1. பட²மஸாரணீயஸுத்தவண்ணனா

1. Paṭhamasāraṇīyasuttavaṇṇanā

11. து³தியஸ்ஸ பட²மே ஸரிதப்³ப³யுத்தகாதி அனுஸ்ஸரணாரஹா. மிஜ்ஜதி ஸினிய்ஹதி ஏதாயாதி மெத்தா, மித்தபா⁴வோ. மெத்தா ஏதஸ்ஸ அத்தீ²தி மெத்தங், காயகம்மங். தங் பன யஸ்மா மெத்தாஸஹக³தசித்தஸமுட்டா²னங், தஸ்மா வுத்தங் ‘‘மெத்தேன சித்தேன காதப்³ப³ங் காயகம்ம’’ந்தி. ஏஸ நயோ ஸேஸத்³வயேபி. இமானீதி மெத்தகாயகம்மாதீ³னி. பி⁴க்கூ²னங் வஸேன ஆக³தானி தேஸங் ஸெட்ட²பரிஸபா⁴வதோ. யதா² பன பி⁴க்கு²னீஸுபி லப்³ப⁴ந்தி, ஏவங் கி³ஹீஸுபி லப்³ப⁴ந்தி சதுபரிஸஸாதா⁴ரணத்தாதி தங் த³ஸ்ஸெந்தோ ‘‘பி⁴க்கூ²னஞ்ஹீ’’திஆதி³மாஹ. பி⁴க்கு²னோ ஸப்³ப³ம்பி அனவஜ்ஜகாயகம்மங் ஆபி⁴ஸமாசாரிககம்மந்தோக³த⁴மேவாதி ஆஹ ‘‘மெத்தேன சித்தேன…பே॰… காயகம்மங் நாமா’’தி. ப⁴த்திவஸேன பவத்தியமானா சேதியபோ³தீ⁴னங் வந்த³னா மெத்தாஸித்³தா⁴தி கத்வா தத³த்தா²ய க³மனங் ‘‘மெத்தங் காயகம்ம’’ந்தி வுத்தங். ஆதி³-ஸத்³தே³ன சேதியபோ³தி⁴பி⁴க்கூ²ஸு வுத்தாவஸேஸாபசாயனாதி³வஸேன பவத்தமெத்தாவஸேன பவத்தங் காயிகங் கிரியங் ஸங்க³ண்ஹாதி.

11. Dutiyassa paṭhame saritabbayuttakāti anussaraṇārahā. Mijjati siniyhati etāyāti mettā, mittabhāvo. Mettā etassa atthīti mettaṃ, kāyakammaṃ. Taṃ pana yasmā mettāsahagatacittasamuṭṭhānaṃ, tasmā vuttaṃ ‘‘mettena cittena kātabbaṃ kāyakamma’’nti. Esa nayo sesadvayepi. Imānīti mettakāyakammādīni. Bhikkhūnaṃ vasena āgatāni tesaṃ seṭṭhaparisabhāvato. Yathā pana bhikkhunīsupi labbhanti, evaṃ gihīsupi labbhanti catuparisasādhāraṇattāti taṃ dassento ‘‘bhikkhūnañhī’’tiādimāha. Bhikkhuno sabbampi anavajjakāyakammaṃ ābhisamācārikakammantogadhamevāti āha ‘‘mettena cittena…pe… kāyakammaṃ nāmā’’ti. Bhattivasena pavattiyamānā cetiyabodhīnaṃ vandanā mettāsiddhāti katvā tadatthāya gamanaṃ ‘‘mettaṃ kāyakamma’’nti vuttaṃ. Ādi-saddena cetiyabodhibhikkhūsu vuttāvasesāpacāyanādivasena pavattamettāvasena pavattaṃ kāyikaṃ kiriyaṃ saṅgaṇhāti.

தேபிடகம்பி பு³த்³த⁴வசனங் கதி²யமானந்தி அதி⁴ப்பாயோ. தேபிடகம்பி பு³த்³த⁴வசனங் பரிபுச்ச²னஅத்த²கத²னவஸேன பவத்தியமானமேவ மெத்தங் வசீகம்மங் நாம ஹிதஜ்ஜா²ஸயேன பவத்திதப்³ப³தோ. தீணி ஸுசரிதானீதி காயவசீமனோஸுசரிதானி. சிந்தனந்தி ஏவங் சிந்தனமத்தம்பி மனோகம்மங், பகே³வ படிபன்னா பா⁴வனாதி த³ஸ்ஸேதி.

Tepiṭakampi buddhavacanaṃ kathiyamānanti adhippāyo. Tepiṭakampi buddhavacanaṃ paripucchanaatthakathanavasena pavattiyamānameva mettaṃ vacīkammaṃ nāma hitajjhāsayena pavattitabbato. Tīṇi sucaritānīti kāyavacīmanosucaritāni. Cintananti evaṃ cintanamattampi manokammaṃ, pageva paṭipannā bhāvanāti dasseti.

