| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
६. पठमसङ्घिकचेतापनसिक्खापदवण्णना
6. Paṭhamasaṅghikacetāpanasikkhāpadavaṇṇanā
अञ्ञस्सत्थाय दिन्नेनाति यं चेतापेति, ततो अञ्ञस्सत्थाय दिन्नेन। अञ्ञुद्दिसिकेनाति पुरिमस्सेवत्थदीपनं।
Aññassatthāya dinnenāti yaṃ cetāpeti, tato aññassatthāya dinnena. Aññuddisikenāti purimassevatthadīpanaṃ.
सेसकं उपनेन्तियाति यदत्थाय दिन्नो, तं चेतापेत्वा अवसेसं अञ्ञस्सत्थाय उपनेन्तिया। सामिके अपलोकेत्वाति दायके आपुच्छित्वा। एवरूपासू आपदासु उपनेन्तीनन्ति एवरूपेसु उपद्दवेसु अञ्ञस्स यस्स कस्सचि अत्थाय उपनेन्तीनं।
Sesakaṃ upanentiyāti yadatthāya dinno, taṃ cetāpetvā avasesaṃ aññassatthāya upanentiyā. Sāmike apaloketvāti dāyake āpucchitvā. Evarūpāsū āpadāsu upanentīnanti evarūpesu upaddavesu aññassa yassa kassaci atthāya upanentīnaṃ.
पठमसङ्घिकचेतापनसिक्खापदवण्णना निट्ठिता।
Paṭhamasaṅghikacetāpanasikkhāpadavaṇṇanā niṭṭhitā.
