| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
4. பட²மஸேனாஸனஸிக்கா²பத³ங்
4. Paṭhamasenāsanasikkhāpadaṃ
108. சதுத்தே² ஹிமமேவ ஹிமந்தோ, ஹிமந்தே நியுத்தோ ஹேமந்திகோ, காலோதி ஆஹ ‘‘ஹேமந்தகாலே’’தி. ஓதாபெந்தா பக்கமிங்ஸூதி ஸம்ப³ந்தோ⁴. காலஸத்³த³ஸ்ஸ ஸம்ப³ந்தி⁴ஸத்³த³த்தா ஸம்ப³ந்தா⁴பெக்கோ²தி ஆஹ ‘‘யஸ்ஸ கஸ்ஸசீ’’தி. ஹிமவஸ்ஸேனாதி ஹிமேன ச வஸ்ஸேன ச.
108. Catutthe himameva himanto, himante niyutto hemantiko, kāloti āha ‘‘hemantakāle’’ti. Otāpentā pakkamiṃsūti sambandho. Kālasaddassa sambandhisaddattā sambandhāpekkhoti āha ‘‘yassa kassacī’’ti. Himavassenāti himena ca vassena ca.
110. ‘‘வஸ்ஸிகோ’’தி ந ஸங்கேதாதி அவஸ்ஸிகஸங்கேதா. ‘‘அட்ட² மாஸே’’தி ஸாமஞ்ஞதோ வுத்தேபி ‘‘அவஸ்ஸிகஸங்கேதே’’தி விஸேஸிதத்தா ஹேமந்திககி³ம்ஹிகமாஸாயேவ க³ஹேதப்³பா³தி ஆஹ ‘‘சத்தாரோ ஹேமந்திகே’’திஆதி³. யத்தா²தி யஸ்மிங் ருக்கே². ந ஊஹத³ந்தீதி ஸம்ப³ந்தோ⁴. ‘‘காகா வா’’தி எத்த² வாஸத்³தோ³ ஸம்பிண்ட³னத்தோ². தேனாஹ ‘‘அஞ்ஞே வா ஸகுந்தா’’தி. தஸ்மாதி யஸ்மா அனுஜானாதி, தஸ்மா. யத்தா²தி யஸ்மிங் ருக்கே², விஸ்ஸமித்வா க³ச்ச²ந்தீதி யோஜனா. யஸ்மிந்தி ருக்கே², கத்வா வஸந்தீதி யோஜனா. அட்ட² மாஸே ஏவாதி ஸம்ப⁴வதோ ஆஹ ‘‘யேஸு ஜனபதே³ஸூ’’திஆதி³ . தேஸுபீதி ஜனபதே³ஸுபி. அவஸ்ஸிகஸங்கேதே ஏவாதி ஸம்ப⁴வதோ ஆஹ ‘‘யத்தா²’’திஆதி³. யத்தா²தி யேஸு ஜனபதே³ஸு. ‘‘விக³தவலாஹகங் விஸுத்³த⁴ங் நப⁴ங் ஹோதீ’’தி இமினா ஸசே அவிக³தவலாஹகங் அவிஸுத்³த⁴ங் நப⁴ங் ஹோதி, நிக்கி²பிதுங் ந வட்டதீதி தீ³பேதி. ‘‘ஏவரூபே காலே’’தி பத³ங் ‘‘நிக்கி²பிதுங் வட்டதீ’’தி பதே³ ஆதா⁴ரோ.
