Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā)

    9. பட²மஸேக²ஸுத்தவண்ணனா

    9. Paṭhamasekhasuttavaṇṇanā

    89. நவமே ஆரமிதப்³ப³ட்டே²ன கம்மங் ஆராமோ ஏதஸ்ஸாதி கம்மாராமோ, தஸ்ஸ பா⁴வோ கம்மாராமதா. தத்த² கம்மந்தி இதிகத்தப்³ப³ங் கம்மங் வுச்சதி. ஸெய்யதி²த³ங் – சீவரவிசாரணங் சீவரகம்மகரணங் உபத்த²ம்ப⁴னங் பத்தத்த²விகஅங்ஸப³த்³த⁴ககாயப³ந்த⁴னத⁴ம்மகரணஆதா⁴ரகபாத³கத²லிகஸம்மஜ்ஜனிஆதீ³னங் கரணந்தி. ஏகச்சோ ஹி ஏதானி கரொந்தோ ஸகலதி³வஸங் ஏதானேவ கரோதி, தங் ஸந்தா⁴யேஸ படிக்கே²போ. யோ பன ஏதேஸங் கரணவேலாயமேவ தானி கரோதி, உத்³தே³ஸவேலாய உத்³தே³ஸங் க³ண்ஹாதி, ஸஜ்ஜா²யவேலாய ஸஜ்ஜா²யதி, சேதியங்க³ணவத்தவேலாய சேதியங்க³ணவத்தங் கரோதி, மனஸிகாரவேலாய மனஸிகாரங் கரோதி, ந ஸோ கம்மாராமோ நாம. ப⁴ஸ்ஸாராமதாதி எத்த² யோ இத்தி²வண்ணபுரிஸவண்ணாதி³வஸேன ஆலாபஸல்லாபங் கரொந்தோயேவ தி³வஸஞ்ச ரத்திஞ்ச வீதினாமேதி, ஏவரூபோ ப⁴ஸ்ஸே பரியந்தகாரீ ந ஹோதி, அயங் ப⁴ஸ்ஸாராமோ நாம. யோ பன ரத்திம்பி தி³வஸம்பி த⁴ம்மங் கதே²தி, பஞ்ஹங் விஸ்ஸஜ்ஜேதி, அயங் அப்பப⁴ஸ்ஸோ ப⁴ஸ்ஸே பரியந்தகாரீயேவ. கஸ்மா? ‘‘ஸன்னிபதிதானங் வோ, பி⁴க்க²வே, த்³வயங் கரணீயங் த⁴ம்மீ வா கதா², அரியோ வா துண்ஹீபா⁴வோ’’தி (ம॰ நி॰ 1.273; உதா³॰ 12, 28, 29) வுத்தத்தா.

    89. Navame āramitabbaṭṭhena kammaṃ ārāmo etassāti kammārāmo, tassa bhāvo kammārāmatā. Tattha kammanti itikattabbaṃ kammaṃ vuccati. Seyyathidaṃ – cīvaravicāraṇaṃ cīvarakammakaraṇaṃ upatthambhanaṃ pattatthavikaaṃsabaddhakakāyabandhanadhammakaraṇaādhārakapādakathalikasammajjaniādīnaṃ karaṇanti. Ekacco hi etāni karonto sakaladivasaṃ etāneva karoti, taṃ sandhāyesa paṭikkhepo. Yo pana etesaṃ karaṇavelāyameva tāni karoti, uddesavelāya uddesaṃ gaṇhāti, sajjhāyavelāya sajjhāyati, cetiyaṅgaṇavattavelāya cetiyaṅgaṇavattaṃ karoti, manasikāravelāya manasikāraṃ karoti, na so kammārāmo nāma. Bhassārāmatāti ettha yo itthivaṇṇapurisavaṇṇādivasena ālāpasallāpaṃ karontoyeva divasañca rattiñca vītināmeti, evarūpo bhasse pariyantakārī na hoti, ayaṃ bhassārāmo nāma. Yo pana rattimpi divasampi dhammaṃ katheti, pañhaṃ vissajjeti, ayaṃ appabhasso bhasse pariyantakārīyeva. Kasmā? ‘‘Sannipatitānaṃ vo, bhikkhave, dvayaṃ karaṇīyaṃ dhammī vā kathā, ariyo vā tuṇhībhāvo’’ti (ma. ni. 1.273; udā. 12, 28, 29) vuttattā.