ஆவீதி பகாஸங். பகாஸபா⁴வோ செத்த² யங் உத்³தி³ஸ்ஸ தங் காயகம்மங் கரீயதி, தஸ்ஸ ஸம்முக²பா⁴வதோதி ஆஹ ‘‘ஸம்முகா²’’தி. ரஹோதி அப்பகாஸங். அப்பகாஸதா ச யங் உத்³தி³ஸ்ஸ தங் காயகம்மங் கரீயதி, தஸ்ஸ அபச்சக்க²பா⁴வதோதி ஆஹ ‘‘பரம்முகா²’’தி. ஸஹாயபா⁴வக³மனங் தேஸங் புரதோ. தேஸு கரொந்தேஸுயேவ ஹி ஸஹாயபா⁴வக³மனங் ஸம்முகா² காயகம்மங் நாம ஹோதி. உப⁴யேஹீதி நவகேஹி தே²ரேஹி ச. பக்³க³ய்ஹாதி பக்³க³ண்ஹித்வா உத்³த⁴ங் கத்வா கேவலங் ‘‘தே³வோ’’தி அவத்வா கு³ணேஹி தி²ரபா⁴வஜோதனங் ‘‘தே³வத்தே²ரோ’’தி வசனங் பக்³க³ய்ஹ வசனங். மமத்தபோ³த⁴னங் வசனங் மமாயனவசனங். ஏகந்தபரம்முக²ஸ்ஸ மனோகம்மஸ்ஸ ஸம்முக²தா நாம விஞ்ஞத்திஸமுட்டா²பனவஸேன ஹோதி, தஞ்ச கோ² லோகே காயகம்மந்தி பாகடங் பஞ்ஞாதங். ஹத்த²விகாராதீ³னி அனாமஸித்வா ஏவ த³ஸ்ஸெந்தோ ‘‘நயனானி உம்மீலெத்வா’’திஆதி³மாஹ. காமங் மெத்தாஸினேஹஸினித்³தா⁴னங் நயனானங் உம்மீலனா பஸன்னேன முகே²ன ஓலோகனஞ்ச மெத்தங் காயகம்மமேவ, யஸ்ஸ பன சித்தஸ்ஸ வஸேன நயனானங் மெத்தாஸினேஹஸினித்³த⁴தா முக²ஸ்ஸ ச பஸன்னதா, தங் ஸந்தா⁴ய வுத்தங் ‘‘மெத்தங் மனோகம்மங் நாமா’’தி.

Āvīti pakāsaṃ. Pakāsabhāvo cettha yaṃ uddissa taṃ kāyakammaṃ karīyati, tassa sammukhabhāvatoti āha ‘‘sammukhā’’ti. Rahoti appakāsaṃ. Appakāsatā ca yaṃ uddissa taṃ kāyakammaṃ karīyati, tassa apaccakkhabhāvatoti āha ‘‘parammukhā’’ti. Sahāyabhāvagamanaṃ tesaṃ purato. Tesu karontesuyeva hi sahāyabhāvagamanaṃ sammukhā kāyakammaṃ nāma hoti. Ubhayehīti navakehi therehi ca. Paggayhāti paggaṇhitvā uddhaṃ katvā kevalaṃ ‘‘devo’’ti avatvā guṇehi thirabhāvajotanaṃ ‘‘devatthero’’ti vacanaṃ paggayha vacanaṃ. Mamattabodhanaṃ vacanaṃ mamāyanavacanaṃ. Ekantaparammukhassa manokammassa sammukhatā nāma viññattisamuṭṭhāpanavasena hoti, tañca kho loke kāyakammanti pākaṭaṃ paññātaṃ. Hatthavikārādīni anāmasitvā eva dassento ‘‘nayanāni ummīletvā’’tiādimāha. Kāmaṃ mettāsinehasiniddhānaṃ nayanānaṃ ummīlanā pasannena mukhena olokanañca mettaṃ kāyakammameva, yassa pana cittassa vasena nayanānaṃ mettāsinehasiniddhatā mukhassa ca pasannatā, taṃ sandhāya vuttaṃ ‘‘mettaṃ manokammaṃ nāmā’’ti.

லாப⁴-ஸத்³தோ³ கம்மஸாத⁴னோ ‘‘லாபா⁴ வத, போ⁴, லத்³தோ⁴’’திஆதீ³ஸு விய. ஸோ செத்த² ‘‘த⁴ம்மலத்³தா⁴’’தி வசனதோ அதீதகாலிகோதி ஆஹ ‘‘சீவராத³யோ லத்³த⁴பச்சயா’’தி. த⁴ம்மதோ ஆக³தாதி த⁴ம்மிகா, பரிஸுத்³த⁴க³மனா பச்சயா. தேனாஹ ‘‘த⁴ம்மலத்³தா⁴’’தி. இமமேவ ஹி அத்த²ங் த³ஸ்ஸேதுங் ‘‘குஹனாதீ³’’திஆதி³ வுத்தங். ந ஸம்மா க³ய்ஹமானா ஹி த⁴ம்மலத்³தா⁴ நாம ந ஹொந்தீதி தப்படிஸேத⁴னத்த²ங் பாளியங் ‘‘த⁴ம்மலத்³தா⁴’’தி வுத்தங். தெ³ய்யங் த³க்கி²ணெய்யஞ்ச அப்படிவிப⁴த்தங் கத்வா பு⁴ஞ்ஜதீதி அப்படிவிப⁴த்தபோ⁴கீ³ நாம ஹோதி. தேனாஹ ‘‘த்³வே படிவிப⁴த்தானி நாமா’’திஆதி³. சித்தேன விப⁴ஜனந்தி ஏதேன சித்துப்பாத³மத்தேனபி விப⁴ஜனங் படிவிப⁴த்தங் நாம, பகே³வ பயோக³தோதி த³ஸ்ஸேதி. சித்தேன விப⁴ஜனபுப்³ப³கங் வா காயேன விப⁴ஜனந்தி மூலமேவ த³ஸ்ஸேதுங் ‘‘ஏவங் சித்தேன விப⁴ஜன’’ந்தி வுத்தங். தேன சித்துப்பாத³மத்தேன படிவிபா⁴கோ³ காதப்³போ³தி த³ஸ்ஸேதி. அப்படிவிப⁴த்தந்தி பா⁴வனபுங்ஸகனித்³தே³ஸோ, அப்படிவிப⁴த்தங் லாப⁴ங் பு⁴ஞ்ஜதீதி கம்மனித்³தே³ஸோ வா. தங் நேவ கி³ஹீனங் தே³தி அத்தனோ ஆஜீவஸோத⁴னத்த²ங். ந அத்தனா பரிபு⁴ஞ்ஜதி ‘‘மய்ஹங் அஸாதா⁴ரணபோ⁴கி³தா மா ஹோதூ’’தி. படிக்³க³ண்ஹந்தோ ச…பே॰… பஸ்ஸதீதி இமினா ஆக³மனதோ பட்டா²ய ஸாதா⁴ரணபு³த்³தி⁴ங் உபட்டா²பேதி. ஏவங் ஹிஸ்ஸ ஸாதா⁴ரணபோ⁴கி³தா ஸுகரா, ஸாரணீயத⁴ம்மோ சஸ்ஸ பூரோ ஹோதி.

