| Library / Tipiṭaka / ਤਿਪਿਟਕ • Tipiṭaka / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā |
੨. ਸਙ੍ਘਾਦਿਸੇਸਕਣ੍ਡਂ (ਭਿਕ੍ਖੁਨੀવਿਭਙ੍ਗવਣ੍ਣਨਾ)
2. Saṅghādisesakaṇḍaṃ (bhikkhunīvibhaṅgavaṇṇanā)
੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦવਣ੍ਣਨਾ
1. Paṭhamasaṅghādisesasikkhāpadavaṇṇanā
੬੭੯. ਸਙ੍ਘਾਦਿਸੇਸਕਣ੍ਡਸ੍ਸ ਪਠਮਸਿਕ੍ਖਾਪਦੇ ਦ੍વੀਸੁ ਜਨੇਸੂਤਿ ਅਡ੍ਡਕਾਰਕੇਸੁ ਦ੍વੀਸੁ ਜਨੇਸੁ। ਯੋ ਕੋਚੀਤਿ ਤੇਸੁਯੇવ ਦ੍વੀਸੁ ਯੋ ਕੋਚਿ, ਅਞ੍ਞੋ વਾ ਤੇਹਿ ਆਣਤ੍ਤੋ। ਦੁਤਿਯਸ੍ਸ ਆਰੋਚੇਤੀਤਿ ਏਤ੍ਥਾਪਿ ਦ੍વੀਸੁ ਜਨੇਸੁ ਯਸ੍ਸ ਕਸ੍ਸਚਿ ਦੁਤਿਯਸ੍ਸ ਕਥਂ ਯੋ ਕੋਚਿ ਆਰੋਚੇਤੀਤਿ ਏવਮਤ੍ਥੋ ਗਹੇਤਬ੍ਬੋਤਿ ਆਹ ‘‘ਦੁਤਿਯਸ੍ਸ ਆਰੋਚੇਤੀਤਿ ਏਤ੍ਥਾਪਿ ਏਸੇવ ਨਯੋ’’ਤਿ। ਗਤਿਗਤਨ੍ਤਿ ਚਿਰਕਾਲਪવਤ੍ਤਂ।
679. Saṅghādisesakaṇḍassa paṭhamasikkhāpade dvīsu janesūti aḍḍakārakesu dvīsu janesu. Yo kocīti tesuyeva dvīsu yo koci, añño vā tehi āṇatto. Dutiyassa ārocetīti etthāpi dvīsu janesu yassa kassaci dutiyassa kathaṃ yo koci ārocetīti evamattho gahetabboti āha ‘‘dutiyassa ārocetīti etthāpi eseva nayo’’ti. Gatigatanti cirakālapavattaṃ.
ਆਪਤ੍ਤੀਤਿ ਆਪਜ੍ਜਨਂ। ਸਹ વਤ੍ਥੁਜ੍ਝਾਚਾਰਾਤਿ વਤ੍ਥੁવੀਤਿਕ੍ਕਮੇਨ ਸਹ। ਸਹਯੋਗੇ ਕਰਣવਚਨਪ੍ਪਸਙ੍ਗੇ ਇਦਂ ਨਿਸ੍ਸਕ੍ਕવਚਨਂ। ਯਨ੍ਤਿ ਯਂ ਧਮ੍ਮਂ। ਨਿਸ੍ਸਾਰੇਤੀਤਿ ਆਪਨ੍ਨਂ ਭਿਕ੍ਖੁਨਿਸਙ੍ਘਮ੍ਹਾ ਨਿਸ੍ਸਾਰੇਤਿ। ਹੇਤੁਮ੍ਹਿ ਚਾਯਂ ਕਤ੍ਤੁવੋਹਾਰੋ। ਨਿਸ੍ਸਾਰਣਹੇਤੁਭੂਤੋ ਹਿ ਧਮ੍ਮੋ ਨਿਸ੍ਸਾਰਣੀਯੋਤਿ વੁਤ੍ਤੋ। ਗੀવਾਯੇવ ਹੋਤਿ, ਨ ਪਾਰਾਜਿਕਂ ਅਨਾਣਤ੍ਤਿਯਾ ਗਹਿਤਤ੍ਤਾ। ਯਥਾ ਦਾਸਦਾਸੀવਾਪੀਆਦੀਨਿ ਸਮ੍ਪਟਿਚ੍ਛਿਤੁਂ ਨ વਟ੍ਟਤਿ, ਏવਂ ਤੇਸਂ ਅਤ੍ਥਾਯ ਅਡ੍ਡਕਰਣਮ੍ਪਿ ਨ વਟ੍ਟਤੀਤਿ ਆਹ ‘‘ਅਯਂ ਅਕਪ੍ਪਿਯਅਡ੍ਡੋ ਨਾਮ, ਨ વਟ੍ਟਤੀ’’ਤਿ।
Āpattīti āpajjanaṃ. Saha vatthujjhācārāti vatthuvītikkamena saha. Sahayoge karaṇavacanappasaṅge idaṃ nissakkavacanaṃ. Yanti yaṃ dhammaṃ. Nissāretīti āpannaṃ bhikkhunisaṅghamhā nissāreti. Hetumhi cāyaṃ kattuvohāro. Nissāraṇahetubhūto hi dhammo nissāraṇīyoti vutto. Gīvāyeva hoti, na pārājikaṃ anāṇattiyā gahitattā. Yathā dāsadāsīvāpīādīni sampaṭicchituṃ na vaṭṭati, evaṃ tesaṃ atthāya aḍḍakaraṇampi na vaṭṭatīti āha ‘‘ayaṃ akappiyaaḍḍo nāma, na vaṭṭatī’’ti.
