| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
2. ஸங்கா⁴தி³ஸேஸகண்ட³ங்
2. Saṅghādisesakaṇḍaṃ
1. பட²மஸங்கா⁴தி³ஸேஸஸிக்கா²பத³வண்ணனா
1. Paṭhamasaṅghādisesasikkhāpadavaṇṇanā
679. ஸங்கா⁴தி³ஸேஸகண்டே³ ‘‘து³தியஸ்ஸ ஆரோசேதீ’’தி எத்தா²பி த்³வீஸுபி அட்³ட³காரகேஸு யஸ்ஸ கஸ்ஸசி து³தியஸ்ஸ கத²ங் யோ கோசி ஆரோசேதீதி ஏவமத்தோ² க³ஹேதப்³போ³தி ஆஹ ‘‘ஏஸேவ நயோ’’தி.
679. Saṅghādisesakaṇḍe ‘‘dutiyassa ārocetī’’ti etthāpi dvīsupi aḍḍakārakesu yassa kassaci dutiyassa kathaṃ yo koci ārocetīti evamattho gahetabboti āha ‘‘eseva nayo’’ti.
க³திக³தந்தி சிரகாலப்பவத்தங். ஆபத்தீதி ஆபஜ்ஜனங். ‘‘நிஸ்ஸாரணீய’’ந்தி இத³ங் கத்துஅத்தே² ஸித்³த⁴ந்தி ஆஹ ‘‘நிஸ்ஸாரேதீ’’தி. ஆபன்னங் பி⁴க்கு²னிங் ஸங்க⁴தோ வியோஜேதி, வியோஜனஹேது ஹோதீதி அத்தோ².
Gatigatanti cirakālappavattaṃ. Āpattīti āpajjanaṃ. ‘‘Nissāraṇīya’’nti idaṃ kattuatthe siddhanti āha ‘‘nissāretī’’ti. Āpannaṃ bhikkhuniṃ saṅghato viyojeti, viyojanahetu hotīti attho.
கீ³வாயேவாதி ஆணத்தியா அபா⁴வதோ. தேஸங் அனத்த²காமதாயாதி ‘‘சோரோ’’தி வுத்தங் மம வசனங் ஸுத்வா கேசி த³ண்டி³ஸ்ஸந்தி ஜீவிதா வோரோபெஸ்ஸந்தீதி ஏவங் ஸஞ்ஞாய. ஏதேன கேவலங் ப⁴யேன வா பரிக்கா²ரக்³க³ஹணத்த²ங் வா ஸஹஸா ‘‘சோரோ’’தி வுத்தே த³ண்டி³தேபி ந தோ³ஸோதி த³ஸ்ஸேதி. ராஜபுரிஸானஞ்ஹி ‘‘சோரோ அய’’ந்தி உத்³தி³ஸ்ஸ கத²னே ஏவ கீ³வா, பி⁴க்கூ²னங், பன ஆராமிகாதீ³னங் வா ஸம்முகா² ‘‘அஸுகோ சோரோ ஏவமகாஸீ’’தி கேனசி வுத்தவசனங் நிஸ்ஸாய ஆராமிகாதீ³ஸு ராஜபுரிஸானங் வத்வா த³ண்டா³பெந்தேஸுபி பி⁴க்கு²ஸ்ஸ ந கீ³வா ராஜபுரிஸானங் அவுத்தத்தா. யேஸஞ்ச வுத்தங், தேஹி ஸயங் சோரஸ்ஸ அத³ண்டி³தத்தாதி க³ஹேதப்³ப³ங். ‘‘த்வங் ஏதஸ்ஸ ஸந்தகங் அச்சி²ந்தா³’’தி ஆணத்தோபி ஹி ஸசே அஞ்ஞேன அச்சி²ந்தா³பேதி, ஆணாபகஸ்ஸ அனாபத்தி விஸங்கேதத்தா. ‘‘அத்தனோ வசனகர’’ந்தி இத³ங் ஸாமீசிவஸேன வுத்தங். வசனங் அகரொந்தானங் ராஜபுரிஸானம்பி ‘‘இமினா க³ஹிதபரிக்கா²ரங் ஆஹராபேஹி, மா சஸ்ஸ த³ண்ட³ங் கரோஹீ’’தி உத்³தி³ஸ்ஸ வத³ந்தஸ்ஸாபி த³ண்டே³ க³ஹிதேபி ந கீ³வா ஏவ த³ண்ட³க்³க³ஹணஸ்ஸ படிக்கி²த்தத்தா, ‘‘அஸுகப⁴ண்ட³ங் அவஹரா’’தி ஆணாபெத்வா விப்படிஸாரே உப்பன்னே புன படிக்கி²பனே (பாரா॰ 121) விய.
