| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೪. ಪಾಚಿತ್ತಿಯಕಣ್ಡಂ
4. Pācittiyakaṇḍaṃ
೧. ಲಸುಣವಗ್ಗೋ
1. Lasuṇavaggo
೧. ಪಠಮಸಿಕ್ಖಾಪದ-ಅತ್ಥಯೋಜನಾ
1. Paṭhamasikkhāpada-atthayojanā
ತಿಂಸಕಾನನ್ತರಂ ತಿಂಸಕಾನಂ ಅನನ್ತರೇ ಕಾಲೇ ಛಸಟ್ಠಿಸತಸಙ್ಗಹಾ ಛಉತ್ತರಸಟ್ಠಿಅಧಿಕಸತೇಹಿ ಸಿಕ್ಖಾಪದೇಹಿ ಸಙ್ಗಹಿತಾ ಯೇ ಧಮ್ಮಾ ಸಙ್ಗೀತಿಕಾರೇಹಿ ಸಙ್ಗೀತಾ, ದಾನಿ ಇಮಸ್ಮಿಂ ಕಾಲೇ ತೇಸಮ್ಪಿ ಧಮ್ಮಾನಂ ಅಯಂ ವಣ್ಣನಾ ಹೋತೀತಿ ಯೋಜನಾ।
Tiṃsakānantaraṃ tiṃsakānaṃ anantare kāle chasaṭṭhisatasaṅgahā chauttarasaṭṭhiadhikasatehi sikkhāpadehi saṅgahitā ye dhammā saṅgītikārehi saṅgītā, dāni imasmiṃ kāle tesampi dhammānaṃ ayaṃ vaṇṇanā hotīti yojanā.
೭೯೩. ತತ್ಥಾತಿ ತೇಸು ಛಸಟ್ಠಿಸತಸಙ್ಗಹೇಸು ಸಿಕ್ಖಾಪದೇಸು, ಪಠಮಸಿಕ್ಖಾಪದೇತಿ ಸಮ್ಬನ್ಧೋ। ‘‘ದ್ವೇ ತಯೋ’’ತಿ ಏತ್ಥ ವಾಸದ್ದೋ ಲುತ್ತನಿದ್ದಿಟ್ಠೋತಿ ಆಹ ‘‘ದ್ವೇ ವಾ ತಯೋ ವಾ’’ತಿ। ಫೋಟಲಕೇತಿ ಕನ್ದೇ, ಮಿಞ್ಜೇ ವಾ। ಏತನ್ತಿ ‘‘ಗಣ್ಡಿಕೇ’’ತಿ ಏತಂ ನಾಮಂ। ‘‘ಪಮಾಣ’’ನ್ತಿಇಮಿನಾ ಮತ್ತಸದ್ದೋ ಪಮಾಣತ್ಥೋವ, ನ ಅಪ್ಪತ್ಥೋ, ನಾಪಿ ಅವಧಾರಣತ್ಥೋತಿ ದಸ್ಸೇತಿ। ಲಸುಣನ್ತಿ ಸೇತವಣ್ಣಮೂಲಂ ಮಹಾಕನ್ದಂ। ಮಹಾಕನ್ದೋ ಹಿ ಬ್ಯಞ್ಜನಸಮ್ಪಾಕಾದೀಸು ಆಮಗನ್ಧಾನಂ ಅಭಿಭವನತ್ತಾ ಲಸೀಯತಿ ಕನ್ತೀಯತೀತಿ ಲಸುಣನ್ತಿ ವುಚ್ಚತಿ।
793.Tatthāti tesu chasaṭṭhisatasaṅgahesu sikkhāpadesu, paṭhamasikkhāpadeti sambandho. ‘‘Dve tayo’’ti ettha vāsaddo luttaniddiṭṭhoti āha ‘‘dve vā tayo vā’’ti. Phoṭalaketi kande, miñje vā. Etanti ‘‘gaṇḍike’’ti etaṃ nāmaṃ. ‘‘Pamāṇa’’ntiiminā mattasaddo pamāṇatthova, na appattho, nāpi avadhāraṇatthoti dasseti. Lasuṇanti setavaṇṇamūlaṃ mahākandaṃ. Mahākando hi byañjanasampākādīsu āmagandhānaṃ abhibhavanattā lasīyati kantīyatīti lasuṇanti vuccati.
