஸ்ஸாரணீயங். பத³பா⁴ஜனே பன அதி⁴ப்பாயமத்தங் த³ஸ்ஸேதுங் ‘‘ஸங்க⁴ம்ஹா நிஸ்ஸாரீயதீதி வுத்தங். தத்த² யங் ஆபன்னா பி⁴க்கு²னீ ஸங்க⁴தோ நிஸ்ஸாரீயதி, ஸோ நிஸ்ஸாரணீயோதி ஏவமத்தோ² த³ட்ட²ப்³போ³. ந ஹி ஸோ ஏவ த⁴ம்மோ ஸங்க⁴ம்ஹா கேனசி நிஸ்ஸாரீயதி. தேன பன த⁴ம்மேன பி⁴க்கு²னீ நிஸ்ஸாரீயதி, தஸ்மா ஸோ நிஸ்ஸாரேதீதி நிஸ்ஸாரணீயோ.
Paṭhamaṃ āpatti etassāti paṭhamāpattiko; vītikkamakkhaṇeyeva āpajjitabboti attho, taṃ paṭhamāpattikaṃ. Padabhājane pana adhippāyamattaṃ dassetuṃ ‘‘saha vatthujjhācārā āpajjati asamanubhāsanāyā’’ti vuttaṃ. Ayañhettha attho – saha vatthujjhācārā yaṃ bhikkhunī āpajjati, na tatiyāya samanubhāsanāya, ayaṃ paṭhamameva saha vatthujjhācārena āpajjitabbattā paṭhamāpattikoti. Bhikkhunisaṅghato nissāretīti nissāraṇīyo; taṃ nissāraṇīyaṃ. Padabhājane pana adhippāyamattaṃ dassetuṃ ‘‘saṅghamhā nissārīyatīti vuttaṃ. Tattha yaṃ āpannā bhikkhunī saṅghato nissārīyati, so nissāraṇīyoti evamattho daṭṭhabbo. Na hi so eva dhammo saṅghamhā kenaci nissārīyati. Tena pana dhammena bhikkhunī nissārīyati, tasmā so nissāretīti nissāraṇīyo.
ஆகட்³டி⁴யமானா க³ச்ச²தீதி அட்³ட³காரகமனுஸ்ஸேஹி ஸயங் வா ஆக³ந்த்வா தூ³தங் வா பேஸெத்வா ஏஹீதி வுச்சமானா வோஹாரிகானங் ஸந்திகங் க³ச்ச²தி, ததோ அட்³ட³காரகோ அத்தனோ வா கத²ங் பட²மங் ஆரோசேது பி⁴க்கு²னியா வா, நேவ பட²மாரோசனே து³க்கடங், ந து³தியாரோசனே து²ல்லச்சயங். அமச்சேஹி வினிச்சி²னித்வா கதே அட்³ட³பரியோஸானேபி அனாபத்தியேவ. ஸசேபி அட்³ட³காரகோ பி⁴க்கு²னிங் வத³தி ‘‘மம ச தவ ச கத²ங் த்வமேவ கதே²ஹீ’’தி; கதெ²ந்தியாபி கத²ங் ஸுத்வா கதே அட்³ட³பரியோஸானேபி அனாபத்தியேவ.
Ākaḍḍhiyamānā gacchatīti aḍḍakārakamanussehi sayaṃ vā āgantvā dūtaṃ vā pesetvā ehīti vuccamānā vohārikānaṃ santikaṃ gacchati, tato aḍḍakārako attano vā kathaṃ paṭhamaṃ ārocetu bhikkhuniyā vā, neva paṭhamārocane dukkaṭaṃ, na dutiyārocane thullaccayaṃ. Amaccehi vinicchinitvā kate aḍḍapariyosānepi anāpattiyeva. Sacepi aḍḍakārako bhikkhuniṃ vadati ‘‘mama ca tava ca kathaṃ tvameva kathehī’’ti; kathentiyāpi kathaṃ sutvā kate aḍḍapariyosānepi anāpattiyeva.
