| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
২. সঙ্ঘাদিসেসকণ্ডং
2. Saṅghādisesakaṇḍaṃ
১. পঠমসঙ্ঘাদিসেসসিক্খাপদৰণ্ণনা
1. Paṭhamasaṅghādisesasikkhāpadavaṇṇanā
৬৭৯. সঙ্ঘাদিসেসকণ্ডে ‘‘দুতিযস্স আরোচেতী’’তি এত্থাপি দ্ৰীসুপি অড্ডকারকেসু যস্স কস্সচি দুতিযস্স কথং যো কোচি আরোচেতীতি এৰমত্থো গহেতব্বোতি আহ ‘‘এসেৰ নযো’’তি।
679. Saṅghādisesakaṇḍe ‘‘dutiyassa ārocetī’’ti etthāpi dvīsupi aḍḍakārakesu yassa kassaci dutiyassa kathaṃ yo koci ārocetīti evamattho gahetabboti āha ‘‘eseva nayo’’ti.
গতিগতন্তি চিরকালপ্পৰত্তং। আপত্তীতি আপজ্জনং। ‘‘নিস্সারণীয’’ন্তি ইদং কত্তুঅত্থে সিদ্ধন্তি আহ ‘‘নিস্সারেতী’’তি। আপন্নং ভিক্খুনিং সঙ্ঘতো ৰিযোজেতি, ৰিযোজনহেতু হোতীতি অত্থো।
Gatigatanti cirakālappavattaṃ. Āpattīti āpajjanaṃ. ‘‘Nissāraṇīya’’nti idaṃ kattuatthe siddhanti āha ‘‘nissāretī’’ti. Āpannaṃ bhikkhuniṃ saṅghato viyojeti, viyojanahetu hotīti attho.
গীৰাযেৰাতি আণত্তিযা অভাৰতো। তেসং অনত্থকামতাযাতি ‘‘চোরো’’তি ৰুত্তং মম ৰচনং সুত্ৰা কেচি দণ্ডিস্সন্তি জীৰিতা ৰোরোপেস্সন্তীতি এৰং সঞ্ঞায। এতেন কেৰলং ভযেন ৰা পরিক্খারগ্গহণত্থং ৰা সহসা ‘‘চোরো’’তি ৰুত্তে দণ্ডিতেপি ন দোসোতি দস্সেতি। রাজপুরিসানঞ্হি ‘‘চোরো অয’’ন্তি উদ্দিস্স কথনে এৰ গীৰা, ভিক্খূনং, পন আরামিকাদীনং ৰা সম্মুখা ‘‘অসুকো চোরো এৰমকাসী’’তি কেনচি ৰুত্তৰচনং নিস্সায আরামিকাদীসু রাজপুরিসানং ৰত্ৰা দণ্ডাপেন্তেসুপি ভিক্খুস্স ন গীৰা রাজপুরিসানং অৰুত্তত্তা। যেসঞ্চ ৰুত্তং, তেহি সযং চোরস্স অদণ্ডিতত্তাতি গহেতব্বং। ‘‘ত্ৰং এতস্স সন্তকং অচ্ছিন্দা’’তি আণত্তোপি হি সচে অঞ্ঞেন অচ্ছিন্দাপেতি, আণাপকস্স অনাপত্তি ৰিসঙ্কেতত্তা। ‘‘অত্তনো ৰচনকর’’ন্তি ইদং সামীচিৰসেন ৰুত্তং। ৰচনং অকরোন্তানং রাজপুরিসানম্পি ‘‘ইমিনা গহিতপরিক্খারং আহরাপেহি, মা চস্স দণ্ডং করোহী’’তি উদ্দিস্স ৰদন্তস্সাপি দণ্ডে গহিতেপি ন গীৰা এৰ দণ্ডগ্গহণস্স পটিক্খিত্তত্তা, ‘‘অসুকভণ্ডং অৰহরা’’তি আণাপেত্ৰা ৰিপ্পটিসারে উপ্পন্নে পুন পটিক্খিপনে (পারা॰ ১২১) ৰিয।
Gīvāyevāti āṇattiyā abhāvato. Tesaṃ anatthakāmatāyāti ‘‘coro’’ti vuttaṃ mama vacanaṃ sutvā keci daṇḍissanti jīvitā voropessantīti evaṃ saññāya. Etena kevalaṃ bhayena vā parikkhāraggahaṇatthaṃ vā sahasā ‘‘coro’’ti vutte daṇḍitepi na dosoti dasseti. Rājapurisānañhi ‘‘coro aya’’nti uddissa kathane eva gīvā, bhikkhūnaṃ, pana ārāmikādīnaṃ vā sammukhā ‘‘asuko coro evamakāsī’’ti kenaci vuttavacanaṃ nissāya ārāmikādīsu rājapurisānaṃ vatvā daṇḍāpentesupi bhikkhussa na gīvā rājapurisānaṃ avuttattā. Yesañca vuttaṃ, tehi sayaṃ corassa adaṇḍitattāti gahetabbaṃ. ‘‘Tvaṃ etassa santakaṃ acchindā’’ti āṇattopi hi sace aññena acchindāpeti, āṇāpakassa anāpatti visaṅketattā. ‘‘Attano vacanakara’’nti idaṃ sāmīcivasena vuttaṃ. Vacanaṃ akarontānaṃ rājapurisānampi ‘‘iminā gahitaparikkhāraṃ āharāpehi, mā cassa daṇḍaṃ karohī’’ti uddissa vadantassāpi daṇḍe gahitepi na gīvā eva daṇḍaggahaṇassa paṭikkhittattā, ‘‘asukabhaṇḍaṃ avaharā’’ti āṇāpetvā vippaṭisāre uppanne puna paṭikkhipane (pārā. 121) viya.