Gīvāyevāti āṇattiyā abhāvato. Tesaṃ anatthakāmatāyāti ‘‘coro’’ti vuttaṃ mama vacanaṃ sutvā keci daṇḍissanti jīvitā voropessantīti evaṃ saññāya. Etena kevalaṃ bhayena vā parikkhāraggahaṇatthaṃ vā sahasā ‘‘coro’’ti vutte daṇḍitepi na dosoti dasseti. Rājapurisānañhi ‘‘coro aya’’nti uddissa kathane eva gīvā, bhikkhūnaṃ, pana ārāmikādīnaṃ vā sammukhā ‘‘asuko coro evamakāsī’’ti kenaci vuttavacanaṃ nissāya ārāmikādīsu rājapurisānaṃ vatvā daṇḍāpentesupi bhikkhussa na gīvā rājapurisānaṃ avuttattā. Yesañca vuttaṃ, tehi sayaṃ corassa adaṇḍitattāti gahetabbaṃ. ‘‘Tvaṃ etassa santakaṃ acchindā’’ti āṇattopi hi sace aññena acchindāpeti, āṇāpakassa anāpatti visaṅketattā. ‘‘Attano vacanakara’’nti idaṃ sāmīcivasena vuttaṃ. Vacanaṃ akarontānaṃ rājapurisānampi ‘‘iminā gahitaparikkhāraṃ āharāpehi, mā cassa daṇḍaṃ karohī’’ti uddissa vadantassāpi daṇḍe gahitepi na gīvā eva daṇḍaggahaṇassa paṭikkhittattā, ‘‘asukabhaṇḍaṃ avaharā’’ti āṇāpetvā vippaṭisāre uppanne puna paṭikkhipane (pārā. 121) viya.
தா³ஸாதீ³னங் ஸம்படிச்ச²னே விய தத³த்தா²ய அட்³ட³கரணே பி⁴க்கூ²னம்பி து³க்கடந்தி ஆஹ ‘‘அகப்பியஅட்³டோ³ நாம ந வட்டதீ’’தி. கேனசி பன பி⁴க்கு²னா கெ²த்தாதி³அத்தா²ய வோஹாரிகானங் ஸந்திகங் க³ந்த்வா அட்³டே³ கதேபி தங் கெ²த்தாதி³ஸம்படிச்ச²னே விய ஸப்³பே³ஸங் அகப்பியங் ந ஹோதி புப்³பே³ ஏவ ஸங்க⁴ஸ்ஸ ஸந்தகத்தா , பி⁴க்கு²ஸ்ஸேவ பன பயோக³வஸேன ஆபத்தியோ ஹொந்தி. தா³ஸாதீ³னம்பி பன அத்தா²ய ரக்க²ங் யாசிதுங் வோஹாரிகேன புட்டே²ன ஸங்க⁴ஸ்ஸ உப்பன்னங் கப்பியக்கமங் வத்துங், ஆராமிகாதீ³ஹி ச அட்³ட³ங் காராபேதுஞ்ச வட்டதி ஏவ. விஹாரவத்தா²தி³கப்பியஅட்³ட³ங் பன பி⁴க்கு²னோ ஸயம்பி காதுங் வட்டதி.
Dāsādīnaṃ sampaṭicchane viya tadatthāya aḍḍakaraṇe bhikkhūnampi dukkaṭanti āha ‘‘akappiyaaḍḍo nāma na vaṭṭatī’’ti. Kenaci pana bhikkhunā khettādiatthāya vohārikānaṃ santikaṃ gantvā aḍḍe katepi taṃ khettādisampaṭicchane viya sabbesaṃ akappiyaṃ na hoti pubbe eva saṅghassa santakattā , bhikkhusseva pana payogavasena āpattiyo honti. Dāsādīnampi pana atthāya rakkhaṃ yācituṃ vohārikena puṭṭhena saṅghassa uppannaṃ kappiyakkamaṃ vattuṃ, ārāmikādīhi ca aḍḍaṃ kārāpetuñca vaṭṭati eva. Vihāravatthādikappiyaaḍḍaṃ pana bhikkhuno sayampi kātuṃ vaṭṭati.
பி⁴க்கு²னீனங் வுத்தோதி ரக்க²ங் யாசந்தீனங் பி⁴க்கு²னீனங் வுத்தோ உத்³தி³ஸ்ஸஅனுத்³தி³ஸ்ஸவஸேன ரக்கா²யாசனவினிச்ச²யோ, ந ஸப்³போ³ ஸிக்கா²பத³வினிச்ச²யோ அஸாதா⁴ரணத்தா ஸிக்கா²பத³ஸ்ஸ. தேனாஹ ‘‘பி⁴க்கு²னோபீ’’திஆதி³. அனாகட்³டி⁴தாய அட்³ட³கரணங், அட்³ட³பரியோஸானந்தி த்³வே அங்கா³னி.
Bhikkhunīnaṃ vuttoti rakkhaṃ yācantīnaṃ bhikkhunīnaṃ vutto uddissaanuddissavasena rakkhāyācanavinicchayo, na sabbo sikkhāpadavinicchayo asādhāraṇattā sikkhāpadassa. Tenāha ‘‘bhikkhunopī’’tiādi. Anākaḍḍhitāya aḍḍakaraṇaṃ, aḍḍapariyosānanti dve aṅgāni.
பட²மஸங்கா⁴தி³ஸேஸஸிக்கா²பத³வண்ணனா நிட்டி²தா.
Paṭhamasaṅghādisesasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 1. பட²மஸங்கா⁴தி³ஸேஸஸிக்கா²பத³ங் • 1. Paṭhamasaṅghādisesasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 1. பட²மஸங்கா⁴தி³ஸேஸஸிக்கா²பத³வண்ணனா • 1. Paṭhamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. பட²மஸங்கா⁴தி³ஸேஸஸிக்கா²பத³வண்ணனா • 1. Paṭhamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பட²மஸங்கா⁴தி³ஸேஸஸிக்கா²பத³-அத்த²யோஜனா • 1. Paṭhamasaṅghādisesasikkhāpada-atthayojanā
