| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༢. སཱརཎཱིཡཝགྒོ
2. Sāraṇīyavaggo
༡. པཋམསཱརཎཱིཡསུཏྟཝཎྞནཱ
1. Paṭhamasāraṇīyasuttavaṇṇanā
༡༡. དུཏིཡསྶ པཋམེ སརིཏབྦཡུཏྟཀཱཏི ཨནུསྶརཎཱརཧཱ། མིཛྫཏི སིནིཡ྄ཧཏི ཨེཏཱཡཱཏི མེཏྟཱ, མིཏྟབྷཱཝོ། མེཏྟཱ ཨེཏསྶ ཨཏྠཱིཏི མེཏྟཾ, ཀཱཡཀམྨཾ། ཏཾ པན ཡསྨཱ མེཏྟཱསཧགཏཙིཏྟསམུཊྛཱནཾ, ཏསྨཱ ཝུཏྟཾ ‘‘མེཏྟེན ཙིཏྟེན ཀཱཏབྦཾ ཀཱཡཀམྨ’’ནྟི། ཨེས ནཡོ སེསདྭཡེཔི། ཨིམཱནཱིཏི མེཏྟཀཱཡཀམྨཱདཱིནི། བྷིཀྑཱུནཾ ཝསེན ཨཱགཏཱནི ཏེསཾ སེཊྛཔརིསབྷཱཝཏོ། ཡཐཱ པན བྷིཀྑུནཱིསུཔི ལབྦྷནྟི, ཨེཝཾ གིཧཱིསུཔི ལབྦྷནྟི ཙཏུཔརིསསཱདྷཱརཎཏྟཱཏི ཏཾ དསྶེནྟོ ‘‘བྷིཀྑཱུནཉྷཱི’’ཏིཨཱདིམཱཧ། བྷིཀྑུནོ སབྦམྤི ཨནཝཛྫཀཱཡཀམྨཾ ཨཱབྷིསམཱཙཱརིཀཀམྨནྟོགདྷམེཝཱཏི ཨཱཧ ‘‘མེཏྟེན ཙིཏྟེན…པེ॰… ཀཱཡཀམྨཾ ནཱམཱ’’ཏི། བྷཏྟིཝསེན པཝཏྟིཡམཱནཱ ཙེཏིཡབོདྷཱིནཾ ཝནྡནཱ མེཏྟཱསིདྡྷཱཏི ཀཏྭཱ ཏདཏྠཱཡ གམནཾ ‘‘མེཏྟཾ ཀཱཡཀམྨ’’ནྟི ཝུཏྟཾ། ཨཱདི-སདྡེན ཙེཏིཡབོདྷིབྷིཀྑཱུསུ ཝུཏྟཱཝསེསཱཔཙཱཡནཱདིཝསེན པཝཏྟམེཏྟཱཝསེན པཝཏྟཾ ཀཱཡིཀཾ ཀིརིཡཾ སངྒཎྷཱཏི།
11. Dutiyassa paṭhame saritabbayuttakāti anussaraṇārahā. Mijjati siniyhati etāyāti mettā, mittabhāvo. Mettā etassa atthīti mettaṃ, kāyakammaṃ. Taṃ pana yasmā mettāsahagatacittasamuṭṭhānaṃ, tasmā vuttaṃ ‘‘mettena cittena kātabbaṃ kāyakamma’’nti. Esa nayo sesadvayepi. Imānīti mettakāyakammādīni. Bhikkhūnaṃ vasena āgatāni tesaṃ seṭṭhaparisabhāvato. Yathā pana bhikkhunīsupi labbhanti, evaṃ gihīsupi labbhanti catuparisasādhāraṇattāti taṃ dassento ‘‘bhikkhūnañhī’’tiādimāha. Bhikkhuno sabbampi anavajjakāyakammaṃ ābhisamācārikakammantogadhamevāti āha ‘‘mettena cittena…pe… kāyakammaṃ nāmā’’ti. Bhattivasena pavattiyamānā cetiyabodhīnaṃ vandanā mettāsiddhāti katvā tadatthāya gamanaṃ ‘‘mettaṃ kāyakamma’’nti vuttaṃ. Ādi-saddena cetiyabodhibhikkhūsu vuttāvasesāpacāyanādivasena pavattamettāvasena pavattaṃ kāyikaṃ kiriyaṃ saṅgaṇhāti.
ཏེཔིཊཀམྤི བུདྡྷཝཙནཾ ཀཐིཡམཱནནྟི ཨདྷིཔྤཱཡོ། ཏེཔིཊཀམྤི བུདྡྷཝཙནཾ པརིཔུཙྪནཨཏྠཀཐནཝསེན པཝཏྟིཡམཱནམེཝ མེཏྟཾ ཝཙཱིཀམྨཾ ནཱམ ཧིཏཛ྄ཛྷཱསཡེན པཝཏྟིཏབྦཏོ། ཏཱིཎི སུཙརིཏཱནཱིཏི ཀཱཡཝཙཱིམནོསུཙརིཏཱནི། ཙིནྟནནྟི ཨེཝཾ ཙིནྟནམཏྟམྤི མནོཀམྨཾ, པགེཝ པཊིཔནྣཱ བྷཱཝནཱཏི དསྶེཏི།
Tepiṭakampi buddhavacanaṃ kathiyamānanti adhippāyo. Tepiṭakampi buddhavacanaṃ paripucchanaatthakathanavasena pavattiyamānameva mettaṃ vacīkammaṃ nāma hitajjhāsayena pavattitabbato. Tīṇi sucaritānīti kāyavacīmanosucaritāni. Cintananti evaṃ cintanamattampi manokammaṃ, pageva paṭipannā bhāvanāti dasseti.