Lābha-saddo kammasādhano ‘‘lābhā vata, bho, laddho’’tiādīsu viya. So cettha ‘‘dhammaladdhā’’ti vacanato atītakālikoti āha ‘‘cīvarādayo laddhapaccayā’’ti. Dhammato āgatāti dhammikā, parisuddhagamanā paccayā. Tenāha ‘‘dhammaladdhā’’ti. Imameva hi atthaṃ dassetuṃ ‘‘kuhanādī’’tiādi vuttaṃ. Na sammā gayhamānā hi dhammaladdhā nāma na hontīti tappaṭisedhanatthaṃ pāḷiyaṃ ‘‘dhammaladdhā’’ti vuttaṃ. Deyyaṃ dakkhiṇeyyañca appaṭivibhattaṃ katvā bhuñjatīti appaṭivibhattabhogī nāma hoti. Tenāha ‘‘dve paṭivibhattāni nāmā’’tiādi. Cittena vibhajananti etena cittuppādamattenapi vibhajanaṃ paṭivibhattaṃ nāma, pageva payogatoti dasseti. Cittena vibhajanapubbakaṃ vā kāyena vibhajananti mūlameva dassetuṃ ‘‘evaṃ cittena vibhajana’’nti vuttaṃ. Tena cittuppādamattena paṭivibhāgo kātabboti dasseti. Appaṭivibhattanti bhāvanapuṃsakaniddeso, appaṭivibhattaṃ lābhaṃ bhuñjatīti kammaniddeso vā. Taṃ neva gihīnaṃ deti attano ājīvasodhanatthaṃ. Na attanā paribhuñjati ‘‘mayhaṃ asādhāraṇabhogitā mā hotū’’ti. Paṭiggaṇhanto ca…pe… passatīti iminā āgamanato paṭṭhāya sādhāraṇabuddhiṃ upaṭṭhāpeti. Evaṃ hissa sādhāraṇabhogitā sukarā, sāraṇīyadhammo cassa pūro hoti.

அத² வா படிக்³க³ண்ஹந்தோ ச…பே॰… பஸ்ஸதீதி இமினா தஸ்ஸ லாப⁴ஸ்ஸ தீஸு காலேஸு ஸாதா⁴ரணதோ ட²பனங் த³ஸ்ஸிதங். படிக்³க³ண்ஹந்தோ ச ஸங்கே⁴ன ஸாதா⁴ரணங் ஹோதூதி இமினா படிக்³க³ஹணகாலோ த³ஸ்ஸிதோ. க³ஹெத்வா…பே॰… பஸ்ஸதீதி இமினா படிக்³க³ஹிதகாலோ. தது³ப⁴யங் பன தாதி³ஸேன புப்³ப³பா⁴கே³ன வினா ந ஹோதீதி அத்த²ஸித்³தோ⁴ புரிமகாலோ. தயித³ங் படிக்³க³ஹணதோ புப்³பே³வஸ்ஸ ஹோதி ‘‘ஸங்கே⁴ன ஸாதா⁴ரணங் ஹோதூதி படிக்³க³ண்ஹிஸ்ஸாமீ’’தி, படிக்³க³ண்ஹந்தஸ்ஸ ஹோதி ‘‘ஸங்கே⁴ன ஸாதா⁴ரணங் ஹோதூதி படிக்³க³ண்ஹாமீ’’தி, படிக்³க³ஹெத்வா ஹோதி ‘‘ஸங்கே⁴ன ஸாதா⁴ரணங் ஹோதூதி ஹி படிக்³க³ஹிதங் மயா’’தி. ஏவங் திலக்க²ணஸம்பன்னங் கத்வா லத்³த⁴ங் லாப⁴ங் ஓஸாரணலக்க²ணங் அவிகோபெத்வா பரிபு⁴ஞ்ஜந்தோ ஸாதா⁴ரணபோ⁴கீ³ அப்படிவிப⁴த்தபோ⁴கீ³ ச ஹோதி.

Atha vā paṭiggaṇhanto ca…pe… passatīti iminā tassa lābhassa tīsu kālesu sādhāraṇato ṭhapanaṃ dassitaṃ. Paṭiggaṇhanto ca saṅghena sādhāraṇaṃ hotūti iminā paṭiggahaṇakālo dassito. Gahetvā…pe… passatīti iminā paṭiggahitakālo. Tadubhayaṃ pana tādisena pubbabhāgena vinā na hotīti atthasiddho purimakālo. Tayidaṃ paṭiggahaṇato pubbevassa hoti ‘‘saṅghena sādhāraṇaṃ hotūti paṭiggaṇhissāmī’’ti, paṭiggaṇhantassa hoti ‘‘saṅghena sādhāraṇaṃ hotūti paṭiggaṇhāmī’’ti, paṭiggahetvā hoti ‘‘saṅghena sādhāraṇaṃ hotūti hi paṭiggahitaṃ mayā’’ti. Evaṃ tilakkhaṇasampannaṃ katvā laddhaṃ lābhaṃ osāraṇalakkhaṇaṃ avikopetvā paribhuñjanto sādhāraṇabhogī appaṭivibhattabhogī ca hoti.