ரக்க²ங் யாசதீதி த⁴ம்மிகங் ரக்க²ங் யாசதி, அனாபத்தி. இதா³னி யதா²யாசிதா ரக்கா² த⁴ம்மிகா ஹோதி, தங் த³ஸ்ஸேதுங் அனோதி³ஸ்ஸ ஆசிக்க²தீதி ஆஹ. தத்த² அதீதங் ஆரப்³ப⁴ அத்தி² ஓதி³ஸ்ஸஆசிக்க²னா, அத்தி² அனோதி³ஸ்ஸஆசிக்க²னா, அனாக³தங் ஆரப்³பா⁴பி அத்தி² ஓதி³ஸ்ஸஆசிக்க²னா, அத்தி² அனோதி³ஸ்ஸஆசிக்க²னா.
Rakkhaṃyācatīti dhammikaṃ rakkhaṃ yācati, anāpatti. Idāni yathāyācitā rakkhā dhammikā hoti, taṃ dassetuṃ anodissa ācikkhatīti āha. Tattha atītaṃ ārabbha atthi odissaācikkhanā, atthi anodissaācikkhanā, anāgataṃ ārabbhāpi atthi odissaācikkhanā, atthi anodissaācikkhanā.
கத²ங் அதீதங் ஆரப்³ப⁴ ஓதி³ஸ்ஸஆசிக்க²னா ஹோதி? பி⁴க்கு²னுபஸ்ஸயே கா³மதா³ரகா து⁴த்தாத³யோ வா யே கேசி அனாசாரங் வா ஆசரந்தி, ருக்க²ங் வா சி²ந்த³ந்தி, ப²லாப²லங் வா ஹரந்தி, பரிக்கா²ரே வா அச்சி²ந்த³ந்தி. பி⁴க்கு²னீ வோஹாரிகே உபஸங்கமித்வா ‘‘அம்ஹாகங் உபஸ்ஸயே இத³ங் நாம கத’’ந்தி வத³தி. ‘‘கேனா’’தி வுத்தே ‘‘அஸுகேன ச அஸுகேன சா’’தி ஆசிக்க²தி. ஏவங் அதீதங் ஆரப்³ப⁴ ஓதி³ஸ்ஸஆசிக்க²னா ஹோதி, ஸா ந வட்டதி. தஞ்சே ஸுத்வா தே வோஹாரிகா தேஸங் த³ண்ட³ங் கரொந்தி, ஸப்³ப³ங் பி⁴க்கு²னியா கீ³வா ஹோதி. த³ண்ட³ங் க³ண்ஹிஸ்ஸந்தீதி அதி⁴ப்பாயேபி ஸதி கீ³வாயேவ ஹோதி. ஸசே பன தஸ்ஸ த³ண்ட³ங் க³ண்ஹதா²தி வத³தி, பஞ்சமாஸகமத்தே க³ஹிதே பாராஜிகங் ஹோதி.
Kathaṃ atītaṃ ārabbha odissaācikkhanā hoti? Bhikkhunupassaye gāmadārakā dhuttādayo vā ye keci anācāraṃ vā ācaranti, rukkhaṃ vā chindanti, phalāphalaṃ vā haranti, parikkhāre vā acchindanti. Bhikkhunī vohārike upasaṅkamitvā ‘‘amhākaṃ upassaye idaṃ nāma kata’’nti vadati. ‘‘Kenā’’ti vutte ‘‘asukena ca asukena cā’’ti ācikkhati. Evaṃ atītaṃ ārabbha odissaācikkhanā hoti, sā na vaṭṭati. Tañce sutvā te vohārikā tesaṃ daṇḍaṃ karonti, sabbaṃ bhikkhuniyā gīvā hoti. Daṇḍaṃ gaṇhissantīti adhippāyepi sati gīvāyeva hoti. Sace pana tassa daṇḍaṃ gaṇhathāti vadati, pañcamāsakamatte gahite pārājikaṃ hoti.
‘‘கேனா’’தி வுத்தே பன ‘‘அஸுகேனாதி வத்துங் அம்ஹாகங் ந வட்டதி, தும்ஹேயேவ ஜானிஸ்ஸத². கேவலஞ்ஹி மயங் ரக்க²ங் யாசாம, தங் நோ தே³த², அவஹடப⁴ண்ட³ஞ்ச ஆஹராபேதா²’’தி வத்தப்³ப³ங். ஏவங் அனோதி³ஸ்ஸ ஆசிக்க²னா ஹோதி, ஸா வட்டதி. ஏவங் வுத்தே ஸசேபி தே வோஹாரிகா காரகே க³வேஸித்வா தேஸங் த³ண்ட³ங் கரொந்தி, ஸப்³ப³ங் ஸாபதெய்யம்பி க³ஹிதங் பி⁴க்கு²னியா, நேவ கீ³வா ந ஆபத்தி.
