| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
3. நிஸ்ஸக்³கி³யகண்ட³ங் (பி⁴க்கு²னீவிப⁴ங்கோ³)
3. Nissaggiyakaṇḍaṃ (bhikkhunīvibhaṅgo)
1. பத்தவக்³கோ³
1. Pattavaggo
1. பட²மஸிக்கா²பத³ங்
1. Paṭhamasikkhāpadaṃ
இமே கோ² பனாய்யாயோ திங்ஸ நிஸ்ஸக்³கி³யா பாசித்தியா
Ime kho panāyyāyo tiṃsa nissaggiyā pācittiyā
த⁴ம்மா உத்³தே³ஸங் ஆக³ச்ச²ந்தி.
Dhammā uddesaṃ āgacchanti.
733. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ ப³ஹூ பத்தே ஸன்னிசயங் கரொந்தி. மனுஸ்ஸா விஹாரசாரிகங் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ ப³ஹூ பத்தே ஸன்னிசயங் கரிஸ்ஸந்தி, பத்தவாணிஜ்ஜங் வா பி⁴க்கு²னியோ கரிஸ்ஸந்தி, ஆமத்திகாபணங் வா பஸாரெஸ்ஸந்தீ’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ பத்தஸன்னிசயங் கரிஸ்ஸந்தீ’’தி…பே॰… ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கு²னியோ பத்தஸன்னிசயங் கரொந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ பத்தஸன்னிசயங் கரிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
733. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo bahū patte sannicayaṃ karonti. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘kathañhi nāma bhikkhuniyo bahū patte sannicayaṃ karissanti, pattavāṇijjaṃ vā bhikkhuniyo karissanti, āmattikāpaṇaṃ vā pasāressantī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo pattasannicayaṃ karissantī’’ti…pe… saccaṃ kira, bhikkhave, chabbaggiyā bhikkhuniyo pattasannicayaṃ karontīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo pattasannicayaṃ karissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
734. ‘‘யா பன பி⁴க்கு²னீ பத்தஸன்னிசயங் கரெய்ய , நிஸ்ஸக்³கி³யங் பாசித்திய’’ந்தி.
734.‘‘Yā pana bhikkhunī pattasannicayaṃ kareyya, nissaggiyaṃ pācittiya’’nti.
735. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
735.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
பத்தோ நாம த்³வே பத்தா – அயோபத்தோ, மத்திகாபத்தோ. தயோ பத்தஸ்ஸ வண்ணா – உக்கட்டோ² பத்தோ, மஜ்ஜி²மோ பத்தோ, ஓமகோ பத்தோ. உக்கட்டோ² நாம பத்தோ அட்³டா⁴ள்ஹகோத³னங் க³ண்ஹாதி சதுபா⁴க³ங் கா²த³னங் தது³பியங் ப்³யஞ்ஜனங். மஜ்ஜி²மோ நாம பத்தோ நாளிகோத³னங் க³ண்ஹாதி சதுபா⁴க³ங் கா²த³னங் தது³பியங் ப்³யஞ்ஜனங். ஓமகோ நாம பத்தோ பத்தோ²த³னங் க³ண்ஹாதி சதுபா⁴க³ங் கா²த³னங் தது³பியங் ப்³யஞ்ஜனங். ததோ உக்கட்டோ² அபத்தோ ஓமகோ அபத்தோ.
Patto nāma dve pattā – ayopatto, mattikāpatto. Tayo pattassa vaṇṇā – ukkaṭṭho patto, majjhimo patto, omako patto. Ukkaṭṭhonāmapatto aḍḍhāḷhakodanaṃ gaṇhāti catubhāgaṃ khādanaṃ tadupiyaṃ byañjanaṃ. Majjhimo nāmapatto nāḷikodanaṃ gaṇhāti catubhāgaṃ khādanaṃ tadupiyaṃ byañjanaṃ. Omakonāmapatto patthodanaṃ gaṇhāti catubhāgaṃ khādanaṃ tadupiyaṃ byañjanaṃ. Tato ukkaṭṭho apatto omako apatto.
ஸன்னிசயங் கரெய்யாதி அனதி⁴ட்டி²தோ அவிகப்பிதோ.
Sannicayaṃ kareyyāti anadhiṭṭhito avikappito.