ཨཱཝཱིཏི པཀཱསཾ། པཀཱསབྷཱཝོ ཙེཏྠ ཡཾ ཨུདྡིསྶ ཏཾ ཀཱཡཀམྨཾ ཀརཱིཡཏི, ཏསྶ སམྨུཁབྷཱཝཏོཏི ཨཱཧ ‘‘སམྨུཁཱ’’ཏི། རཧོཏི ཨཔྤཀཱསཾ། ཨཔྤཀཱསཏཱ ཙ ཡཾ ཨུདྡིསྶ ཏཾ ཀཱཡཀམྨཾ ཀརཱིཡཏི, ཏསྶ ཨཔཙྩཀྑབྷཱཝཏོཏི ཨཱཧ ‘‘པརམྨུཁཱ’’ཏི། སཧཱཡབྷཱཝགམནཾ ཏེསཾ པུརཏོ། ཏེསུ ཀརོནྟེསུཡེཝ ཧི སཧཱཡབྷཱཝགམནཾ སམྨུཁཱ ཀཱཡཀམྨཾ ནཱམ ཧོཏི། ཨུབྷཡེཧཱིཏི ནཝཀེཧི ཐེརེཧི ཙ། པགྒཡ྄ཧཱཏི པགྒཎྷིཏྭཱ ཨུདྡྷཾ ཀཏྭཱ ཀེཝལཾ ‘‘དེཝོ’’ཏི ཨཝཏྭཱ གུཎེཧི ཐིརབྷཱཝཛོཏནཾ ‘‘དེཝཏྠེརོ’’ཏི ཝཙནཾ པགྒཡ྄ཧ ཝཙནཾ། མམཏྟབོདྷནཾ ཝཙནཾ མམཱཡནཝཙནཾ། ཨེཀནྟཔརམྨུཁསྶ མནོཀམྨསྶ སམྨུཁཏཱ ནཱམ ཝིཉྙཏྟིསམུཊྛཱཔནཝསེན ཧོཏི, ཏཉྩ ཁོ ལོཀེ ཀཱཡཀམྨནྟི པཱཀཊཾ པཉྙཱཏཾ། ཧཏྠཝིཀཱརཱདཱིནི ཨནཱམསིཏྭཱ ཨེཝ དསྶེནྟོ ‘‘ནཡནཱནི ཨུམྨཱིལེཏྭཱ’’ཏིཨཱདིམཱཧ། ཀཱམཾ མེཏྟཱསིནེཧསིནིདྡྷཱནཾ ནཡནཱནཾ ཨུམྨཱིལནཱ པསནྣེན མུཁེན ཨོལོཀནཉྩ མེཏྟཾ ཀཱཡཀམྨམེཝ, ཡསྶ པན ཙིཏྟསྶ ཝསེན ནཡནཱནཾ མེཏྟཱསིནེཧསིནིདྡྷཏཱ མུཁསྶ ཙ པསནྣཏཱ, ཏཾ སནྡྷཱཡ ཝུཏྟཾ ‘‘མེཏྟཾ མནོཀམྨཾ ནཱམཱ’’ཏི།
Āvīti pakāsaṃ. Pakāsabhāvo cettha yaṃ uddissa taṃ kāyakammaṃ karīyati, tassa sammukhabhāvatoti āha ‘‘sammukhā’’ti. Rahoti appakāsaṃ. Appakāsatā ca yaṃ uddissa taṃ kāyakammaṃ karīyati, tassa apaccakkhabhāvatoti āha ‘‘parammukhā’’ti. Sahāyabhāvagamanaṃ tesaṃ purato. Tesu karontesuyeva hi sahāyabhāvagamanaṃ sammukhā kāyakammaṃ nāma hoti. Ubhayehīti navakehi therehi ca. Paggayhāti paggaṇhitvā uddhaṃ katvā kevalaṃ ‘‘devo’’ti avatvā guṇehi thirabhāvajotanaṃ ‘‘devatthero’’ti vacanaṃ paggayha vacanaṃ. Mamattabodhanaṃ vacanaṃ mamāyanavacanaṃ. Ekantaparammukhassa manokammassa sammukhatā nāma viññattisamuṭṭhāpanavasena hoti, tañca kho loke kāyakammanti pākaṭaṃ paññātaṃ. Hatthavikārādīni anāmasitvā eva dassento ‘‘nayanāni ummīletvā’’tiādimāha. Kāmaṃ mettāsinehasiniddhānaṃ nayanānaṃ ummīlanā pasannena mukhena olokanañca mettaṃ kāyakammameva, yassa pana cittassa vasena nayanānaṃ mettāsinehasiniddhatā mukhassa ca pasannatā, taṃ sandhāya vuttaṃ ‘‘mettaṃ manokammaṃ nāmā’’ti.
ལཱབྷ-སདྡོ ཀམྨསཱདྷནོ ‘‘ལཱབྷཱ ཝཏ, བྷོ, ལདྡྷོ’’ཏིཨཱདཱིསུ ཝིཡ། སོ ཙེཏྠ ‘‘དྷམྨལདྡྷཱ’’ཏི ཝཙནཏོ ཨཏཱིཏཀཱལིཀོཏི ཨཱཧ ‘‘ཙཱིཝརཱདཡོ ལདྡྷཔཙྩཡཱ’’ཏི། དྷམྨཏོ ཨཱགཏཱཏི དྷམྨིཀཱ, པརིསུདྡྷགམནཱ པཙྩཡཱ། ཏེནཱཧ ‘‘དྷམྨལདྡྷཱ’’ཏི། ཨིམམེཝ ཧི ཨཏྠཾ དསྶེཏུཾ ‘‘ཀུཧནཱདཱི’’ཏིཨཱདི ཝུཏྟཾ། ན སམྨཱ གཡ྄ཧམཱནཱ ཧི དྷམྨལདྡྷཱ ནཱམ ན ཧོནྟཱིཏི ཏཔྤཊིསེདྷནཏྠཾ པཱལི༹ཡཾ ‘‘དྷམྨལདྡྷཱ’’ཏི ཝུཏྟཾ། དེཡྻཾ དཀྑིཎེཡྻཉྩ ཨཔྤཊིཝིབྷཏྟཾ ཀཏྭཱ བྷུཉྫཏཱིཏི ཨཔྤཊིཝིབྷཏྟབྷོགཱི ནཱམ ཧོཏི། ཏེནཱཧ ‘‘དྭེ པཊིཝིབྷཏྟཱནི ནཱམཱ’’ཏིཨཱདི། ཙིཏྟེན ཝིབྷཛནནྟི ཨེཏེན ཙིཏྟུཔྤཱདམཏྟེནཔི ཝིབྷཛནཾ པཊིཝིབྷཏྟཾ ནཱམ, པགེཝ པཡོགཏོཏི དསྶེཏི། ཙིཏྟེན ཝིབྷཛནཔུབྦཀཾ ཝཱ ཀཱཡེན ཝིབྷཛནནྟི མཱུལམེཝ དསྶེཏུཾ ‘‘ཨེཝཾ ཙིཏྟེན ཝིབྷཛན’’ནྟི ཝུཏྟཾ། ཏེན ཙིཏྟུཔྤཱདམཏྟེན པཊིཝིབྷཱགོ ཀཱཏབྦོཏི དསྶེཏི། ཨཔྤཊིཝིབྷཏྟནྟི བྷཱཝནཔུཾསཀནིདྡེསོ, ཨཔྤཊིཝིབྷཏྟཾ ལཱབྷཾ བྷུཉྫཏཱིཏི ཀམྨནིདྡེསོ ཝཱ། ཏཾ ནེཝ གིཧཱིནཾ དེཏི ཨཏྟནོ ཨཱཛཱིཝསོདྷནཏྠཾ། ན ཨཏྟནཱ པརིབྷུཉྫཏི ‘‘མཡ྄ཧཾ ཨསཱདྷཱརཎབྷོགིཏཱ མཱ ཧོཏཱུ’’ཏི། པཊིགྒཎྷནྟོ ཙ…པེ॰… པསྶཏཱིཏི ཨིམིནཱ ཨཱགམནཏོ པཊྛཱཡ སཱདྷཱརཎབུདྡྷིཾ ཨུཔཊྛཱཔེཏི། ཨེཝཾ ཧིསྶ སཱདྷཱརཎབྷོགིཏཱ སུཀརཱ, སཱརཎཱིཡདྷམྨོ ཙསྶ པཱུརོ ཧོཏི།