‘‘Kenā’’ti vutte pana ‘‘asukenāti vattuṃ amhākaṃ na vaṭṭati, tumheyeva jānissatha. Kevalañhi mayaṃ rakkhaṃ yācāma, taṃ no detha, avahaṭabhaṇḍañca āharāpethā’’ti vattabbaṃ. Evaṃ anodissa ācikkhanā hoti, sā vaṭṭati. Evaṃ vutte sacepi te vohārikā kārake gavesitvā tesaṃ daṇḍaṃ karonti, sabbaṃ sāpateyyampi gahitaṃ bhikkhuniyā, neva gīvā na āpatti.
பரிக்கா²ரங் ஹரந்தே தி³ஸ்வா தேஸங் அனத்த²காமதாய சோரோ சோரோதி வத்தும்பி ந வட்டதி. ஏவங் வுத்தேபி ஹி யங் தேஸங் த³ண்ட³ங் கரொந்தி, ஸப்³ப³ம்பி பி⁴க்கு²னியா கீ³வா ஹோதி. அத்தனோ வசனகரங் பன ‘‘இமினா மே பரிக்கா²ரோ க³ஹிதோ, தங் ஆஹராபேஹி, மா சஸ்ஸ த³ண்ட³ங் கரோஹீ’’தி வத்துங் வட்டதி. தா³ஸதா³ஸீவாபிஆதீ³னங் அத்தா²ய அட்³ட³ங் கரொந்தி, அயங் அகப்பியஅட்³டோ³ நாம, ந வட்டதி.
Parikkhāraṃ harante disvā tesaṃ anatthakāmatāya coro coroti vattumpi na vaṭṭati. Evaṃ vuttepi hi yaṃ tesaṃ daṇḍaṃ karonti, sabbampi bhikkhuniyā gīvā hoti. Attano vacanakaraṃ pana ‘‘iminā me parikkhāro gahito, taṃ āharāpehi, mā cassa daṇḍaṃ karohī’’ti vattuṃ vaṭṭati. Dāsadāsīvāpiādīnaṃ atthāya aḍḍaṃ karonti, ayaṃ akappiyaaḍḍo nāma, na vaṭṭati.
கத²ங் அனாக³தங் ஆரப்³ப⁴ ஓதி³ஸ்ஸஆசிக்க²னா ஹோதி? வுத்தனயேனேவ பரேஹி அனாசாராதீ³ஸு கதேஸு பி⁴க்கு²னீ வோஹாரிகே ஏவங் வத³தி ‘‘அம்ஹாகங் உபஸ்ஸயே இத³ஞ்சித³ஞ்ச கரொந்தி, ரக்க²ங் நோ தே³த² ஆயதிங் அகரணத்தா²யா’’தி. ‘‘கேன ஏவங் கத’’ந்தி வுத்தே ச ‘‘அஸுகேன அஸுகேன சா’’தி ஆசிக்க²தி. ஏவங் அனாக³தங் ஆரப்³ப⁴ ஓதி³ஸ்ஸஆசிக்க²னா ஹோதி, ஸாபி ந வட்டதி. தேஸஞ்ஹி த³ண்டே³ கதே புரிமனயேனேவ ஸப்³ப³ங் பி⁴க்கு²னியா கீ³வா. ஸேஸங் புரிமஸதி³ஸமேவ.
Kathaṃ anāgataṃ ārabbha odissaācikkhanā hoti? Vuttanayeneva parehi anācārādīsu katesu bhikkhunī vohārike evaṃ vadati ‘‘amhākaṃ upassaye idañcidañca karonti, rakkhaṃ no detha āyatiṃ akaraṇatthāyā’’ti. ‘‘Kena evaṃ kata’’nti vutte ca ‘‘asukena asukena cā’’ti ācikkhati. Evaṃ anāgataṃ ārabbha odissaācikkhanā hoti, sāpi na vaṭṭati. Tesañhi daṇḍe kate purimanayeneva sabbaṃ bhikkhuniyā gīvā. Sesaṃ purimasadisameva.
