| Library / Tipiṭaka / д̇ибидага • Tipiṭaka / бхигкунийвибхан̇г̇а • Bhikkhunīvibhaṅga |
4. баажид̇д̇ияаган̣д̣ам̣ (бхигкунийвибхан̇г̇о)
4. Pācittiyakaṇḍaṃ (bhikkhunīvibhaṅgo)
1. ласун̣аваг̇г̇о
1. Lasuṇavaggo
1. батамасигкаабад̣̇ам̣
1. Paṭhamasikkhāpadaṃ
имз ко банааяяааяо часадтисад̇аа баажид̇д̇ияаа
Ime kho panāyyāyo chasaṭṭhisatā pācittiyā
д̇хаммаа уд̣̇д̣̇зсам̣ ааг̇ажчанд̇и.
Dhammā uddesaṃ āgacchanti.
793. д̇зна самаязна б̣уд̣̇д̇хо бхаг̇аваа саавад̇т̇ияам̣ вихарад̇и ж̇зд̇аванз анаат̇абин̣д̣игасса аараамз. д̇зна ко бана самаязна ан̃н̃ад̇арзна убаасагзна бхигкунисан̇гхо ласун̣зна баваарид̇о ход̇и – ‘‘яаасам̣ аяяаанам̣ ласун̣зна ад̇т̇о, ахам̣ ласун̣знаа’’д̇и. кзд̇д̇абаало жа аан̣ад̇д̇о ход̇и – ‘‘сажз бхигкунияо ааг̇ажчанд̇и, згамзгааяа бхигкунияаа д̣̇взд̇аяо бхан̣д̣игз д̣̇зхий’’д̇и. д̇зна ко бана самаязна саавад̇т̇ияам̣ уссаво ход̇и. яат̇аабхад̇ам̣ ласун̣ам̣ баригкаяам̣ аг̇амааси. бхигкунияо д̇ам̣ убаасагам̣ убасан̇гамид̇ваа зд̇ад̣̇авожум̣ – ‘‘ласун̣зна, аавусо, ад̇т̇о’’д̇и. ‘‘над̇т̇ааяяз. яат̇аабхад̇ам̣ ласун̣ам̣ баригкийн̣ам̣. кзд̇д̇ам̣ г̇ажчат̇аа’’д̇и. т̇уллананд̣̇аа бхигкуний кзд̇д̇ам̣ г̇анд̇ваа на мад̇д̇ам̣ ж̇аанид̇ваа б̣ахум̣ ласун̣ам̣ хараабзси. кзд̇д̇абаало уж̇жхааяад̇и кияяад̇и вибаажзд̇и – ‘‘гат̇ан̃хи наама бхигкунияо на мад̇д̇ам̣ ж̇аанид̇ваа б̣ахум̣ ласун̣ам̣ хараабзссанд̇ий’’д̇и! ассосум̣ ко бхигкунияо д̇асса кзд̇д̇абааласса уж̇жхааяанд̇асса кияяанд̇асса вибаажзнд̇асса. яаа д̇аа бхигкунияо аббижчаа…бз… д̇аа уж̇жхааяанд̇и кияяанд̇и вибаажзнд̇и – ‘‘гат̇ан̃хи наама аяяаа т̇уллананд̣̇аа на мад̇д̇ам̣ ж̇аанид̇ваа б̣ахум̣ ласун̣ам̣ хараабзссад̇ий’’д̇и…бз… сажжам̣ гира, бхигкавз, т̇уллананд̣̇аа бхигкуний на мад̇д̇ам̣ ж̇аанид̇ваа б̣ахум̣ ласун̣ам̣ хараабзд̇ийд̇и 1? ‘‘сажжам̣, бхаг̇аваа’’д̇и. виг̇арахи б̣уд̣̇д̇хо бхаг̇аваа…бз… гат̇ан̃хи наама, бхигкавз, т̇уллананд̣̇аа бхигкуний на мад̇д̇ам̣ ж̇аанид̇ваа б̣ахум̣ ласун̣ам̣ хараабзссад̇и! нзд̇ам̣, бхигкавз, аббасаннаанам̣ ваа басаад̣̇ааяа…бз… д̇хаммим̣ гат̇ам̣ гад̇ваа бхигкуу ааманд̇зси –
793. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarena upāsakena bhikkhunisaṅgho lasuṇena pavārito hoti – ‘‘yāsaṃ ayyānaṃ lasuṇena attho, ahaṃ lasuṇenā’’ti. Khettapālo ca āṇatto hoti – ‘‘sace bhikkhuniyo āgacchanti, ekamekāya bhikkhuniyā dvetayo bhaṇḍike dehī’’ti. Tena kho pana samayena sāvatthiyaṃ ussavo hoti. Yathābhataṃ lasuṇaṃ parikkhayaṃ agamāsi. Bhikkhuniyo taṃ upāsakaṃ upasaṅkamitvā etadavocuṃ – ‘‘lasuṇena, āvuso, attho’’ti. ‘‘Natthāyye. Yathābhataṃ lasuṇaṃ parikkhīṇaṃ. Khettaṃ gacchathā’’ti. Thullanandā bhikkhunī khettaṃ gantvā na mattaṃ jānitvā bahuṃ lasuṇaṃ harāpesi. Khettapālo ujjhāyati khiyyati vipāceti – ‘‘kathañhi nāma bhikkhuniyo na mattaṃ jānitvā bahuṃ lasuṇaṃ harāpessantī’’ti! Assosuṃ kho bhikkhuniyo tassa khettapālassa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā na mattaṃ jānitvā bahuṃ lasuṇaṃ harāpessatī’’ti…pe… saccaṃ kira, bhikkhave, thullanandā bhikkhunī na mattaṃ jānitvā bahuṃ lasuṇaṃ harāpetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī na mattaṃ jānitvā bahuṃ lasuṇaṃ harāpessati! Netaṃ, bhikkhave, appasannānaṃ vā pasādāya…pe… dhammiṃ kathaṃ katvā bhikkhū āmantesi –
‘‘бхууд̇абуб̣б̣ам̣, бхигкавз, т̇уллананд̣̇аа бхигкуний ан̃н̃ад̇арасса б̣раахман̣асса баж̇аабад̇и ахоси. д̇иссо жа д̇хийд̇аро – нанд̣̇аа, нанд̣̇авад̇ий, сунд̣̇арийнанд̣̇аа. ат̇а ко, бхигкавз, со б̣раахман̣о гаалан̇гад̇ваа ан̃н̃ад̇арам̣ хам̣саяоним̣ убабаж̇ж̇и. д̇асса саб̣б̣асован̣н̣амаяаа бад̇д̇аа ахзсум̣. со д̇аасам̣ згзгам̣ бад̇д̇ам̣ д̣̇зд̇и. ат̇а ко, бхигкавз, т̇уллананд̣̇аа бхигкуний ‘‘аяам̣ хам̣со амхаагам̣ згзгам̣ бад̇д̇ам̣ д̣̇зд̇ий’’д̇и д̇ам̣ хам̣сарааж̇ам̣ г̇ахзд̇ваа ниббад̇д̇ам̣ агааси. д̇асса буна ж̇ааяамаанаа бад̇д̇аа сзд̇аа самбаж̇ж̇им̣су. д̇ад̣̇ааби, бхигкавз, т̇уллананд̣̇аа бхигкуний ад̇илобхзна суван̣н̣аа барихийнаа. ид̣̇аани ласун̣аа барихааяиссад̇ий’’д̇и.
‘‘Bhūtapubbaṃ, bhikkhave, thullanandā bhikkhunī aññatarassa brāhmaṇassa pajāpati ahosi. Tisso ca dhītaro – nandā, nandavatī, sundarīnandā. Atha kho, bhikkhave, so brāhmaṇo kālaṅkatvā aññataraṃ haṃsayoniṃ upapajji. Tassa sabbasovaṇṇamayā pattā ahesuṃ. So tāsaṃ ekekaṃ pattaṃ deti. Atha kho, bhikkhave, thullanandā bhikkhunī ‘‘ayaṃ haṃso amhākaṃ ekekaṃ pattaṃ detī’’ti taṃ haṃsarājaṃ gahetvā nippattaṃ akāsi. Tassa puna jāyamānā pattā setā sampajjiṃsu. Tadāpi, bhikkhave, thullanandā bhikkhunī atilobhena suvaṇṇā parihīnā. Idāni lasuṇā parihāyissatī’’ti.
3 ‘‘яам̣ лад̣̇д̇хам̣ д̇зна д̇удтаб̣б̣ам̣, ад̇илобхо хи баабаго;
4 ‘‘Yaṃ laddhaṃ tena tuṭṭhabbaṃ, atilobho hi pāpako;
хам̣сарааж̇ам̣ г̇ахзд̇ваана, суван̣н̣аа барихааяат̇аа’’д̇и.