Lābha-saddo kammasādhano ‘‘lābhā vata, bho, laddho’’tiādīsu viya. So cettha ‘‘dhammaladdhā’’ti vacanato atītakālikoti āha ‘‘cīvarādayo laddhapaccayā’’ti. Dhammato āgatāti dhammikā, parisuddhagamanā paccayā. Tenāha ‘‘dhammaladdhā’’ti. Imameva hi atthaṃ dassetuṃ ‘‘kuhanādī’’tiādi vuttaṃ. Na sammā gayhamānā hi dhammaladdhā nāma na hontīti tappaṭisedhanatthaṃ pāḷiyaṃ ‘‘dhammaladdhā’’ti vuttaṃ. Deyyaṃ dakkhiṇeyyañca appaṭivibhattaṃ katvā bhuñjatīti appaṭivibhattabhogī nāma hoti. Tenāha ‘‘dve paṭivibhattāni nāmā’’tiādi. Cittena vibhajananti etena cittuppādamattenapi vibhajanaṃ paṭivibhattaṃ nāma, pageva payogatoti dasseti. Cittena vibhajanapubbakaṃ vā kāyena vibhajananti mūlameva dassetuṃ ‘‘evaṃ cittena vibhajana’’nti vuttaṃ. Tena cittuppādamattena paṭivibhāgo kātabboti dasseti. Appaṭivibhattanti bhāvanapuṃsakaniddeso, appaṭivibhattaṃ lābhaṃ bhuñjatīti kammaniddeso vā. Taṃ neva gihīnaṃ deti attano ājīvasodhanatthaṃ. Na attanā paribhuñjati ‘‘mayhaṃ asādhāraṇabhogitā mā hotū’’ti. Paṭiggaṇhanto ca…pe… passatīti iminā āgamanato paṭṭhāya sādhāraṇabuddhiṃ upaṭṭhāpeti. Evaṃ hissa sādhāraṇabhogitā sukarā, sāraṇīyadhammo cassa pūro hoti.
ཨཐ ཝཱ པཊིགྒཎྷནྟོ ཙ…པེ॰… པསྶཏཱིཏི ཨིམིནཱ ཏསྶ ལཱབྷསྶ ཏཱིསུ ཀཱལེསུ སཱདྷཱརཎཏོ ཋཔནཾ དསྶིཏཾ། པཊིགྒཎྷནྟོ ཙ སངྒྷེན སཱདྷཱརཎཾ ཧོཏཱུཏི ཨིམིནཱ པཊིགྒཧཎཀཱལོ དསྶིཏོ། གཧེཏྭཱ…པེ॰… པསྶཏཱིཏི ཨིམིནཱ པཊིགྒཧིཏཀཱལོ། ཏདུབྷཡཾ པན ཏཱདིསེན པུབྦབྷཱགེན ཝིནཱ ན ཧོཏཱིཏི ཨཏྠསིདྡྷོ པུརིམཀཱལོ། ཏཡིདཾ པཊིགྒཧཎཏོ པུབྦེཝསྶ ཧོཏི ‘‘སངྒྷེན སཱདྷཱརཎཾ ཧོཏཱུཏི པཊིགྒཎྷིསྶཱམཱི’’ཏི, པཊིགྒཎྷནྟསྶ ཧོཏི ‘‘སངྒྷེན སཱདྷཱརཎཾ ཧོཏཱུཏི པཊིགྒཎྷཱམཱི’’ཏི, པཊིགྒཧེཏྭཱ ཧོཏི ‘‘སངྒྷེན སཱདྷཱརཎཾ ཧོཏཱུཏི ཧི པཊིགྒཧིཏཾ མཡཱ’’ཏི། ཨེཝཾ ཏིལཀྑཎསམྤནྣཾ ཀཏྭཱ ལདྡྷཾ ལཱབྷཾ ཨོསཱརཎལཀྑཎཾ ཨཝིཀོཔེཏྭཱ པརིབྷུཉྫནྟོ སཱདྷཱརཎབྷོགཱི ཨཔྤཊིཝིབྷཏྟབྷོགཱི ཙ ཧོཏི།
Atha vā paṭiggaṇhanto ca…pe… passatīti iminā tassa lābhassa tīsu kālesu sādhāraṇato ṭhapanaṃ dassitaṃ. Paṭiggaṇhanto ca saṅghena sādhāraṇaṃ hotūti iminā paṭiggahaṇakālo dassito. Gahetvā…pe… passatīti iminā paṭiggahitakālo. Tadubhayaṃ pana tādisena pubbabhāgena vinā na hotīti atthasiddho purimakālo. Tayidaṃ paṭiggahaṇato pubbevassa hoti ‘‘saṅghena sādhāraṇaṃ hotūti paṭiggaṇhissāmī’’ti, paṭiggaṇhantassa hoti ‘‘saṅghena sādhāraṇaṃ hotūti paṭiggaṇhāmī’’ti, paṭiggahetvā hoti ‘‘saṅghena sādhāraṇaṃ hotūti hi paṭiggahitaṃ mayā’’ti. Evaṃ tilakkhaṇasampannaṃ katvā laddhaṃ lābhaṃ osāraṇalakkhaṇaṃ avikopetvā paribhuñjanto sādhāraṇabhogī appaṭivibhattabhogī ca hoti.
