| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. පඨමසාරිපුත්‌තසුත්‌තං
4. Paṭhamasāriputtasuttaṃ
1000. එකං සමයං ආයස්‌මා ච සාරිපුත්‌තො ආයස්‌මා ච ආනන්‌දො සාවත්‌ථියං විහරන්‌ති ජෙතවනෙ අනාථපිණ්‌ඩිකස්‌ස ආරාමෙ. අථ ඛො ආයස්‌මා ආනන්‌දො සායන්‌හසමයං පටිසල්‌ලානා වුට්‌ඨිතො…පෙ.… එකමන්‌තං නිසින්‌නො ඛො ආයස්‌මා ආනන්‌දො ආයස්‌මන්‌තං සාරිපුත්‌තං එතදවොච – ‘‘කතිනං නු ඛො, ආවුසො සාරිපුත්‌ත, ධම්‌මානං සමන්‌නාගමනහෙතු එවමයං පජා භගවතා බ්‍යාකතා සොතාපන්‌නා අවිනිපාතධම්‌මා නියතා සම්‌බොධිපරායණා’’ති ? ‘‘චතුන්‌නං ඛො, ආවුසො, ධම්‌මානං සමන්‌නාගමනහෙතු එවමයං පජා භගවතා බ්‍යාකතා සොතාපන්‌නා අවිනිපාතධම්‌මා නියතා සම්‌බොධිපරායණා’’.
1000. Ekaṃ samayaṃ āyasmā ca sāriputto āyasmā ca ānando sāvatthiyaṃ viharanti jetavane anāthapiṇḍikassa ārāme. Atha kho āyasmā ānando sāyanhasamayaṃ paṭisallānā vuṭṭhito…pe… ekamantaṃ nisinno kho āyasmā ānando āyasmantaṃ sāriputtaṃ etadavoca – ‘‘katinaṃ nu kho, āvuso sāriputta, dhammānaṃ samannāgamanahetu evamayaṃ pajā bhagavatā byākatā sotāpannā avinipātadhammā niyatā sambodhiparāyaṇā’’ti ? ‘‘Catunnaṃ kho, āvuso, dhammānaṃ samannāgamanahetu evamayaṃ pajā bhagavatā byākatā sotāpannā avinipātadhammā niyatā sambodhiparāyaṇā’’.
‘‘කතමෙසං චතුන්‌නං? ඉධාවුසො, අරියසාවකො බුද්‌ධෙ අවෙච්‌චප්‌පසාදෙන සමන්‌නාගතො හොති – ඉතිපි සො භගවා…පෙ.… සත්‌ථා දෙවමනුස්‌සානං බුද්‌ධො භගවාති. ධම්‌මෙ…පෙ.… සඞ්‌ඝෙ…පෙ.… අරියකන්‌තෙහි සීලෙහි සමන්‌නාගතො හොති අඛණ්‌ඩෙහි…පෙ.… සමාධිසංවත්‌තනිකෙහි. ඉමෙසං ඛො, ආවුසො, චතුන්‌නං ධම්‌මානං සමන්‌නාගමනහෙතු එවමයං පජා භගවතා බ්‍යාකතා සොතාපන්‌නා අවිනිපාතධම්‌මා නියතා සම්‌බොධිපරායණා’’ති. චතුත්‌ථං.
‘‘Katamesaṃ catunnaṃ? Idhāvuso, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Imesaṃ kho, āvuso, catunnaṃ dhammānaṃ samannāgamanahetu evamayaṃ pajā bhagavatā byākatā sotāpannā avinipātadhammā niyatā sambodhiparāyaṇā’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4-5. පඨමසාරිපුත්‌තසුත්‌තාදිවණ්‌ණනා • 4-5. Paṭhamasāriputtasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4-5. පඨමසාරිපුත්‌තසුත්‌තාදිවණ්‌ණනා • 4-5. Paṭhamasāriputtasuttādivaṇṇanā