110. ‘‘Vassiko’’ti na saṅketāti avassikasaṅketā. ‘‘Aṭṭha māse’’ti sāmaññato vuttepi ‘‘avassikasaṅkete’’ti visesitattā hemantikagimhikamāsāyeva gahetabbāti āha ‘‘cattāro hemantike’’tiādi. Yatthāti yasmiṃ rukkhe. Na ūhadantīti sambandho. ‘‘Kākā vā’’ti ettha vāsaddo sampiṇḍanattho. Tenāha ‘‘aññe vā sakuntā’’ti. Tasmāti yasmā anujānāti, tasmā. Yatthāti yasmiṃ rukkhe, vissamitvā gacchantīti yojanā. Yasminti rukkhe, katvā vasantīti yojanā. Aṭṭha māse evāti sambhavato āha ‘‘yesu janapadesū’’tiādi . Tesupīti janapadesupi. Avassikasaṅkete evāti sambhavato āha ‘‘yatthā’’tiādi. Yatthāti yesu janapadesu. ‘‘Vigatavalāhakaṃ visuddhaṃ nabhaṃ hotī’’ti iminā sace avigatavalāhakaṃ avisuddhaṃ nabhaṃ hoti, nikkhipituṃ na vaṭṭatīti dīpeti. ‘‘Evarūpe kāle’’ti padaṃ ‘‘nikkhipituṃ vaṭṭatī’’ti pade ādhāro.
அப்³போ⁴காஸிகேனாபீதி அப்³போ⁴காஸது⁴தங்க³யுத்தேனாபி. பிஸத்³தோ³ ருக்க²மூலிகஸ்ஸ அபெக்க²கோ. வத்தங் வித்தா²ரெந்தோ ஆஹ ‘‘தஸ்ஸ ஹீ’’திஆதி³. தஸ்ஸாதி அப்³போ⁴காஸிகஸ்ஸ. ஹிஸத்³தோ³ வித்தா²ரஜோதகோ. தத்தே²வாதி புக்³க³லிகமஞ்சகேயேவ. ஸங்கி⁴கங் மஞ்சந்தி ஸம்ப³ந்தோ⁴. வீதமஞ்சகோதி வாயிதமஞ்சகோ. தஸ்மிந்தி வீதமஞ்சகே. புராணமஞ்சகோ நஸ்ஸந்தோபி அனக்³கோ⁴தி ஆஹ ‘‘புராணமஞ்சகோ க³ஹேதப்³போ³’’தி. சம்மேன அவனஹிதப்³போ³தி ஓனத்³தோ⁴, ஸோ ஏவ ஓனத்³த⁴கோ. க³ஹெத்வா ச பன பஞ்ஞபெத்வா நிபஜ்ஜிதுங் ந வட்டதீதி யோஜனா. அஸமயேதி வஸ்ஸிகஸங்கா²தே அகாலே. சதுக்³கு³ணேனாபீதி சதுபடலேனபி. வட்டந்தி வலாஹகா ஆவட்டந்தி அஸ்மிங் ஸமயேதி வட்டுலோ, ஸோ ஏவ வட்டலிகோ, ஸத்தாஹங் வட்டலிகோ, ஸத்தாஹோ வா வட்டலிகோ ஸத்தாஹவட்டலிகோ, ஸோ ஆதி³ யேஸங் தானீதி ஸத்தாஹவட்டலிகாதீ³னி. ஆதி³ஸத்³தே³ன ஸத்தாஹதோ ஊனாதி⁴கானி க³ஹேதப்³பா³னி. காயானுக³திகத்தாதி காயங் அனுக³மகத்தா காயஸதி³ஸத்தாதி அத்தோ².
Abbhokāsikenāpīti abbhokāsadhutaṅgayuttenāpi. Pisaddo rukkhamūlikassa apekkhako. Vattaṃ vitthārento āha ‘‘tassa hī’’tiādi. Tassāti abbhokāsikassa. Hisaddo vitthārajotako. Tatthevāti puggalikamañcakeyeva. Saṅghikaṃ mañcanti sambandho. Vītamañcakoti vāyitamañcako. Tasminti vītamañcake. Purāṇamañcako nassantopi anagghoti āha ‘‘purāṇamañcako gahetabbo’’ti. Cammena avanahitabboti onaddho, so eva onaddhako. Gahetvā ca pana paññapetvā nipajjituṃ na vaṭṭatīti yojanā. Asamayeti vassikasaṅkhāte akāle. Catugguṇenāpīti catupaṭalenapi. Vaṭṭanti valāhakā āvaṭṭanti asmiṃ samayeti vaṭṭulo, so eva vaṭṭaliko, sattāhaṃ vaṭṭaliko, sattāho vā vaṭṭaliko sattāhavaṭṭaliko, so ādi yesaṃ tānīti sattāhavaṭṭalikādīni. Ādisaddena sattāhato ūnādhikāni gahetabbāni. Kāyānugatikattāti kāyaṃ anugamakattā kāyasadisattāti attho.