ཨིམཾ པན སཱརཎཱིཡདྷམྨནྟི ཨིམཾ ཙཏུཏྠཾ སརིཏབྦཡུཏྟདྷམཾ། ན ཧི…པེ॰… གཎྷནྟི, ཏསྨཱ སཱདྷཱརཎབྷོགིཏཱ དུསྶཱིལསྶ ནཏྠཱིཏི ཨཱརམྦྷོཔི ཏཱཝ ན སམྦྷཝཏི, ཀུཏོ པཱུརཎནྟི ཨདྷིཔྤཱཡོ། པརིསུདྡྷསཱིལོཏི ཨིམིནཱ ལཱབྷསྶ དྷམྨིཀབྷཱཝཾ དསྶེཏི། ཝཏྟཾ ཨཁཎྜེནྟོཏི ཨིམིནཱ ཨཔྤཊིཝིབྷཏྟབྷོགིཏཾ སཱདྷཱརཎབྷོགིཏཉྩ དསྶེཏི། སཏི པན ཏདུབྷཡེ སཱརཎཱིཡདྷམྨོ པཱུརིཏོ ཨེཝ ཧོཏཱིཏི ཨཱཧ ‘‘པཱུརེཏཱི’’ཏི། ཨོདིསྶཀཾ ཀཏྭཱཏི ཨེཏེན ཨནོདིསྶཀཾ ཀཏྭཱ པིཏུནོ, ཨཱཙརིཡུཔཛ྄ཛྷཱཡཱདཱིནཾ ཝཱ ཐེརཱསནཏོ པཊྛཱཡ དེནྟསྶ སཱརཎཱིཡདྷམྨོཡེཝ ཧོཏཱིཏི དསྶེཏི། དཱཏབྦནྟི ཨཝསྶཾ དཱཏབྦཾ། སཱརཎཱིཡདྷམྨོ པནསྶ ན ཧོཏི པཊིཛགྒཊྛཱནེ ཨོདིསྶཀཾ ཀཏྭཱ དིནྣཏྟཱ། ཏེནཱཧ ‘‘པལིབོདྷཛགྒནཾ ནཱམ ཧོཏཱི’’ཏི། མུཏྟཔལིབོདྷསྶ ཝཊྚཏི ཨམུཏྟཔལིབོདྷསྶ པཱུརེཏུཾ ཨསཀྐུཎེཡྻཏྟཱ། ཡདི ཨེཝཾ སབྦེན སབྦཾ སཱརཎཱིཡདྷམྨཾ པཱུརེནྟསྶ ཨོདིསྶཀདཱནཾ ཝཊྚཏི, ན ཝཊྚཏཱིཏི? ནོ ན ཝཊྚཏི ཡུཏྟཊྛཱནེཏི དསྶེནྟོ ‘‘ཏེན པནཱ’’ཏིཨཱདིམཱཧ། ཨིམིནཱ ཨོདིསྶཀདཱནཾ པནསྶ ན སབྦཏྠ ཝཱརིཏནྟི དསྶེཏི། གིལཱནཱདཱིནཉྷི ཨོདིསྶཀཾ ཀཏྭཱ དཱནཾ ཨཔྤཊིཝིབྷཱགཔཀྑིཀཾ ‘‘ཨསུཀསྶ ན དསྶཱམཱི’’ཏི པཊིཀྑེཔསྶ ཨབྷཱཝཏོ། བྱཏིརེཀཔྤདྷཱནོ ཧི པཊིབྷཱགོ། ཏེནཱཧ ‘‘ཨཝསེས’’ནྟིཨཱདི། ཨདཱཏུམྤཱིཏི པི-སདྡེན དཱཏུམྤི ཝཊྚཏཱིཏི དསྶེཏི། ཏཉྩ ཁོ ཀརུཎཱཡནཝསེན, ན ཝཏྟཔརིཔཱུརཎཝསེན, ཏསྨཱ དུསྶཱིལསྶཔི ཨཏྠིཀསྶ སཏི སམྦྷཝེ དཱཏབྦཾ། དཱནཉྷི ནཱམ ན ཀསྶཙི ནིཝཱརིཏཾ།
Imaṃ pana sāraṇīyadhammanti imaṃ catutthaṃ saritabbayuttadhamaṃ. Na hi…pe… gaṇhanti, tasmā sādhāraṇabhogitā dussīlassa natthīti ārambhopi tāva na sambhavati, kuto pūraṇanti adhippāyo. Parisuddhasīloti iminā lābhassa dhammikabhāvaṃ dasseti. Vattaṃ akhaṇḍentoti iminā appaṭivibhattabhogitaṃ sādhāraṇabhogitañca dasseti. Sati pana tadubhaye sāraṇīyadhammo pūrito eva hotīti āha ‘‘pūretī’’ti. Odissakaṃ katvāti etena anodissakaṃ katvā pituno, ācariyupajjhāyādīnaṃ vā therāsanato paṭṭhāya dentassa sāraṇīyadhammoyeva hotīti dasseti. Dātabbanti avassaṃ dātabbaṃ. Sāraṇīyadhammo panassa na hoti paṭijaggaṭṭhāne odissakaṃ katvā dinnattā. Tenāha ‘‘palibodhajagganaṃ nāma hotī’’ti. Muttapalibodhassa vaṭṭati amuttapalibodhassa pūretuṃ asakkuṇeyyattā. Yadi evaṃ sabbena sabbaṃ sāraṇīyadhammaṃ pūrentassa odissakadānaṃ vaṭṭati, na vaṭṭatīti? No na vaṭṭati yuttaṭṭhāneti dassento ‘‘tena panā’’tiādimāha. Iminā odissakadānaṃ panassa na sabbattha vāritanti dasseti. Gilānādīnañhi odissakaṃ katvā dānaṃ appaṭivibhāgapakkhikaṃ ‘‘asukassa na dassāmī’’ti paṭikkhepassa abhāvato. Byatirekappadhāno hi paṭibhāgo. Tenāha ‘‘avasesa’’ntiādi. Adātumpīti pi-saddena dātumpi vaṭṭatīti dasseti. Tañca kho karuṇāyanavasena, na vattaparipūraṇavasena, tasmā dussīlassapi atthikassa sati sambhave dātabbaṃ. Dānañhi nāma na kassaci nivāritaṃ.