Haṃsarājaṃ gahetvāna, suvaṇṇā parihāyathā’’ti.
ат̇а ко бхаг̇аваа т̇уллананд̣̇ам̣ бхигкуним̣ анзгабарияааязна виг̇арахид̇ваа д̣̇уб̣бхарад̇ааяа…бз… зван̃жа бана, бхигкавз, бхигкунияо имам̣ сигкаабад̣̇ам̣ уд̣̇д̣̇исанд̇у –
Atha kho bhagavā thullanandaṃ bhikkhuniṃ anekapariyāyena vigarahitvā dubbharatāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
794. ‘‘яаа бана бхигкуний ласун̣ам̣ каад̣̇зяяа баажид̇д̇ияа’’нд̇и.
794.‘‘Yā pana bhikkhunī lasuṇaṃ khādeyya pācittiya’’nti.
795. яаа банаад̇и яаа яаад̣̇исаа…бз… бхигкунийд̇и…бз… аяам̣ имасмим̣ ад̇т̇з ад̇хиббзд̇аа бхигкунийд̇и.
795.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ласун̣ам̣ наама мааг̇ад̇хагам̣ вужжад̇и.
Lasuṇaṃ nāma māgadhakaṃ vuccati.
‘‘каад̣̇иссаамийд̇и бадиг̇г̇ан̣хаа’’д̇и, аабад̇д̇и д̣̇уггадасса. аж̇жхохаарз аж̇жхохаарз аабад̇д̇и баажид̇д̇ияасса.
‘‘Khādissāmīti paṭiggaṇhā’’ti, āpatti dukkaṭassa. Ajjhohāre ajjhohāre āpatti pācittiyassa.
796. ласун̣з ласун̣асан̃н̃аа каад̣̇ад̇и, аабад̇д̇и баажид̇д̇ияасса. ласун̣з взмад̇игаа каад̣̇ад̇и, аабад̇д̇и баажид̇д̇ияасса. ласун̣з аласун̣асан̃н̃аа каад̣̇ад̇и, аабад̇д̇и баажид̇д̇ияасса.
796. Lasuṇe lasuṇasaññā khādati, āpatti pācittiyassa. Lasuṇe vematikā khādati, āpatti pācittiyassa. Lasuṇe alasuṇasaññā khādati, āpatti pācittiyassa.
аласун̣з ласун̣асан̃н̃аа каад̣̇ад̇и, аабад̇д̇и д̣̇уггадасса. аласун̣з взмад̇игаа каад̣̇ад̇и, аабад̇д̇и д̣̇уггадасса. аласун̣з аласун̣асан̃н̃аа каад̣̇ад̇и, анаабад̇д̇и.
Alasuṇe lasuṇasaññā khādati, āpatti dukkaṭassa. Alasuṇe vematikā khādati, āpatti dukkaṭassa. Alasuṇe alasuṇasaññā khādati, anāpatti.
797. анаабад̇д̇и балан̣д̣угз, бхан̃ж̇анагз, харийд̇агз, жаабаласун̣з, суубасамбаагз, мам̣сасамбаагз, д̇зласамбаагз, саал̣авз, уд̇д̇арибхан̇г̇з, уммад̇д̇игааяа, аад̣̇игаммигааяаад̇и.
797. Anāpatti palaṇḍuke, bhañjanake, harītake, cāpalasuṇe, sūpasampāke, maṃsasampāke, telasampāke, sāḷave, uttaribhaṅge, ummattikāya, ādikammikāyāti.
батамасигкаабад̣̇ам̣ нидтид̇ам̣.
Paṭhamasikkhāpadaṃ niṭṭhitaṃ.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / бхигкунийвибхан̇г̇а-адтагат̇аа • Bhikkhunīvibhaṅga-aṭṭhakathā / 1. батамаласун̣асигкаабад̣̇аван̣н̣анаа • 1. Paṭhamalasuṇasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 1. ласун̣аваг̇г̇аван̣н̣анаа • 1. Lasuṇavaggavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 1. батамаласун̣асигкаабад̣̇аван̣н̣анаа • 1. Paṭhamalasuṇasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 1. батамаласун̣аад̣̇исигкаабад̣̇аван̣н̣анаа • 1. Paṭhamalasuṇādisikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 1. батамасигкаабад̣̇а-ад̇т̇аяож̇анаа • 1. Paṭhamasikkhāpada-atthayojanā
