| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. பட²மஸத்தகஸுத்தவண்ணனா
2. Paṭhamasattakasuttavaṇṇanā
23. ததியே அபரிஹானாய ஹிதாதி அபரிஹானியா (தீ³॰ நி॰ டீ॰ 2.136), ந பரிஹாயந்தி ஏதேஹீதி வா அபரிஹானியா. ஏவங் ஸங்கே²பதோ வுத்தமத்த²ங் வித்தா²ரதோ த³ஸ்ஸெந்தோ ‘‘இதா⁴பி சா’’திஆதி³மாஹ. தத்த² ததோதிஆதி³ தி³ஸாஸு ஆக³தஸாஸனே வுத்தவசனங் வுத்தகத²னங். விஹாரஸீமா ஆகுலா யஸ்மா , தஸ்மா உபோஸத²பவாரணா டி²தா. ஓலீயமானகோதி பாளிதோ அத்த²தோ ச வினஸ்ஸமானகோ. உக்கி²பாபெந்தாதி பகு³ணபா⁴வகரணேன அத்த²ஸங்வண்ணனாவஸேன ச பக்³க³ண்ஹந்தா.
23. Tatiye aparihānāya hitāti aparihāniyā (dī. ni. ṭī. 2.136), na parihāyanti etehīti vā aparihāniyā. Evaṃ saṅkhepato vuttamatthaṃ vitthārato dassento ‘‘idhāpi cā’’tiādimāha. Tattha tatotiādi disāsu āgatasāsane vuttavacanaṃ vuttakathanaṃ. Vihārasīmā ākulā yasmā , tasmā uposathapavāraṇā ṭhitā. Olīyamānakoti pāḷito atthato ca vinassamānako. Ukkhipāpentāti paguṇabhāvakaraṇena atthasaṃvaṇṇanāvasena ca paggaṇhantā.
ஸாவத்தி²யங் பி⁴க்கூ² விய (பாரா॰ 565) பாசித்தியங் தே³ஸாபேதப்³போ³தி பஞ்ஞாபெந்தா. வஜ்ஜிபுத்தகா விய (சூளவ॰ 446) த³ஸவத்து²தீ³பனேன. ததா² அகரொந்தாதி நவங் கதிகவத்தங் வா ஸிக்கா²பத³ங் வா அமத்³த³ந்தா த⁴ம்மவினயதோ ஸாஸனங் தீ³பெந்தா கு²த்³த³கம்பி ச ஸிக்கா²பத³ங் அஸமூஹனந்தா. ஆயஸ்மா மஹாகஸ்ஸபோ விய சாதி ‘‘ஸுணாது மே, ஆவுஸோ, ஸங்கோ⁴, ஸந்தாம்ஹாகங் ஸிக்கா²பதா³னி கி³ஹிக³தானி. கி³ஹினோபி ஜானந்தி ‘இத³ங் வோ ஸமணானங் ஸக்யபுத்திகானங் கப்பதி, இத³ங் வோ ந கப்பதீ’தி. ஸசேபி ஹி மயங் கு²த்³தா³னுகு²த்³த³கானி ஸிக்கா²பதா³னி ஸமூஹனிஸ்ஸாம, ப⁴விஸ்ஸந்தி வத்தாரோ ‘தூ⁴மகாலிகங் ஸமணேன கோ³தமேன ஸாவகானங் ஸிக்கா²பத³ங் பஞ்ஞத்தங், யாவிமேஸங் ஸத்தா² அட்டா²ஸி, தாவிமே ஸிக்கா²பதே³ஸு ஸிக்கி²ங்ஸு. யதோ இமேஸங் ஸத்தா² பரினிப்³பு³தோ, ந தா³னிமே ஸிக்கா²பதே³ஸு ஸிக்க²ந்தீ’தி. யதி³ ஸங்க⁴ஸ்ஸ பத்தகல்லங், ஸங்கோ⁴ அபஞ்ஞத்தங் ந பஞ்ஞபெய்ய, பஞ்ஞத்தங் ந ஸமுச்சி²ந்தெ³ய்ய, யதா²பஞ்ஞத்தேஸு ஸிக்கா²பதே³ஸு ஸமாதா³ய வத்தெய்யா’’தி இமங் (சூளவ॰ 442) தந்திங் ட²பெந்தோ ஆயஸ்மா மஹாகஸ்ஸபோ விய ச.
