| Library / Tipiṭaka / তিপিটক • Tipiṭaka / উদানপাল়ি • Udānapāḷi |
৩. পঠমসত্তসুত্তং
3. Paṭhamasattasuttaṃ
অথ খো সম্বহুলা ভিক্খূ পুব্বণ্হসমযং নিৰাসেত্ৰা পত্তচীৰরমাদায সাৰত্থিযং পিণ্ডায পাৰিসিংসু। সাৰত্থিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ভিক্খূ ভগৰন্তং এতদৰোচুং – ‘‘ইধ, ভন্তে, সাৰত্থিযা মনুস্সা যেভুয্যেন কামেসু অতিৰেলং সত্তা রত্তা গিদ্ধা গধিতা মুচ্ছিতা অজ্ঝোপন্না সম্মত্তকজাতা কামেসু ৰিহরন্তী’’তি।
Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiyaṃ piṇḍāya pāvisiṃsu. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha, bhante, sāvatthiyā manussā yebhuyyena kāmesu ativelaṃ sattā rattā giddhā gadhitā mucchitā ajjhopannā sammattakajātā kāmesu viharantī’’ti.
অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘কামেসু সত্তা কামসঙ্গসত্তা,
‘‘Kāmesu sattā kāmasaṅgasattā,
সংযোজনে ৰজ্জমপস্সমানা।
Saṃyojane vajjamapassamānā;
ন হি জাতু সংযোজনসঙ্গসত্তা,
Na hi jātu saṃyojanasaṅgasattā,
ওঘং তরেয্যুং ৰিপুলং মহন্ত’’ন্তি॥ ততিযং।
Oghaṃ tareyyuṃ vipulaṃ mahanta’’nti. tatiyaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / উদান-অট্ঠকথা • Udāna-aṭṭhakathā / ৩. পঠমসত্তসুত্তৰণ্ণনা • 3. Paṭhamasattasuttavaṇṇanā