இமங் பன ஸாரணீயத⁴ம்மந்தி இமங் சதுத்த²ங் ஸரிதப்³ப³யுத்தத⁴மங். ந ஹி…பே॰… க³ண்ஹந்தி, தஸ்மா ஸாதா⁴ரணபோ⁴கி³தா து³ஸ்ஸீலஸ்ஸ நத்தீ²தி ஆரம்போ⁴பி தாவ ந ஸம்ப⁴வதி, குதோ பூரணந்தி அதி⁴ப்பாயோ. பரிஸுத்³த⁴ஸீலோதி இமினா லாப⁴ஸ்ஸ த⁴ம்மிகபா⁴வங் த³ஸ்ஸேதி. வத்தங் அக²ண்டெ³ந்தோதி இமினா அப்படிவிப⁴த்தபோ⁴கி³தங் ஸாதா⁴ரணபோ⁴கி³தஞ்ச த³ஸ்ஸேதி. ஸதி பன தது³ப⁴யே ஸாரணீயத⁴ம்மோ பூரிதோ ஏவ ஹோதீதி ஆஹ ‘‘பூரேதீ’’தி. ஓதி³ஸ்ஸகங் கத்வாதி ஏதேன அனோதி³ஸ்ஸகங் கத்வா பிதுனோ, ஆசரியுபஜ்ஜா²யாதீ³னங் வா தே²ராஸனதோ பட்டா²ய தெ³ந்தஸ்ஸ ஸாரணீயத⁴ம்மோயேவ ஹோதீதி த³ஸ்ஸேதி. தா³தப்³ப³ந்தி அவஸ்ஸங் தா³தப்³ப³ங். ஸாரணீயத⁴ம்மோ பனஸ்ஸ ந ஹோதி படிஜக்³க³ட்டா²னே ஓதி³ஸ்ஸகங் கத்வா தி³ன்னத்தா. தேனாஹ ‘‘பலிபோ³த⁴ஜக்³க³னங் நாம ஹோதீ’’தி. முத்தபலிபோ³த⁴ஸ்ஸ வட்டதி அமுத்தபலிபோ³த⁴ஸ்ஸ பூரேதுங் அஸக்குணெய்யத்தா. யதி³ ஏவங் ஸப்³பே³ன ஸப்³ப³ங் ஸாரணீயத⁴ம்மங் பூரெந்தஸ்ஸ ஓதி³ஸ்ஸகதா³னங் வட்டதி, ந வட்டதீதி? நோ ந வட்டதி யுத்தட்டா²னேதி த³ஸ்ஸெந்தோ ‘‘தேன பனா’’திஆதி³மாஹ. இமினா ஓதி³ஸ்ஸகதா³னங் பனஸ்ஸ ந ஸப்³ப³த்த² வாரிதந்தி த³ஸ்ஸேதி. கி³லானாதீ³னஞ்ஹி ஓதி³ஸ்ஸகங் கத்வா தா³னங் அப்படிவிபா⁴க³பக்கி²கங் ‘‘அஸுகஸ்ஸ ந த³ஸ்ஸாமீ’’தி படிக்கே²பஸ்ஸ அபா⁴வதோ. ப்³யதிரேகப்பதா⁴னோ ஹி படிபா⁴கோ³. தேனாஹ ‘‘அவஸேஸ’’ந்திஆதி³. அதா³தும்பீதி பி-ஸத்³தே³ன தா³தும்பி வட்டதீதி த³ஸ்ஸேதி. தஞ்ச கோ² கருணாயனவஸேன, ந வத்தபரிபூரணவஸேன, தஸ்மா து³ஸ்ஸீலஸ்ஸபி அத்தி²கஸ்ஸ ஸதி ஸம்ப⁴வே தா³தப்³ப³ங். தா³னஞ்ஹி நாம ந கஸ்ஸசி நிவாரிதங்.

Imaṃ pana sāraṇīyadhammanti imaṃ catutthaṃ saritabbayuttadhamaṃ. Na hi…pe… gaṇhanti, tasmā sādhāraṇabhogitā dussīlassa natthīti ārambhopi tāva na sambhavati, kuto pūraṇanti adhippāyo. Parisuddhasīloti iminā lābhassa dhammikabhāvaṃ dasseti. Vattaṃ akhaṇḍentoti iminā appaṭivibhattabhogitaṃ sādhāraṇabhogitañca dasseti. Sati pana tadubhaye sāraṇīyadhammo pūrito eva hotīti āha ‘‘pūretī’’ti. Odissakaṃ katvāti etena anodissakaṃ katvā pituno, ācariyupajjhāyādīnaṃ vā therāsanato paṭṭhāya dentassa sāraṇīyadhammoyeva hotīti dasseti. Dātabbanti avassaṃ dātabbaṃ. Sāraṇīyadhammo panassa na hoti paṭijaggaṭṭhāne odissakaṃ katvā dinnattā. Tenāha ‘‘palibodhajagganaṃ nāma hotī’’ti. Muttapalibodhassa vaṭṭati amuttapalibodhassa pūretuṃ asakkuṇeyyattā. Yadi evaṃ sabbena sabbaṃ sāraṇīyadhammaṃ pūrentassa odissakadānaṃ vaṭṭati, na vaṭṭatīti? No na vaṭṭati yuttaṭṭhāneti dassento ‘‘tena panā’’tiādimāha. Iminā odissakadānaṃ panassa na sabbattha vāritanti dasseti. Gilānādīnañhi odissakaṃ katvā dānaṃ appaṭivibhāgapakkhikaṃ ‘‘asukassa na dassāmī’’ti paṭikkhepassa abhāvato. Byatirekappadhāno hi paṭibhāgo. Tenāha ‘‘avasesa’’ntiādi. Adātumpīti pi-saddena dātumpi vaṭṭatīti dasseti. Tañca kho karuṇāyanavasena, na vattaparipūraṇavasena, tasmā dussīlassapi atthikassa sati sambhave dātabbaṃ. Dānañhi nāma na kassaci nivāritaṃ.