    நித்³தா³ராமதாதி எத்த² யோ க³ச்ச²ந்தோபி நிஸின்னோபி நிபன்னோபி தி²னமித்³தா⁴பி⁴பூ⁴தோ நித்³தா³யதியேவ, அயங் நித்³தா³ராமோ நாம. யஸ்ஸ பன கரஜகாயே கே³லஞ்ஞேன சித்தங் ப⁴வங்கே³ ஓதரதி, நாயங் நித்³தா³ராமோ. தேனேவாஹ – ‘‘அபி⁴ஜானாமி கோ² பனாஹங், அக்³கி³வெஸ்ஸன, கி³ம்ஹானங் பச்சி²மே மாஸே பச்சா²ப⁴த்தங் பிண்ட³பாதப்படிக்கந்தோ சதுக்³கு³ணங் ஸங்கா⁴டிங் பஞ்ஞாபெத்வா த³க்கி²ணேன பஸ்ஸேன ஸதோ ஸம்பஜானோ நித்³த³ங் ஓக்கமிதா’’தி (ம॰ நி॰ 1.387). ஸங்க³ணிகாராமதாதி எத்த² யோ ஏகஸ்ஸ து³தியோ, த்³வின்னங் ததியோ, திண்ணங் சதுத்தோ²தி ஏவங் ஸங்ஸட்டோ²வ விஹரதி, ஏககோ அஸ்ஸாத³ங் ந லப⁴தி, அயங் ஸங்க³ணிகாராமோ. யோ பன சதூஸு இரியாபதே²ஸு ஏககோவ அஸ்ஸாத³ங் லப⁴தி, நாயங் ஸங்க³ணிகாராமோ வேதி³தப்³போ³. ஸேகா²னங் படிலத்³த⁴கு³ணஸ்ஸ பரிஹானாஸம்ப⁴வதோ ‘‘உபரிகு³ணேஹீ’’திஆதி³ வுத்தங்.

    Niddārāmatāti ettha yo gacchantopi nisinnopi nipannopi thinamiddhābhibhūto niddāyatiyeva, ayaṃ niddārāmo nāma. Yassa pana karajakāye gelaññena cittaṃ bhavaṅge otarati, nāyaṃ niddārāmo. Tenevāha – ‘‘abhijānāmi kho panāhaṃ, aggivessana, gimhānaṃ pacchime māse pacchābhattaṃ piṇḍapātappaṭikkanto catugguṇaṃ saṅghāṭiṃ paññāpetvā dakkhiṇena passena sato sampajāno niddaṃ okkamitā’’ti (ma. ni. 1.387). Saṅgaṇikārāmatāti ettha yo ekassa dutiyo, dvinnaṃ tatiyo, tiṇṇaṃ catutthoti evaṃ saṃsaṭṭhova viharati, ekako assādaṃ na labhati, ayaṃ saṅgaṇikārāmo. Yo pana catūsu iriyāpathesu ekakova assādaṃ labhati, nāyaṃ saṅgaṇikārāmo veditabbo. Sekhānaṃ paṭiladdhaguṇassa parihānāsambhavato ‘‘upariguṇehī’’tiādi vuttaṃ.

    பட²மஸேக²ஸுத்தவண்ணனா நிட்டி²தா.

    Paṭhamasekhasuttavaṇṇanā niṭṭhitā.







    Related texts:



    திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. பட²மஸேக²ஸுத்தங் • 9. Paṭhamasekhasuttaṃ

    அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. பட²மஸேக²ஸுத்தவண்ணனா • 9. Paṭhamasekhasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact