| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
༤. པཱཙིཏྟིཡཀཎྜཾ
4. Pācittiyakaṇḍaṃ
༡. ལསུཎཝགྒོ
1. Lasuṇavaggo
༡. པཋམསིཀྑཱཔད-ཨཏྠཡོཛནཱ
1. Paṭhamasikkhāpada-atthayojanā
ཏིཾསཀཱནནྟརཾ ཏིཾསཀཱནཾ ཨནནྟརེ ཀཱལེ ཚསཊྛིསཏསངྒཧཱ ཚཨུཏྟརསཊྛིཨདྷིཀསཏེཧི སིཀྑཱཔདེཧི སངྒཧིཏཱ ཡེ དྷམྨཱ སངྒཱིཏིཀཱརེཧི སངྒཱིཏཱ, དཱནི ཨིམསྨིཾ ཀཱལེ ཏེསམྤི དྷམྨཱནཾ ཨཡཾ ཝཎྞནཱ ཧོཏཱིཏི ཡོཛནཱ།
Tiṃsakānantaraṃ tiṃsakānaṃ anantare kāle chasaṭṭhisatasaṅgahā chauttarasaṭṭhiadhikasatehi sikkhāpadehi saṅgahitā ye dhammā saṅgītikārehi saṅgītā, dāni imasmiṃ kāle tesampi dhammānaṃ ayaṃ vaṇṇanā hotīti yojanā.
༧༩༣. ཏཏྠཱཏི ཏེསུ ཚསཊྛིསཏསངྒཧེསུ སིཀྑཱཔདེསུ, པཋམསིཀྑཱཔདེཏི སམྦནྡྷོ། ‘‘དྭེ ཏཡོ’’ཏི ཨེཏྠ ཝཱསདྡོ ལུཏྟནིདྡིཊྛོཏི ཨཱཧ ‘‘དྭེ ཝཱ ཏཡོ ཝཱ’’ཏི། ཕོཊལཀེཏི ཀནྡེ, མིཉྫེ ཝཱ། ཨེཏནྟི ‘‘གཎྜིཀེ’’ཏི ཨེཏཾ ནཱམཾ། ‘‘པམཱཎ’’ནྟིཨིམིནཱ མཏྟསདྡོ པམཱཎཏྠོཝ, ན ཨཔྤཏྠོ, ནཱཔི ཨཝདྷཱརཎཏྠོཏི དསྶེཏི། ལསུཎནྟི སེཏཝཎྞམཱུལཾ མཧཱཀནྡཾ། མཧཱཀནྡོ ཧི བྱཉྫནསམྤཱཀཱདཱིསུ ཨཱམགནྡྷཱནཾ ཨབྷིབྷཝནཏྟཱ ལསཱིཡཏི ཀནྟཱིཡཏཱིཏི ལསུཎནྟི ཝུཙྩཏི།
793.Tatthāti tesu chasaṭṭhisatasaṅgahesu sikkhāpadesu, paṭhamasikkhāpadeti sambandho. ‘‘Dve tayo’’ti ettha vāsaddo luttaniddiṭṭhoti āha ‘‘dve vā tayo vā’’ti. Phoṭalaketi kande, miñje vā. Etanti ‘‘gaṇḍike’’ti etaṃ nāmaṃ. ‘‘Pamāṇa’’ntiiminā mattasaddo pamāṇatthova, na appattho, nāpi avadhāraṇatthoti dasseti. Lasuṇanti setavaṇṇamūlaṃ mahākandaṃ. Mahākando hi byañjanasampākādīsu āmagandhānaṃ abhibhavanattā lasīyati kantīyatīti lasuṇanti vuccati.
སུཝཎྞཧཾསཡོནིནྟི སུཝཎྞམཡེན པཏྟེན ཡུཏྟཾ ཧཾསཡོནིཾ། ཛཱཏིསྶརོཏི ཛཱཏིཾ བྷཝཾ སརཏི ཛཱནཱཏཱིཏི ཛཱཏིསྶརོ། ཨཐཱཏི ཛཱཏིསྶརསྶ ནིཔྥནྣཏྟཱ། ནིཔྥནྣཏྠོ ཧི ཨཐསདྡོ། པུབྦསིནེཧེནཱཏི པུབྦེ མནུསྶབྷཝེ བྷཱཝིཏེན སིནེཧེན། ཏཱསནྟི པཛཱཔཏིཡཱ ཙ ཏིསྶནྣཾ དྷཱིཏརཱནཉྩ། ཏཾ པནཱཏི པཏྟཾ པན།
Suvaṇṇahaṃsayoninti suvaṇṇamayena pattena yuttaṃ haṃsayoniṃ. Jātissaroti jātiṃ bhavaṃ sarati jānātīti jātissaro. Athāti jātissarassa nipphannattā. Nipphannattho hi athasaddo. Pubbasinehenāti pubbe manussabhave bhāvitena sinehena. Tāsanti pajāpatiyā ca tissannaṃ dhītarānañca. Taṃ panāti pattaṃ pana.
