| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៤. បឋមសរណានិសក្កសុត្តវណ្ណនា
4. Paṭhamasaraṇānisakkasuttavaṇṇanā
១០២០. ចតុត្ថេ ឥធ មហានាម ឯកច្ចោ បុគ្គលោតិ ឥទំ ន កេវលំ សរណានិ ឯវ អបាយតោ មុត្តោ, ឥមេបិ បុគ្គលា មុត្តាតិ ទស្សេតុំ អារទ្ធំ។ មត្តសោ និជ្ឈានំ ខមន្តីតិ បមាណេន ច ឱលោកនំ ខមន្តិ។ ឥមិនា ធម្មានុសារិមគ្គដ្ឋបុគ្គលំ ទស្សេតិ។ អគន្តា និរយន្តិ មគ្គដ្ឋបុគ្គលោ ហិ អបាយតោ បរិមុត្តោតិ វា បរិមុច្ចិស្សតីតិ វា វត្តុំ ន វដ្ដតិ, បរិមុច្ចតីតិ បន វត្តុំ វដ្ដតិ។ យស្មា ច បរិមុច្ចតិ, តស្មា គន្តា នាម ន ហោតីតិ, ‘‘អគន្តា’’តិ វុត្តោ, ន គច្ឆតីតិ អត្ថោ។ សទ្ធាមត្តំ បេមមត្តន្តិ ឥមិនា សទ្ធានុសារិមគ្គដ្ឋបុគ្គលំ ទស្សេតិ។ មហាសាលាតិ សមីបេ ឋិតេវ ចត្តារោ មហាសាររុក្ខេ ទស្សេន្តោ អាហ។ មរណកាលេ សិក្ខំ សមាទិយីតិ មរណសមយេ តីសុ សិក្ខាសុ បរិបូរការី អហោសីតិ ទស្សេតិ។
1020. Catutthe idha mahānāma ekacco puggaloti idaṃ na kevalaṃ saraṇāni eva apāyato mutto, imepi puggalā muttāti dassetuṃ āraddhaṃ. Mattaso nijjhānaṃ khamantīti pamāṇena ca olokanaṃ khamanti. Iminā dhammānusārimaggaṭṭhapuggalaṃ dasseti. Agantā nirayanti maggaṭṭhapuggalo hi apāyato parimuttoti vā parimuccissatīti vā vattuṃ na vaṭṭati, parimuccatīti pana vattuṃ vaṭṭati. Yasmā ca parimuccati, tasmā gantā nāma na hotīti, ‘‘agantā’’ti vutto, na gacchatīti attho. Saddhāmattaṃ pemamattanti iminā saddhānusārimaggaṭṭhapuggalaṃ dasseti. Mahāsālāti samīpe ṭhiteva cattāro mahāsārarukkhe dassento āha. Maraṇakāle sikkhaṃ samādiyīti maraṇasamaye tīsu sikkhāsu paripūrakārī ahosīti dasseti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៤. បឋមសរណានិសក្កសុត្តំ • 4. Paṭhamasaraṇānisakkasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៤. បឋមសរណានិសក្កសុត្តវណ្ណនា • 4. Paṭhamasaraṇānisakkasuttavaṇṇanā