பண்ணகுடீஸூதி பண்ணேன சா²தி³தகுடீஸு. ஸபா⁴க³பி⁴க்கூ²னந்தி அத்தனா ஸபா⁴க³பி⁴க்கூ²னங், ஸந்திகந்தி ஸம்ப³ந்தோ⁴. அனோவஸ்ஸகே டா²னேதி யோஜனா. லக்³கெ³த்வாதி லம்பெ³த்வா, அயமேவ வா பாடோ². ‘‘ஸம்மஜ்ஜனி’’ந்தி பத³ங் ‘‘க³ஹெத்வா’’தி பதே³ அவுத்தகம்மங், ‘‘ட²பேதப்³பா³’’தி பதே³ வுத்தகம்மங். தோ⁴வித்வாதி ஸம்மஜ்ஜனிங் ஸுத்³த⁴ங் கத்வா. உபோஸதா²கா³ராதீ³ஸூதிஆதி³ஸத்³தே³ன பரிவேணாதீ³னி க³ஹேதப்³பா³னி.
Paṇṇakuṭīsūti paṇṇena chāditakuṭīsu. Sabhāgabhikkhūnanti attanā sabhāgabhikkhūnaṃ, santikanti sambandho. Anovassake ṭhāneti yojanā. Laggetvāti lambetvā, ayameva vā pāṭho. ‘‘Sammajjani’’nti padaṃ ‘‘gahetvā’’ti pade avuttakammaṃ, ‘‘ṭhapetabbā’’ti pade vuttakammaṃ. Dhovitvāti sammajjaniṃ suddhaṃ katvā. Uposathāgārādīsūtiādisaddena pariveṇādīni gahetabbāni.
யோ பன பி⁴க்கு² க³ந்துகாமோ ஹோதி, தேனாதி யோஜனா. தத்தா²தி ஸாலாயங். யத்த² கத்த²சீதி யஸ்மிங் கிஸ்மிஞ்சி டா²னே. பாகதிகட்டா²னேதி பகதியா க³ஹிதட்டா²னே. தத்ர தத்ரேவாதி தேஸு தேஸு சேதியங்க³ணாதீ³ஸுயேவ . அஸனஸாலந்தி அஸந்தி ப⁴க்க²ந்தி அஸ்ஸங் ஸாலாயந்தி அஸனா, அஸனா ச ஸா ஸாலா சேதி அஸனஸாலா, போ⁴ஜனஸாலாதி அத்தோ². தத்ராதி தஸ்ஸ ஸம்மஜ்ஜந்தஸ்ஸ, தஸ்மிங் ‘‘வத்தங் ஜானிதப்³ப³’’ந்தி பாடே² வா. மஜ்ஜ²தோதி பவித்ததோ, ஸுத்³த⁴ட்டா²னதோதி அத்தோ². பாத³ட்டா²னாபி⁴முகா²தி ஸம்மஜ்ஜந்தஸ்ஸ பாத³ட்டா²னங் அபி⁴முகா². வாலிகா ஹரிதப்³பா³தி பங்ஸு ச வாலிகா ச அபனேதப்³பா³. ஸம்முஞ்சனீஸலாகாய பரங் பேல்லேதப்³பா³தி அதி⁴ப்பாயோ. ப³ஹீதி ஸம்மஜ்ஜிதப்³ப³தலதோ ப³ஹி.
