| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
6. ஆராமவக்³கோ³
6. Ārāmavaggo
1. பட²மஸிக்கா²பத³ங்
1. Paṭhamasikkhāpadaṃ
1021. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா பி⁴க்கூ² கா³மகாவாஸே ஏகசீவரா சீவரகம்மங் கரொந்தி. பி⁴க்கு²னியோ அனாபுச்சா² ஆராமங் பவிஸித்வா யேன தே பி⁴க்கூ² தேனுபஸங்கமிங்ஸு. பி⁴க்கூ² உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ அனாபுச்சா² ஆராமங் பவிஸிஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ அனாபுச்சா² ஆராமங் பவிஸந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ அனாபுச்சா² ஆராமங் பவிஸிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1021. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā bhikkhū gāmakāvāse ekacīvarā cīvarakammaṃ karonti. Bhikkhuniyo anāpucchā ārāmaṃ pavisitvā yena te bhikkhū tenupasaṅkamiṃsu. Bhikkhū ujjhāyanti khiyyanti vipācenti – ‘‘kathañhi nāma bhikkhuniyo anāpucchā ārāmaṃ pavisissantī’’ti…pe… saccaṃ kira, bhikkhave, bhikkhuniyo anāpucchā ārāmaṃ pavisantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo anāpucchā ārāmaṃ pavisissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘யா பன பி⁴க்கு²னீ அனாபுச்சா² ஆராமங் பவிஸெய்ய, பாசித்திய’’ந்தி.
‘‘Yā pana bhikkhunī anāpucchā ārāmaṃ paviseyya, pācittiya’’nti.
ஏவஞ்சித³ங் ப⁴க³வதா பி⁴க்கு²னீனங் ஸிக்கா²பத³ங் பஞ்ஞத்தங் ஹோதி.
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
1022. தேன கோ² பன ஸமயேன தே பி⁴க்கூ² தம்ஹா ஆவாஸா பக்கமிங்ஸு. பி⁴க்கு²னியோ – ‘‘அய்யா பக்கந்தா’’தி, ஆராமங் நாக³மங்ஸு. அத² கோ² தே பி⁴க்கூ² புனதே³வ தங் ஆவாஸங் பச்சாக³ச்சி²ங்ஸு. பி⁴க்கு²னியோ – ‘‘அய்யா ஆக³தா’’தி, ஆபுச்சா² ஆராமங் பவிஸித்வா யேன தே பி⁴க்கூ² தேனுபஸங்கமிங்ஸு; உபஸங்கமித்வா தே பி⁴க்கூ² அபி⁴வாதெ³த்வா ஏகமந்தங் அட்ட²ங்ஸு. ஏகமந்தங் டி²தா கோ² தா பி⁴க்கு²னியோ தே பி⁴க்கூ² ஏதத³வோசுங் – ‘‘கிஸ்ஸ தும்ஹே, ப⁴கி³னியோ, ஆராமங் நேவ ஸம்மஜ்ஜித்த² ந பானீயங் பரிபோ⁴ஜனீயங் உபட்டா²பித்தா²தி? ப⁴க³வதா, அய்யா, ஸிக்கா²பத³ங் பஞ்ஞத்தங் 1 ஹோதி – ‘‘ந அனாபுச்சா² ஆராமோ பவிஸிதப்³போ³’’தி. தேன மயங் ந ஆக³மிம்ஹா’’தி. ப⁴க³வதோ ஏதமத்த²ங் ஆரோசேஸுங்…பே॰… அனுஜானாமி, பி⁴க்க²வே, ஸந்தங் பி⁴க்கு²ங் ஆபுச்சா² ஆராமங் பவிஸிதுங். ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1022. Tena kho pana samayena te bhikkhū tamhā āvāsā pakkamiṃsu. Bhikkhuniyo – ‘‘ayyā pakkantā’’ti, ārāmaṃ nāgamaṃsu. Atha kho te bhikkhū punadeva taṃ āvāsaṃ paccāgacchiṃsu. Bhikkhuniyo – ‘‘ayyā āgatā’’ti, āpucchā ārāmaṃ pavisitvā yena te bhikkhū tenupasaṅkamiṃsu; upasaṅkamitvā te bhikkhū abhivādetvā ekamantaṃ aṭṭhaṃsu. Ekamantaṃ ṭhitā kho tā bhikkhuniyo te bhikkhū etadavocuṃ – ‘‘kissa tumhe, bhaginiyo, ārāmaṃ neva sammajjittha na pānīyaṃ paribhojanīyaṃ upaṭṭhāpitthāti? Bhagavatā, ayyā, sikkhāpadaṃ paññattaṃ 2 hoti – ‘‘na anāpucchā ārāmo pavisitabbo’’ti. Tena mayaṃ na āgamimhā’’ti. Bhagavato etamatthaṃ ārocesuṃ…pe… anujānāmi, bhikkhave, santaṃ bhikkhuṃ āpucchā ārāmaṃ pavisituṃ. Evañca pana, bhikkhave, bhikkhuniyo imaṃ sikkhāpadaṃ uddisantu –
‘‘யா பன பி⁴க்கு²னீ ஸந்தங் பி⁴க்கு²ங் அனாபுச்சா² ஆராமங் பவிஸெய்ய, பாசித்திய’’ந்தி.
