| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
2. ஸங்கா⁴தி³ஸேஸகண்ட³ங் (பி⁴க்கு²னீவிப⁴ங்க³வண்ணனா)
2. Saṅghādisesakaṇḍaṃ (bhikkhunīvibhaṅgavaṇṇanā)
1. பட²மஸங்கா⁴தி³ஸேஸஸிக்கா²பத³வண்ணனா
1. Paṭhamasaṅghādisesasikkhāpadavaṇṇanā
679. ஸங்கா⁴தி³ஸேஸகண்ட³ஸ்ஸ பட²மஸிக்கா²பதே³ த்³வீஸு ஜனேஸூதி அட்³ட³காரகேஸு த்³வீஸு ஜனேஸு. யோ கோசீதி தேஸுயேவ த்³வீஸு யோ கோசி, அஞ்ஞோ வா தேஹி ஆணத்தோ. து³தியஸ்ஸ ஆரோசேதீதி எத்தா²பி த்³வீஸு ஜனேஸு யஸ்ஸ கஸ்ஸசி து³தியஸ்ஸ கத²ங் யோ கோசி ஆரோசேதீதி ஏவமத்தோ² க³ஹேதப்³போ³தி ஆஹ ‘‘து³தியஸ்ஸ ஆரோசேதீதி எத்தா²பி ஏஸேவ நயோ’’தி. க³திக³தந்தி சிரகாலபவத்தங்.
679. Saṅghādisesakaṇḍassa paṭhamasikkhāpade dvīsu janesūti aḍḍakārakesu dvīsu janesu. Yo kocīti tesuyeva dvīsu yo koci, añño vā tehi āṇatto. Dutiyassa ārocetīti etthāpi dvīsu janesu yassa kassaci dutiyassa kathaṃ yo koci ārocetīti evamattho gahetabboti āha ‘‘dutiyassa ārocetīti etthāpi eseva nayo’’ti. Gatigatanti cirakālapavattaṃ.
ஆபத்தீதி ஆபஜ்ஜனங். ஸஹ வத்து²ஜ்ஜா²சாராதி வத்து²வீதிக்கமேன ஸஹ. ஸஹயோகே³ கரணவசனப்பஸங்கே³ இத³ங் நிஸ்ஸக்கவசனங். யந்தி யங் த⁴ம்மங். நிஸ்ஸாரேதீதி ஆபன்னங் பி⁴க்கு²னிஸங்க⁴ம்ஹா நிஸ்ஸாரேதி. ஹேதும்ஹி சாயங் கத்துவோஹாரோ. நிஸ்ஸாரணஹேதுபூ⁴தோ ஹி த⁴ம்மோ நிஸ்ஸாரணீயோதி வுத்தோ. கீ³வாயேவ ஹோதி, ந பாராஜிகங் அனாணத்தியா க³ஹிதத்தா. யதா² தா³ஸதா³ஸீவாபீஆதீ³னி ஸம்படிச்சி²துங் ந வட்டதி, ஏவங் தேஸங் அத்தா²ய அட்³ட³கரணம்பி ந வட்டதீதி ஆஹ ‘‘அயங் அகப்பியஅட்³டோ³ நாம, ந வட்டதீ’’தி.
Āpattīti āpajjanaṃ. Saha vatthujjhācārāti vatthuvītikkamena saha. Sahayoge karaṇavacanappasaṅge idaṃ nissakkavacanaṃ. Yanti yaṃ dhammaṃ. Nissāretīti āpannaṃ bhikkhunisaṅghamhā nissāreti. Hetumhi cāyaṃ kattuvohāro. Nissāraṇahetubhūto hi dhammo nissāraṇīyoti vutto. Gīvāyeva hoti, na pārājikaṃ anāṇattiyā gahitattā. Yathā dāsadāsīvāpīādīni sampaṭicchituṃ na vaṭṭati, evaṃ tesaṃ atthāya aḍḍakaraṇampi na vaṭṭatīti āha ‘‘ayaṃ akappiyaaḍḍo nāma, na vaṭṭatī’’ti.
எத்த² ச ஸசே அதி⁴கரணட்டா²னங் க³ந்த்வா ‘‘அம்ஹாகங் ஏஸோ தா³ஸோ, தா³ஸீ, வாபீ, கெ²த்தங், ஆராமோ, ஆராமவத்து², கா³வோ, அஜா, குக்குடா’’திஆதி³னா வோஹரதி, அகப்பியங். ‘‘அயங் அம்ஹாகங் ஆராமிகோ, அயங் வாபீ இத்த²ன்னாமேன ஸங்க⁴ஸ்ஸ ப⁴ண்ட³தோ⁴வனத்தா²ய தி³ன்னா, இதோ கெ²த்ததோ ஆராமதோ உப்பஜ்ஜனகசதுபச்சயா இதோ கா³விதோ மஹிங்ஸிதோ அஜாதோ உப்பஜ்ஜனககோ³ரஸா இத்த²ன்னாமேன ஸங்க⁴ஸ்ஸ தி³ன்னாதி புச்சி²தே வா அபுச்சி²தே வா வத்துங் வட்டதீ’’தி வத³ந்தி. ஸேஸமெத்த² உத்தானமேவ. அனாகட்³டி⁴தாய அட்³ட³கரணங், அட்³ட³பரியோஸானந்தி இமானி பனெத்த² த்³வே அங்கா³னி.
Ettha ca sace adhikaraṇaṭṭhānaṃ gantvā ‘‘amhākaṃ eso dāso, dāsī, vāpī, khettaṃ, ārāmo, ārāmavatthu, gāvo, ajā, kukkuṭā’’tiādinā voharati, akappiyaṃ. ‘‘Ayaṃ amhākaṃ ārāmiko, ayaṃ vāpī itthannāmena saṅghassa bhaṇḍadhovanatthāya dinnā, ito khettato ārāmato uppajjanakacatupaccayā ito gāvito mahiṃsito ajāto uppajjanakagorasā itthannāmena saṅghassa dinnāti pucchite vā apucchite vā vattuṃ vaṭṭatī’’ti vadanti. Sesamettha uttānameva. Anākaḍḍhitāya aḍḍakaraṇaṃ, aḍḍapariyosānanti imāni panettha dve aṅgāni.
பட²மஸங்கா⁴தி³ஸேஸஸிக்கா²பத³வண்ணனா நிட்டி²தா.
Paṭhamasaṅghādisesasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 1. பட²மஸங்கா⁴தி³ஸேஸஸிக்கா²பத³ங் • 1. Paṭhamasaṅghādisesasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 1. பட²மஸங்கா⁴தி³ஸேஸஸிக்கா²பத³வண்ணனா • 1. Paṭhamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மஸங்கா⁴தி³ஸேஸஸிக்கா²பத³வண்ணனா • 1. Paṭhamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பட²மஸங்கா⁴தி³ஸேஸஸிக்கா²பத³-அத்த²யோஜனா • 1. Paṭhamasaṅghādisesasikkhāpada-atthayojanā
