| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
2. පඨමසත්‌තකසුත්‌තවණ්‌ණනා
2. Paṭhamasattakasuttavaṇṇanā
23. තතියෙ අපරිහානාය හිතාති අපරිහානියා (දී. නි. ටී. 2.136), න පරිහායන්‌ති එතෙහීති වා අපරිහානියා. එවං සඞ්‌ඛෙපතො වුත්‌තමත්‌ථං විත්‌ථාරතො දස්‌සෙන්‌තො ‘‘ඉධාපි චා’’තිආදිමාහ. තත්‌ථ තතොතිආදි දිසාසු ආගතසාසනෙ වුත්‌තවචනං වුත්‌තකථනං. විහාරසීමා ආකුලා යස්‌මා , තස්‌මා උපොසථපවාරණා ඨිතා. ඔලීයමානකොති පාළිතො අත්‌ථතො ච විනස්‌සමානකො. උක්‌ඛිපාපෙන්‌තාති පගුණභාවකරණෙන අත්‌ථසංවණ්‌ණනාවසෙන ච පග්‌ගණ්‌හන්‌තා.
23. Tatiye aparihānāya hitāti aparihāniyā (dī. ni. ṭī. 2.136), na parihāyanti etehīti vā aparihāniyā. Evaṃ saṅkhepato vuttamatthaṃ vitthārato dassento ‘‘idhāpi cā’’tiādimāha. Tattha tatotiādi disāsu āgatasāsane vuttavacanaṃ vuttakathanaṃ. Vihārasīmā ākulā yasmā , tasmā uposathapavāraṇā ṭhitā. Olīyamānakoti pāḷito atthato ca vinassamānako. Ukkhipāpentāti paguṇabhāvakaraṇena atthasaṃvaṇṇanāvasena ca paggaṇhantā.
සාවත්‌ථියං භික්‌ඛූ විය (පාරා. 565) පාචිත්‌තියං දෙසාපෙතබ්‌බොති පඤ්‌ඤාපෙන්‌තා. වජ්‌ජිපුත්‌තකා විය (චූළව. 446) දසවත්‌ථුදීපනෙන. තථා අකරොන්‌තාති නවං කතිකවත්‌තං වා සික්‌ඛාපදං වා අමද්‌දන්‌තා ධම්‌මවිනයතො සාසනං දීපෙන්‌තා ඛුද්‌දකම්‌පි ච සික්‌ඛාපදං අසමූහනන්‌තා. ආයස්‌මා මහාකස්‌සපො විය චාති ‘‘සුණාතු මෙ, ආවුසො, සඞ්‌ඝො, සන්‌තාම්‌හාකං සික්‌ඛාපදානි ගිහිගතානි. ගිහිනොපි ජානන්‌ති ‘ඉදං වො සමණානං සක්‍යපුත්‌තිකානං කප්‌පති, ඉදං වො න කප්‌පතී’ති. සචෙපි හි මයං ඛුද්‌දානුඛුද්‌දකානි සික්‌ඛාපදානි සමූහනිස්‌සාම, භවිස්‌සන්‌ති වත්‌තාරො ‘ධූමකාලිකං සමණෙන ගොතමෙන සාවකානං සික්‌ඛාපදං පඤ්‌ඤත්‌තං, යාවිමෙසං සත්‌ථා අට්‌ඨාසි, තාවිමෙ සික්‌ඛාපදෙසු සික්‌ඛිංසු. යතො ඉමෙසං සත්‌ථා පරිනිබ්‌බුතො, න දානිමෙ සික්‌ඛාපදෙසු සික්‌ඛන්‌තී’ති. යදි සඞ්‌ඝස්‌ස පත්‌තකල්‌ලං, සඞ්‌ඝො අපඤ්‌ඤත්‌තං න පඤ්‌ඤපෙය්‍ය, පඤ්‌ඤත්‌තං න සමුච්‌ඡින්‌දෙය්‍ය, යථාපඤ්‌ඤත්‌තෙසු සික්‌ඛාපදෙසු සමාදාය වත්‌තෙය්‍යා’’ති ඉමං (චූළව. 442) තන්‌තිං ඨපෙන්‌තො ආයස්‌මා මහාකස්‌සපො විය ච.