Yo pana bhikkhu gantukāmo hoti, tenāti yojanā. Tatthāti sālāyaṃ. Yattha katthacīti yasmiṃ kismiñci ṭhāne. Pākatikaṭṭhāneti pakatiyā gahitaṭṭhāne. Tatra tatrevāti tesu tesu cetiyaṅgaṇādīsuyeva . Asanasālanti asanti bhakkhanti assaṃ sālāyanti asanā, asanā ca sā sālā ceti asanasālā, bhojanasālāti attho. Tatrāti tassa sammajjantassa, tasmiṃ ‘‘vattaṃ jānitabba’’nti pāṭhe vā. Majjhatoti pavittato, suddhaṭṭhānatoti attho. Pādaṭṭhānābhimukhāti sammajjantassa pādaṭṭhānaṃ abhimukhā. Vālikā haritabbāti paṃsu ca vālikā ca apanetabbā. Sammuñcanīsalākāya paraṃ pelletabbāti adhippāyo. Bahīti sammajjitabbatalato bahi.
111. மஸாரகோதீதி எத்த² இதிஸத்³தோ³ நாமபரியாயோ, மஸாரகோ நாமாதி அத்தோ². ஏவங் பு³ந்தி³காப³த்³தோ⁴தீதிஆதீ³ஸுபி. பாதே³ மஸித்வா விஜ்ஜி²த்வா தத்த² அடனியோ பவேஸேதப்³பா³ எத்தா²தி மஸாரகோ. பு³ந்தோ³ ஏவ பு³ந்தி³கோ, பாதோ³, தஸ்மிங் ஆப³த்³தா⁴ ப³ந்தி⁴தா அடனீ யஸ்ஸாதி பு³ந்தி³காப³த்³தோ⁴. குளீரஸ்ஸ பாதோ³ விய பாதோ³ யஸ்ஸாதி குளீரபாத³கோ, யதா² குளீரோ வங்கபாதோ³ ஹோதி, ஏவங் வங்கபாதோ³தி வுத்தங் ஹோதி. ஆஹச்ச அங்கே³ விஜ்ஜி²த்வா தத்த² பவேஸிதோ பாதோ³ யஸ்ஸாதி ஆஹச்சபாத³கோ. ஆணிந்தி அக்³க³கி²லங். மஞ்சதி புக்³க³லங் தா⁴ரேதீதி மஞ்சோ. பீட²தி விஸமது³க்க²ங் ஹிங்ஸதீதி பீட²ங். பணவோதி ஏகோ தூரியவிஸேஸோ, தஸ்ஸ ஸண்டா²னங் கத்வாதி அத்தோ². தஞ்ஹி ஏதரஹி பு³த்³த⁴படிமஸ்ஸ பல்லங்கஸண்டா²னங் ஹோதி. தந்தி கொச்ச²ங். கரொந்தி கிராதி ஸம்ப³ந்தோ⁴. எத்தா²தி ஸேனாஸனபரிபோ⁴கே³. ஹீதி ஸச்சங். தந்தி கொச்ச²ங் மஹக்³க⁴ங் ஹோதி, மஹக்³க⁴த்தா ப⁴த்³த³பீட²ந்திபி வுச்சதி. யேனாதி யேன பி⁴க்கு²னா. ‘‘தா²மமஜ்ஜி²மஸ்ஸா’’தி பதே³ன பமாணமஜ்ஜி²மங் நிவத்தேதி.
111.Masārakotīti ettha itisaddo nāmapariyāyo, masārako nāmāti attho. Evaṃ bundikābaddhotītiādīsupi. Pāde masitvā vijjhitvā tattha aṭaniyo pavesetabbā etthāti masārako. Bundo eva bundiko, pādo, tasmiṃ ābaddhā bandhitā aṭanī yassāti bundikābaddho. Kuḷīrassa pādo viya pādo yassāti kuḷīrapādako, yathā kuḷīro vaṅkapādo hoti, evaṃ vaṅkapādoti vuttaṃ hoti. Āhacca aṅge vijjhitvā tattha pavesito pādo yassāti āhaccapādako. Āṇinti aggakhilaṃ. Mañcati puggalaṃ dhāretīti mañco. Pīṭhati visamadukkhaṃ hiṃsatīti pīṭhaṃ. Paṇavoti eko tūriyaviseso, tassa saṇṭhānaṃ katvāti attho. Tañhi etarahi buddhapaṭimassa pallaṅkasaṇṭhānaṃ hoti. Tanti kocchaṃ. Karonti kirāti sambandho. Etthāti senāsanaparibhoge. Hīti saccaṃ. Tanti kocchaṃ mahagghaṃ hoti, mahagghattā bhaddapīṭhantipi vuccati. Yenāti yena bhikkhunā. ‘‘Thāmamajjhimassā’’ti padena pamāṇamajjhimaṃ nivatteti.