སུསིཀྑིཏཱཡཱཏི སཱརཎཱིཡཔཱུརཎཝིདྷིམྷི སུསིཀྑིཏཱཡ, སུཀུསལཱཡཱཏི ཨཏྠོ། ཨིདཱནི ཏསྶ ཀོསལླཾ དསྶེཏུཾ ‘‘སུསིཀྑིཏཱཡ ཧཱི’’ཏིཨཱདི ཝུཏྟཾ། དྭཱདསཧི ཝསྶེཧི པཱུརེཧི, ན ཏཏོ ཨོརནྟི ཨིམིནཱ ཏསྶ དུཔྤཱུརཏཾ དསྶེཏི། ཏཐཱ ཧི སོ མཧཔྥལོ མཧཱནིསཾསོ དིཊྛདྷམྨིཀེཧིཔི ཏཱཝགརུཏརེཧི ཕལཱནིསཾསེཧི ཨནུགཏོཏི ཏཾསམངྒཱི ཙ པུགྒལོ ཝིསེསལཱབྷཱི ཨརིཡཔུགྒལོ ཝིཡ ལོཀེ ཨཙྪརིཡབྦྷུཏདྷམྨསམནྣཱགཏོ ཧོཏི། ཏཐཱ ཧི སོ དུཔྤཛཧདཱནམཡསྶ སཱིལམཡསྶ པུཉྙསྶ པཊིཔཀྑདྷམྨཾ སུདཱུརེ ཝིཀྑམྦྷིཏཾ ཀཏྭཱ ཝིསུདྡྷེན ཙེཏསཱ ལོཀེ པཱཀཊོ པཉྙཱཏོ ཧུཏྭཱ ཝིཧརཏི། ཏསྶིམམཏྠཾ བྱཏིརེཀཏོ ཨནྭཡཏོ ཙ ཝིབྷཱཝེཏུཾ ‘‘སཙེ ཧཱི’’ཏིཨཱདི ཝུཏྟཾ། ཏཾ སུཝིཉྙེཡྻམེཝ།
Susikkhitāyāti sāraṇīyapūraṇavidhimhi susikkhitāya, sukusalāyāti attho. Idāni tassa kosallaṃ dassetuṃ ‘‘susikkhitāya hī’’tiādi vuttaṃ. Dvādasahi vassehi pūrehi, na tato oranti iminā tassa duppūrataṃ dasseti. Tathā hi so mahapphalo mahānisaṃso diṭṭhadhammikehipi tāvagarutarehi phalānisaṃsehi anugatoti taṃsamaṅgī ca puggalo visesalābhī ariyapuggalo viya loke acchariyabbhutadhammasamannāgato hoti. Tathā hi so duppajahadānamayassa sīlamayassa puññassa paṭipakkhadhammaṃ sudūre vikkhambhitaṃ katvā visuddhena cetasā loke pākaṭo paññāto hutvā viharati. Tassimamatthaṃ byatirekato anvayato ca vibhāvetuṃ ‘‘sace hī’’tiādi vuttaṃ. Taṃ suviññeyyameva.
ཨིདཱནིསྶ སམྤརཱཡིཀེ དིཊྛདྷམྨིཀེ ཙ ཨཱནིསཾསེ དསྶེཏུཾ ‘‘ཨེཝཾ པཱུརིཏསཱརཎཱིཡདྷམྨསྶཱ’’ཏིཨཱདི ཝུཏྟཾ། ནེཝ ཨིསྶཱ ན མཙྪརིཡཾ ཧོཏི ཙིརཀཱལབྷཱཝནཱཡ ཝིདྷུཏབྷཱཝཏོ། མནུསྶཱནཾ པིཡོ ཧོཏི པརིཙྩཱགསཱིལཏཱཡ ཝིསྶུཏཏྟཱ། ཏེནཱཧ ‘‘དདཾ པིཡོ ཧོཏི བྷཛནྟི ནཾ བཧཱུ’’ཏིཨཱདི (ཨ॰ ནི॰ ༥.༣༤)། སུལབྷཔཙྩཡོ ཧོཏི དཱནཝསེན ཨུལཱ༹རཛ྄ཛྷཱསཡཱནཾ པཙྩཡལཱབྷསྶ ཨིདྷཱནིསཾསསབྷཱཝཏོ དཱནསྶ། པཏྟགཏམསྶ དིཡྻམཱནཾ ན ཁཱིཡཏི པཏྟགཏསྶེཝ དྭཱདསཝསྶིཀསྶ མཧཱཝཏྟསྶ ཨཝིཙྪེདེན པཱུརིཏཏྟཱ། ཨགྒབྷཎྜཾ ལབྷཏི དེཝསིཀཾ དཀྑིཎེཡྻཱནཾ ཨགྒཏོ པཊྛཱཡ དཱནསྶ དིནྣཏྟཱ། བྷཡེ ཝཱ…པེ॰… ཨཱཔཛྫནྟི དེཡྻཔྤཊིགྒཱཧཀཝིཀཔྤཾ ཨཀཏྭཱ ཨཏྟནི ནིརཔེཀྑཙིཏྟེན ཙིརཀཱལཾ དཱནསྶ པཱུརིཏཏཱཡ པསཱརིཏཙིཏྟཏྟཱ།
Idānissa samparāyike diṭṭhadhammike ca ānisaṃse dassetuṃ ‘‘evaṃ pūritasāraṇīyadhammassā’’tiādi vuttaṃ. Neva issā na macchariyaṃ hoti cirakālabhāvanāya vidhutabhāvato. Manussānaṃ piyo hoti pariccāgasīlatāya vissutattā. Tenāha ‘‘dadaṃ piyo hoti bhajanti naṃ bahū’’tiādi (a. ni. 5.34). Sulabhapaccayo hoti dānavasena uḷārajjhāsayānaṃ paccayalābhassa idhānisaṃsasabhāvato dānassa. Pattagatamassa diyyamānaṃ na khīyati pattagatasseva dvādasavassikassa mahāvattassa avicchedena pūritattā. Aggabhaṇḍaṃ labhati devasikaṃ dakkhiṇeyyānaṃ aggato paṭṭhāya dānassa dinnattā. Bhaye vā…pe… āpajjanti deyyappaṭiggāhakavikappaṃ akatvā attani nirapekkhacittena cirakālaṃ dānassa pūritatāya pasāritacittattā.
ཏཏྲཱཏི ཏེསུ ཨཱནིསཾསེསུ ཝིབྷཱཝེཏབྦེསུ། ཨིམཱནི ཕལཱནི ཝཏྠཱུནི ཀཱརཎཱནི། མཧཱགིརིགཱམོ ནཱམ ནཱགདཱིཔཔསྶེ ཨེཀོ གཱམོཝ། ཨལབྷནྟཱཔཱིཏི ཨཔྤཔུཉྙཏཱཡ ཨལཱབྷིནོ སམཱནཱཔི། བྷིཀྑཱཙཱརམགྒསབྷཱགནྟི སབྷཱགཾ ཏབྦྷཱགིཡཾ བྷིཀྑཱཙཱརམགྒཾ ཛཱནནྟི། ཨནུཏྟརིམནུསྶདྷམྨཏྟཱ ཐེརཱནཾ སཾསཡཝིནོདནཏྠཉྩ ‘‘སཱརཎཱིཡདྷམྨོ མེ, བྷནྟེ, པཱུརིཏོ’’ཏི ཨཱཧ། ཏཐཱ ཧི དུཏིཡཝཏྠུསྨིམྤི ཐེརེན ཨཏྟཱ པཀཱསིཏོ། དཧརཀཱལེ ཨེཝཾ ཀིར སཱརཎཱིཡདྷམྨཔཱུརཀོ ཨཧོསི། མནུསྶཱནཾ པིཡཏཱཡ སུལབྷཔཙྩཡཏཱཡཔི ཨིདཾ ཝཏྠུམེཝ། པཏྟགཏཱཁཱིཡནསྶ པན ཝིསེསཾ ཝིབྷཱཝནཏོ ‘‘ཨིདཾ ཏཱཝ…པེ॰… ཨེཏྠ ཝཏྠཱུ’’ཏི ཝུཏྟཾ།
Tatrāti tesu ānisaṃsesu vibhāvetabbesu. Imāni phalāni vatthūni kāraṇāni. Mahāgirigāmo nāma nāgadīpapasse eko gāmova. Alabhantāpīti appapuññatāya alābhino samānāpi. Bhikkhācāramaggasabhāganti sabhāgaṃ tabbhāgiyaṃ bhikkhācāramaggaṃ jānanti. Anuttarimanussadhammattā therānaṃ saṃsayavinodanatthañca ‘‘sāraṇīyadhammo me, bhante, pūrito’’ti āha. Tathā hi dutiyavatthusmimpi therena attā pakāsito. Daharakāle evaṃ kira sāraṇīyadhammapūrako ahosi. Manussānaṃ piyatāya sulabhapaccayatāyapi idaṃ vatthumeva. Pattagatākhīyanassa pana visesaṃ vibhāvanato ‘‘idaṃ tāva…pe… ettha vatthū’’ti vuttaṃ.
གིརིབྷཎྜམཧཱཔཱུཛཱཡཱཏི ཙེཏིཡགིརིམྷི སཀལལངྐཱདཱིཔེ ཡོཛནཔྤམཱཎེ སམུདྡེ ཙ ནཱཝཱསངྒྷཱཊཱདིཀེ ཋཔེཏྭཱ དཱིཔཔུཔྥགནྡྷཱདཱིཧི ཀརིཡམཱནཱཡ མཧཱཔཱུཛཱཡ། ཏསྶཱ ཙ པཊིཔཏྟིཡཱ ཨཝཉྫྷབྷཱཝཝིབྷཱཝནཏྠཾ ‘‘ཨེཏེ མཡ྄ཧཾ པཱཔུཎིསྶནྟཱི’’ཏི ཨཱཧ། པརིཡཱཡེནཔི ལེསེནཔི། ཨནུཙྪཝིཀནྟི ‘‘སཱརཎཱིཡདྷམྨཔཱུརཀོ’’ཏི ཡཐཱབྷཱུཏཔཝེདནཾ ཏུམྷཱཀཾ ཨནུཙྪཝིཀནྟི ཨཏྠོ།
Giribhaṇḍamahāpūjāyāti cetiyagirimhi sakalalaṅkādīpe yojanappamāṇe samudde ca nāvāsaṅghāṭādike ṭhapetvā dīpapupphagandhādīhi kariyamānāya mahāpūjāya. Tassā ca paṭipattiyā avañjhabhāvavibhāvanatthaṃ ‘‘ete mayhaṃ pāpuṇissantī’’ti āha. Pariyāyenapi lesenapi. Anucchavikanti ‘‘sāraṇīyadhammapūrako’’ti yathābhūtapavedanaṃ tumhākaṃ anucchavikanti attho.
ཨནཱརོཙེཏྭཱཝ པལཱཡིཾསུ ཙོརབྷཡེན། ‘‘ཨཏྟནོ དུཛྫཱིཝིཀཱཡཱ’’ཏིཔི ཝདནྟི། ཨཧཾ སཱརཎཱིཡདྷམྨཔཱུརིཀཱ, མམ པཏྟཔརིཡཱཔནྣེནཔི སབྦཱཔིམཱ བྷིཀྑུནིཡོ ཡཱཔེསྶནྟཱིཏི ཨཱཧ ‘‘མཱ ཏུམྷེ ཏེསཾ གཏབྷཱཝཾ ཙིནྟཡིཏྠཱ’’ཏི། ཝཊྚིསྶཏཱིཏི ཀཔྤིསྶཏི། ཐེརཱི སཱརཎཱིཡདྷམྨཔཱུརིཀཱ ཨཧོསི, ཐེརསྶ པན སཱིལཏེཛེནེཝ དེཝཏཱ ཨུསྶུཀྐཾ ཨཱཔཛྫི།
Anārocetvāva palāyiṃsu corabhayena. ‘‘Attano dujjīvikāyā’’tipi vadanti. Ahaṃ sāraṇīyadhammapūrikā, mama pattapariyāpannenapi sabbāpimā bhikkhuniyo yāpessantīti āha ‘‘mā tumhe tesaṃ gatabhāvaṃ cintayitthā’’ti. Vaṭṭissatīti kappissati. Therī sāraṇīyadhammapūrikā ahosi, therassa pana sīlatejeneva devatā ussukkaṃ āpajji.