ਏਤ੍ਥ ਚ ਸਚੇ ਅਧਿਕਰਣਟ੍ਠਾਨਂ ਗਨ੍ਤ੍વਾ ‘‘ਅਮ੍ਹਾਕਂ ਏਸੋ ਦਾਸੋ, ਦਾਸੀ, વਾਪੀ, ਖੇਤ੍ਤਂ, ਆਰਾਮੋ, ਆਰਾਮવਤ੍ਥੁ, ਗਾવੋ, ਅਜਾ, ਕੁਕ੍ਕੁਟਾ’’ਤਿਆਦਿਨਾ વੋਹਰਤਿ, ਅਕਪ੍ਪਿਯਂ। ‘‘ਅਯਂ ਅਮ੍ਹਾਕਂ ਆਰਾਮਿਕੋ, ਅਯਂ વਾਪੀ ਇਤ੍ਥਨ੍ਨਾਮੇਨ ਸਙ੍ਘਸ੍ਸ ਭਣ੍ਡਧੋવਨਤ੍ਥਾਯ ਦਿਨ੍ਨਾ, ਇਤੋ ਖੇਤ੍ਤਤੋ ਆਰਾਮਤੋ ਉਪ੍ਪਜ੍ਜਨਕਚਤੁਪਚ੍ਚਯਾ ਇਤੋ ਗਾવਿਤੋ ਮਹਿਂਸਿਤੋ ਅਜਾਤੋ ਉਪ੍ਪਜ੍ਜਨਕਗੋਰਸਾ ਇਤ੍ਥਨ੍ਨਾਮੇਨ ਸਙ੍ਘਸ੍ਸ ਦਿਨ੍ਨਾਤਿ ਪੁਚ੍ਛਿਤੇ વਾ ਅਪੁਚ੍ਛਿਤੇ વਾ વਤ੍ਤੁਂ વਟ੍ਟਤੀ’’ਤਿ વਦਨ੍ਤਿ। ਸੇਸਮੇਤ੍ਥ ਉਤ੍ਤਾਨਮੇવ। ਅਨਾਕਡ੍ਢਿਤਾਯ ਅਡ੍ਡਕਰਣਂ, ਅਡ੍ਡਪਰਿਯੋਸਾਨਨ੍ਤਿ ਇਮਾਨਿ ਪਨੇਤ੍ਥ ਦ੍વੇ ਅਙ੍ਗਾਨਿ।
Ettha ca sace adhikaraṇaṭṭhānaṃ gantvā ‘‘amhākaṃ eso dāso, dāsī, vāpī, khettaṃ, ārāmo, ārāmavatthu, gāvo, ajā, kukkuṭā’’tiādinā voharati, akappiyaṃ. ‘‘Ayaṃ amhākaṃ ārāmiko, ayaṃ vāpī itthannāmena saṅghassa bhaṇḍadhovanatthāya dinnā, ito khettato ārāmato uppajjanakacatupaccayā ito gāvito mahiṃsito ajāto uppajjanakagorasā itthannāmena saṅghassa dinnāti pucchite vā apucchite vā vattuṃ vaṭṭatī’’ti vadanti. Sesamettha uttānameva. Anākaḍḍhitāya aḍḍakaraṇaṃ, aḍḍapariyosānanti imāni panettha dve aṅgāni.
ਪਠਮਸਙ੍ਘਾਦਿਸੇਸਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Paṭhamasaṅghādisesasikkhāpadavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਭਿਕ੍ਖੁਨੀવਿਭਙ੍ਗ • Bhikkhunīvibhaṅga / ੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦਂ • 1. Paṭhamasaṅghādisesasikkhāpadaṃ
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਭਿਕ੍ਖੁਨੀવਿਭਙ੍ਗ-ਅਟ੍ਠਕਥਾ • Bhikkhunīvibhaṅga-aṭṭhakathā / ੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦવਣ੍ਣਨਾ • 1. Paṭhamasaṅghādisesasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦવਣ੍ਣਨਾ • 1. Paṭhamasaṅghādisesasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦ-ਅਤ੍ਥਯੋਜਨਾ • 1. Paṭhamasaṅghādisesasikkhāpada-atthayojanā