எத்தா²தி ‘‘அனாபுச்ச²ங் வா க³ச்செ²ய்யா’’தி பதே³. தே²ரோ ஆணாபேதீதி யோஜனா. ஆணாபேதீதி ச ஆண-தா⁴துயா ஏவ பேஸனஸங்கா²தஸ்ஸ ஹெத்வத்த²ஸ்ஸ வாசகத்தா ணாபேஸத்³தோ³ ஸ்வத்தோ²வ. ஸோதி த³ஹரோ. ததா²தி யதா² தே²ரேன வுத்தோ, ததா² கத்வாதி அத்தோ². தத்தா²தி தி³வாட்டா²னே, மஞ்சபீடே² வா. ததோதி ட²பனகாலதோ. பரிபு³ந்தே⁴தி ஹிங் ஸேதீதி பலிபோ³தோ⁴, பரிஸத்³தோ³ உபஸக்³கோ³, ஸோ விகாரவஸேன அஞ்ஞதா² ஜாதோ. ஸோ பலிபோ³தோ⁴ அஞ்ஞத்த² ஆவாஸாதி³கோ, இத⁴ பன ஸந்த²ராபிதமஞ்சாதி³கோ. ஸாயந்தி ஸாயன்ஹே, பு⁴ம்மத்தே² சேதங் உபயோக³வசனங். தே²ரோ ப⁴ணதீதி ஸம்ப³ந்தோ⁴. தத்தா²தி மஞ்சபீடே². ‘‘பா³லோ ஹோதீ’’தி வத்வா தஸ்ஸ அத்த²ங் த³ஸ்ஸெந்தோ ஆஹ ‘‘அனுக்³க³ஹிதவத்தோ’’தி. அனுக்³க³ஹிதங் வத்தங் யேனாதி அனுக்³க³ஹிதவத்தோ, தே²ரோ. தஜ்ஜேதீதி உப்³பே³ஜேதி. தஸ்மிந்தி த³ஹரே. அஸ்ஸாதி தே²ரஸ்ஸ.
Etthāti ‘‘anāpucchaṃ vā gaccheyyā’’ti pade. Thero āṇāpetīti yojanā. Āṇāpetīti ca āṇa-dhātuyā eva pesanasaṅkhātassa hetvatthassa vācakattā ṇāpesaddo svatthova. Soti daharo. Tathāti yathā therena vutto, tathā katvāti attho. Tatthāti divāṭṭhāne, mañcapīṭhe vā. Tatoti ṭhapanakālato. Paribundheti hiṃ setīti palibodho, parisaddo upasaggo, so vikāravasena aññathā jāto. So palibodho aññattha āvāsādiko, idha pana santharāpitamañcādiko. Sāyanti sāyanhe, bhummatthe cetaṃ upayogavacanaṃ. Thero bhaṇatīti sambandho. Tatthāti mañcapīṭhe. ‘‘Bālo hotī’’ti vatvā tassa atthaṃ dassento āha ‘‘anuggahitavatto’’ti. Anuggahitaṃ vattaṃ yenāti anuggahitavatto, thero. Tajjetīti ubbejeti. Tasminti dahare. Assāti therassa.
ஆணத்திக்க²ணேயேவாதி தே²ரஸ்ஸ பேஸனக்க²ணேயேவ. த³ஹரோ வத³தீதி யோஜனா. ‘‘தே²ரோ’’தி பத³ங் ‘‘வத்வா க³ச்ச²தீ’’தி பத³த்³வயே கத்தா, ‘‘காரேதப்³போ³’’தி பதே³ கம்மங். நந்தி மஞ்சபீட²ங், ‘‘பஞ்ஞபெத்வா’’திபத³மபெக்கி²ய ஏவங் வுத்தங். நந்தி த³ஹரங் வா. ‘‘வத்வா’’தி பத³மபெக்கி²ய ஏவங் வுத்தங். தத்தே²வாதி மஞ்சபீடே²யேவ. அஸ்ஸாதி தே²ரஸ்ஸ. தத்தா²தி தி³வாட்டா²னே. போ⁴ஜனஸாலதோ அஞ்ஞத்த² க³ச்ச²ந்தோதி போ⁴ஜனஸாலதோ நிக்க²மித்வா மஞ்சபீட²பஞ்ஞாபனட்டா²னதோ அஞ்ஞங் டா²னங் க³ச்ச²ந்தோ, தே²ரோதி யோஜனா. தத்தே²வாதி தி³வாட்டா²னேயேவ. யத்ரிச்ச²தீதி யங் டா²னங் க³ந்துமிச்ச²தீதி அத்தோ². அந்தரஸன்னிபாதேதி ஸகலங் அஹோரத்தங் அஸன்னிபாதெத்வா அந்தரே ஸன்னிபாதே ஸதீதி யோஜனா.
Āṇattikkhaṇeyevāti therassa pesanakkhaṇeyeva. Daharo vadatīti yojanā. ‘‘Thero’’ti padaṃ ‘‘vatvā gacchatī’’ti padadvaye kattā, ‘‘kāretabbo’’ti pade kammaṃ. Nanti mañcapīṭhaṃ, ‘‘paññapetvā’’tipadamapekkhiya evaṃ vuttaṃ. Nanti daharaṃ vā. ‘‘Vatvā’’ti padamapekkhiya evaṃ vuttaṃ. Tatthevāti mañcapīṭheyeva. Assāti therassa. Tatthāti divāṭṭhāne. Bhojanasālato aññattha gacchantoti bhojanasālato nikkhamitvā mañcapīṭhapaññāpanaṭṭhānato aññaṃ ṭhānaṃ gacchanto, theroti yojanā. Tatthevāti divāṭṭhāneyeva. Yatricchatīti yaṃ ṭhānaṃ gantumicchatīti attho. Antarasannipāteti sakalaṃ ahorattaṃ asannipātetvā antare sannipāte satīti yojanā.
தத்தா²தி தஸ்மிங் டா²னே. ஆக³ந்துகா க³ண்ஹந்தீதி ஸம்ப³ந்தோ⁴. ததோதி க³ண்ஹனதோ. தேஸந்தி ஆக³ந்துகானங் . யேஹீதி ஆவாஸிகோ வா ஹோது, ஆக³ந்துகோ வா, யேஹி பி⁴க்கூ²ஹி. தேதி நிஸின்னகபி⁴க்கூ². உத்³த⁴ங் பாளிபாட²ங் ஸாரேதி பவத்தேதீதி உஸ்ஸாரகோ. த⁴ம்மகதா²யங் ஸாதூ⁴தி த⁴ம்மகதி²கோ. தஸ்மிந்தி உஸ்ஸாரகே வா த⁴ம்மகதி²கே வா. அஹோரத்தந்தி அஹோ ச ரத்தி ச அஹோரத்தங், அச்சந்தஸங்யோக³பத³ங். இதரஸ்மிந்தி பட²மங் நிஸின்னபி⁴க்கு²தோ அஞ்ஞஸ்மிங் பி⁴க்கு²ம்ஹீதி யோஜனா. அந்தோஉபசாரட்டே²யேவாதி லெட்³டு³பாதஸங்கா²தஸ்ஸ உபசாரஸ்ஸ அந்தோ டி²தேயேவ, அனாத³ரே சேதங் பு⁴ம்மங். ஸப்³ப³த்தா²தி ஆபத்திவாரஅனாபத்திவாரேஸு.