‘‘Yā pana bhikkhunī santaṃ bhikkhuṃ anāpucchā ārāmaṃ paviseyya, pācittiya’’nti.
ஏவஞ்சித³ங் ப⁴க³வதா பி⁴க்கு²னீனங் ஸிக்கா²பத³ங் பஞ்ஞத்தங் ஹோதி.
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
1023. தேன கோ² பன ஸமயேன தே பி⁴க்கூ² தம்ஹா ஆவாஸா பக்கமித்வா புனதே³வ தங் ஆவாஸங் பச்சாக³ச்சி²ங்ஸு. பி⁴க்கு²னியோ – ‘‘அய்யா பக்கந்தா’’தி அனாபுச்சா² ஆராமங் பவிஸிங்ஸு. தாஸங் குக்குச்சங் அஹோஸி – ‘‘ப⁴க³வதா ஸிக்கா²பத³ங் பஞ்ஞத்தங் – ‘ந ஸந்தங் பி⁴க்கு²ங் அனாபுச்சா² ஆராமோ பவிஸிதப்³போ³’தி. மயஞ்சம்ஹா ஸந்தங் பி⁴க்கு²ங் அனாபுச்சா² ஆராமங் பவிஸிம்ஹா. கச்சி நு கோ² மயங் பாசித்தியங் ஆபத்திங் ஆபன்னா’’தி…பே॰… ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1023. Tena kho pana samayena te bhikkhū tamhā āvāsā pakkamitvā punadeva taṃ āvāsaṃ paccāgacchiṃsu. Bhikkhuniyo – ‘‘ayyā pakkantā’’ti anāpucchā ārāmaṃ pavisiṃsu. Tāsaṃ kukkuccaṃ ahosi – ‘‘bhagavatā sikkhāpadaṃ paññattaṃ – ‘na santaṃ bhikkhuṃ anāpucchā ārāmo pavisitabbo’ti. Mayañcamhā santaṃ bhikkhuṃ anāpucchā ārāmaṃ pavisimhā. Kacci nu kho mayaṃ pācittiyaṃ āpattiṃ āpannā’’ti…pe… bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1024. ‘‘யா பன பி⁴க்கு²னீ ஜானங் ஸபி⁴க்கு²கங் ஆராமங் அனாபுச்சா² பவிஸெய்ய, பாசித்திய’’ந்தி.
1024.‘‘Yā pana bhikkhunī jānaṃ sabhikkhukaṃ ārāmaṃ anāpucchā paviseyya, pācittiya’’nti.
1025. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1025.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஜானாதி நாம ஸாமங் வா ஜானாதி, அஞ்ஞே வா தஸ்ஸா ஆரோசெந்தி, தே வா ஆரோசெந்தி.
Jānāti nāma sāmaṃ vā jānāti, aññe vā tassā ārocenti, te vā ārocenti.
ஸபி⁴க்கு²கோ நாம ஆராமோ யத்த² பி⁴க்கூ² ருக்க²மூலேபி வஸந்தி.
Sabhikkhuko nāma ārāmo yattha bhikkhū rukkhamūlepi vasanti.
