| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
4. பட²மஸேனாஸனஸிக்கா²பத³வண்ணனா
4. Paṭhamasenāsanasikkhāpadavaṇṇanā
108. சதுத்த²ஸிக்கா²பதே³ – ஹேமந்திகே காலேதி ஹேமந்தகாலே ஹிமபாதஸமயே. காயங் ஓதாபெந்தாதி மஞ்சபீடா²தீ³ஸு நிஸின்னா பா³லாதபேன காயங் ஓதாபெந்தா. காலே ஆரோசிதேதி யாகு³ப⁴த்தாதீ³ஸு யஸ்ஸ கஸ்ஸசி காலே ஆரோசிதே. ஓவட்ட²ங் ஹோதீதி ஹிமவஸ்ஸேன ஓவட்ட²ங் திந்தங் ஹோதி.
108. Catutthasikkhāpade – hemantike kāleti hemantakāle himapātasamaye. Kāyaṃ otāpentāti mañcapīṭhādīsu nisinnā bālātapena kāyaṃ otāpentā. Kāle ārociteti yāgubhattādīsu yassa kassaci kāle ārocite. Ovaṭṭhaṃ hotīti himavassena ovaṭṭhaṃ tintaṃ hoti.
110. அவஸ்ஸிகஸங்கேதேதி வஸ்ஸிகவஸ்ஸானமாஸாதி ஏவங் அபஞ்ஞத்தே சத்தாரோ ஹேமந்திகே சத்தாரோ ச கி³ம்ஹிகே அட்ட² மாஸேதி அத்தோ². மண்ட³பே வாதி ஸாகா²மண்ட³பே வா பத³ரமண்ட³பே வா. ருக்க²மூலே வாதி யஸ்ஸ கஸ்ஸசி ருக்க²ஸ்ஸ ஹெட்டா². யத்த² காகா வா குலலா வா ந ஊஹத³ந்தீதி யத்த² து⁴வனிவாஸேன குலாவகே கத்வா வஸமானா ஏதே காககுலலா வா அஞ்ஞே வா ஸகுந்தா தங் ஸேனாஸனங் ந ஊஹத³ந்தி, தாதி³ஸே ருக்க²மூலே நிக்கி²பிதுங் அனுஜானாமீதி. தஸ்மா யத்த² கோ³சரப்பஸுதா ஸகுந்தா விஸ்ஸமித்வா க³ச்ச²ந்தி, தஸ்ஸ ருக்க²ஸ்ஸ மூலே நிக்கி²பிதுங் வட்டதி. யஸ்மிங் பன து⁴வனிவாஸேன குலாவகே கத்வா வஸந்தி, தஸ்ஸ ருக்க²ஸ்ஸ மூலே ந நிக்கி²பிதப்³ப³ங். ‘‘அட்ட² மாஸே’’தி வசனதோ யேஸு ஜனபதே³ஸு வஸ்ஸகாலே ந வஸ்ஸதி, தேஸுபி சத்தாரோ மாஸே நிக்கி²பிதுங் ந வட்டதியேவ. ‘‘அவஸ்ஸிகஸங்கேதே’’தி வசனதோ யத்த² ஹேமந்தே தே³வோ வஸ்ஸதி, தத்த² ஹேமந்தேபி அஜ்ஜோ²காஸே நிக்கி²பிதுங் ந வட்டதி. கி³ம்ஹே பன ஸப்³ப³த்த² விக³தவலாஹகங் விஸுத்³த⁴ங் நப⁴ங் ஹோதி, ஏவரூபே காலே கேனசிதே³வ கரணீயேன அஜ்ஜோ²காஸே மஞ்சபீட²ங் நிக்கி²பிதுங் வட்டதி.
110.Avassikasaṅketeti vassikavassānamāsāti evaṃ apaññatte cattāro hemantike cattāro ca gimhike aṭṭha māseti attho. Maṇḍape vāti sākhāmaṇḍape vā padaramaṇḍape vā. Rukkhamūle vāti yassa kassaci rukkhassa heṭṭhā. Yattha kākā vā kulalā vā na ūhadantīti yattha dhuvanivāsena kulāvake katvā vasamānā ete kākakulalā vā aññe vā sakuntā taṃ senāsanaṃ na ūhadanti, tādise rukkhamūle nikkhipituṃ anujānāmīti. Tasmā yattha gocarappasutā sakuntā vissamitvā gacchanti, tassa rukkhassa mūle nikkhipituṃ vaṭṭati. Yasmiṃ pana dhuvanivāsena kulāvake katvā vasanti, tassa rukkhassa mūle na nikkhipitabbaṃ. ‘‘Aṭṭha māse’’ti vacanato yesu janapadesu vassakāle na vassati, tesupi cattāro māse nikkhipituṃ na vaṭṭatiyeva. ‘‘Avassikasaṅkete’’ti vacanato yattha hemante devo vassati, tattha hemantepi ajjhokāse nikkhipituṃ na vaṭṭati. Gimhe pana sabbattha vigatavalāhakaṃ visuddhaṃ nabhaṃ hoti, evarūpe kāle kenacideva karaṇīyena ajjhokāse mañcapīṭhaṃ nikkhipituṃ vaṭṭati.