Tatthāti tasmiṃ ṭhāne. Āgantukā gaṇhantīti sambandho. Tatoti gaṇhanato. Tesanti āgantukānaṃ . Yehīti āvāsiko vā hotu, āgantuko vā, yehi bhikkhūhi. Teti nisinnakabhikkhū. Uddhaṃ pāḷipāṭhaṃ sāreti pavattetīti ussārako. Dhammakathāyaṃ sādhūti dhammakathiko. Tasminti ussārake vā dhammakathike vā. Ahorattanti aho ca ratti ca ahorattaṃ, accantasaṃyogapadaṃ. Itarasminti paṭhamaṃ nisinnabhikkhuto aññasmiṃ bhikkhumhīti yojanā. Antoupacāraṭṭheyevāti leḍḍupātasaṅkhātassa upacārassa anto ṭhiteyeva, anādare cetaṃ bhummaṃ. Sabbatthāti āpattivāraanāpattivāresu.
112. சிமிலிகங் வாதிஆதீ³ஸு வினிச்ச²யோ ஏவங் வேதி³தப்³போ³தி யோஜனா. தந்தி சிமிலிகத்த²ரணங். உத்தரி அத்த²ரிதப்³ப³ந்தி உத்தரத்த²ரணந்தி த³ஸ்ஸெந்தோ ஆஹ ‘‘உத்தரத்த²ரணங் நாமா’’திஆதி³. பூ⁴மியந்தி ஸுதா⁴தி³பரிகம்மேன அகதாயங் பகதிபூ⁴மியங். சம்மக²ண்டோ³தி எத்த² சம்மங்யேவ அந்தே க²ண்ட³த்தா சி²ன்னத்தா சம்மக²ண்டோ³தி வுச்சதி. நனு ஸீஹசம்மாதீ³னி ந கப்பந்தீதி ஆஹ ‘‘அட்ட²கதா²ஸு ஹீ’’திஆதி³. ஹீதி ஸச்சங். தஸ்மாதி யஸ்மா ந தி³ஸ்ஸதி, தஸ்மா. பரிஹரணேயேவாதி அத்தனோ ஸந்தகந்தி பரிச்சி²ந்தி³த்வா, புக்³க³லிகந்தி வா பரிக்³க³ஹெத்வா தங் தங் டா²னங் ஹரணேயேவ. பாதோ³ புஞ்சீ²யதி ஸோதீ⁴யதி ஏதாயாதி பாத³புஞ்ச²னீதி கத்வா ரஜ்ஜுபிலோதிகாயோ பாத³புஞ்ச²னீதி வுச்சதீதி ஆஹ ‘‘பாத³புஞ்ச²னீ நாமா’’திஆதி³. மயஸத்³த³லோபங் கத்வா ப²லகபீட²ந்தி வுத்தந்தி ஆஹ ‘‘ப²லகபீட²ங் நாம ப²லகமயங் பீட²’’ந்தி. ப²லகஞ்ச பீட²ஞ்ச ப²லகபீட²ந்தி வா த³ஸ்ஸேதுங் வுத்தங் ‘‘அத² வா’’தி. ஏதேனாதி ‘‘ப²லகபீட²’’ந்தி பதே³ன. ‘‘ஸங்க³ஹித’’ந்தி பதே³ கரணங், கத்தா வா. பீ³ஜனிபத்தகந்தி சதுரஸ்ஸபீ³ஜனீயேவ ஸகுணபத்தஸதி³ஸத்தா பீ³ஜனிபத்தகங், ஸதி³ஸத்தே² கோ. ‘‘அஜ்ஜோ²காஸே’’தி பத³ங் ‘‘பசித்வா’’தி பதே³ ஆதா⁴ரோ. அக்³கி³ஸாலாயந்தி அக்³கி³னா பசனஸாலாயங். பப்³பா⁴ரேதி லேணஸதி³ஸே பப்³பா⁴ரே. யத்தா²தி யஸ்மிங் டா²னே.