༧༩༥. མགདྷེསཱུཏི མགདྷརཊྛེ ཋིཏེསུ ཛནཔདེསུ། ཧཱིཏི སཙྩཾ, ཡསྨཱ ཝཱ། ཨིདྷཱཏི ‘‘ལསུཎཾ ཁཱདེཡྻཱ’’ཏིཔདེ། ཏམྤཱིཏི མཱགདྷཀམྤི། གཎྜིཀལསུཎམེཝཱཏི གཎྜོ ཕོཊོ ཨེཏསྶཏྠཱིཏི གཎྜིཀཾ། གཎྜསདྡོ ཧི ཕོཊཔརིཡཱཡོ, བཧུཏྠེ ཨིཀཔཙྩཡོ། བཧུགཎྜིཀལསུཎནྟི ཧི ཝུཏྟཾ ཧོཏི། གཎྜསདྡོ ཧི ཕོཊེ ཙ ཀཔོལེ ཙཱཏི དྭཱིསུ ཨཏྠེསུ ཝཏྟཏི, ཨིདྷ པན ཕོཊེ ཝཏྟཏཱིཏི དཊྛབྦཾ། པོཏྠཀེསུ པན ཨོཊྛཛེན ཙཏུཏྠཀྑརེན པཱཋོ ཨཏྠི, སོ ཝཱིམཾསིཏྭཱ གཧེཏབྦོ། བཧཱུསུ ཧི པུབྦཔོཏྠཀེསུ ཀཎྛཛོ ཏཏིཡཀྑརོ ཙ ཨོཊྛཛོ ཙཏུཏྠཀྑརོ ཙཱཏི དྭེ ཨཀྑརཱ ཨཉྙམཉྙཾ པརིཝཏྟིཏྭཱ ཏིཊྛནྟི། ན ཨེཀདྭིཏིམིཉྫཀནྟི ཨེཀམིཉྫོ པལཎྜུཀོ ན ཧོཏི, དྭིམིཉྫོ བྷཉྫནཀོ ན ཧོཏི, ཏིམིཉྫོ ཧརིཏཀོ ན ཧོཏཱིཏི ཨཏྠོ། ཀུརུནྡིཡཾ པན ཝུཏྟནྟི སམྦནྡྷོ། སངྑཱདིཏྭཱཏི དནྟེཧི ཙུཎྞཝིཙུཎྞཾ ཀཏྭཱ།
795.Magadhesūti magadharaṭṭhe ṭhitesu janapadesu. Hīti saccaṃ, yasmā vā. Idhāti ‘‘lasuṇaṃ khādeyyā’’tipade. Tampīti māgadhakampi. Gaṇḍikalasuṇamevāti gaṇḍo phoṭo etassatthīti gaṇḍikaṃ. Gaṇḍasaddo hi phoṭapariyāyo, bahutthe ikapaccayo. Bahugaṇḍikalasuṇanti hi vuttaṃ hoti. Gaṇḍasaddo hi phoṭe ca kapole cāti dvīsu atthesu vattati, idha pana phoṭe vattatīti daṭṭhabbaṃ. Potthakesu pana oṭṭhajena catutthakkharena pāṭho atthi, so vīmaṃsitvā gahetabbo. Bahūsu hi pubbapotthakesu kaṇṭhajo tatiyakkharo ca oṭṭhajo catutthakkharo cāti dve akkharā aññamaññaṃ parivattitvā tiṭṭhanti. Na ekadvitimiñjakanti ekamiñjo palaṇḍuko na hoti, dvimiñjo bhañjanako na hoti, timiñjo haritako na hotīti attho. Kurundiyaṃ pana vuttanti sambandho. Saṅkhāditvāti dantehi cuṇṇavicuṇṇaṃ katvā.
༧༩༧. པལཎྜུཀོཏི སུཀནྡཀོ ཨེཀོ ལསུཎཝིསེསོ། བྷཉྫནཀཱདཱིནི ལོཀསངྐེཏོཔདེསཏོ དཊྛབྦཱནི། ཧཱིཏི སཙྩཾ། ཏསྶཱཏི ཙཱཔལསུཎསྶ། སབྷཱཝེནེཝཱཏི སཱུཔསམྤཱཀཱདིཾ ཝིནཱ ཨཏྟནོ སབྷཱཝཏོ ཨེཝ། ཏནྟི མཱགདྷཀཾ, པཀྑིཔིཏུནྟི སམྦནྡྷོ། ཧཱིཏི སཙྩཾ། ཡཏྠ ཀཏྠཙཱིཏི ཡེསུ ཀེསུཙཱིཏི། པཋམཾ།
797.Palaṇḍukoti sukandako eko lasuṇaviseso. Bhañjanakādīni lokasaṅketopadesato daṭṭhabbāni. Hīti saccaṃ. Tassāti cāpalasuṇassa. Sabhāvenevāti sūpasampākādiṃ vinā attano sabhāvato eva. Tanti māgadhakaṃ, pakkhipitunti sambandho. Hīti saccaṃ. Yattha katthacīti yesu kesucīti. Paṭhamaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / བྷིཀྑུནཱིཝིབྷངྒ • Bhikkhunīvibhaṅga / ༡. པཋམསིཀྑཱཔདཾ • 1. Paṭhamasikkhāpadaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༡. པཋམལསུཎསིཀྑཱཔདཝཎྞནཱ • 1. Paṭhamalasuṇasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༡. ལསུཎཝགྒཝཎྞནཱ • 1. Lasuṇavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༡. པཋམལསུཎསིཀྑཱཔདཝཎྞནཱ • 1. Paṭhamalasuṇasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམལསུཎཱདིསིཀྑཱཔདཝཎྞནཱ • 1. Paṭhamalasuṇādisikkhāpadavaṇṇanā