ಸುವಣ್ಣಹಂಸಯೋನಿನ್ತಿ ಸುವಣ್ಣಮಯೇನ ಪತ್ತೇನ ಯುತ್ತಂ ಹಂಸಯೋನಿಂ। ಜಾತಿಸ್ಸರೋತಿ ಜಾತಿಂ ಭವಂ ಸರತಿ ಜಾನಾತೀತಿ ಜಾತಿಸ್ಸರೋ। ಅಥಾತಿ ಜಾತಿಸ್ಸರಸ್ಸ ನಿಪ್ಫನ್ನತ್ತಾ। ನಿಪ್ಫನ್ನತ್ಥೋ ಹಿ ಅಥಸದ್ದೋ। ಪುಬ್ಬಸಿನೇಹೇನಾತಿ ಪುಬ್ಬೇ ಮನುಸ್ಸಭವೇ ಭಾವಿತೇನ ಸಿನೇಹೇನ। ತಾಸನ್ತಿ ಪಜಾಪತಿಯಾ ಚ ತಿಸ್ಸನ್ನಂ ಧೀತರಾನಞ್ಚ। ತಂ ಪನಾತಿ ಪತ್ತಂ ಪನ।
Suvaṇṇahaṃsayoninti suvaṇṇamayena pattena yuttaṃ haṃsayoniṃ. Jātissaroti jātiṃ bhavaṃ sarati jānātīti jātissaro. Athāti jātissarassa nipphannattā. Nipphannattho hi athasaddo. Pubbasinehenāti pubbe manussabhave bhāvitena sinehena. Tāsanti pajāpatiyā ca tissannaṃ dhītarānañca. Taṃ panāti pattaṃ pana.
೭೯೫. ಮಗಧೇಸೂತಿ ಮಗಧರಟ್ಠೇ ಠಿತೇಸು ಜನಪದೇಸು। ಹೀತಿ ಸಚ್ಚಂ, ಯಸ್ಮಾ ವಾ। ಇಧಾತಿ ‘‘ಲಸುಣಂ ಖಾದೇಯ್ಯಾ’’ತಿಪದೇ। ತಮ್ಪೀತಿ ಮಾಗಧಕಮ್ಪಿ। ಗಣ್ಡಿಕಲಸುಣಮೇವಾತಿ ಗಣ್ಡೋ ಫೋಟೋ ಏತಸ್ಸತ್ಥೀತಿ ಗಣ್ಡಿಕಂ। ಗಣ್ಡಸದ್ದೋ ಹಿ ಫೋಟಪರಿಯಾಯೋ, ಬಹುತ್ಥೇ ಇಕಪಚ್ಚಯೋ। ಬಹುಗಣ್ಡಿಕಲಸುಣನ್ತಿ ಹಿ ವುತ್ತಂ ಹೋತಿ। ಗಣ್ಡಸದ್ದೋ ಹಿ ಫೋಟೇ ಚ ಕಪೋಲೇ ಚಾತಿ ದ್ವೀಸು ಅತ್ಥೇಸು ವತ್ತತಿ, ಇಧ ಪನ ಫೋಟೇ ವತ್ತತೀತಿ ದಟ್ಠಬ್ಬಂ। ಪೋತ್ಥಕೇಸು ಪನ ಓಟ್ಠಜೇನ ಚತುತ್ಥಕ್ಖರೇನ ಪಾಠೋ ಅತ್ಥಿ, ಸೋ ವೀಮಂಸಿತ್ವಾ ಗಹೇತಬ್ಬೋ। ಬಹೂಸು ಹಿ ಪುಬ್ಬಪೋತ್ಥಕೇಸು ಕಣ್ಠಜೋ ತತಿಯಕ್ಖರೋ ಚ ಓಟ್ಠಜೋ ಚತುತ್ಥಕ್ಖರೋ ಚಾತಿ ದ್ವೇ ಅಕ್ಖರಾ ಅಞ್ಞಮಞ್ಞಂ ಪರಿವತ್ತಿತ್ವಾ ತಿಟ್ಠನ್ತಿ। ನ ಏಕದ್ವಿತಿಮಿಞ್ಜಕನ್ತಿ ಏಕಮಿಞ್ಜೋ ಪಲಣ್ಡುಕೋ ನ ಹೋತಿ, ದ್ವಿಮಿಞ್ಜೋ ಭಞ್ಜನಕೋ ನ ಹೋತಿ, ತಿಮಿಞ್ಜೋ ಹರಿತಕೋ ನ ಹೋತೀತಿ ಅತ್ಥೋ। ಕುರುನ್ದಿಯಂ ಪನ ವುತ್ತನ್ತಿ ಸಮ್ಬನ್ಧೋ। ಸಙ್ಖಾದಿತ್ವಾತಿ ದನ್ತೇಹಿ ಚುಣ್ಣವಿಚುಣ್ಣಂ ಕತ್ವಾ।
795.Magadhesūti magadharaṭṭhe ṭhitesu janapadesu. Hīti saccaṃ, yasmā vā. Idhāti ‘‘lasuṇaṃ khādeyyā’’tipade. Tampīti māgadhakampi. Gaṇḍikalasuṇamevāti gaṇḍo phoṭo etassatthīti gaṇḍikaṃ. Gaṇḍasaddo hi phoṭapariyāyo, bahutthe ikapaccayo. Bahugaṇḍikalasuṇanti hi vuttaṃ hoti. Gaṇḍasaddo hi phoṭe ca kapole cāti dvīsu