அப்³போ⁴காஸிகேனாபி வத்தங் ஜானிதப்³ப³ங், தஸ்ஸ ஹி ஸசே புக்³க³லிகமஞ்சகோ அத்தி², தத்தே²வ ஸயிதப்³ப³ங். ஸங்கி⁴கங் க³ண்ஹந்தேன வெத்தேன வா வாகேன வா வீதமஞ்சகோ க³ஹேதப்³போ³. தஸ்மிங் அஸதி புராணமஞ்சகோ க³ஹேதப்³போ³. தஸ்மிம்பி அஸதி நவவாயிமோ வா ஓனத்³த⁴கோ வா க³ஹேதப்³போ³. க³ஹெத்வா ச பன ‘‘அஹங் உக்கட்ட²ருக்க²மூலிகோ உக்கட்ட²அப்³போ⁴காஸிகோ’’தி சீவரகுடிம்பி அகத்வா அஸமயே அஜ்ஜோ²காஸே ருக்க²மூலே வா பஞ்ஞபெத்வா நிபஜ்ஜிதுங் ந வட்டதி. ஸசே பன சதுக்³கு³ணேனபி சீவரேன கதகுடி அதேமெந்தங் ரக்கி²துங் ந ஸக்கோதி, ஸத்தாஹவத்³த³லிகாதீ³னி ப⁴வந்தி, பி⁴க்கு²னோ காயானுக³திகத்தா வட்டதி.
Abbhokāsikenāpi vattaṃ jānitabbaṃ, tassa hi sace puggalikamañcako atthi, tattheva sayitabbaṃ. Saṅghikaṃ gaṇhantena vettena vā vākena vā vītamañcako gahetabbo. Tasmiṃ asati purāṇamañcako gahetabbo. Tasmimpi asati navavāyimo vā onaddhako vā gahetabbo. Gahetvā ca pana ‘‘ahaṃ ukkaṭṭharukkhamūliko ukkaṭṭhaabbhokāsiko’’ti cīvarakuṭimpi akatvā asamaye ajjhokāse rukkhamūle vā paññapetvā nipajjituṃ na vaṭṭati. Sace pana catugguṇenapi cīvarena katakuṭi atementaṃ rakkhituṃ na sakkoti, sattāhavaddalikādīni bhavanti, bhikkhuno kāyānugatikattā vaṭṭati.
அரஞ்ஞே பண்ணகுடீஸு வஸந்தானங் ஸீலஸம்பதா³ய பஸன்னசித்தா மனுஸ்ஸா நவங் மஞ்சபீட²ங் தெ³ந்தி ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி வஸித்வா க³ச்ச²ந்தேஹி ஸாமந்தவிஹாரே ஸபா⁴க³பி⁴க்கூ²னங் பேஸெத்வா க³ந்தப்³ப³ங், ஸபா⁴கா³னங் அபா⁴வே அனோவஸ்ஸகே நிக்கி²பித்வா க³ந்தப்³ப³ங், அனோவஸ்ஸகே அஸதி ருக்கே² லக்³கெ³த்வா க³ந்தப்³ப³ங். சேதியங்க³ணே ஸம்மஜ்ஜனிங் க³ஹெத்வா போ⁴ஜனஸாலங்க³ணங் வா உபோஸதா²கா³ரங்க³ணங் வா பரிவேணதி³வாட்டா²னஅக்³கி³ஸாலாதீ³ஸு வா அஞ்ஞதரங் ஸம்மஜ்ஜித்வா தோ⁴வித்வா புன ஸம்மஜ்ஜனீமாளகேயேவ ட²பேதப்³பா³. உபோஸதா²கா³ராதீ³ஸு அஞ்ஞதரஸ்மிங் க³ஹெத்வா அவஸேஸானி ஸம்மஜ்ஜந்தஸ்ஸாபி ஏஸேவ நயோ.
Araññe paṇṇakuṭīsu vasantānaṃ sīlasampadāya pasannacittā manussā navaṃ mañcapīṭhaṃ denti ‘‘saṅghikaparibhogena paribhuñjathā’’ti vasitvā gacchantehi sāmantavihāre sabhāgabhikkhūnaṃ pesetvā gantabbaṃ, sabhāgānaṃ abhāve anovassake nikkhipitvā gantabbaṃ, anovassake asati rukkhe laggetvā gantabbaṃ. Cetiyaṅgaṇe sammajjaniṃ gahetvā bhojanasālaṅgaṇaṃ vā uposathāgāraṅgaṇaṃ vā pariveṇadivāṭṭhānaaggisālādīsu vā aññataraṃ sammajjitvā dhovitvā puna sammajjanīmāḷakeyeva ṭhapetabbā. Uposathāgārādīsu aññatarasmiṃ gahetvā avasesāni sammajjantassāpi eseva nayo.