112. Cimilikaṃ vātiādīsu vinicchayo evaṃ veditabboti yojanā. Tanti cimilikattharaṇaṃ. Uttari attharitabbanti uttarattharaṇanti dassento āha ‘‘uttarattharaṇaṃ nāmā’’tiādi. Bhūmiyanti sudhādiparikammena akatāyaṃ pakatibhūmiyaṃ. Cammakhaṇḍoti ettha cammaṃyeva ante khaṇḍattā chinnattā cammakhaṇḍoti vuccati. Nanu sīhacammādīni na kappantīti āha ‘‘aṭṭhakathāsu hī’’tiādi. Hīti saccaṃ. Tasmāti yasmā na dissati, tasmā. Pariharaṇeyevāti attano santakanti paricchinditvā, puggalikanti vā pariggahetvā taṃ taṃ ṭhānaṃ haraṇeyeva. Pādo puñchīyati sodhīyati etāyāti pādapuñchanīti katvā rajjupilotikāyo pādapuñchanīti vuccatīti āha ‘‘pādapuñchanī nāmā’’tiādi. Mayasaddalopaṃ katvā phalakapīṭhanti vuttanti āha ‘‘phalakapīṭhaṃ nāma phalakamayaṃ pīṭha’’nti. Phalakañca pīṭhañca phalakapīṭhanti vā dassetuṃ vuttaṃ ‘‘atha vā’’ti. Etenāti ‘‘phalakapīṭha’’nti padena. ‘‘Saṅgahita’’nti pade karaṇaṃ, kattā vā. Bījanipattakanti caturassabījanīyeva sakuṇapattasadisattā bījanipattakaṃ, sadisatthe ko. ‘‘Ajjhokāse’’ti padaṃ ‘‘pacitvā’’ti pade ādhāro. Aggisālāyanti agginā pacanasālāyaṃ. Pabbhāreti leṇasadise pabbhāre. Yatthāti yasmiṃ ṭhāne.
யஸ்மிந்தி புக்³க³லே. ‘‘அத்தனோ புக்³க³லிகமிவ ஹோதீ’’தி இமினா அனாபத்தீதி த³ஸ்ஸேதி.
Yasminti puggale. ‘‘Attano puggalikamiva hotī’’ti iminā anāpattīti dasseti.
113. யோ பி⁴க்கு² வா லஜ்ஜீ ஹோதி, ததா²ரூபங் பி⁴க்கு²ங் வா தி யோஜனா. ‘‘லஜ்ஜீ ஹோதீ’’தி வத்வா தஸ்ஸ அத்த²ங் த³ஸ்ஸெந்தோ ஆஹ ‘‘அத்தனோ பலிபோ³த⁴ங் விய மஞ்ஞதீ’’தி. யோதி ஆபுச்ச²கோ பி⁴க்கு². ‘‘கேனசி உபத்³து³தங் ஹோதீ’’தி ஸங்கே²பேன வுத்தமத்த²ங் வித்தா²ரெந்தோ ஆஹ ‘‘ஸசேபி ஹீ’’திஆதி³. ஹிஸத்³தோ³ வித்தா²ரஜோதகோ. வுட்³ட⁴தரோ பி⁴க்கு² க³ண்ஹாதீதி ஸம்ப³ந்தோ⁴. தங் பதே³ஸந்தி ஸேனாஸனட்ட²பிதட்டா²னங். ஆபதா³ஸூதி விபத்தீஸூதி. சதுத்த²ங்.
113. Yo bhikkhu vā lajjī hoti, tathārūpaṃ bhikkhuṃ vā ti yojanā. ‘‘Lajjī hotī’’ti vatvā tassa atthaṃ dassento āha ‘‘attano palibodhaṃ viya maññatī’’ti. Yoti āpucchako bhikkhu. ‘‘Kenaci upaddutaṃ hotī’’ti saṅkhepena vuttamatthaṃ vitthārento āha ‘‘sacepi hī’’tiādi. Hisaddo vitthārajotako. Vuḍḍhataro bhikkhu gaṇhātīti sambandho. Taṃ padesanti senāsanaṭṭhapitaṭṭhānaṃ. Āpadāsūti vipattīsūti. Catutthaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. பட²மஸேனாஸனஸிக்கா²பத³வண்ணனா • 4. Paṭhamasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. பட²மஸேனாஸனஸிக்கா²பத³வண்ணனா • 4. Paṭhamasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. பட²மஸேனாஸனஸிக்கா²பத³வண்ணனா • 4. Paṭhamasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. பட²மஸேனாஸனஸிக்கா²பத³வண்ணனா • 4. Paṭhamasenāsanasikkhāpadavaṇṇanā