Sāvatthiyaṃ bhikkhū viya (pārā. 565) pācittiyaṃ desāpetabboti paññāpentā. Vajjiputtakā viya (cūḷava. 446) dasavatthudīpanena. Tathā akarontāti navaṃ katikavattaṃ vā sikkhāpadaṃ vā amaddantā dhammavinayato sāsanaṃ dīpentā khuddakampi ca sikkhāpadaṃ asamūhanantā. Āyasmā mahākassapo viya cāti ‘‘suṇātu me, āvuso, saṅgho, santāmhākaṃ sikkhāpadāni gihigatāni. Gihinopi jānanti ‘idaṃ vo samaṇānaṃ sakyaputtikānaṃ kappati, idaṃ vo na kappatī’ti. Sacepi hi mayaṃ khuddānukhuddakāni sikkhāpadāni samūhanissāma, bhavissanti vattāro ‘dhūmakālikaṃ samaṇena gotamena sāvakānaṃ sikkhāpadaṃ paññattaṃ, yāvimesaṃ satthā aṭṭhāsi, tāvime sikkhāpadesu sikkhiṃsu. Yato imesaṃ satthā parinibbuto, na dānime sikkhāpadesu sikkhantī’ti. Yadi saṅghassa pattakallaṃ, saṅgho apaññattaṃ na paññapeyya, paññattaṃ na samucchindeyya, yathāpaññattesu sikkhāpadesu samādāya vatteyyā’’ti imaṃ (cūḷava. 442) tantiṃ ṭhapento āyasmā mahākassapo viya ca.
தி²ரபா⁴வப்பத்தாதி ஸாஸனே தி²ரபா⁴வங் அனிவத்திதபா⁴வங் உபக³தா. தே²ரகாரகேஹீதி தே²ரபா⁴வஸாத⁴கேஹி ஸீலாதி³கு³ணேஹி அஸெக்க²த⁴ம்மேஹி. ப³ஹூ ரத்தியோதி பப்³ப³ஜிதா ஹுத்வா ப³ஹூ ரத்தியோ ஜானந்தி. ஸீலாதி³கு³ணேஸு பதிட்டா²பனமேவ ஸாஸனே பரிணாயகதாதி ஆஹ ‘‘தீஸு ஸிக்கா²ஸு பவத்தெந்தீ’’தி. ஓவாத³ங் ந தெ³ந்தி அபா⁴ஜனபா⁴வதோ. பவேணிகத²ந்தி ஆசரியபரம்பராப⁴தங் ஸம்மாபடிபத்திதீ³பனங் த⁴ம்மகத²ங். ஸாரபூ⁴தங் த⁴ம்மபரியாயந்தி ஸமத²விபஸ்ஸனாமக்³க³ப²லஸம்பாபனேன ஸாஸனே ஸாரபூ⁴தங் பொ³ஜ்ஜ²ங்க³கோஸல்லஅனுத்தரஸீதிபா⁴வ- (அ॰ நி॰ 6.85) அதி⁴சித்தஸுத்தாதி³த⁴ம்மதந்திங். ஆதி³கங் ஓவாத³ந்தி ஆதி³-ஸத்³தே³ன ‘‘ஏவங் தே ஆலோகேதப்³ப³ங், ஏவங் தே விலோகேதப்³ப³ங், ஏவங் தே ஸமிஞ்ஜிதப்³ப³ங், ஏவங் தே பஸாரேதப்³ப³ங், ஏவங் தே ஸங்கா⁴டிபத்தசீவரங் தா⁴ரேதப்³ப³’’ந்தி ஓவாத³ங் ஸங்க³ண்ஹாதி.
Thirabhāvappattāti sāsane thirabhāvaṃ anivattitabhāvaṃ upagatā. Therakārakehīti therabhāvasādhakehi sīlādiguṇehi asekkhadhammehi. Bahū rattiyoti pabbajitā hutvā bahū rattiyo jānanti. Sīlādiguṇesu patiṭṭhāpanameva sāsane pariṇāyakatāti āha ‘‘tīsu sikkhāsu pavattentī’’ti. Ovādaṃ na denti abhājanabhāvato. Paveṇikathanti ācariyaparamparābhataṃ sammāpaṭipattidīpanaṃ dhammakathaṃ. Sārabhūtaṃ dhammapariyāyanti samathavipassanāmaggaphalasampāpanena sāsane sārabhūtaṃ bojjhaṅgakosallaanuttarasītibhāva- (a. ni. 6.85) adhicittasuttādidhammatantiṃ. Ādikaṃ ovādanti ādi-saddena ‘‘evaṃ te āloketabbaṃ, evaṃ te viloketabbaṃ, evaṃ te samiñjitabbaṃ, evaṃ te pasāretabbaṃ, evaṃ te saṅghāṭipattacīvaraṃ dhāretabba’’nti ovādaṃ saṅgaṇhāti.