அனாபுச்சா² ஆராமங் பவிஸெய்யாதி பி⁴க்கு²ங் வா ஸாமணேரங் வா ஆராமிகங் வா அனாபுச்சா² பரிக்கி²த்தஸ்ஸ ஆராமஸ்ஸ பரிக்கே²பங் அதிக்காமெந்தியா ஆபத்தி பாசித்தியஸ்ஸ. அபரிக்கி²த்தஸ்ஸ ஆராமஸ்ஸ உபசாரங் ஓக்கமந்தியா ஆபத்தி பாசித்தியஸ்ஸ.
Anāpucchā ārāmaṃ paviseyyāti bhikkhuṃ vā sāmaṇeraṃ vā ārāmikaṃ vā anāpucchā parikkhittassa ārāmassa parikkhepaṃ atikkāmentiyā āpatti pācittiyassa. Aparikkhittassa ārāmassa upacāraṃ okkamantiyā āpatti pācittiyassa.
1026. ஸபி⁴க்கு²கே ஸபி⁴க்கு²கஸஞ்ஞா ஸந்தங் பி⁴க்கு²ங் அனாபுச்சா² ஆராமங் பவிஸதி, ஆபத்தி பாசித்தியஸ்ஸ. ஸபி⁴க்கு²கே வேமதிகா ஸந்தங் பி⁴க்கு²ங் அனாபுச்சா² ஆராமங் பவிஸதி, ஆபத்தி து³க்கடஸ்ஸ. ஸபி⁴க்கு²கே அபி⁴க்கு²கஸஞ்ஞா ஸந்தங் பி⁴க்கு²ங் அனாபுச்சா² ஆராமங் பவிஸதி, அனாபத்தி.
1026. Sabhikkhuke sabhikkhukasaññā santaṃ bhikkhuṃ anāpucchā ārāmaṃ pavisati, āpatti pācittiyassa. Sabhikkhuke vematikā santaṃ bhikkhuṃ anāpucchā ārāmaṃ pavisati, āpatti dukkaṭassa. Sabhikkhuke abhikkhukasaññā santaṃ bhikkhuṃ anāpucchā ārāmaṃ pavisati, anāpatti.
அபி⁴க்கு²கே ஸபி⁴க்கு²கஸஞ்ஞா, ஆபத்தி து³க்கடஸ்ஸ. அபி⁴க்கு²கே வேமதிகா, ஆபத்தி து³க்கடஸ்ஸ. அபி⁴க்கு²கே அபி⁴க்கு²கஸஞ்ஞா, அனாபத்தி.
Abhikkhuke sabhikkhukasaññā, āpatti dukkaṭassa. Abhikkhuke vematikā, āpatti dukkaṭassa. Abhikkhuke abhikkhukasaññā, anāpatti.
1027. அனாபத்தி ஸந்தங் பி⁴க்கு²ங் ஆபுச்சா² பவிஸதி, அஸந்தங் பி⁴க்கு²ங் அனாபுச்சா² பவிஸதி, ஸீஸானுலோகிகா க³ச்ச²தி, யத்த² பி⁴க்கு²னியோ ஸன்னிபதிதா ஹொந்தி தத்த² க³ச்ச²தி, ஆராமேன மக்³கோ³ ஹோதி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.
1027. Anāpatti santaṃ bhikkhuṃ āpucchā pavisati, asantaṃ bhikkhuṃ anāpucchā pavisati, sīsānulokikā gacchati, yattha bhikkhuniyo sannipatitā honti tattha gacchati, ārāmena maggo hoti, gilānāya, āpadāsu, ummattikāya, ādikammikāyāti.
பட²மஸிக்கா²பத³ங் நிட்டி²தங்.
Paṭhamasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 1. பட²மஸிக்கா²பத³வண்ணனா • 1. Paṭhamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. சித்தாகா³ரவக்³க³வண்ணனா • 5. Cittāgāravaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. ஆராமவக்³க³வண்ணனா • 6. Ārāmavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மாதி³ஸிக்கா²பத³வண்ணனா • 1. Paṭhamādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பட²மஸிக்கா²பத³-அத்த²யோஜனா • 1. Paṭhamasikkhāpada-atthayojanā