யோ பன பி⁴க்கா²சாரமக்³க³ங் ஸம்மஜ்ஜந்தோவ க³ந்துகாமோ ஹோதி, தேன ஸம்மஜ்ஜித்வா ஸசே அந்தராமக்³கே³ ஸாலா அத்தி², தத்த² ட²பேதப்³பா³. ஸசே நத்தி², வலாஹகானங் அனுட்டி²தபா⁴வங் ஸல்லக்கெ²த்வா ‘‘யாவாஹங் கா³மதோ நிக்க²மாமி, தாவ ந வஸ்ஸிஸ்ஸதீ’’தி ஜானந்தேன யத்த² கத்த²சி நிக்கி²பித்வா புன பச்சாக³ச்ச²ந்தேன பாகதிகட்டா²னே ட²பேதப்³பா³. ஸசே வஸ்ஸிஸ்ஸதீதி ஜானந்தோ அஜ்ஜோ²காஸே ட²பேதி, து³க்கடந்தி மஹாபச்சரியங் வுத்தங். ஸசே பன தத்ர தத்ரேவ ஸம்மஜ்ஜனத்தா²ய ஸம்மஜ்ஜனீ நிக்கி²த்தா ஹோதி, தங் தங் டா²னங் ஸம்மஜ்ஜித்வா தத்ர தத்ரேவ நிக்கி²பிதுங் வட்டதி. ஆஸனஸாலங் ஸம்மஜ்ஜந்தேன வத்தங் ஜானிதப்³ப³ங். தத்ரித³ங் வத்தங் – மஜ்ஜ²தோ பட்டா²ய பாத³ட்டா²னாபி⁴முகா² வாலிகா ஹரிதப்³பா³. கசவரங் ஹத்தே²ஹி க³ஹெத்வா ப³ஹி ச²ட்³டே³தப்³ப³ங்.
Yo pana bhikkhācāramaggaṃ sammajjantova gantukāmo hoti, tena sammajjitvā sace antarāmagge sālā atthi, tattha ṭhapetabbā. Sace natthi, valāhakānaṃ anuṭṭhitabhāvaṃ sallakkhetvā ‘‘yāvāhaṃ gāmato nikkhamāmi, tāva na vassissatī’’ti jānantena yattha katthaci nikkhipitvā puna paccāgacchantena pākatikaṭṭhāne ṭhapetabbā. Sace vassissatīti jānanto ajjhokāse ṭhapeti, dukkaṭanti mahāpaccariyaṃ vuttaṃ. Sace pana tatra tatreva sammajjanatthāya sammajjanī nikkhittā hoti, taṃ taṃ ṭhānaṃ sammajjitvā tatra tatreva nikkhipituṃ vaṭṭati. Āsanasālaṃ sammajjantena vattaṃ jānitabbaṃ. Tatridaṃ vattaṃ – majjhato paṭṭhāya pādaṭṭhānābhimukhā vālikā haritabbā. Kacavaraṃ hatthehi gahetvā bahi chaḍḍetabbaṃ.
111. மஸாரகோதி மஞ்சபாதே³ விஜ்ஜி²த்வா தத்த² அடனியோ பவேஸெத்வா கதோ. பு³ந்தி³காப³த்³தோ⁴தி அடனீஹி மஞ்சபாதே³ ட³ங்ஸாபெத்வா பல்லங்கஸங்கே²பேன கதோ. குளீரபாத³கோதி அஸ்ஸமெண்ட³காதீ³னங் பாத³ஸதி³ஸேஹி பாதே³ஹி கதோ. யோ வா பன கோசி வங்கபாத³கோ, அயங் வுச்சதி குளீரபாத³கோ. ஆஹச்சபாத³கோதி அயங் பன ‘‘ஆஹச்சபாத³கோ நாம மஞ்சோ அங்கே³ விஜ்ஜி²த்வா கதோ ஹோதீ’’தி ஏவங் பரதோ பாளியங்யேவ வுத்தோ, தஸ்மா அடனியோ விஜ்ஜி²த்வா தத்த² பாத³ஸிக²ங் பவேஸெத்வா உபரி ஆணிங் த³த்வா கதமஞ்சோ ‘‘ஆஹச்சபாத³கோ’’தி வேதி³தப்³போ³. பீடே²பி ஏஸேவ நயோ. அந்தோ ஸங்வேடெ²த்வா ப³த்³த⁴ங் ஹோதீதி ஹெட்டா² ச உபரி ச வித்த²தங் மஜ்ஜே² ஸங்கி²த்தங் பணவஸண்டா²னங் கத்வா ப³த்³த⁴ங் ஹோதி, தங் கிர மஜ்ஜே² ஸீஹப்³யக்³க⁴சம்மபரிக்கி²த்தம்பி கரொந்தி. அகப்பியசம்மங் நாமெத்த² நத்தி². ஸேனாஸனஞ்ஹி ஸோவண்ணமயம்பி வட்டதி, தஸ்மா தங் மஹக்³க⁴ங் ஹோதி. அனுபஸம்பன்னங் ஸந்த²ராபேதி தஸ்ஸ பலிபோ³தோ⁴தி யேன ஸந்த²ராபிதங், தஸ்ஸ பலிபோ³தோ⁴. லெட்³டு³பாதங் அதிக்கமந்தஸ்ஸ ஆபத்தி பாசித்தியஸ்ஸாதி தா²மமஜ்ஜி²மஸ்ஸ புரிஸஸ்ஸ லெட்³டு³பாதங் அதிக்கமந்தஸ்ஸ பாசித்தியங்.
111.Masārakoti mañcapāde vijjhitvā tattha aṭaniyo pavesetvā kato. Bundikābaddhoti aṭanīhi mañcapāde ḍaṃsāpetvā pallaṅkasaṅkhepena kato. Kuḷīrapādakoti assameṇḍakādīnaṃ pādasadisehi pādehi kato. Yo vā pana koci vaṅkapādako, ayaṃ vuccati kuḷīrapādako. Āhaccapādakoti ayaṃ pana ‘‘āhaccapādako nāma mañco aṅge vijjhitvā kato hotī’’ti evaṃ parato pāḷiyaṃyeva vutto, tasmā aṭaniyo vijjhitvā tattha pādasikhaṃ pavesetvā upari āṇiṃ datvā katamañco ‘‘āhaccapādako’’ti veditabbo. Pīṭhepi eseva nayo. Anto saṃveṭhetvā baddhaṃ hotīti heṭṭhā ca upari ca vitthataṃ majjhe saṅkhittaṃ paṇavasaṇṭhānaṃ katvā baddhaṃ hoti, taṃ kira majjhe sīhabyagghacammaparikkhittampi karonti. Akappiyacammaṃ nāmettha natthi. Senāsanañhi sovaṇṇamayampi vaṭṭati, tasmā taṃ mahagghaṃ hoti. Anupasampannaṃ santharāpeti tassa palibodhoti yena santharāpitaṃ, tassa palibodho. Leḍḍupātaṃ atikkamantassa āpatti pācittiyassāti thāmamajjhimassa purisassa leḍḍupātaṃ atikkamantassa pācittiyaṃ.
அயங் பனெத்த² வினிச்ச²யோ – தே²ரோ போ⁴ஜனஸாலாயங் ப⁴த்தகிச்சங் கத்வா த³ஹரங் ஆணாபேதி ‘‘க³ச்ச² தி³வாட்டா²னே மஞ்சபீட²ங் பஞ்ஞபேஹீ’’தி. ஸோ ததா² கத்வா நிஸின்னோ. தே²ரோ யதா²ருசிங் விசரித்வா தத்த² க³ந்த்வா த²விகங் வா உத்தராஸங்க³ங் வா ட²பேதி, ததோ பட்டா²ய தே²ரஸ்ஸ பலிபோ³தோ⁴. நிஸீதி³த்வா ஸயங் க³ச்ச²ந்தோ நேவ உத்³த⁴ரதி, ந உத்³த⁴ராபேதி, லெட்³டு³பாதாதிக்கமே பாசித்தியங். ஸசே பன தே²ரோ தத்த² த²விகங் வா உத்தராஸங்க³ங் வா அட்ட²பெத்வா சங்கமந்தோவ த³ஹரங் ‘‘க³ச்ச² த்வ’’ந்தி ப⁴ணதி, தேன ‘‘இத³ங் ப⁴ந்தே மஞ்சபீட²’’ந்தி ஆசிக்கி²தப்³ப³ங். ஸசே தே²ரோ வத்தங் ஜானாதி ‘‘த்வங் க³ச்ச², அஹங் பாகதிகங் கரிஸ்ஸாமீ’’தி வத்தப்³ப³ங். ஸசே பா³லோ ஹோதி அனுக்³க³ஹிதவத்தோ ‘‘க³ச்ச², மா இத⁴ திட்ட², நேவ நிஸீதி³துங் ந நிபஜ்ஜிதுங் தே³மீ’’தி த³ஹரங் தஜ்ஜேதியேவ. த³ஹரேன ‘‘ப⁴ந்தே ஸுக²ங் ஸயதா²’’தி கப்பங் லபி⁴த்வா வந்தி³த்வா க³ந்தப்³ப³ங். தஸ்மிங் க³தே தே²ரஸ்ஸேவ பலிபோ³தோ⁴. புரிமனயேனேவ சஸ்ஸ ஆபத்தி வேதி³தப்³பா³.
Ayaṃ panettha vinicchayo – thero bhojanasālāyaṃ bhattakiccaṃ katvā daharaṃ āṇāpeti ‘‘gaccha divāṭṭhāne mañcapīṭhaṃ paññapehī’’ti. So tathā katvā nisinno. Thero yathāruciṃ vicaritvā tattha gantvā thavikaṃ vā uttarāsaṅgaṃ vā ṭhapeti, tato paṭṭhāya therassa palibodho. Nisīditvā sayaṃ gacchanto neva uddharati, na uddharāpeti, leḍḍupātātikkame pācittiyaṃ. Sace pana thero tattha thavikaṃ vā uttarāsaṅgaṃ vā aṭṭhapetvā caṅkamantova daharaṃ ‘‘gaccha tva’’nti bhaṇati, tena ‘‘idaṃ bhante mañcapīṭha’’nti ācikkhitabbaṃ. Sace thero vattaṃ jānāti ‘‘tvaṃ gaccha, ahaṃ pākatikaṃ karissāmī’’ti vattabbaṃ. Sace bālo hoti anuggahitavatto ‘‘gaccha, mā idha tiṭṭha, neva nisīdituṃ na nipajjituṃ demī’’ti daharaṃ tajjetiyeva. Daharena ‘‘bhante sukhaṃ sayathā’’ti kappaṃ labhitvā vanditvā gantabbaṃ. Tasmiṃ gate therasseva palibodho. Purimanayeneva cassa āpatti veditabbā.
அத² பன ஆணத்திக்க²ணேயேவ த³ஹரோ ‘‘மய்ஹங் ப⁴ந்தே ப⁴ண்ட³கதோ⁴வனாதி³ கிஞ்சி கரணீயங் அத்தீ²’’தி வத³தி, தே²ரோ ச நங் ‘‘த்வங் பஞ்ஞபெத்வா க³ச்சா²ஹீ’’தி வத்வா போ⁴ஜனஸாலதோ நிக்க²மித்வா அஞ்ஞத்த² க³ச்ச²தி, பாது³த்³தா⁴ரேன காரேதப்³போ³. ஸசே தத்தே²வ க³ந்த்வா நிஸீத³தி புரிமனயேனேவ சஸ்ஸ லெட்³டு³பாதாதிக்கமே ஆபத்தி. ஸசே பன தே²ரோ ஸாமணேரங் ஆணாபேதி , ஸாமணேரே தத்த² மஞ்சபீட²ங் பஞ்ஞபெத்வா நிஸின்னேபி போ⁴ஜனஸாலதோ அஞ்ஞத்த² க³ச்ச²ந்தோ பாது³த்³தா⁴ரேன காரேதப்³போ³. க³ந்த்வா நிஸின்னோ புன க³மனகாலே லெட்³டு³பாதாதிக்கமே ஆபத்தியா காரேதப்³போ³. ஸசே பன ஆணாபெந்தோ மஞ்சபீட²ங் பஞ்ஞபெத்வா தத்தே²வ நிஸீதா³தி ஆணாபேதி, யத்ரிச்ச²தி தத்ர க³ந்த்வா ஆக³ந்துங் லப⁴தி. ஸயங் பன பாகதிகங் அகத்வா க³ச்ச²ந்தஸ்ஸ லெட்³டு³பாதாதிக்கமே பாசித்தியங். அந்தரஸன்னிபாதே மஞ்சபீடா²னி பஞ்ஞபெத்வா நிஸின்னேஹி க³மனகாலே ஆராமிகானங் இமங் படிஸாமேதா²தி வத்தப்³ப³ங், அவத்வா க³ச்ச²ந்தானங் லெட்³டு³பாதாதிக்கமே ஆபத்தி.
Atha pana āṇattikkhaṇeyeva daharo ‘‘mayhaṃ bhante bhaṇḍakadhovanādi kiñci karaṇīyaṃ atthī’’ti vadati, thero ca naṃ ‘‘tvaṃ paññapetvā gacchāhī’’ti vatvā bhojanasālato nikkhamitvā aññattha gacchati, pāduddhārena kāretabbo. Sace tattheva gantvā nisīdati purimanayeneva cassa leḍḍupātātikkame āpatti. Sace pana thero sāmaṇeraṃ āṇāpeti , sāmaṇere tattha mañcapīṭhaṃ paññapetvā nisinnepi bhojanasālato aññattha gacchanto pāduddhārena kāretabbo. Gantvā nisinno puna gamanakāle leḍḍupātātikkame āpattiyā kāretabbo. Sace pana āṇāpento mañcapīṭhaṃ paññapetvā tattheva nisīdāti āṇāpeti, yatricchati tatra gantvā āgantuṃ labhati. Sayaṃ pana pākatikaṃ akatvā gacchantassa leḍḍupātātikkame pācittiyaṃ. Antarasannipāte mañcapīṭhāni paññapetvā nisinnehi gamanakāle ārāmikānaṃ imaṃ paṭisāmethāti vattabbaṃ, avatvā gacchantānaṃ leḍḍupātātikkame āpatti.
மஹாத⁴ம்மஸவனங் நாம ஹோதி தத்த² உபோஸதா²கா³ரதோபி போ⁴ஜனஸாலதோபி ஆஹரித்வா மஞ்சபீடா²னி பஞ்ஞபெந்தி. ஆவாஸிகானங்யேவ பலிபோ³தோ⁴. ஸசே ஆக³ந்துகா ‘‘இத³ங் அம்ஹாகங் உபஜ்ஜா²யஸ்ஸ இத³ங் ஆசரியஸ்ஸா’’தி க³ண்ஹந்தி, ததோ பட்டா²ய தேஸங்யேவ பலிபோ³தோ⁴. க³மனகாலே பாகதிகங் அகத்வா லெட்³டு³பாதங் அதிக்கமந்தானங் ஆபத்தி. மஹாபச்சரியங் புன வுத்தங் – ‘‘யாவ அஞ்ஞே ந நிஸீத³ந்தி, தாவ யேஹி பஞ்ஞத்தங், தேஸங் பா⁴ரோ. அஞ்ஞேஸு ஆக³ந்த்வா நிஸின்னேஸு நிஸின்னகானங் பா⁴ரோ. ஸசே தே அனுத்³த⁴ரித்வா வா அனுத்³த⁴ராபெத்வா வா க³ச்ச²ந்தி, து³க்கடங். கஸ்மா? அனாணத்தியா பஞ்ஞபிதத்தா’’தி. த⁴ம்மாஸனே பஞ்ஞத்தே யாவ உஸ்ஸாரகோ வா த⁴ம்மகதி²கோ வா நாக³ச்ச²தி, தாவ பஞ்ஞாபகானங் பலிபோ³தோ⁴, தஸ்மிங் ஆக³ந்த்வா நிஸின்னே தஸ்ஸ பலிபோ³தோ⁴. ஸகலங் அஹோரத்தங் த⁴ம்மஸவனங் ஹோதி, அஞ்ஞோ உஸ்ஸாரகோ வா த⁴ம்மகதி²கோ வா உட்ட²ஹதி, அஞ்ஞோ நிஸீத³தி, யோ யோ ஆக³ந்த்வா நிஸீத³தி, தஸ்ஸ தஸ்ஸ பா⁴ரோ. உட்ட²ஹந்தேன பன ‘‘இத³மாஸனங் தும்ஹாகங் பா⁴ரோ’’தி வத்வா க³ந்தப்³ப³ங். ஸசேபி இதரஸ்மிங் அனாக³தேயேவ பட²மங் நிஸின்னோ உட்டா²ய க³ச்ச²தி, தஸ்மிஞ்ச அந்தோஉபசாரட்டே²யேவ இதரோ ஆக³ந்த்வா நிஸீத³தி, உட்டா²ய க³தோ ஆபத்தியா ந காரேதப்³போ³. ஸசே பன இதரஸ்மிங் அனாக³தேயேவ பட²மங் நிஸின்னோ உட்டா²யாஸனா லெட்³டு³பாதங் அதிக்கமதி, ஆபத்தியா காரேதப்³போ³. ஸப்³ப³த்த² ச ‘‘லெட்³டு³பாதாதிக்கமே பட²மபாதே³ து³க்கடங், து³தியே பாசித்திய’’ந்தி அயங் நயோ மஹாபச்சரியங் வுத்தோ.
Mahādhammasavanaṃ nāma hoti tattha uposathāgāratopi bhojanasālatopi āharitvā mañcapīṭhāni paññapenti. Āvāsikānaṃyeva palibodho. Sace āgantukā ‘‘idaṃ amhākaṃ upajjhāyassa idaṃ ācariyassā’’ti gaṇhanti, tato paṭṭhāya tesaṃyeva palibodho. Gamanakāle pākatikaṃ akatvā leḍḍupātaṃ atikkamantānaṃ āpatti. Mahāpaccariyaṃ puna vuttaṃ – ‘‘yāva aññe na nisīdanti, tāva yehi paññattaṃ, tesaṃ bhāro. Aññesu āgantvā nisinnesu nisinnakānaṃ bhāro. Sace te anuddharitvā vā anuddharāpetvā vā gacchanti, dukkaṭaṃ. Kasmā? Anāṇattiyā paññapitattā’’ti. Dhammāsane paññatte yāva ussārako vā dhammakathiko vā nāgacchati, tāva paññāpakānaṃ palibodho, tasmiṃ āgantvā nisinne tassa palibodho. Sakalaṃ ahorattaṃ dhammasavanaṃ hoti, añño ussārako vā dhammakathiko vā uṭṭhahati, añño nisīdati, yo yo āgantvā nisīdati, tassa tassa bhāro. Uṭṭhahantena pana ‘‘idamāsanaṃ tumhākaṃ bhāro’’ti vatvā gantabbaṃ. Sacepi itarasmiṃ anāgateyeva paṭhamaṃ nisinno uṭṭhāya gacchati, tasmiñca antoupacāraṭṭheyeva itaro āgantvā nisīdati, uṭṭhāya gato āpattiyā na kāretabbo. Sace pana itarasmiṃ anāgateyeva paṭhamaṃ nisinno uṭṭhāyāsanā leḍḍupātaṃ atikkamati, āpattiyā kāretabbo. Sabbattha ca ‘‘leḍḍupātātikkame paṭhamapāde dukkaṭaṃ, dutiye pācittiya’’nti ayaṃ nayo mahāpaccariyaṃ vutto.
112. சிமிலிகங் வாதிஆதீ³ஸு சிமிலிகா நாம ஸுதா⁴தி³பரிகம்மகதாய பூ⁴மியா வண்ணானுரக்க²ணத்த²ங் கதா ஹோதி , தங் ஹெட்டா² பத்த²ரித்வா உபரி கடஸாரகங் பத்த²ரந்தி. உத்தரத்த²ரணங் நாம மஞ்சபீடா²னங் உபரி அத்த²ரிதப்³ப³கங் பச்சத்த²ரணங். பூ⁴மத்த²ரணங் நாம பூ⁴மியங் அத்த²ரிதப்³பா³ கடஸாரகாதி³விகதி. தட்டிகங் நாம தாலபண்ணேஹி வா வாகேஹி வா கததட்டிகா. சம்மக²ண்டோ³ நாம ஸீஹப்³யக்³க⁴தீ³பிதரச்ச²சம்மாதீ³ஸுபி யங்கிஞ்சி சம்மங். அட்ட²கதா²ஸு ஹி ஸேனாஸனபரிபோ⁴கே³ படிக்கி²த்தசம்மங் நாம ந தி³ஸ்ஸதி, தஸ்மா ஸீஹசம்மாதீ³னங் பரிஹரணேயேவ படிக்கே²போ வேதி³தப்³போ³. பாத³புஞ்ச²னீ நாம ரஜ்ஜுகேஹி வா பிலோதிகாஹி வா பாத³புஞ்ச²னத்த²ங் கதா. ப²லகபீட²ங் நாம ப²லகமயங் பீட²ங். அத² வா ப²லகஞ்சேவ தா³ருமயபீட²ஞ்ச; ஏதேன ஸப்³ப³ம்பி தா³ருப⁴ண்டா³தி³ ஸங்க³ஹிதங். மஹாபச்சரியங் பன வித்தா²ரேனேவ வுத்தங் – ‘‘ஆதா⁴ரகங் பத்தபிதா⁴னங் பாத³கத²லிகங் தாலவண்டங் பீ³ஜனீபத்தகங் யங்கிஞ்சி தா³ருப⁴ண்ட³ங் அந்தமஸோ பானீயஉளுங்கங் பானீயஸங்க²ங் அஜ்ஜோ²காஸே நிக்கி²பித்வா க³ச்ச²ந்தஸ்ஸ து³க்கட’’ந்தி. மஹாஅட்ட²கதா²யங் பன ஏஸ நயோ து³தியஸிக்கா²பதே³ த³ஸ்ஸிதோ. அஜ்ஜோ²காஸே ரஜனங் பசித்வா ரஜனபா⁴ஜனங் ரஜனஉளுங்கோ ரஜனதோ³ணிகாதி ஸப்³ப³ங் அக்³கி³ஸாலாய படிஸாமேதப்³ப³ங். ஸசே அக்³கி³ஸாலா நத்தி², அனோவஸ்ஸகே பப்³பா⁴ரே நிக்கி²பிதப்³ப³ங். தஸ்மிம்பி அஸதி யத்த² ஓலோகெந்தா பி⁴க்கூ² பஸ்ஸந்தி, தாதி³ஸே டா²னே ட²பெத்வாபி க³ந்துங் வட்டதி.
112.Cimilikaṃ vātiādīsu cimilikā nāma sudhādiparikammakatāya bhūmiyā vaṇṇānurakkhaṇatthaṃ katā hoti , taṃ heṭṭhā pattharitvā upari kaṭasārakaṃ pattharanti. Uttarattharaṇaṃ nāma mañcapīṭhānaṃ upari attharitabbakaṃ paccattharaṇaṃ. Bhūmattharaṇaṃ nāma bhūmiyaṃ attharitabbā kaṭasārakādivikati. Taṭṭikaṃ nāma tālapaṇṇehi vā vākehi vā katataṭṭikā. Cammakhaṇḍo nāma sīhabyagghadīpitaracchacammādīsupi yaṃkiñci cammaṃ. Aṭṭhakathāsu hi senāsanaparibhoge paṭikkhittacammaṃ nāma na dissati, tasmā sīhacammādīnaṃ pariharaṇeyeva paṭikkhepo veditabbo. Pādapuñchanī nāma rajjukehi vā pilotikāhi vā pādapuñchanatthaṃ katā. Phalakapīṭhaṃ nāma phalakamayaṃ pīṭhaṃ. Atha vā phalakañceva dārumayapīṭhañca; etena sabbampi dārubhaṇḍādi saṅgahitaṃ. Mahāpaccariyaṃ pana vitthāreneva vuttaṃ – ‘‘ādhārakaṃ pattapidhānaṃ pādakathalikaṃ tālavaṇṭaṃ bījanīpattakaṃ yaṃkiñci dārubhaṇḍaṃ antamaso pānīyauḷuṅkaṃ pānīyasaṅkhaṃ ajjhokāse nikkhipitvā gacchantassa dukkaṭa’’nti. Mahāaṭṭhakathāyaṃ pana esa nayo dutiyasikkhāpade dassito. Ajjhokāse rajanaṃ pacitvā rajanabhājanaṃ rajanauḷuṅko rajanadoṇikāti sabbaṃ aggisālāya paṭisāmetabbaṃ. Sace aggisālā natthi, anovassake pabbhāre nikkhipitabbaṃ. Tasmimpi asati yattha olokentā bhikkhū passanti, tādise ṭhāne ṭhapetvāpi gantuṃ vaṭṭati.
அஞ்ஞஸ்ஸ புக்³க³லிகேதி யஸ்மிங் விஸ்ஸாஸக்³கா³ஹோ ந ருஹதி, தஸ்ஸ ஸந்தகே து³க்கடங். யஸ்மிங் பன விஸ்ஸாஸோ ருஹதி, தஸ்ஸ ஸந்தகங் அத்தனோ புக்³க³லிகமிவ ஹோதீதி மஹாபச்சரியாதீ³ஸு வுத்தங்.
Aññassapuggaliketi yasmiṃ vissāsaggāho na ruhati, tassa santake dukkaṭaṃ. Yasmiṃ pana vissāso ruhati, tassa santakaṃ attano puggalikamiva hotīti mahāpaccariyādīsu vuttaṃ.
113. ஆபுச்ச²ங் க³ச்ச²தீதி யோ பி⁴க்கு² வா ஸாமணேரோ வா ஆராமிகோ வா லஜ்ஜீ ஹோதி, அத்தனோ பலிபோ³த⁴ங் விய மஞ்ஞதி, யோ ததா²ரூபங் ஆபுச்சி²த்வா க³ச்ச²தி, தஸ்ஸ அனாபத்தி. ஓதாபெந்தோ க³ச்ச²தீதி ஆதபே ஓதாபெந்தோ ஆக³ந்த்வா உத்³த⁴ரிஸ்ஸாமீதி க³ச்ச²தி; ஏவங் க³ச்ச²தோ அனாபத்தி. கேனசி பலிபு³த்³த⁴ங் ஹோதீதி ஸேனாஸனங் கேனசி உபத்³து³தங் ஹோதீதி அத்தோ². ஸசேபி ஹி வுட்³ட⁴தரோ பி⁴க்கு² உட்டா²பெத்வா க³ண்ஹாதி, ஸசேபி யக்கோ² வா பேதோ வா ஆக³ந்த்வா நிஸீத³தி, கோசி வா இஸ்ஸரோ ஆக³ந்த்வா க³ண்ஹாதி, ஸேனாஸனங் பலிபு³த்³த⁴ங் ஹோதி, ஸீஹப்³யக்³கா⁴தீ³ஸு வா பன தங் பதே³ஸங் ஆக³ந்த்வா டி²தேஸுபி ஸேனாஸனங் பலிபு³த்³த⁴ங் ஹோதியேவ. ஏவங் கேனசி பலிபு³த்³தே⁴ அனுத்³த⁴ரித்வாபி க³ச்ச²தோ அனாபத்தி. ஆபதா³ஸூதி ஜீவிதப்³ரஹ்மசரியந்தராயேஸு. ஸேஸங் உத்தானமேவாதி.
113.Āpucchaṃ gacchatīti yo bhikkhu vā sāmaṇero vā ārāmiko vā lajjī hoti, attano palibodhaṃ viya maññati, yo tathārūpaṃ āpucchitvā gacchati, tassa anāpatti. Otāpento gacchatīti ātape otāpento āgantvā uddharissāmīti gacchati; evaṃ gacchato anāpatti. Kenaci palibuddhaṃ hotīti senāsanaṃ kenaci upaddutaṃ hotīti attho. Sacepi hi vuḍḍhataro bhikkhu uṭṭhāpetvā gaṇhāti, sacepi yakkho vā peto vā āgantvā nisīdati, koci vā issaro āgantvā gaṇhāti, senāsanaṃ palibuddhaṃ hoti, sīhabyagghādīsu vā pana taṃ padesaṃ āgantvā ṭhitesupi senāsanaṃ palibuddhaṃ hotiyeva. Evaṃ kenaci palibuddhe anuddharitvāpi gacchato anāpatti. Āpadāsūti jīvitabrahmacariyantarāyesu. Sesaṃ uttānamevāti.
கதி²னஸமுட்டா²னங் – காயவாசதோ காயவாசாசித்ததோ ச ஸமுட்டா²தி, கிரியாகிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், வசீகம்மங், திசித்தங், திவேத³னந்தி.
Kathinasamuṭṭhānaṃ – kāyavācato kāyavācācittato ca samuṭṭhāti, kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
பட²மஸேனாஸனஸிக்கா²பத³ங் சதுத்த²ங்.
Paṭhamasenāsanasikkhāpadaṃ catutthaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. பட²மஸேனாஸனஸிக்கா²பத³வண்ணனா • 4. Paṭhamasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. பட²மஸேனாஸனஸிக்கா²பத³வண்ணனா • 4. Paṭhamasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. பட²மஸேனாஸனஸிக்கா²பத³வண்ணனா • 4. Paṭhamasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. பட²மஸேனாஸனஸிக்கா²பத³ங் • 4. Paṭhamasenāsanasikkhāpadaṃ
