| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
5. சித்தாகா³ரவக்³கோ³
5. Cittāgāravaggo
1. பட²மஸிக்கா²பத³ங்
1. Paṭhamasikkhāpadaṃ
977. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ரஞ்ஞோ பஸேனதி³ஸ்ஸ கோஸலஸ்ஸ உய்யானே சித்தாகா³ரே படிபா⁴னசித்தங் கதங் ஹோதி. ப³ஹூ மனுஸ்ஸா சித்தாகா³ரங் த³ஸ்ஸனாய க³ச்ச²ந்தி. ச²ப்³ப³க்³கி³யாபி பி⁴க்கு²னியோ சித்தாகா³ரங் த³ஸ்ஸனாய அக³மங்ஸு. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ சித்தாகா³ரங் த³ஸ்ஸனாய க³ச்சி²ஸ்ஸந்தி, ஸெய்யதா²பி கி³ஹினியோ காமபோ⁴கி³னியோ’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ சித்தாகா³ரங் த³ஸ்ஸனாய க³ச்சி²ஸ்ஸந்தீ’’தி…பே॰… ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கு²னியோ சித்தாகா³ரங் த³ஸ்ஸனாய க³ச்ச²ந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ சித்தாகா³ரங் த³ஸ்ஸனாய க³ச்சி²ஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
977. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena rañño pasenadissa kosalassa uyyāne cittāgāre paṭibhānacittaṃ kataṃ hoti. Bahū manussā cittāgāraṃ dassanāya gacchanti. Chabbaggiyāpi bhikkhuniyo cittāgāraṃ dassanāya agamaṃsu. Manussā ujjhāyanti khiyyanti vipācenti – ‘‘kathañhi nāma bhikkhuniyo cittāgāraṃ dassanāya gacchissanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo cittāgāraṃ dassanāya gacchissantī’’ti…pe… saccaṃ kira, bhikkhave, chabbaggiyā bhikkhuniyo cittāgāraṃ dassanāya gacchantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo cittāgāraṃ dassanāya gacchissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
978. ‘‘யா பன பி⁴க்கு²னீ ராஜாகா³ரங் வா சித்தாகா³ரங் வா ஆராமங் வா உய்யானங் வா பொக்க²ரணிங் வா த³ஸ்ஸனாய க³ச்செ²ய்ய, பாசித்திய’’ந்தி.
978.‘‘Yā pana bhikkhunī rājāgāraṃ vā cittāgāraṃ vā ārāmaṃ vā uyyānaṃ vā pokkharaṇiṃ vā dassanāya gaccheyya, pācittiya’’nti.
979. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
979.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ராஜாகா³ரங் நாம யத்த² கத்த²சி ரஞ்ஞோ கீளிதுங் ரமிதுங் கதங் ஹோதி.
Rājāgāraṃ nāma yattha katthaci rañño kīḷituṃ ramituṃ kataṃ hoti.
சித்தாகா³ரங் நாம யத்த² கத்த²சி மனுஸ்ஸானங் கீளிதுங் ரமிதுங் கதங் ஹோதி.
Cittāgāraṃ nāma yattha katthaci manussānaṃ kīḷituṃ ramituṃ kataṃ hoti.
ஆராமோ நாம யத்த² கத்த²சி மனுஸ்ஸானங் கீளிதுங் ரமிதுங் கதோ ஹோதி.
Ārāmo nāma yattha katthaci manussānaṃ kīḷituṃ ramituṃ kato hoti.
உய்யானங் நாம யத்த² கத்த²சி மனுஸ்ஸானங் கீளிதுங் ரமிதுங் கதங் ஹோதி.
Uyyānaṃ nāma yattha katthaci manussānaṃ kīḷituṃ ramituṃ kataṃ hoti.
பொக்க²ரணீ நாம யத்த² கத்த²சி மனுஸ்ஸானங் கீளிதுங் ரமிதுங் கதா ஹோதி.
Pokkharaṇī nāma yattha katthaci manussānaṃ kīḷituṃ ramituṃ katā hoti.
980. த³ஸ்ஸனாய க³ச்ச²தி, ஆபத்தி து³க்கடஸ்ஸ. யத்த² டி²தா பஸ்ஸதி, ஆபத்தி பாசித்தியஸ்ஸ. த³ஸ்ஸனூபசாரங் விஜஹித்வா புனப்புனங் பஸ்ஸதி, ஆபத்தி பாசித்தியஸ்ஸ. ஏகமேகங் த³ஸ்ஸனாய க³ச்ச²தி, ஆபத்தி து³க்கடஸ்ஸ. யத்த² டி²தா பஸ்ஸதி, ஆபத்தி பசித்தியஸ்ஸ. த³ஸ்ஸனூபசாரங் விஜஹித்வா புனப்புனங் பஸ்ஸதி, ஆபத்தி பாசித்தியஸ்ஸ.
980. Dassanāya gacchati, āpatti dukkaṭassa. Yattha ṭhitā passati, āpatti pācittiyassa. Dassanūpacāraṃ vijahitvā punappunaṃ passati, āpatti pācittiyassa. Ekamekaṃ dassanāya gacchati, āpatti dukkaṭassa. Yattha ṭhitā passati, āpatti pacittiyassa. Dassanūpacāraṃ vijahitvā punappunaṃ passati, āpatti pācittiyassa.
981. அனாபத்தி ஆராமே டி²தா பஸ்ஸதி, க³ச்ச²ந்தீ வா ஆக³ச்ச²ந்தீ வா பஸ்ஸதி, ஸதி கரணீயே க³ந்த்வா பஸ்ஸதி, ஆபதா³ஸு, உம்மத்திகாய, ஆதி³கம்மிகாயாதி.
981. Anāpatti ārāme ṭhitā passati, gacchantī vā āgacchantī vā passati, sati karaṇīye gantvā passati, āpadāsu, ummattikāya, ādikammikāyāti.
பட²மஸிக்கா²பத³ங் நிட்டி²தங்.
Paṭhamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 1. பட²மஸிக்கா²பத³வண்ணனா • 1. Paṭhamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. சித்தாகா³ரவக்³க³வண்ணனா • 5. Cittāgāravaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பட²மஸிக்கா²பத³வண்ணனா • 1. Paṭhamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மாதி³ஸிக்கா²பத³வண்ணனா • 1. Paṭhamādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பட²மஸிக்கா²பத³-அத்த²யோஜனா • 1. Paṭhamasikkhāpada-atthayojanā
