| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
৩. নিস্সগ্গিযকণ্ডং (ভিক্খুনীৰিভঙ্গো)
3. Nissaggiyakaṇḍaṃ (bhikkhunīvibhaṅgo)
১. পত্তৰগ্গো
1. Pattavaggo
১. পঠমসিক্খাপদং
1. Paṭhamasikkhāpadaṃ
ইমে খো পনায্যাযো তিংস নিস্সগ্গিযা পাচিত্তিযা
Ime kho panāyyāyo tiṃsa nissaggiyā pācittiyā
ধম্মা উদ্দেসং আগচ্ছন্তি।
Dhammā uddesaṃ āgacchanti.
৭৩৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খুনিযো বহূ পত্তে সন্নিচযং করোন্তি। মনুস্সা ৰিহারচারিকং আহিণ্ডন্তা পস্সিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো বহূ পত্তে সন্নিচযং করিস্সন্তি, পত্তৰাণিজ্জং ৰা ভিক্খুনিযো করিস্সন্তি, আমত্তিকাপণং ৰা পসারেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো পত্তসন্নিচযং করিস্সন্তী’’তি…পে॰… সচ্চং কির, ভিক্খৰে, ছব্বগ্গিযা ভিক্খুনিযো পত্তসন্নিচযং করোন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, ছব্বগ্গিযা ভিক্খুনিযো পত্তসন্নিচযং করিস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
733. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo bahū patte sannicayaṃ karonti. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘kathañhi nāma bhikkhuniyo bahū patte sannicayaṃ karissanti, pattavāṇijjaṃ vā bhikkhuniyo karissanti, āmattikāpaṇaṃ vā pasāressantī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo pattasannicayaṃ karissantī’’ti…pe… saccaṃ kira, bhikkhave, chabbaggiyā bhikkhuniyo pattasannicayaṃ karontīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo pattasannicayaṃ karissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৭৩৪. ‘‘যা পন ভিক্খুনী পত্তসন্নিচযং করেয্য , নিস্সগ্গিযং পাচিত্তিয’’ন্তি।
734.‘‘Yā pana bhikkhunī pattasannicayaṃ kareyya, nissaggiyaṃ pācittiya’’nti.
৭৩৫. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
735.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
পত্তো নাম দ্ৰে পত্তা – অযোপত্তো, মত্তিকাপত্তো। তযো পত্তস্স ৰণ্ণা – উক্কট্ঠো পত্তো, মজ্ঝিমো পত্তো, ওমকো পত্তো। উক্কট্ঠো নাম পত্তো অড্ঢাল়্হকোদনং গণ্হাতি চতুভাগং খাদনং তদুপিযং ব্যঞ্জনং। মজ্ঝিমো নাম পত্তো নাল়িকোদনং গণ্হাতি চতুভাগং খাদনং তদুপিযং ব্যঞ্জনং। ওমকো নাম পত্তো পত্থোদনং গণ্হাতি চতুভাগং খাদনং তদুপিযং ব্যঞ্জনং। ততো উক্কট্ঠো অপত্তো ওমকো অপত্তো।
Patto nāma dve pattā – ayopatto, mattikāpatto. Tayo pattassa vaṇṇā – ukkaṭṭho patto, majjhimo patto, omako patto. Ukkaṭṭhonāmapatto aḍḍhāḷhakodanaṃ gaṇhāti catubhāgaṃ khādanaṃ tadupiyaṃ byañjanaṃ. Majjhimo nāmapatto nāḷikodanaṃ gaṇhāti catubhāgaṃ khādanaṃ tadupiyaṃ byañjanaṃ. Omakonāmapatto patthodanaṃ gaṇhāti catubhāgaṃ khādanaṃ tadupiyaṃ byañjanaṃ. Tato ukkaṭṭho apatto omako apatto.
সন্নিচযং করেয্যাতি অনধিট্ঠিতো অৰিকপ্পিতো।
Sannicayaṃ kareyyāti anadhiṭṭhito avikappito.