நிஸ்ஸக்³கி³யோ ஹோதீதி ஸஹ அருணுக்³க³மனா நிஸ்ஸக்³கி³யோ ஹோதி. நிஸ்ஸஜ்ஜிதப்³போ³ ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³போ³. தாய பி⁴க்கு²னியா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கு²னீனங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘அயங் மே, அய்யே, பத்தோ ரத்தாதிக்கந்தோ நிஸ்ஸக்³கி³யோ, இமாஹங் ஸங்க⁴ஸ்ஸ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தாய பி⁴க்கு²னியா படிப³லாய ஆபத்தி படிக்³க³ஹேதப்³பா³. நிஸ்ஸட்ட²பத்தோ தா³தப்³போ³ –
Nissaggiyohotīti saha aruṇuggamanā nissaggiyo hoti. Nissajjitabbo saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbo. Tāya bhikkhuniyā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhunīnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ayaṃ me, ayye, patto rattātikkanto nissaggiyo, imāhaṃ saṅghassa nissajjāmī’’ti. Nissajjitvā āpatti desetabbā. Byattāya bhikkhuniyā paṭibalāya āpatti paṭiggahetabbā. Nissaṭṭhapatto dātabbo –
‘‘ஸுணாது மே, அய்யே, ஸங்கோ⁴. அயங் பத்தோ இத்த²ன்னாமாய பி⁴க்கு²னியா நிஸ்ஸக்³கி³யோ ஸங்க⁴ஸ்ஸ நிஸ்ஸட்டோ². யதி³ ஸங்க⁴ஸ்ஸ பத்தகல்லங், ஸங்கோ⁴ இமங் பத்தங் இத்த²ன்னாமாய பி⁴க்கு²னியா த³தெ³ய்யா’’தி.
‘‘Suṇātu me, ayye, saṅgho. Ayaṃ patto itthannāmāya bhikkhuniyā nissaggiyo saṅghassa nissaṭṭho. Yadi saṅghassa pattakallaṃ, saṅgho imaṃ pattaṃ itthannāmāya bhikkhuniyā dadeyyā’’ti.
தாய பி⁴க்கு²னியா ஸம்ப³ஹுலா பி⁴க்கு²னியோ உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கு²னீனங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸு வசனீயா – ‘‘அயங் மே, அய்யாயோ, பத்தோ ரத்தாதிக்கந்தோ நிஸ்ஸக்³கி³யோ, இமாஹங் அய்யானங் நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தாய பி⁴க்கு²னியா படிப³லாய ஆபத்தி படிக்³க³ஹேதப்³பா³. நிஸ்ஸட்ட²பத்தோ தா³தப்³போ³ –
Tāya bhikkhuniyā sambahulā bhikkhuniyo upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhunīnaṃ pāde vanditvā ukkuṭikaṃ nisīditvā añjaliṃ paggahetvā evamassu vacanīyā – ‘‘ayaṃ me, ayyāyo, patto rattātikkanto nissaggiyo, imāhaṃ ayyānaṃ nissajjāmī’’ti. Nissajjitvā āpatti desetabbā. Byattāya bhikkhuniyā paṭibalāya āpatti paṭiggahetabbā. Nissaṭṭhapatto dātabbo –
‘‘ஸுணந்து மே அய்யாயோ. அயங் பத்தோ இத்த²ன்னாமாய பி⁴க்கு²னியா நிஸ்ஸக்³கி³யோ அய்யானங் நிஸ்ஸட்டோ². யதி³ அய்யானங் பத்தகல்லங், அய்யாயோ இமங் பத்தங் இத்த²ன்னாமாய பி⁴க்கு²னியா த³தெ³ய்யு’’ந்தி.
‘‘Suṇantu me ayyāyo. Ayaṃ patto itthannāmāya bhikkhuniyā nissaggiyo ayyānaṃ nissaṭṭho. Yadi ayyānaṃ pattakallaṃ, ayyāyo imaṃ pattaṃ itthannāmāya bhikkhuniyā dadeyyu’’nti.
தாய பி⁴க்கு²னியா ஏகங் பி⁴க்கு²னிங் உபஸங்கமித்வா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயா – ‘‘அயங் மே, அய்யே, பத்தோ ரத்தாதிக்கந்தோ நிஸ்ஸக்³கி³யோ. இமாஹங் அய்யாய நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. தாய பி⁴க்கு²னியா ஆபத்தி படிக்³க³ஹேதப்³பா³. நிஸ்ஸட்ட²பத்தோ தா³தப்³போ³ – ‘‘இமங் பத்தங் அய்யாய த³ம்மீ’’தி.
Tāya bhikkhuniyā ekaṃ bhikkhuniṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyā – ‘‘ayaṃ me, ayye, patto rattātikkanto nissaggiyo. Imāhaṃ ayyāya nissajjāmī’’ti. Nissajjitvā āpatti desetabbā. Tāya bhikkhuniyā āpatti paṭiggahetabbā. Nissaṭṭhapatto dātabbo – ‘‘imaṃ pattaṃ ayyāya dammī’’ti.
