| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
4. துவட்டவக்³கோ³
4. Tuvaṭṭavaggo
1. பட²மஸிக்கா²பத³ங்
1. Paṭhamasikkhāpadaṃ
932. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே . தேன கோ² பன ஸமயேன பி⁴க்கு²னியோ த்³வே ஏகமஞ்சே துவட்டெந்தி. மனுஸ்ஸா விஹாரசாரிகங் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ த்³வே ஏகமஞ்சே துவட்டெஸ்ஸந்தி, ஸெய்யதா²பி கி³ஹினியோ காமபோ⁴கி³னியோ’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ த்³வே ஏகமஞ்சே துவட்டெஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ த்³வே ஏகமஞ்சே துவட்டெந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ த்³வே ஏகமஞ்சே துவட்டெஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
932. Tena samayena buddho bhagavā sāvatthiyaṃ viharati jetavane anāthapiṇḍikassa ārāme . Tena kho pana samayena bhikkhuniyo dve ekamañce tuvaṭṭenti. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘kathañhi nāma bhikkhuniyo dve ekamañce tuvaṭṭessanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo dve ekamañce tuvaṭṭessantī’’ti…pe… saccaṃ kira, bhikkhave, bhikkhuniyo dve ekamañce tuvaṭṭentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo dve ekamañce tuvaṭṭessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
933. ‘‘யா பன பி⁴க்கு²னியோ த்³வே ஏகமஞ்சே துவட்டெய்யுங், பாசித்திய’’ந்தி.
933.‘‘Yāpana bhikkhuniyo dve ekamañce tuvaṭṭeyyuṃ, pācittiya’’nti.
934. யா பனாதி யா யாதி³ஸா…பே॰… பி⁴க்கு²னியோதி உபஸம்பன்னாயோ வுச்சந்தி.
934.Yāpanāti yā yādisā…pe… bhikkhuniyoti upasampannāyo vuccanti.
த்³வே ஏகமஞ்சே துவட்டெய்யுந்தி ஏகாய நிபன்னாய அபரா நிபஜ்ஜதி, ஆபத்தி பாசித்தியஸ்ஸ. உபோ⁴ வா நிபஜ்ஜந்தி, ஆபத்தி பாசித்தியஸ்ஸ. உட்ட²ஹித்வா புனப்புனங் நிபஜ்ஜந்தி, ஆபத்தி பாசித்தியஸ்ஸ.
Dve ekamañce tuvaṭṭeyyunti ekāya nipannāya aparā nipajjati, āpatti pācittiyassa. Ubho vā nipajjanti, āpatti pācittiyassa. Uṭṭhahitvā punappunaṃ nipajjanti, āpatti pācittiyassa.
935. அனாபத்தி ஏகாய நிபன்னாய அபரா நிஸீத³தி, உபோ⁴ வா நிஸீத³ந்தி, உம்மத்திகானங், ஆதி³கம்மிகானந்தி.
935. Anāpatti ekāya nipannāya aparā nisīdati, ubho vā nisīdanti, ummattikānaṃ, ādikammikānanti.
பட²மஸிக்கா²பத³ங் நிட்டி²தங்.
Paṭhamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 1. பட²மஸிக்கா²பத³வண்ணனா • 1. Paṭhamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. நக்³க³வக்³க³வண்ணனா • 3. Naggavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பட²மஸிக்கா²பத³வண்ணனா • 1. Paṭhamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பட²மஸிக்கா²பத³-அத்த²யோஜனா • 1. Paṭhamasikkhāpada-atthayojanā