புனப்³ப⁴வதா³னங் புனப்³ப⁴வோ உத்தரபத³லோபேன. இதரேதி யே ந பச்சயவஸிகா ந ஆமிஸசக்கு²கா, தே ந க³ச்ச²ந்தி தண்ஹாய வஸங்.
Punabbhavadānaṃ punabbhavo uttarapadalopena. Itareti ye na paccayavasikā na āmisacakkhukā, te na gacchanti taṇhāya vasaṃ.
ஆரஞ்ஞகேஸூதி அரஞ்ஞபா⁴கே³ஸு அரஞ்ஞபரியாபன்னேஸு. நனு யத்த² கத்த²சிபி தண்ஹா ஸாவஜ்ஜா ஏவாதி சோத³னங் ஸந்தா⁴யாஹ ‘‘கா³மந்தஸேனாஸனேஸு ஹீ’’திஆதி³. தேன ‘‘அனுத்தரேஸு விமொக்கே²ஸு பிஹங் உபட்டா²பயதோ’’தி எத்த² வுத்தபிஹாத³யோ பிய ஆரஞ்ஞகஸேனாஸனேஸு ஸாலயதா ஸேவிதப்³ப³பக்கி²கா ஏவாதி த³ஸ்ஸேதி.
Āraññakesūti araññabhāgesu araññapariyāpannesu. Nanu yattha katthacipi taṇhā sāvajjā evāti codanaṃ sandhāyāha ‘‘gāmantasenāsanesu hī’’tiādi. Tena ‘‘anuttaresu vimokkhesu pihaṃ upaṭṭhāpayato’’ti ettha vuttapihādayo piya āraññakasenāsanesu sālayatā sevitabbapakkhikā evāti dasseti.
அத்தனாவாதி ஸயமேவ. தேன பரேஹி அனுஸ்ஸாஹிதானங் ஸரஸேனேவ அனாக³தானங் பேஸலானங் பி⁴க்கூ²னங் ஆக³மனங், ஆக³தானஞ்ச பா²ஸுவிஹாரங் பச்சாஸீஸந்தீதி த³ஸ்ஸேதி. இமினாவ நீஹாரேனாதி இமாய படிபத்தியா. அக்³க³ஹிதத⁴ம்மக்³க³ஹணந்தி அக்³க³ஹிதஸ்ஸ பரியத்தித⁴ம்மஸ்ஸ உக்³க³ஹணங். க³ஹிதஸஜ்ஜா²யகரணந்தி உக்³க³ஹிதஸ்ஸ ஸுட்டு² அத்த²சிந்தனங். சிந்தரத்தோ² ஹி அயங் ஸஜ்ஜா²யஸத்³தோ³. எந்தீதி உபக³ச்ச²ந்தி. நிஸீத³ந்தி ஆஸனபஞ்ஞாபனாதி³னா.
Attanāvāti sayameva. Tena parehi anussāhitānaṃ saraseneva anāgatānaṃ pesalānaṃ bhikkhūnaṃ āgamanaṃ, āgatānañca phāsuvihāraṃ paccāsīsantīti dasseti. Imināva nīhārenāti imāya paṭipattiyā. Aggahitadhammaggahaṇanti aggahitassa pariyattidhammassa uggahaṇaṃ. Gahitasajjhāyakaraṇanti uggahitassa suṭṭhu atthacintanaṃ. Cintarattho hi ayaṃ sajjhāyasaddo. Entīti upagacchanti. Nisīdanti āsanapaññāpanādinā.
பட²மஸத்தகஸுத்தவண்ணனா நிட்டி²தா.
Paṭhamasattakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. பட²மஸத்தகஸுத்தங் • 3. Paṭhamasattakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. பட²மஸத்தகஸுத்தவண்ணனா • 3. Paṭhamasattakasuttavaṇṇanā