ஸுஸிக்கி²தாயாதி ஸாரணீயபூரணவிதி⁴ம்ஹி ஸுஸிக்கி²தாய, ஸுகுஸலாயாதி அத்தோ². இதா³னி தஸ்ஸ கோஸல்லங் த³ஸ்ஸேதுங் ‘‘ஸுஸிக்கி²தாய ஹீ’’திஆதி³ வுத்தங். த்³வாத³ஸஹி வஸ்ஸேஹி பூரேஹி, ந ததோ ஓரந்தி இமினா தஸ்ஸ து³ப்பூரதங் த³ஸ்ஸேதி. ததா² ஹி ஸோ மஹப்ப²லோ மஹானிஸங்ஸோ தி³ட்ட²த⁴ம்மிகேஹிபி தாவக³ருதரேஹி ப²லானிஸங்ஸேஹி அனுக³தோதி தங்ஸமங்கீ³ ச புக்³க³லோ விஸேஸலாபீ⁴ அரியபுக்³க³லோ விய லோகே அச்ச²ரியப்³பு⁴தத⁴ம்மஸமன்னாக³தோ ஹோதி. ததா² ஹி ஸோ து³ப்பஜஹதா³னமயஸ்ஸ ஸீலமயஸ்ஸ புஞ்ஞஸ்ஸ படிபக்க²த⁴ம்மங் ஸுதூ³ரே விக்க²ம்பி⁴தங் கத்வா விஸுத்³தே⁴ன சேதஸா லோகே பாகடோ பஞ்ஞாதோ ஹுத்வா விஹரதி. தஸ்ஸிமமத்த²ங் ப்³யதிரேகதோ அன்வயதோ ச விபா⁴வேதுங் ‘‘ஸசே ஹீ’’திஆதி³ வுத்தங். தங் ஸுவிஞ்ஞெய்யமேவ.

Susikkhitāyāti sāraṇīyapūraṇavidhimhi susikkhitāya, sukusalāyāti attho. Idāni tassa kosallaṃ dassetuṃ ‘‘susikkhitāya hī’’tiādi vuttaṃ. Dvādasahi vassehi pūrehi, na tato oranti iminā tassa duppūrataṃ dasseti. Tathā hi so mahapphalo mahānisaṃso diṭṭhadhammikehipi tāvagarutarehi phalānisaṃsehi anugatoti taṃsamaṅgī ca puggalo visesalābhī ariyapuggalo viya loke acchariyabbhutadhammasamannāgato hoti. Tathā hi so duppajahadānamayassa sīlamayassa puññassa paṭipakkhadhammaṃ sudūre vikkhambhitaṃ katvā visuddhena cetasā loke pākaṭo paññāto hutvā viharati. Tassimamatthaṃ byatirekato anvayato ca vibhāvetuṃ ‘‘sace hī’’tiādi vuttaṃ. Taṃ suviññeyyameva.

இதா³னிஸ்ஸ ஸம்பராயிகே தி³ட்ட²த⁴ம்மிகே ச ஆனிஸங்ஸே த³ஸ்ஸேதுங் ‘‘ஏவங் பூரிதஸாரணீயத⁴ம்மஸ்ஸா’’திஆதி³ வுத்தங். நேவ இஸ்ஸா ந மச்ச²ரியங் ஹோதி சிரகாலபா⁴வனாய விது⁴தபா⁴வதோ. மனுஸ்ஸானங் பியோ ஹோதி பரிச்சாக³ஸீலதாய விஸ்ஸுதத்தா. தேனாஹ ‘‘த³த³ங் பியோ ஹோதி ப⁴ஜந்தி நங் ப³ஹூ’’திஆதி³ (அ॰ நி॰ 5.34). ஸுலப⁴பச்சயோ ஹோதி தா³னவஸேன உளாரஜ்ஜா²ஸயானங் பச்சயலாப⁴ஸ்ஸ இதா⁴னிஸங்ஸஸபா⁴வதோ தா³னஸ்ஸ. பத்தக³தமஸ்ஸ தி³ய்யமானங் ந கீ²யதி பத்தக³தஸ்ஸேவ த்³வாத³ஸவஸ்ஸிகஸ்ஸ மஹாவத்தஸ்ஸ அவிச்சே²தே³ன பூரிதத்தா. அக்³க³ப⁴ண்ட³ங் லப⁴தி தே³வஸிகங் த³க்கி²ணெய்யானங் அக்³க³தோ பட்டா²ய தா³னஸ்ஸ தி³ன்னத்தா. ப⁴யே வா…பே॰… ஆபஜ்ஜந்தி தெ³ய்யப்படிக்³கா³ஹகவிகப்பங் அகத்வா அத்தனி நிரபெக்க²சித்தேன சிரகாலங் தா³னஸ்ஸ பூரிததாய பஸாரிதசித்தத்தா.

Idānissa samparāyike diṭṭhadhammike ca ānisaṃse dassetuṃ ‘‘evaṃ pūritasāraṇīyadhammassā’’tiādi vuttaṃ. Neva issā na macchariyaṃ hoti cirakālabhāvanāya vidhutabhāvato. Manussānaṃ piyo hoti pariccāgasīlatāya vissutattā. Tenāha ‘‘dadaṃ piyo hoti bhajanti naṃ bahū’’tiādi (a. ni. 5.34). Sulabhapaccayo hoti dānavasena uḷārajjhāsayānaṃ paccayalābhassa idhānisaṃsasabhāvato dānassa. Pattagatamassa diyyamānaṃ na khīyati pattagatasseva dvādasavassikassa mahāvattassa avicchedena pūritattā. Aggabhaṇḍaṃ labhati devasikaṃ dakkhiṇeyyānaṃ aggato paṭṭhāya dānassa dinnattā. Bhaye vā…pe… āpajjanti deyyappaṭiggāhakavikappaṃ akatvā attani nirapekkhacittena cirakālaṃ dānassa pūritatāya pasāritacittattā.