Sāvatthiyaṃ bhikkhū viya (pārā. 565) pācittiyaṃ desāpetabboti paññāpentā. Vajjiputtakā viya (cūḷava. 446) dasavatthudīpanena. Tathā akarontāti navaṃ katikavattaṃ vā sikkhāpadaṃ vā amaddantā dhammavinayato sāsanaṃ dīpentā khuddakampi ca sikkhāpadaṃ asamūhanantā. Āyasmā mahākassapo viya cāti ‘‘suṇātu me, āvuso, saṅgho, santāmhākaṃ sikkhāpadāni gihigatāni. Gihinopi jānanti ‘idaṃ vo samaṇānaṃ sakyaputtikānaṃ kappati, idaṃ vo na kappatī’ti. Sacepi hi mayaṃ khuddānukhuddakāni sikkhāpadāni samūhanissāma, bhavissanti vattāro ‘dhūmakālikaṃ samaṇena gotamena sāvakānaṃ sikkhāpadaṃ paññattaṃ, yāvimesaṃ satthā aṭṭhāsi, tāvime sikkhāpadesu sikkhiṃsu. Yato imesaṃ satthā parinibbuto, na dānime sikkhāpadesu sikkhantī’ti. Yadi saṅghassa pattakallaṃ, saṅgho apaññattaṃ na paññapeyya, paññattaṃ na samucchindeyya, yathāpaññattesu sikkhāpadesu samādāya vatteyyā’’ti imaṃ (cūḷava. 442) tantiṃ ṭhapento āyasmā mahākassapo viya ca.
ථිරභාවප්‌පත්‌තාති සාසනෙ ථිරභාවං අනිවත්‌තිතභාවං උපගතා. ථෙරකාරකෙහීති ථෙරභාවසාධකෙහි සීලාදිගුණෙහි අසෙක්‌ඛධම්‌මෙහි. බහූ රත්‌තියොති පබ්‌බජිතා හුත්‌වා බහූ රත්‌තියො ජානන්‌ති. සීලාදිගුණෙසු පතිට්‌ඨාපනමෙව සාසනෙ පරිණායකතාති ආහ ‘‘තීසු සික්‌ඛාසු පවත්‌තෙන්‌තී’’ති. ඔවාදං න දෙන්‌ති අභාජනභාවතො. පවෙණිකථන්‌ති ආචරියපරම්‌පරාභතං සම්‌මාපටිපත්‌තිදීපනං ධම්‌මකථං. සාරභූතං ධම්‌මපරියායන්‌ති සමථවිපස්‌සනාමග්‌ගඵලසම්‌පාපනෙන සාසනෙ සාරභූතං බොජ්‌ඣඞ්‌ගකොසල්‌ලඅනුත්‌තරසීතිභාව- (අ. නි. 6.85) අධිචිත්‌තසුත්‌තාදිධම්‌මතන්‌තිං. ආදිකං ඔවාදන්‌ති ආදි-සද්‌දෙන ‘‘එවං තෙ ආලොකෙතබ්‌බං, එවං තෙ විලොකෙතබ්‌බං, එවං තෙ සමිඤ්‌ජිතබ්‌බං, එවං තෙ පසාරෙතබ්‌බං, එවං තෙ සඞ්‌ඝාටිපත්‌තචීවරං ධාරෙතබ්‌බ’’න්‌ති ඔවාදං සඞ්‌ගණ්‌හාති.
Thirabhāvappattāti sāsane thirabhāvaṃ anivattitabhāvaṃ upagatā. Therakārakehīti therabhāvasādhakehi sīlādiguṇehi asekkhadhammehi. Bahū rattiyoti pabbajitā hutvā bahū rattiyo jānanti. Sīlādiguṇesu patiṭṭhāpanameva sāsane pariṇāyakatāti āha ‘‘tīsu sikkhāsu pavattentī’’ti. Ovādaṃ na denti abhājanabhāvato. Paveṇikathanti ācariyaparamparābhataṃ sammāpaṭipattidīpanaṃ dhammakathaṃ. Sārabhūtaṃ dhammapariyāyanti samathavipassanāmaggaphalasampāpanena sāsane sārabhūtaṃ bojjhaṅgakosallaanuttarasītibhāva- (a. ni. 6.85) adhicittasuttādidhammatantiṃ. Ādikaṃ ovādanti ādi-saddena ‘‘evaṃ te āloketabbaṃ, evaṃ te viloketabbaṃ, evaṃ te samiñjitabbaṃ, evaṃ te pasāretabbaṃ, evaṃ te saṅghāṭipattacīvaraṃ dhāretabba’’nti ovādaṃ saṅgaṇhāti.