atthesu vattati, idha pana phoṭe vattatīti daṭṭhabbaṃ. Potthakesu pana oṭṭhajena catutthakkharena pāṭho atthi, so vīmaṃsitvā gahetabbo. Bahūsu hi pubbapotthakesu kaṇṭhajo tatiyakkharo ca oṭṭhajo catutthakkharo cāti dve akkharā aññamaññaṃ parivattitvā tiṭṭhanti. Na ekadvitimiñjakanti ekamiñjo palaṇḍuko na hoti, dvimiñjo bhañjanako na hoti, timiñjo haritako na hotīti attho. Kurundiyaṃ pana vuttanti sambandho. Saṅkhāditvāti dantehi cuṇṇavicuṇṇaṃ katvā.
೭೯೭. ಪಲಣ್ಡುಕೋತಿ ಸುಕನ್ದಕೋ ಏಕೋ ಲಸುಣವಿಸೇಸೋ। ಭಞ್ಜನಕಾದೀನಿ ಲೋಕಸಙ್ಕೇತೋಪದೇಸತೋ ದಟ್ಠಬ್ಬಾನಿ। ಹೀತಿ ಸಚ್ಚಂ। ತಸ್ಸಾತಿ ಚಾಪಲಸುಣಸ್ಸ। ಸಭಾವೇನೇವಾತಿ ಸೂಪಸಮ್ಪಾಕಾದಿಂ ವಿನಾ ಅತ್ತನೋ ಸಭಾವತೋ ಏವ। ತನ್ತಿ ಮಾಗಧಕಂ, ಪಕ್ಖಿಪಿತುನ್ತಿ ಸಮ್ಬನ್ಧೋ। ಹೀತಿ ಸಚ್ಚಂ। ಯತ್ಥ ಕತ್ಥಚೀತಿ ಯೇಸು ಕೇಸುಚೀತಿ। ಪಠಮಂ।
797.Palaṇḍukoti sukandako eko lasuṇaviseso. Bhañjanakādīni lokasaṅketopadesato daṭṭhabbāni. Hīti saccaṃ. Tassāti cāpalasuṇassa. Sabhāvenevāti sūpasampākādiṃ vinā attano sabhāvato eva. Tanti māgadhakaṃ, pakkhipitunti sambandho. Hīti saccaṃ. Yattha katthacīti yesu kesucīti. Paṭhamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಭಿಕ್ಖುನೀವಿಭಙ್ಗ • Bhikkhunīvibhaṅga / ೧. ಪಠಮಸಿಕ್ಖಾಪದಂ • 1. Paṭhamasikkhāpadaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಭಿಕ್ಖುನೀವಿಭಙ್ಗ-ಅಟ್ಠಕಥಾ • Bhikkhunīvibhaṅga-aṭṭhakathā / ೧. ಪಠಮಲಸುಣಸಿಕ್ಖಾಪದವಣ್ಣನಾ • 1. Paṭhamalasuṇasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೧. ಲಸುಣವಗ್ಗವಣ್ಣನಾ • 1. Lasuṇavaggavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೧. ಪಠಮಲಸುಣಸಿಕ್ಖಾಪದವಣ್ಣನಾ • 1. Paṭhamalasuṇasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೧. ಪಠಮಲಸುಣಾದಿಸಿಕ್ಖಾಪದವಣ್ಣನಾ • 1. Paṭhamalasuṇādisikkhāpadavaṇṇanā
