| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. பட²மஸாரிபுத்தகொட்டி²கஸுத்தங்
3. Paṭhamasāriputtakoṭṭhikasuttaṃ
412. ஏகங் ஸமயங் ஆயஸ்மா ச ஸாரிபுத்தோ, ஆயஸ்மா ச மஹாகொட்டி²கோ பா³ராணஸியங் விஹரந்தி இஸிபதனே மிக³தா³யே. அத² கோ² ஆயஸ்மா மஹாகொட்டி²கோ ஸாயன்ஹஸமயங் படிஸல்லானா வுட்டி²தோ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா மஹாகொட்டி²கோ ஆயஸ்மந்தங் ஸாரிபுத்தங் ஏதத³வோச –
412. Ekaṃ samayaṃ āyasmā ca sāriputto, āyasmā ca mahākoṭṭhiko bārāṇasiyaṃ viharanti isipatane migadāye. Atha kho āyasmā mahākoṭṭhiko sāyanhasamayaṃ paṭisallānā vuṭṭhito yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā mahākoṭṭhiko āyasmantaṃ sāriputtaṃ etadavoca –
‘‘கிங் நு கோ², ஆவுஸோ ஸாரிபுத்த, ஹோதி ததா²க³தோ பரங் மரணா’’தி? ‘‘அப்³யாகதங் கோ² ஏதங், ஆவுஸோ, ப⁴க³வதா – ‘ஹோதி ததா²க³தோ பரங் மரணா’’’தி. ‘‘கிங் பனாவுஸோ, ந ஹோதி ததா²க³தோ பரங் மரணா’’தி? ‘‘ஏதம்பி கோ², ஆவுஸோ, அப்³யாகதங் ப⁴க³வதா – ‘ந ஹோதி ததா²க³தோ பரங் மரணா’’’தி. ‘‘கிங் நு கோ², ஆவுஸோ, ஹோதி ச ந ச ஹோதி ததா²க³தோ பரங் மரணா’’தி? ‘‘அப்³யாகதங் கோ² ஏதங், ஆவுஸோ, ப⁴க³வதா – ‘ஹோதி ச ந ச ஹோதி ததா²க³தோ பரங் மரணா’’’தி. ‘‘கிங் பனாவுஸோ, நேவ ஹோதி ந ந ஹோதி ததா²க³தோ பரங் மரணா’’தி? ‘‘ஏதம்பி கோ², ஆவுஸோ, அப்³யாகதங் ப⁴க³வதா – ‘நேவ ஹோதி ந ந ஹோதி ததா²க³தோ பரங் மரணா’’’தி.
‘‘Kiṃ nu kho, āvuso sāriputta, hoti tathāgato paraṃ maraṇā’’ti? ‘‘Abyākataṃ kho etaṃ, āvuso, bhagavatā – ‘hoti tathāgato paraṃ maraṇā’’’ti. ‘‘Kiṃ panāvuso, na hoti tathāgato paraṃ maraṇā’’ti? ‘‘Etampi kho, āvuso, abyākataṃ bhagavatā – ‘na hoti tathāgato paraṃ maraṇā’’’ti. ‘‘Kiṃ nu kho, āvuso, hoti ca na ca hoti tathāgato paraṃ maraṇā’’ti? ‘‘Abyākataṃ kho etaṃ, āvuso, bhagavatā – ‘hoti ca na ca hoti tathāgato paraṃ maraṇā’’’ti. ‘‘Kiṃ panāvuso, neva hoti na na hoti tathāgato paraṃ maraṇā’’ti? ‘‘Etampi kho, āvuso, abyākataṃ bhagavatā – ‘neva hoti na na hoti tathāgato paraṃ maraṇā’’’ti.
‘‘‘கிங் நு கோ², ஆவுஸோ, ஹோதி ததா²க³தோ பரங் மரணா’தி இதி புட்டோ² ஸமானோ, ‘அப்³யாகதங் கோ² ஏதங், ஆவுஸோ, ப⁴க³வதா – ஹோதி ததா²க³தோ பரங் மரணா’தி வதே³ஸி…பே॰… ‘கிங் பனாவுஸோ, நேவ ஹோதி ந ந ஹோதி ததா²க³தோ பரங் மரணா’தி இதி புட்டோ² ஸமானோ – ‘ஏதம்பி கோ², ஆவுஸோ, அப்³யாகதங் ப⁴க³வதா – நேவ ஹோதி ந ந ஹோதி ததா²க³தோ பரங் மரணா’தி வதே³ஸி. கோ நு கோ², ஆவுஸோ, ஹேது, கோ பச்சயோ யேனேதங் அப்³யாகதங் ப⁴க³வதா’’தி?
‘‘‘Kiṃ nu kho, āvuso, hoti tathāgato paraṃ maraṇā’ti iti puṭṭho samāno, ‘abyākataṃ kho etaṃ, āvuso, bhagavatā – hoti tathāgato paraṃ maraṇā’ti vadesi…pe… ‘kiṃ panāvuso, neva hoti na na hoti tathāgato paraṃ maraṇā’ti iti puṭṭho samāno – ‘etampi kho, āvuso, abyākataṃ bhagavatā – neva hoti na na hoti tathāgato paraṃ maraṇā’ti vadesi. Ko nu kho, āvuso, hetu, ko paccayo yenetaṃ abyākataṃ bhagavatā’’ti?