தத்ராதி தேஸு ஆனிஸங்ஸேஸு விபா⁴வேதப்³பே³ஸு. இமானி ப²லானி வத்தூ²னி காரணானி. மஹாகி³ரிகா³மோ நாம நாக³தீ³பபஸ்ஸே ஏகோ கா³மோவ. அலப⁴ந்தாபீதி அப்பபுஞ்ஞதாய அலாபி⁴னோ ஸமானாபி. பி⁴க்கா²சாரமக்³க³ஸபா⁴க³ந்தி ஸபா⁴க³ங் தப்³பா⁴கி³யங் பி⁴க்கா²சாரமக்³க³ங் ஜானந்தி. அனுத்தரிமனுஸ்ஸத⁴ம்மத்தா தே²ரானங் ஸங்ஸயவினோத³னத்த²ஞ்ச ‘‘ஸாரணீயத⁴ம்மோ மே, ப⁴ந்தே, பூரிதோ’’தி ஆஹ. ததா² ஹி து³தியவத்து²ஸ்மிம்பி தே²ரேன அத்தா பகாஸிதோ. த³ஹரகாலே ஏவங் கிர ஸாரணீயத⁴ம்மபூரகோ அஹோஸி. மனுஸ்ஸானங் பியதாய ஸுலப⁴பச்சயதாயபி இத³ங் வத்து²மேவ. பத்தக³தாகீ²யனஸ்ஸ பன விஸேஸங் விபா⁴வனதோ ‘‘இத³ங் தாவ…பே॰… எத்த² வத்தூ²’’தி வுத்தங்.

Tatrāti tesu ānisaṃsesu vibhāvetabbesu. Imāni phalāni vatthūni kāraṇāni. Mahāgirigāmo nāma nāgadīpapasse eko gāmova. Alabhantāpīti appapuññatāya alābhino samānāpi. Bhikkhācāramaggasabhāganti sabhāgaṃ tabbhāgiyaṃ bhikkhācāramaggaṃ jānanti. Anuttarimanussadhammattā therānaṃ saṃsayavinodanatthañca ‘‘sāraṇīyadhammo me, bhante, pūrito’’ti āha. Tathā hi dutiyavatthusmimpi therena attā pakāsito. Daharakāle evaṃ kira sāraṇīyadhammapūrako ahosi. Manussānaṃ piyatāya sulabhapaccayatāyapi idaṃ vatthumeva. Pattagatākhīyanassa pana visesaṃ vibhāvanato ‘‘idaṃ tāva…pe… ettha vatthū’’ti vuttaṃ.

கி³ரிப⁴ண்ட³மஹாபூஜாயாதி சேதியகி³ரிம்ஹி ஸகலலங்காதீ³பே யோஜனப்பமாணே ஸமுத்³தே³ ச நாவாஸங்கா⁴டாதி³கே ட²பெத்வா தீ³பபுப்ப²க³ந்தா⁴தீ³ஹி கரியமானாய மஹாபூஜாய. தஸ்ஸா ச படிபத்தியா அவஞ்ஜ²பா⁴வவிபா⁴வனத்த²ங் ‘‘ஏதே மய்ஹங் பாபுணிஸ்ஸந்தீ’’தி ஆஹ. பரியாயேனபி லேஸேனபி. அனுச்ச²விகந்தி ‘‘ஸாரணீயத⁴ம்மபூரகோ’’தி யதா²பூ⁴தபவேத³னங் தும்ஹாகங் அனுச்ச²விகந்தி அத்தோ².

Giribhaṇḍamahāpūjāyāti cetiyagirimhi sakalalaṅkādīpe yojanappamāṇe samudde ca nāvāsaṅghāṭādike ṭhapetvā dīpapupphagandhādīhi kariyamānāya mahāpūjāya. Tassā ca paṭipattiyā avañjhabhāvavibhāvanatthaṃ ‘‘ete mayhaṃ pāpuṇissantī’’ti āha. Pariyāyenapi lesenapi. Anucchavikanti ‘‘sāraṇīyadhammapūrako’’ti yathābhūtapavedanaṃ tumhākaṃ anucchavikanti attho.

அனாரோசெத்வாவ பலாயிங்ஸு சோரப⁴யேன. ‘‘அத்தனோ து³ஜ்ஜீவிகாயா’’திபி வத³ந்தி. அஹங் ஸாரணீயத⁴ம்மபூரிகா, மம பத்தபரியாபன்னேனபி ஸப்³பா³பிமா பி⁴க்கு²னியோ யாபெஸ்ஸந்தீதி ஆஹ ‘‘மா தும்ஹே தேஸங் க³தபா⁴வங் சிந்தயித்தா²’’தி. வட்டிஸ்ஸதீதி கப்பிஸ்ஸதி. தே²ரீ ஸாரணீயத⁴ம்மபூரிகா அஹோஸி, தே²ரஸ்ஸ பன ஸீலதேஜேனேவ தே³வதா உஸ்ஸுக்கங் ஆபஜ்ஜி.

Anārocetvāva palāyiṃsu corabhayena. ‘‘Attano dujjīvikāyā’’tipi vadanti. Ahaṃ sāraṇīyadhammapūrikā, mama pattapariyāpannenapi sabbāpimā bhikkhuniyo yāpessantīti āha ‘‘mā tumhe tesaṃ gatabhāvaṃ cintayitthā’’ti. Vaṭṭissatīti kappissati. Therī sāraṇīyadhammapūrikā ahosi, therassa pana sīlatejeneva devatā ussukkaṃ āpajji.

நத்தி² ஏதேஸங் க²ண்ட³ந்தி அக²ண்டா³னி. தங் பன நேஸங் க²ண்ட³ங் த³ஸ்ஸேதுங் ‘‘யஸ்ஸா’’திஆதி³ வுத்தங். தத்த² உபஸம்பன்னஸீலானங் உத்³தே³ஸக்கமேன ஆதி³அந்தா வேதி³தப்³பா³. தேனாஹ ‘‘ஸத்தஸூ’’திஆதி³. ந ஹி அஞ்ஞோ கோசி ஆபத்திக்க²ந்தா⁴னங் அனுக்கமோ அத்தி², அனுபஸம்பன்னஸீலானங் ஸமாதா³னக்கமேனபி ஆதி³அந்தா லப்³ப⁴ந்தி. பரியந்தே சி²ன்னஸாடகோ வியாதி தத்ரந்தே த³ஸந்தே வா சி²ன்னவத்த²ங் விய. விஸதி³ஸுதா³ஹரணஞ்சேதங் ‘‘அக²ண்டா³னீ’’தி இமஸ்ஸ அதி⁴கதத்தா. ஏவங் ஸேஸானம்பி உதா³ஹரணானி. க²ண்டி³கதா பி⁴ன்னதா க²ண்ட³ங், தங் ஏதஸ்ஸ அத்தீ²தி க²ண்ட³ங், ஸீலங். சி²த்³த³ந்திஆதீ³ஸுபி ஏஸேவ நயோ. வேமஜ்ஜே² பி⁴ன்னங் வினிவிஜ்ஜ²னவஸேன. விஸபா⁴க³வண்ணேன கா³வீ வியாதி ஸம்ப³ந்தோ⁴. விஸபா⁴க³வண்ணேன உபட்³ட⁴ங் ததியபா⁴க³க³தங் ஸம்பி⁴ன்னவண்ணங் ஸப³லங், விஸபா⁴க³வண்ணேஹேவ பி³ந்தூ³ஹி அந்தரந்தராஹி விமிஸ்ஸங் கம்மாஸங். அயங் இமேஸங் விஸேஸோ. ஸப³லரஹிதானி அஸப³லானி, ததா² அகம்மாஸானி. ஸீலஸ்ஸ தண்ஹாதா³ஸப்³யதோ மோசனங் விவட்டூபனிஸ்ஸயபா⁴வாபாத³னங், தஸ்மா தண்ஹாதா³ஸப்³யதோ மோசனவசனேன தேஸங் ஸீலானங் விவட்டூபனிஸ்ஸயதமாஹ. பு⁴ஜிஸ்ஸபா⁴வகரணதோதி இமினா பு⁴ஜிஸ்ஸகரானி பு⁴ஜிஸ்ஸானீதி உத்தரபத³லோபேனாயங் நித்³தே³ஸோதி த³ஸ்ஸேதி. யஸ்மா வா தங்ஸமங்கி³புக்³க³லோ ஸேரீ ஸயங்வஸீ பு⁴ஜிஸ்ஸோ நாம ஹோதி, தஸ்மாபி பு⁴ஜிஸ்ஸானி. அவிஞ்ஞூனங் அப்பமாணதாய ‘‘விஞ்ஞுப்பஸத்தா²னீ’’தி வுத்தங். ஸுபரிஸுத்³த⁴பா⁴வேன வா ஸம்பன்னத்தா விஞ்ஞூஹி பஸத்தா²னீதி விஞ்ஞுப்பஸத்தா²னி.

Natthi etesaṃ khaṇḍanti akhaṇḍāni. Taṃ pana nesaṃ khaṇḍaṃ dassetuṃ ‘‘yassā’’tiādi vuttaṃ. Tattha upasampannasīlānaṃ uddesakkamena ādiantā veditabbā. Tenāha ‘‘sattasū’’tiādi. Na hi añño koci āpattikkhandhānaṃ anukkamo atthi, anupasampannasīlānaṃ samādānakkamenapi ādiantā labbhanti. Pariyante chinnasāṭako viyāti tatrante dasante vā chinnavatthaṃ viya. Visadisudāharaṇañcetaṃ ‘‘akhaṇḍānī’’ti imassa adhikatattā. Evaṃ sesānampi udāharaṇāni. Khaṇḍikatā bhinnatā khaṇḍaṃ, taṃ etassa atthīti khaṇḍaṃ, sīlaṃ. Chiddantiādīsupi eseva nayo. Vemajjhe bhinnaṃ vinivijjhanavasena. Visabhāgavaṇṇena gāvī viyāti sambandho. Visabhāgavaṇṇena upaḍḍhaṃ tatiyabhāgagataṃ sambhinnavaṇṇaṃ sabalaṃ, visabhāgavaṇṇeheva bindūhi antarantarāhi vimissaṃ kammāsaṃ. Ayaṃ imesaṃ viseso. Sabalarahitāni asabalāni, tathā akammāsāni. Sīlassa taṇhādāsabyato mocanaṃ vivaṭṭūpanissayabhāvāpādanaṃ, tasmā taṇhādāsabyato mocanavacanena tesaṃ sīlānaṃ vivaṭṭūpanissayatamāha. Bhujissabhāvakaraṇatoti iminā bhujissakarāni bhujissānīti uttarapadalopenāyaṃ niddesoti dasseti. Yasmā vā taṃsamaṅgipuggalo serī sayaṃvasī bhujisso nāma hoti, tasmāpi bhujissāni. Aviññūnaṃ appamāṇatāya ‘‘viññuppasatthānī’’ti vuttaṃ. Suparisuddhabhāvena vā sampannattā viññūhi pasatthānīti viññuppasatthāni.

தண்ஹாதி³ட்டீ²ஹி அபராமட்ட²த்தாதி ‘‘இமினாஹங் ஸீலேன தே³வோ வா ப⁴விஸ்ஸாமி தே³வஞ்ஞதரோ வா’’தி தண்ஹாபராமாஸேன, ‘‘இமினாஹங் ஸீலேன தே³வோ ஹுத்வா தத்த² நிச்சோ து⁴வோ ஸஸ்ஸதோ ப⁴விஸ்ஸாமீ’’தி தி³ட்டி²பராமாஸேன ச அபராமட்ட²த்தா. பராமட்டு²ந்தி ‘‘அயங் தே ஸீலேஸு தோ³ஸோ’’தி சதூஸு விபத்தீஸு யாய காயசி விபத்தியா த³ஸ்ஸனேன பராமட்டு²ங், அனுத்³த⁴ங்ஸேதுங் சோதே³துந்தி அத்தோ². ஸீலங் நாம அவிப்படிஸாராதி³பாரம்பரியேன யாவதே³வ ஸமாதி⁴ஸம்பாத³னத்த²ந்தி ஆஹ ‘‘ஸமாதி⁴ஸங்வத்தனிகானீ’’தி. ஸமாதி⁴ஸங்வத்தனப்பயோஜனானி ஸமாதி⁴ஸங்வத்தனிகானி.