ནཏྠི ཨེཏེསཾ ཁཎྜནྟི ཨཁཎྜཱནི། ཏཾ པན ནེསཾ ཁཎྜཾ དསྶེཏུཾ ‘‘ཡསྶཱ’’ཏིཨཱདི ཝུཏྟཾ། ཏཏྠ ཨུཔསམྤནྣསཱིལཱནཾ ཨུདྡེསཀྐམེན ཨཱདིཨནྟཱ ཝེདིཏབྦཱ། ཏེནཱཧ ‘‘སཏྟསཱུ’’ཏིཨཱདི། ན ཧི ཨཉྙོ ཀོཙི ཨཱཔཏྟིཀྑནྡྷཱནཾ ཨནུཀྐམོ ཨཏྠི, ཨནུཔསམྤནྣསཱིལཱནཾ སམཱདཱནཀྐམེནཔི ཨཱདིཨནྟཱ ལབྦྷནྟི། པརིཡནྟེ ཚིནྣསཱཊཀོ ཝིཡཱཏི ཏཏྲནྟེ དསནྟེ ཝཱ ཚིནྣཝཏྠཾ ཝིཡ། ཝིསདིསུདཱཧརཎཉྩེཏཾ ‘‘ཨཁཎྜཱནཱི’’ཏི ཨིམསྶ ཨདྷིཀཏཏྟཱ། ཨེཝཾ སེསཱནམྤི ཨུདཱཧརཎཱནི། ཁཎྜིཀཏཱ བྷིནྣཏཱ ཁཎྜཾ, ཏཾ ཨེཏསྶ ཨཏྠཱིཏི ཁཎྜཾ, སཱིལཾ། ཚིདྡནྟིཨཱདཱིསུཔི ཨེསེཝ ནཡོ། ཝེམཛ྄ཛྷེ བྷིནྣཾ ཝིནིཝིཛ྄ཛྷནཝསེན། ཝིསབྷཱགཝཎྞེན གཱཝཱི ཝིཡཱཏི སམྦནྡྷོ། ཝིསབྷཱགཝཎྞེན ཨུཔཌྜྷཾ ཏཏིཡབྷཱགགཏཾ སམྦྷིནྣཝཎྞཾ སབལཾ, ཝིསབྷཱགཝཎྞེཧེཝ བིནྡཱུཧི ཨནྟརནྟརཱཧི ཝིམིསྶཾ ཀམྨཱསཾ། ཨཡཾ ཨིམེསཾ ཝིསེསོ། སབལརཧིཏཱནི ཨསབལཱནི, ཏཐཱ ཨཀམྨཱསཱནི། སཱིལསྶ ཏཎྷཱདཱསབྱཏོ མོཙནཾ ཝིཝཊྚཱུཔནིསྶཡབྷཱཝཱཔཱདནཾ, ཏསྨཱ ཏཎྷཱདཱསབྱཏོ མོཙནཝཙནེན ཏེསཾ སཱིལཱནཾ ཝིཝཊྚཱུཔནིསྶཡཏམཱཧ། བྷུཛིསྶབྷཱཝཀརཎཏོཏི ཨིམིནཱ བྷུཛིསྶཀརཱནི བྷུཛིསྶཱནཱིཏི ཨུཏྟརཔདལོཔེནཱཡཾ ནིདྡེསོཏི དསྶེཏི། ཡསྨཱ ཝཱ ཏཾསམངྒིཔུགྒལོ སེརཱི སཡཾཝསཱི བྷུཛིསྶོ ནཱམ ཧོཏི, ཏསྨཱཔི བྷུཛིསྶཱནི། ཨཝིཉྙཱུནཾ ཨཔྤམཱཎཏཱཡ ‘‘ཝིཉྙུཔྤསཏྠཱནཱི’’ཏི ཝུཏྟཾ། སུཔརིསུདྡྷབྷཱཝེན ཝཱ སམྤནྣཏྟཱ ཝིཉྙཱུཧི པསཏྠཱནཱིཏི ཝིཉྙུཔྤསཏྠཱནི།
Natthi etesaṃ khaṇḍanti akhaṇḍāni. Taṃ pana nesaṃ khaṇḍaṃ dassetuṃ ‘‘yassā’’tiādi vuttaṃ. Tattha upasampannasīlānaṃ uddesakkamena ādiantā veditabbā. Tenāha ‘‘sattasū’’tiādi. Na hi añño koci āpattikkhandhānaṃ anukkamo atthi, anupasampannasīlānaṃ samādānakkamenapi ādiantā labbhanti. Pariyante chinnasāṭako viyāti tatrante dasante vā chinnavatthaṃ viya. Visadisudāharaṇañcetaṃ ‘‘akhaṇḍānī’’ti imassa adhikatattā. Evaṃ sesānampi udāharaṇāni. Khaṇḍikatā bhinnatā khaṇḍaṃ, taṃ etassa atthīti khaṇḍaṃ, sīlaṃ. Chiddantiādīsupi eseva nayo. Vemajjhe bhinnaṃ vinivijjhanavasena. Visabhāgavaṇṇena gāvī viyāti sambandho. Visabhāgavaṇṇena upaḍḍhaṃ tatiyabhāgagataṃ sambhinnavaṇṇaṃ sabalaṃ, visabhāgavaṇṇeheva bindūhi antarantarāhi vimissaṃ kammāsaṃ. Ayaṃ imesaṃ viseso. Sabalarahitāni asabalāni, tathā akammāsāni. Sīlassa taṇhādāsabyato mocanaṃ vivaṭṭūpanissayabhāvāpādanaṃ, tasmā taṇhādāsabyato mocanavacanena tesaṃ sīlānaṃ vivaṭṭūpanissayatamāha. Bhujissabhāvakaraṇatoti iminā bhujissakarāni bhujissānīti uttarapadalopenāyaṃ niddesoti dasseti. Yasmā vā taṃsamaṅgipuggalo serī sayaṃvasī bhujisso nāma hoti, tasmāpi bhujissāni. Aviññūnaṃ appamāṇatāya ‘‘viññuppasatthānī’’ti vuttaṃ. Suparisuddhabhāvena vā sampannattā viññūhi pasatthānīti viññuppasatthāni.