‘‘ஹோதி ததா²க³தோ பரங் மரணாதி கோ², ஆவுஸோ, ரூபக³தமேதங். ந ஹோதி ததா²க³தோ பரங் மரணாதி, ரூபக³தமேதங். ஹோதி ச ந ச ஹோதி ததா²க³தோ பரங் மரணாதி, ரூபக³தமேதங். நேவ ஹோதி ந ந ஹோதி ததா²க³தோ பரங் மரணாதி, ரூபக³தமேதங். ஹோதி ததா²க³தோ பரங் மரணாதி கோ², ஆவுஸோ, வேத³னாக³தமேதங். ந ஹோதி ததா²க³தோ பரங் மரணாதி, வேத³னாக³தமேதங். ஹோதி ச ந ச ஹோதி ததா²க³தோ பரங் மரணாதி, வேத³னாக³தமேதங். நேவ ஹோதி ந ந ஹோதி ததா²க³தோ பரங் மரணாதி, வேத³னாக³தமேதங். ஹோதி ததா²க³தோ பரங் மரணாதி கோ², ஆவுஸோ, ஸஞ்ஞாக³தமேதங். ந ஹோதி ததா²க³தோ பரங் மரணாதி, ஸஞ்ஞாக³தமேதங். ஹோதி ச ந ச ஹோதி ததா²க³தோ பரங் மரணாதி, ஸஞ்ஞாக³தமேதங். நேவ ஹோதி ந ந ஹோதி ததா²க³தோ பரங் மரணாதி, ஸஞ்ஞாக³தமேதங். ஹோதி ததா²க³தோ பரங் மரணாதி கோ², ஆவுஸோ, ஸங்கா²ரக³தமேதங் . ந ஹோதி ததா²க³தோ பரங் மரணாதி, ஸங்கா²ரக³தமேதங். ஹோதி ச ந ச ஹோதி ததா²க³தோ பரங் மரணாதி, ஸங்கா²ரக³தமேதங். நேவ ஹோதி ந ந ஹோதி ததா²க³தோ பரங் மரணாதி, ஸங்கா²ரக³தமேதங். ஹோதி ததா²க³தோ பரங் மரணாதி கோ², ஆவுஸோ, விஞ்ஞாணக³தமேதங். ந ஹோதி ததா²க³தோ பரங் மரணாதி, விஞ்ஞாணக³தமேதங். ஹோதி ச ந ச ஹோதி ததா²க³தோ பரங் மரணாதி, விஞ்ஞாணக³தமேதங். நேவ ஹோதி ந ந ஹோதி ததா²க³தோ பரங் மரணாதி, விஞ்ஞாணக³தமேதங். அயங் கோ², ஆவுஸோ, ஹேது அயங் பச்சயோ, யேனேதங் அப்³யாகதங் ப⁴க³வதா’’தி. ததியங்.
‘‘Hoti tathāgato paraṃ maraṇāti kho, āvuso, rūpagatametaṃ. Na hoti tathāgato paraṃ maraṇāti, rūpagatametaṃ. Hoti ca na ca hoti tathāgato paraṃ maraṇāti, rūpagatametaṃ. Neva hoti na na hoti tathāgato paraṃ maraṇāti, rūpagatametaṃ. Hoti tathāgato paraṃ maraṇāti kho, āvuso, vedanāgatametaṃ. Na hoti tathāgato paraṃ maraṇāti, vedanāgatametaṃ. Hoti ca na ca hoti tathāgato paraṃ maraṇāti, vedanāgatametaṃ. Neva hoti na na hoti tathāgato paraṃ maraṇāti, vedanāgatametaṃ. Hoti tathāgato paraṃ maraṇāti kho, āvuso, saññāgatametaṃ. Na hoti tathāgato paraṃ maraṇāti, saññāgatametaṃ. Hoti ca na ca hoti tathāgato paraṃ maraṇāti, saññāgatametaṃ. Neva hoti na na hoti tathāgato paraṃ maraṇāti, saññāgatametaṃ. Hoti tathāgato paraṃ maraṇāti kho, āvuso, saṅkhāragatametaṃ . Na hoti tathāgato paraṃ maraṇāti, saṅkhāragatametaṃ. Hoti ca na ca hoti tathāgato paraṃ maraṇāti, saṅkhāragatametaṃ. Neva hoti na na hoti tathāgato paraṃ maraṇāti, saṅkhāragatametaṃ. Hoti tathāgato paraṃ maraṇāti kho, āvuso, viññāṇagatametaṃ. Na hoti tathāgato paraṃ maraṇāti, viññāṇagatametaṃ. Hoti ca na ca hoti tathāgato paraṃ maraṇāti, viññāṇagatametaṃ. Neva hoti na na hoti tathāgato paraṃ maraṇāti, viññāṇagatametaṃ. Ayaṃ kho, āvuso, hetu ayaṃ paccayo, yenetaṃ abyākataṃ bhagavatā’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3-8. பட²மஸாரிபுத்தகொட்டி²கஸுத்தாதி³வண்ணனா • 3-8. Paṭhamasāriputtakoṭṭhikasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3-8. பட²மஸாரிபுத்தகொட்டி²கஸுத்தாதி³வண்ணனா • 3-8. Paṭhamasāriputtakoṭṭhikasuttādivaṇṇanā