Taṇhādiṭṭhīhi aparāmaṭṭhattāti ‘‘imināhaṃ sīlena devo vā bhavissāmi devaññataro vā’’ti taṇhāparāmāsena, ‘‘imināhaṃ sīlena devo hutvā tattha nicco dhuvo sassato bhavissāmī’’ti diṭṭhiparāmāsena ca aparāmaṭṭhattā. Parāmaṭṭhunti ‘‘ayaṃ te sīlesu doso’’ti catūsu vipattīsu yāya kāyaci vipattiyā dassanena parāmaṭṭhuṃ, anuddhaṃsetuṃ codetunti attho. Sīlaṃ nāma avippaṭisārādipārampariyena yāvadeva samādhisampādanatthanti āha ‘‘samādhisaṃvattanikānī’’ti. Samādhisaṃvattanappayojanāni samādhisaṃvattanikāni.

ஸமானபா⁴வோ ஸாமஞ்ஞங், பரிபுண்ணசதுபாரிஸுத்³தி⁴பா⁴வேன மஜ்ஜே² பி⁴ன்னஸுவண்ணஸ்ஸ விய பே⁴தா³பா⁴வதோ ஸீலேன ஸாமஞ்ஞங் ஸீலஸாமஞ்ஞங், தங் க³தோ உபக³தோதி ஸீலஸாமஞ்ஞக³தோ. தேனாஹ ‘‘ஸமானபா⁴வூபக³தஸீலோ’’தி, ஸீலஸம்பத்தியா ஸமானபா⁴வங் உபக³தஸீலோ ஸபா⁴க³வுத்திகோதி அத்தோ². காமங் புது²ஜ்ஜனானம்பி சதுபாரிஸுத்³தி⁴ஸீலே நானத்தங் ந ஸியா, தங் பன ந ஏகந்திகங், இத³ங் ஏகந்திகங் நியதபா⁴வதோதி ஆஹ ‘‘நத்தி² மக்³க³ஸீலே நானத்த’’ந்தி. தங் ஸந்தா⁴யேதங் வுத்தந்தி மக்³க³ஸீலங் ஸந்தா⁴ய தங் ‘‘யானி தானி ஸீலானீ’’திஆதி³ வுத்தங்.

Samānabhāvo sāmaññaṃ, paripuṇṇacatupārisuddhibhāvena majjhe bhinnasuvaṇṇassa viya bhedābhāvato sīlena sāmaññaṃ sīlasāmaññaṃ, taṃ gato upagatoti sīlasāmaññagato. Tenāha ‘‘samānabhāvūpagatasīlo’’ti, sīlasampattiyā samānabhāvaṃ upagatasīlo sabhāgavuttikoti attho. Kāmaṃ puthujjanānampi catupārisuddhisīle nānattaṃ na siyā, taṃ pana na ekantikaṃ, idaṃ ekantikaṃ niyatabhāvatoti āha ‘‘natthimaggasīle nānatta’’nti. Taṃ sandhāyetaṃ vuttanti maggasīlaṃ sandhāya taṃ ‘‘yāni tāni sīlānī’’tiādi vuttaṃ.

யாயந்தி யா அயங் மய்ஹஞ்சேவ தும்ஹாகஞ்ச பச்சக்க²பூ⁴தா. தி³ட்டீ²தி மக்³க³ஸம்மாதி³ட்டி². நித்³தோ³ஸாதி நித்³து⁴ததோ³ஸா, ஸமுச்சி²ன்னராகா³தி³பாபத⁴ம்மாதி அத்தோ². நிய்யாதீதி வட்டது³க்க²தோ நிஸ்ஸரதி நிக்³க³ச்ச²தி. ஸயங் நிய்யந்தீயேவ ஹி தங்ஸமங்கி³புக்³க³லங் வட்டது³க்க²தோ நிய்யாபேதீதி வுச்சதி. யா ஸத்து² அனுஸிட்டி², தங் கரோதீதி தக்கரோ, தஸ்ஸ, யதா²னுஸிட்ட²ங் படிபஜ்ஜந்தஸ்ஸாதி அத்தோ². ஸமானதி³ட்டி²பா⁴வந்தி ஸதி³ஸதி³ட்டி²பா⁴வங் ஸச்சஸம்படிவேதே⁴ன அபி⁴ன்னதி³ட்டி²பா⁴வங்.

Yāyanti yā ayaṃ mayhañceva tumhākañca paccakkhabhūtā. Diṭṭhīti maggasammādiṭṭhi. Niddosāti niddhutadosā, samucchinnarāgādipāpadhammāti attho. Niyyātīti vaṭṭadukkhato nissarati niggacchati. Sayaṃ niyyantīyeva hi taṃsamaṅgipuggalaṃ vaṭṭadukkhato niyyāpetīti vuccati. Yā satthu anusiṭṭhi, taṃ karotīti takkaro, tassa, yathānusiṭṭhaṃ paṭipajjantassāti attho. Samānadiṭṭhibhāvanti sadisadiṭṭhibhāvaṃ saccasampaṭivedhena abhinnadiṭṭhibhāvaṃ.

பட²மஸாரணீயஸுத்தவண்ணனா நிட்டி²தா.

Paṭhamasāraṇīyasuttavaṇṇanā niṭṭhitā.

Next: 2. து³தியஸாரணீயஸுத்தவண்ணனா • 2. Dutiyasāraṇīyasuttavaṇṇanā

Related texts:

திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. பட²மஸாரணீயஸுத்தங் • 1. Paṭhamasāraṇīyasuttaṃ

அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. பட²மஸாரணீயஸுத்தவண்ணனா • 1. Paṭhamasāraṇīyasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact