| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၃. နဂ္ဂဝဂ္ဂော
3. Naggavaggo
၁. ပဌမသိက္ခာပဒံ
1. Paṭhamasikkhāpadaṃ
၈၈၃. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန သမ္ဗဟုလာ 1 ဘိက္ခုနိယော အစိရဝတိယာ နဒိယာ ဝေသိယာဟိ သဒ္ဓိံ နဂ္ဂာ ဧကတိတ္ထေ နဟာယန္တိ။ ဝေသိယာ တာ ဘိက္ခုနိယော ဥပ္ပဏ္ဍေသုံ – ‘‘ကိံ နု ခော နာမ တုမ္ဟာကံ, အယ္ယေ, ဒဟရာနံ 2 ဗ္ရဟ္မစရိယံ စိဏ္ဏေန, နနု နာမ ကာမာ ပရိဘုဉ္ဇိတဗ္ဗာ ! ယဒာ ဇိဏ္ဏာ ဘဝိသ္သထ တဒာ ဗ္ရဟ္မစရိယံ စရိသ္သထ။ ဧဝံ တုမ္ဟာကံ ဥဘော အတ္ထာ ပရိဂ္ဂဟိတာ ဘဝိသ္သန္တီ’’တိ။ ဘိက္ခုနိယော ဝေသိယာဟိ ဥပ္ပဏ္ဍိယမာနာ မင္ကူ အဟေသုံ။ အထ ခော တာ ဘိက္ခုနိယော ဥပသ္သယံ ဂန္တ္ဝာ ဘိက္ခုနီနံ ဧတမတ္ထံ အာရောစေသုံ။ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘တေန ဟိ, ဘိက္ခဝေ, ဘိက္ခုနီနံ သိက္ခာပဒံ ပညပေသ္သာမိ ဒသ အတ္ထဝသေ ပဋိစ္စ – သင္ဃသုဋ္ဌုတာယ။ပေ.။ ဝိနယာနုဂ္ဂဟာယ။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
883. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā 3 bhikkhuniyo aciravatiyā nadiyā vesiyāhi saddhiṃ naggā ekatitthe nahāyanti. Vesiyā tā bhikkhuniyo uppaṇḍesuṃ – ‘‘kiṃ nu kho nāma tumhākaṃ, ayye, daharānaṃ 4 brahmacariyaṃ ciṇṇena, nanu nāma kāmā paribhuñjitabbā ! Yadā jiṇṇā bhavissatha tadā brahmacariyaṃ carissatha. Evaṃ tumhākaṃ ubho atthā pariggahitā bhavissantī’’ti. Bhikkhuniyo vesiyāhi uppaṇḍiyamānā maṅkū ahesuṃ. Atha kho tā bhikkhuniyo upassayaṃ gantvā bhikkhunīnaṃ etamatthaṃ ārocesuṃ. Bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhunīnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya…pe… vinayānuggahāya. Evañca pana, bhikkhave, bhikkhuniyo imaṃ sikkhāpadaṃ uddisantu –
၈၈၄. ‘‘ယာ ပန ဘိက္ခုနီ နဂ္ဂာ နဟာယေယ္ယ, ပာစိတ္တိယ’’န္တိ။
884.‘‘Yāpana bhikkhunī naggā nahāyeyya, pācittiya’’nti.
၈၈၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။
885.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
နဂ္ဂာ နဟာယေယ္ယာတိ အနိဝတ္ထာ ဝာ အပာရုတာ ဝာ နဟာယတိ, ပယောဂေ ဒုက္ကဋံ။ နဟာနပရိယောသာနေ အာပတ္တိ ပာစိတ္တိယသ္သ။
Naggā nahāyeyyāti anivatthā vā apārutā vā nahāyati, payoge dukkaṭaṃ. Nahānapariyosāne āpatti pācittiyassa.
၈၈၆. အနာပတ္တိ အစ္ဆိန္နစီဝရိကာယ ဝာ နဋ္ဌစီဝရိကာယ ဝာ, အာပဒာသု, ဥမ္မတ္တိကာယ, အာဒိကမ္မိကာယာတိ။
886. Anāpatti acchinnacīvarikāya vā naṭṭhacīvarikāya vā, āpadāsu, ummattikāya, ādikammikāyāti.
ပဌမသိက္ခာပဒံ နိဋ္ဌိတံ။
Paṭhamasikkhāpadaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၁. ပဌမသိက္ခာပဒဝဏ္ဏနာ • 1. Paṭhamasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၃. နဂ္ဂဝဂ္ဂဝဏ္ဏနာ • 3. Naggavaggavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၁-၂. ပဌမဒုတိယသိက္ခာပဒဝဏ္ဏနာ • 1-2. Paṭhamadutiyasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. ပဌမာဒိသိက္ခာပဒဝဏ္ဏနာ • 1. Paṭhamādisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁. ပဌမသိက္ခာပဒ-အတ္ထယောဇနာ • 1. Paṭhamasikkhāpada-atthayojanā