ཏཎྷཱདིཊྛཱིཧི ཨཔརཱམཊྛཏྟཱཏི ‘‘ཨིམིནཱཧཾ སཱིལེན དེཝོ ཝཱ བྷཝིསྶཱམི དེཝཉྙཏརོ ཝཱ’’ཏི ཏཎྷཱཔརཱམཱསེན, ‘‘ཨིམིནཱཧཾ སཱིལེན དེཝོ ཧུཏྭཱ ཏཏྠ ནིཙྩོ དྷུཝོ སསྶཏོ བྷཝིསྶཱམཱི’’ཏི དིཊྛིཔརཱམཱསེན ཙ ཨཔརཱམཊྛཏྟཱ། པརཱམཊྛུནྟི ‘‘ཨཡཾ ཏེ སཱིལེསུ དོསོ’’ཏི ཙཏཱུསུ ཝིཔཏྟཱིསུ ཡཱཡ ཀཱཡཙི ཝིཔཏྟིཡཱ དསྶནེན པརཱམཊྛུཾ, ཨནུདྡྷཾསེཏུཾ ཙོདེཏུནྟི ཨཏྠོ། སཱིལཾ ནཱམ ཨཝིཔྤཊིསཱརཱདིཔཱརམྤརིཡེན ཡཱཝདེཝ སམཱདྷིསམྤཱདནཏྠནྟི ཨཱཧ ‘‘སམཱདྷིསཾཝཏྟནིཀཱནཱི’’ཏི། སམཱདྷིསཾཝཏྟནཔྤཡོཛནཱནི སམཱདྷིསཾཝཏྟནིཀཱནི།
Taṇhādiṭṭhīhi aparāmaṭṭhattāti ‘‘imināhaṃ sīlena devo vā bhavissāmi devaññataro vā’’ti taṇhāparāmāsena, ‘‘imināhaṃ sīlena devo hutvā tattha nicco dhuvo sassato bhavissāmī’’ti diṭṭhiparāmāsena ca aparāmaṭṭhattā. Parāmaṭṭhunti ‘‘ayaṃ te sīlesu doso’’ti catūsu vipattīsu yāya kāyaci vipattiyā dassanena parāmaṭṭhuṃ, anuddhaṃsetuṃ codetunti attho. Sīlaṃ nāma avippaṭisārādipārampariyena yāvadeva samādhisampādanatthanti āha ‘‘samādhisaṃvattanikānī’’ti. Samādhisaṃvattanappayojanāni samādhisaṃvattanikāni.
སམཱནབྷཱཝོ སཱམཉྙཾ, པརིཔུཎྞཙཏུཔཱརིསུདྡྷིབྷཱཝེན མཛ྄ཛྷེ བྷིནྣསུཝཎྞསྶ ཝིཡ བྷེདཱབྷཱཝཏོ སཱིལེན སཱམཉྙཾ སཱིལསཱམཉྙཾ, ཏཾ གཏོ ཨུཔགཏོཏི སཱིལསཱམཉྙགཏོ། ཏེནཱཧ ‘‘སམཱནབྷཱཝཱུཔགཏསཱིལོ’’ཏི, སཱིལསམྤཏྟིཡཱ སམཱནབྷཱཝཾ ཨུཔགཏསཱིལོ སབྷཱགཝུཏྟིཀོཏི ཨཏྠོ། ཀཱམཾ པུཐུཛྫནཱནམྤི ཙཏུཔཱརིསུདྡྷིསཱིལེ ནཱནཏྟཾ ན སིཡཱ, ཏཾ པན ན ཨེཀནྟིཀཾ, ཨིདཾ ཨེཀནྟིཀཾ ནིཡཏབྷཱཝཏོཏི ཨཱཧ ‘‘ནཏྠི མགྒསཱིལེ ནཱནཏྟ’’ནྟི། ཏཾ སནྡྷཱཡེཏཾ ཝུཏྟནྟི མགྒསཱིལཾ སནྡྷཱཡ ཏཾ ‘‘ཡཱནི ཏཱནི སཱིལཱནཱི’’ཏིཨཱདི ཝུཏྟཾ།
Samānabhāvo sāmaññaṃ, paripuṇṇacatupārisuddhibhāvena majjhe bhinnasuvaṇṇassa viya bhedābhāvato sīlena sāmaññaṃ sīlasāmaññaṃ, taṃ gato upagatoti sīlasāmaññagato. Tenāha ‘‘samānabhāvūpagatasīlo’’ti, sīlasampattiyā samānabhāvaṃ upagatasīlo sabhāgavuttikoti attho. Kāmaṃ puthujjanānampi catupārisuddhisīle nānattaṃ na siyā, taṃ pana na ekantikaṃ, idaṃ ekantikaṃ niyatabhāvatoti āha ‘‘natthimaggasīle nānatta’’nti. Taṃ sandhāyetaṃ vuttanti maggasīlaṃ sandhāya taṃ ‘‘yāni tāni sīlānī’’tiādi vuttaṃ.
ཡཱཡནྟི ཡཱ ཨཡཾ མཡ྄ཧཉྩེཝ ཏུམྷཱཀཉྩ པཙྩཀྑབྷཱུཏཱ། དིཊྛཱིཏི མགྒསམྨཱདིཊྛི། ནིདྡོསཱཏི ནིདྡྷུཏདོསཱ, སམུཙྪིནྣརཱགཱདིཔཱཔདྷམྨཱཏི ཨཏྠོ། ནིཡྻཱཏཱིཏི ཝཊྚདུཀྑཏོ ནིསྶརཏི ནིགྒཙྪཏི། སཡཾ ནིཡྻནྟཱིཡེཝ ཧི ཏཾསམངྒིཔུགྒལཾ ཝཊྚདུཀྑཏོ ནིཡྻཱཔེཏཱིཏི ཝུཙྩཏི། ཡཱ སཏྠུ ཨནུསིཊྛི, ཏཾ ཀརོཏཱིཏི ཏཀྐརོ, ཏསྶ, ཡཐཱནུསིཊྛཾ པཊིཔཛྫནྟསྶཱཏི ཨཏྠོ། སམཱནདིཊྛིབྷཱཝནྟི སདིསདིཊྛིབྷཱཝཾ སཙྩསམྤཊིཝེདྷེན ཨབྷིནྣདིཊྛིབྷཱཝཾ།
Yāyanti yā ayaṃ mayhañceva tumhākañca paccakkhabhūtā. Diṭṭhīti maggasammādiṭṭhi. Niddosāti niddhutadosā, samucchinnarāgādipāpadhammāti attho. Niyyātīti vaṭṭadukkhato nissarati niggacchati. Sayaṃ niyyantīyeva hi taṃsamaṅgipuggalaṃ vaṭṭadukkhato niyyāpetīti vuccati. Yā satthu anusiṭṭhi, taṃ karotīti takkaro, tassa, yathānusiṭṭhaṃ paṭipajjantassāti attho. Samānadiṭṭhibhāvanti sadisadiṭṭhibhāvaṃ saccasampaṭivedhena abhinnadiṭṭhibhāvaṃ.
པཋམསཱརཎཱིཡསུཏྟཝཎྞནཱ ནིཊྛིཏཱ།
Paṭhamasāraṇīyasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡. པཋམསཱརཎཱིཡསུཏྟཾ • 1. Paṭhamasāraṇīyasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡. པཋམསཱརཎཱིཡསུཏྟཝཎྞནཱ • 1. Paṭhamasāraṇīyasuttavaṇṇanā