736. ரத்தாதிக்கந்தே அதிக்கந்தஸஞ்ஞா, நிஸ்ஸக்³கி³யங் பாசித்தியங். ரத்தாதிக்கந்தே வேமதிகா, நிஸ்ஸக்³கி³யங் பாசித்தியங். ரத்தாதிக்கந்தே அனதிக்கந்தஸஞ்ஞா, நிஸ்ஸக்³கி³யங் பாசித்தியங். அனதி⁴ட்டி²தே அதி⁴ட்டி²தஸஞ்ஞா, நிஸ்ஸக்³கி³யங் பாசித்தியங். அவிகப்பிதே விகப்பிதஸஞ்ஞா, நிஸ்ஸக்³கி³யங் பாசித்தியங். அவிஸ்ஸஜ்ஜிதே விஸ்ஸஜ்ஜிதஸஞ்ஞா , நிஸ்ஸக்³கி³யங் பாசித்தியங். அனட்டே² நட்ட²ஸஞ்ஞா… அவினட்டே² வினட்ட²ஸஞ்ஞா… அபி⁴ன்னே பி⁴ன்னஸஞ்ஞா… அவிலுத்தே விலுத்தஸஞ்ஞா, நிஸ்ஸக்³கி³யங் பாசித்தியங்.
736. Rattātikkante atikkantasaññā, nissaggiyaṃ pācittiyaṃ. Rattātikkante vematikā, nissaggiyaṃ pācittiyaṃ. Rattātikkante anatikkantasaññā, nissaggiyaṃ pācittiyaṃ. Anadhiṭṭhite adhiṭṭhitasaññā, nissaggiyaṃ pācittiyaṃ. Avikappite vikappitasaññā, nissaggiyaṃ pācittiyaṃ. Avissajjite vissajjitasaññā , nissaggiyaṃ pācittiyaṃ. Anaṭṭhe naṭṭhasaññā… avinaṭṭhe vinaṭṭhasaññā… abhinne bhinnasaññā… avilutte viluttasaññā, nissaggiyaṃ pācittiyaṃ.
நிஸ்ஸக்³கி³யங் பத்தங் அனிஸ்ஸஜ்ஜித்வா பரிபு⁴ஞ்ஜதி, ஆபத்தி து³க்கடஸ்ஸ. ரத்தானதிக்கந்தே அதிக்கந்தஸஞ்ஞா, ஆபத்தி து³க்கடஸ்ஸ. ரத்தானதிக்கந்தே வேமதிகா, ஆபத்தி து³க்கடஸ்ஸ. ரத்தானதிக்கந்தே அனதிக்கந்தஸஞ்ஞா அனாபத்தி.
Nissaggiyaṃ pattaṃ anissajjitvā paribhuñjati, āpatti dukkaṭassa. Rattānatikkante atikkantasaññā, āpatti dukkaṭassa. Rattānatikkante vematikā, āpatti dukkaṭassa. Rattānatikkante anatikkantasaññā anāpatti.
737. அனாபத்தி அந்தோஅருணே அதி⁴ட்டே²தி, விகப்பேதி, விஸ்ஸஜ்ஜேதி, நஸ்ஸதி, வினஸ்ஸதி, பி⁴ஜ்ஜதி, அச்சி²ந்தி³த்வா க³ண்ஹந்தி, விஸ்ஸாஸங் க³ண்ஹந்தி, உம்மத்திகாய, ஆதி³கம்மிகாயாதி.
737. Anāpatti antoaruṇe adhiṭṭheti, vikappeti, vissajjeti, nassati, vinassati, bhijjati, acchinditvā gaṇhanti, vissāsaṃ gaṇhanti, ummattikāya, ādikammikāyāti.
தேன கோ² பன ஸமயேன ச²ப்³ப³க்³கி³யா பி⁴க்கு²னியோ நிஸ்ஸட்ட²பத்தங் ந தெ³ந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, நிஸ்ஸட்ட²பத்தோ ந தா³தப்³போ³. யா ந த³தெ³ய்ய, ஆபத்தி து³க்கடஸ்ஸாதி.
Tena kho pana samayena chabbaggiyā bhikkhuniyo nissaṭṭhapattaṃ na denti. Bhagavato etamatthaṃ ārocesuṃ. Na, bhikkhave, nissaṭṭhapatto na dātabbo. Yā na dadeyya, āpatti dukkaṭassāti.
பட²மஸிக்கா²பத³ங் நிட்டி²தங்.
Paṭhamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / பட²மனிஸ்ஸக்³கி³யபாசித்தியஸிக்கா²பத³வண்ணனா • Paṭhamanissaggiyapācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. நிஸ்ஸக்³கி³யகண்ட³ங் (பி⁴க்கு²னீவிப⁴ங்க³வண்ணனா) • 3. Nissaggiyakaṇḍaṃ (bhikkhunīvibhaṅgavaṇṇanā)
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பட²மனிஸ்ஸக்³கி³யபாசித்தியஸிக்கா²பத³வண்ணனா • 1. Paṭhamanissaggiyapācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. து³தியனிஸ்ஸக்³கி³யாதி³பாசித்தியஸிக்கா²பத³வண்ணனா • 2. Dutiyanissaggiyādipācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பட²மனிஸ்ஸக்³கி³யபாசித்தியஸிக்கா²பத³-அத்த²யோஜனா • 1. Paṭhamanissaggiyapācittiyasikkhāpada-atthayojanā