দাসাদীনং সম্পটিচ্ছনে ৰিয তদত্থায অড্ডকরণে ভিক্খূনম্পি দুক্কটন্তি আহ ‘‘অকপ্পিযঅড্ডো নাম ন ৰট্টতী’’তি। কেনচি পন ভিক্খুনা খেত্তাদিঅত্থায ৰোহারিকানং সন্তিকং গন্ত্ৰা অড্ডে কতেপি তং খেত্তাদিসম্পটিচ্ছনে ৰিয সব্বেসং অকপ্পিযং ন হোতি পুব্বে এৰ সঙ্ঘস্স সন্তকত্তা , ভিক্খুস্সেৰ পন পযোগৰসেন আপত্তিযো হোন্তি। দাসাদীনম্পি পন অত্থায রক্খং যাচিতুং ৰোহারিকেন পুট্ঠেন সঙ্ঘস্স উপ্পন্নং কপ্পিযক্কমং ৰত্তুং, আরামিকাদীহি চ অড্ডং কারাপেতুঞ্চ ৰট্টতি এৰ। ৰিহারৰত্থাদিকপ্পিযঅড্ডং পন ভিক্খুনো সযম্পি কাতুং ৰট্টতি।
Dāsādīnaṃ sampaṭicchane viya tadatthāya aḍḍakaraṇe bhikkhūnampi dukkaṭanti āha ‘‘akappiyaaḍḍo nāma na vaṭṭatī’’ti. Kenaci pana bhikkhunā khettādiatthāya vohārikānaṃ santikaṃ gantvā aḍḍe katepi taṃ khettādisampaṭicchane viya sabbesaṃ akappiyaṃ na hoti pubbe eva saṅghassa santakattā , bhikkhusseva pana payogavasena āpattiyo honti. Dāsādīnampi pana atthāya rakkhaṃ yācituṃ vohārikena puṭṭhena saṅghassa uppannaṃ kappiyakkamaṃ vattuṃ, ārāmikādīhi ca aḍḍaṃ kārāpetuñca vaṭṭati eva. Vihāravatthādikappiyaaḍḍaṃ pana bhikkhuno sayampi kātuṃ vaṭṭati.
ভিক্খুনীনং ৰুত্তোতি রক্খং যাচন্তীনং ভিক্খুনীনং ৰুত্তো উদ্দিস্সঅনুদ্দিস্সৰসেন রক্খাযাচনৰিনিচ্ছযো, ন সব্বো সিক্খাপদৰিনিচ্ছযো অসাধারণত্তা সিক্খাপদস্স। তেনাহ ‘‘ভিক্খুনোপী’’তিআদি। অনাকড্ঢিতায অড্ডকরণং, অড্ডপরিযোসানন্তি দ্ৰে অঙ্গানি।
Bhikkhunīnaṃ vuttoti rakkhaṃ yācantīnaṃ bhikkhunīnaṃ vutto uddissaanuddissavasena rakkhāyācanavinicchayo, na sabbo sikkhāpadavinicchayo asādhāraṇattā sikkhāpadassa. Tenāha ‘‘bhikkhunopī’’tiādi. Anākaḍḍhitāya aḍḍakaraṇaṃ, aḍḍapariyosānanti dve aṅgāni.
পঠমসঙ্ঘাদিসেসসিক্খাপদৰণ্ণনা নিট্ঠিতা।
Paṭhamasaṅghādisesasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / ভিক্খুনীৰিভঙ্গ • Bhikkhunīvibhaṅga / ১. পঠমসঙ্ঘাদিসেসসিক্খাপদং • 1. Paṭhamasaṅghādisesasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ১. পঠমসঙ্ঘাদিসেসসিক্খাপদৰণ্ণনা • 1. Paṭhamasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. পঠমসঙ্ঘাদিসেসসিক্খাপদৰণ্ণনা • 1. Paṭhamasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. পঠমসঙ্ঘাদিসেসসিক্খাপদ-অত্থযোজনা • 1. Paṭhamasaṅghādisesasikkhāpada-atthayojanā