පුනබ්‌භවදානං පුනබ්‌භවො උත්‌තරපදලොපෙන. ඉතරෙති යෙ න පච්‌චයවසිකා න ආමිසචක්‌ඛුකා, තෙ න ගච්‌ඡන්‌ති තණ්‌හාය වසං.
Punabbhavadānaṃ punabbhavo uttarapadalopena. Itareti ye na paccayavasikā na āmisacakkhukā, te na gacchanti taṇhāya vasaṃ.
ආරඤ්‌ඤකෙසූති අරඤ්‌ඤභාගෙසු අරඤ්‌ඤපරියාපන්‌නෙසු. නනු යත්‌ථ කත්‌ථචිපි තණ්‌හා සාවජ්‌ජා එවාති චොදනං සන්‌ධායාහ ‘‘ගාමන්‌තසෙනාසනෙසු හී’’තිආදි. තෙන ‘‘අනුත්‌තරෙසු විමොක්‌ඛෙසු පිහං උපට්‌ඨාපයතො’’ති එත්‌ථ වුත්‌තපිහාදයො පිය ආරඤ්‌ඤකසෙනාසනෙසු සාලයතා සෙවිතබ්‌බපක්‌ඛිකා එවාති දස්‌සෙති.
Āraññakesūti araññabhāgesu araññapariyāpannesu. Nanu yattha katthacipi taṇhā sāvajjā evāti codanaṃ sandhāyāha ‘‘gāmantasenāsanesu hī’’tiādi. Tena ‘‘anuttaresu vimokkhesu pihaṃ upaṭṭhāpayato’’ti ettha vuttapihādayo piya āraññakasenāsanesu sālayatā sevitabbapakkhikā evāti dasseti.
අත්‌තනාවාති සයමෙව. තෙන පරෙහි අනුස්‌සාහිතානං සරසෙනෙව අනාගතානං පෙසලානං භික්‌ඛූනං ආගමනං, ආගතානඤ්‌ච ඵාසුවිහාරං පච්‌චාසීසන්‌තීති දස්‌සෙති. ඉමිනාව නීහාරෙනාති ඉමාය පටිපත්‌තියා. අග්‌ගහිතධම්‌මග්‌ගහණන්‌ති අග්‌ගහිතස්‌ස පරියත්‌තිධම්‌මස්‌ස උග්‌ගහණං. ගහිතසජ්‌ඣායකරණන්‌ති උග්‌ගහිතස්‌ස සුට්‌ඨු අත්‌ථචින්‌තනං. චින්‌තරත්‌ථො හි අයං සජ්‌ඣායසද්‌දො. එන්‌තීති උපගච්‌ඡන්‌ති. නිසීදන්‌ති ආසනපඤ්‌ඤාපනාදිනා.
Attanāvāti sayameva. Tena parehi anussāhitānaṃ saraseneva anāgatānaṃ pesalānaṃ bhikkhūnaṃ āgamanaṃ, āgatānañca phāsuvihāraṃ paccāsīsantīti dasseti. Imināva nīhārenāti imāya paṭipattiyā. Aggahitadhammaggahaṇanti aggahitassa pariyattidhammassa uggahaṇaṃ. Gahitasajjhāyakaraṇanti uggahitassa suṭṭhu atthacintanaṃ. Cintarattho hi ayaṃ sajjhāyasaddo. Entīti upagacchanti. Nisīdanti āsanapaññāpanādinā.
පඨමසත්‌තකසුත්‌තවණ්‌ණනා නිට්‌ඨිතා.
Paṭhamasattakasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 3. පඨමසත්‌තකසුත්‌තං • 3. Paṭhamasattakasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3. පඨමසත්‌තකසුත්‌තවණ්‌ණනා • 3. Paṭhamasattakasuttavaṇṇanā