ஸசே பன வோஹாரிகா ‘‘பி⁴க்கு²னுபஸ்ஸயே ஏவரூபங் அனாசாரங் கரொந்தானங் இமங் நாம த³ண்ட³ங் கரோமா’’தி பே⁴ரிங் சராபெத்வா ஆணாய அதிட்ட²மானே பரியேஸித்வா த³ண்ட³ங் கரொந்தி, பி⁴க்கு²னியா நேவ கீ³வா ந ஆபத்தி.
Sace pana vohārikā ‘‘bhikkhunupassaye evarūpaṃ anācāraṃ karontānaṃ imaṃ nāma daṇḍaṃ karomā’’ti bheriṃ carāpetvā āṇāya atiṭṭhamāne pariyesitvā daṇḍaṃ karonti, bhikkhuniyā neva gīvā na āpatti.
யோ சாயங் பி⁴க்கு²னீனங் வுத்தோ, பி⁴க்கூ²னம்பி ஏஸேவ நயோ. பி⁴க்கு²னோபி ஹி ஓதி³ஸ்ஸஆசிக்க²னா ந வட்டதி. யங் ததா² ஆசிக்கி²தே த³ண்ட³ங் கரொந்தி, ஸப்³ப³ங் கீ³வா ஹோதி. வுத்தனயேனேவ த³ண்ட³ங் க³ண்ஹாபெந்தஸ்ஸ பாராஜிகங். யோ பன ‘‘த³ண்ட³ங் கரிஸ்ஸந்தீ’’தி ஜானந்தோபி அனோதி³ஸ்ஸ கதே²தி, தே ச பரியேஸித்வா த³ண்ட³ங் கரொந்தியேவ, ந தோ³ஸோ. விஹாரஸீமாய ருக்கா²தீ³னி சி²ந்த³ந்தானங் வாஸிப²ரஸுஆதீ³னி க³ஹெத்வா பாஸாணேஹி கொட்டெந்தி, ந வட்டதி. ஸசே தா⁴ரா பி⁴ஜ்ஜதி, காராபெத்வா தா³தப்³பா³. உபதா⁴வித்வா தேஸங் பரிக்கா²ரே க³ண்ஹந்தி, தம்பி ந காதப்³ப³ங், லஹுபரிவத்தஞ்ஹி சித்தங், தெ²ய்யசேதனாய உப்பன்னாய மூலச்சே²ஜ்ஜம்பி க³ச்செ²ய்ய. ஸேஸங் உத்தானமேவ.
Yo cāyaṃ bhikkhunīnaṃ vutto, bhikkhūnampi eseva nayo. Bhikkhunopi hi odissaācikkhanā na vaṭṭati. Yaṃ tathā ācikkhite daṇḍaṃ karonti, sabbaṃ gīvā hoti. Vuttanayeneva daṇḍaṃ gaṇhāpentassa pārājikaṃ. Yo pana ‘‘daṇḍaṃ karissantī’’ti jānantopi anodissa katheti, te ca pariyesitvā daṇḍaṃ karontiyeva, na doso. Vihārasīmāya rukkhādīni chindantānaṃ vāsipharasuādīni gahetvā pāsāṇehi koṭṭenti, na vaṭṭati. Sace dhārā bhijjati, kārāpetvā dātabbā. Upadhāvitvā tesaṃ parikkhāre gaṇhanti, tampi na kātabbaṃ, lahuparivattañhi cittaṃ, theyyacetanāya uppannāya mūlacchejjampi gaccheyya. Sesaṃ uttānameva.
கதி²னஸமுட்டா²னங் – கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், வசீகம்மங், திசித்தங், திவேத³னந்தி.
Kathinasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ஸத்தரஸகே பட²மஸிக்கா²பத³ங்.
Sattarasake paṭhamasikkhāpadaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 1. பட²மஸங்கா⁴தி³ஸேஸஸிக்கா²பத³ங் • 1. Paṭhamasaṅghādisesasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. பட²மஸங்கா⁴தி³ஸேஸஸிக்கா²பத³வண்ணனா • 1. Paṭhamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மஸங்கா⁴தி³ஸேஸஸிக்கா²பத³வண்ணனா • 1. Paṭhamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பட²மஸங்கா⁴தி³ஸேஸஸிக்கா²பத³-அத்த²யோஜனா • 1. Paṭhamasaṅghādisesasikkhāpada-atthayojanā