নিস্সগ্গিযো হোতীতি সহ অরুণুগ্গমনা নিস্সগ্গিযো হোতি। নিস্সজ্জিতব্বো সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বো। তায ভিক্খুনিযা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অযং মে, অয্যে, পত্তো রত্তাতিক্কন্তো নিস্সগ্গিযো, ইমাহং সঙ্ঘস্স নিস্সজ্জামী’’তি। নিস্সজ্জিত্ৰা আপত্তি দেসেতব্বা। ব্যত্তায ভিক্খুনিযা পটিবলায আপত্তি পটিগ্গহেতব্বা। নিস্সট্ঠপত্তো দাতব্বো –
Nissaggiyohotīti saha aruṇuggamanā nissaggiyo hoti. Nissajjitabbo saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbo. Tāya bhikkhuniyā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhunīnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ayaṃ me, ayye, patto rattātikkanto nissaggiyo, imāhaṃ saṅghassa nissajjāmī’’ti. Nissajjitvā āpatti desetabbā. Byattāya bhikkhuniyā paṭibalāya āpatti paṭiggahetabbā. Nissaṭṭhapatto dātabbo –
‘‘সুণাতু মে, অয্যে, সঙ্ঘো। অযং পত্তো ইত্থন্নামায ভিক্খুনিযা নিস্সগ্গিযো সঙ্ঘস্স নিস্সট্ঠো। যদি সঙ্ঘস্স পত্তকল্লং, সঙ্ঘো ইমং পত্তং ইত্থন্নামায ভিক্খুনিযা দদেয্যা’’তি।
‘‘Suṇātu me, ayye, saṅgho. Ayaṃ patto itthannāmāya bhikkhuniyā nissaggiyo saṅghassa nissaṭṭho. Yadi saṅghassa pattakallaṃ, saṅgho imaṃ pattaṃ itthannāmāya bhikkhuniyā dadeyyā’’ti.
তায ভিক্খুনিযা সম্বহুলা ভিক্খুনিযো উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্সু ৰচনীযা – ‘‘অযং মে, অয্যাযো, পত্তো রত্তাতিক্কন্তো নিস্সগ্গিযো, ইমাহং অয্যানং নিস্সজ্জামী’’তি। নিস্সজ্জিত্ৰা আপত্তি দেসেতব্বা। ব্যত্তায ভিক্খুনিযা পটিবলায আপত্তি পটিগ্গহেতব্বা। নিস্সট্ঠপত্তো দাতব্বো –
Tāya bhikkhuniyā sambahulā bhikkhuniyo upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhunīnaṃ pāde vanditvā ukkuṭikaṃ nisīditvā añjaliṃ paggahetvā evamassu vacanīyā – ‘‘ayaṃ me, ayyāyo, patto rattātikkanto nissaggiyo, imāhaṃ ayyānaṃ nissajjāmī’’ti. Nissajjitvā āpatti desetabbā. Byattāya bhikkhuniyā paṭibalāya āpatti paṭiggahetabbā. Nissaṭṭhapatto dātabbo –
‘‘সুণন্তু মে অয্যাযো। অযং পত্তো ইত্থন্নামায ভিক্খুনিযা নিস্সগ্গিযো অয্যানং নিস্সট্ঠো। যদি অয্যানং পত্তকল্লং, অয্যাযো ইমং পত্তং ইত্থন্নামায ভিক্খুনিযা দদেয্যু’’ন্তি।
‘‘Suṇantu me ayyāyo. Ayaṃ patto itthannāmāya bhikkhuniyā nissaggiyo ayyānaṃ nissaṭṭho. Yadi ayyānaṃ pattakallaṃ, ayyāyo imaṃ pattaṃ itthannāmāya bhikkhuniyā dadeyyu’’nti.
তায ভিক্খুনিযা একং ভিক্খুনিং উপসঙ্কমিত্ৰা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযা – ‘‘অযং মে, অয্যে, পত্তো রত্তাতিক্কন্তো নিস্সগ্গিযো। ইমাহং অয্যায নিস্সজ্জামী’’তি। নিস্সজ্জিত্ৰা আপত্তি দেসেতব্বা। তায ভিক্খুনিযা আপত্তি পটিগ্গহেতব্বা। নিস্সট্ঠপত্তো দাতব্বো – ‘‘ইমং পত্তং অয্যায দম্মী’’তি।
Tāya bhikkhuniyā ekaṃ bhikkhuniṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyā – ‘‘ayaṃ me, ayye, patto rattātikkanto nissaggiyo. Imāhaṃ ayyāya nissajjāmī’’ti. Nissajjitvā āpatti desetabbā. Tāya bhikkhuniyā āpatti paṭiggahetabbā. Nissaṭṭhapatto dātabbo – ‘‘imaṃ pattaṃ ayyāya dammī’’ti.
৭৩৬. রত্তাতিক্কন্তে অতিক্কন্তসঞ্ঞা, নিস্সগ্গিযং পাচিত্তিযং। রত্তাতিক্কন্তে ৰেমতিকা, নিস্সগ্গিযং পাচিত্তিযং। রত্তাতিক্কন্তে অনতিক্কন্তসঞ্ঞা, নিস্সগ্গিযং পাচিত্তিযং। অনধিট্ঠিতে অধিট্ঠিতসঞ্ঞা, নিস্সগ্গিযং পাচিত্তিযং। অৰিকপ্পিতে ৰিকপ্পিতসঞ্ঞা, নিস্সগ্গিযং পাচিত্তিযং। অৰিস্সজ্জিতে ৰিস্সজ্জিতসঞ্ঞা , নিস্সগ্গিযং পাচিত্তিযং। অনট্ঠে নট্ঠসঞ্ঞা… অৰিনট্ঠে ৰিনট্ঠসঞ্ঞা… অভিন্নে ভিন্নসঞ্ঞা… অৰিলুত্তে ৰিলুত্তসঞ্ঞা, নিস্সগ্গিযং পাচিত্তিযং।
736. Rattātikkante atikkantasaññā, nissaggiyaṃ pācittiyaṃ. Rattātikkante vematikā, nissaggiyaṃ pācittiyaṃ. Rattātikkante anatikkantasaññā, nissaggiyaṃ pācittiyaṃ. Anadhiṭṭhite adhiṭṭhitasaññā, nissaggiyaṃ pācittiyaṃ. Avikappite vikappitasaññā, nissaggiyaṃ pācittiyaṃ. Avissajjite vissajjitasaññā , nissaggiyaṃ pācittiyaṃ. Anaṭṭhe naṭṭhasaññā… avinaṭṭhe vinaṭṭhasaññā… abhinne bhinnasaññā… avilutte viluttasaññā, nissaggiyaṃ pācittiyaṃ.
নিস্সগ্গিযং পত্তং অনিস্সজ্জিত্ৰা পরিভুঞ্জতি, আপত্তি দুক্কটস্স। রত্তানতিক্কন্তে অতিক্কন্তসঞ্ঞা, আপত্তি দুক্কটস্স। রত্তানতিক্কন্তে ৰেমতিকা, আপত্তি দুক্কটস্স। রত্তানতিক্কন্তে অনতিক্কন্তসঞ্ঞা অনাপত্তি।
Nissaggiyaṃ pattaṃ anissajjitvā paribhuñjati, āpatti dukkaṭassa. Rattānatikkante atikkantasaññā, āpatti dukkaṭassa. Rattānatikkante vematikā, āpatti dukkaṭassa. Rattānatikkante anatikkantasaññā anāpatti.
৭৩৭. অনাপত্তি অন্তোঅরুণে অধিট্ঠেতি, ৰিকপ্পেতি, ৰিস্সজ্জেতি, নস্সতি, ৰিনস্সতি, ভিজ্জতি, অচ্ছিন্দিত্ৰা গণ্হন্তি, ৰিস্সাসং গণ্হন্তি, উম্মত্তিকায, আদিকম্মিকাযাতি।
737. Anāpatti antoaruṇe adhiṭṭheti, vikappeti, vissajjeti, nassati, vinassati, bhijjati, acchinditvā gaṇhanti, vissāsaṃ gaṇhanti, ummattikāya, ādikammikāyāti.
তেন খো পন সমযেন ছব্বগ্গিযা ভিক্খুনিযো নিস্সট্ঠপত্তং ন দেন্তি। ভগৰতো এতমত্থং আরোচেসুং। ন, ভিক্খৰে, নিস্সট্ঠপত্তো ন দাতব্বো। যা ন দদেয্য, আপত্তি দুক্কটস্সাতি।
Tena kho pana samayena chabbaggiyā bhikkhuniyo nissaṭṭhapattaṃ na denti. Bhagavato etamatthaṃ ārocesuṃ. Na, bhikkhave, nissaṭṭhapatto na dātabbo. Yā na dadeyya, āpatti dukkaṭassāti.
পঠমসিক্খাপদং নিট্ঠিতং।
Paṭhamasikkhāpadaṃ niṭṭhitaṃ.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / পঠমনিস্সগ্গিযপাচিত্তিযসিক্খাপদৰণ্ণনা • Paṭhamanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. নিস্সগ্গিযকণ্ডং (ভিক্খুনীৰিভঙ্গৰণ্ণনা) • 3. Nissaggiyakaṇḍaṃ (bhikkhunīvibhaṅgavaṇṇanā)
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. পঠমনিস্সগ্গিযপাচিত্তিযসিক্খাপদৰণ্ণনা • 1. Paṭhamanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. দুতিযনিস্সগ্গিযাদিপাচিত্তিযসিক্খাপদৰণ্ণনা • 2. Dutiyanissaggiyādipācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. পঠমনিস্সগ্গিযপাচিত্তিযসিক্খাপদ-অত্থযোজনা • 1. Paṭhamanissaggiyapācittiyasikkhāpada-atthayojanā
