| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
9. ඡත්‌තුපාහනවග්‌ගො
9. Chattupāhanavaggo
1. පඨමසික්‌ඛාපදං
1. Paṭhamasikkhāpadaṃ
1178. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ඡබ්‌බග්‌ගියා භික්‌ඛුනියො ඡත්‌තුපාහනං ධාරෙන්‌ති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛුනියො ඡත්‌තුපාහනං ධාරෙස්‌සන්‌ති, සෙය්‍යථාපි ගිහිනියො කාමභොගිනියො’’ති! අස්‌සොසුං ඛො භික්‌ඛුනියො තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛුනියො ඡත්‌තුපාහනං ධාරෙස්‌සන්‌තී’’ති…පෙ.… සච්‌චං කිර, භික්‌ඛවෙ, ඡබ්‌බග්‌ගියා භික්‌ඛුනියො ඡත්‌තුපාහනං ධාරෙන්‌තීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ඡබ්‌බග්‌ගියා භික්‌ඛුනියො ඡත්‌තුපාහනං ධාරෙස්‌සන්‌ති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1178. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo chattupāhanaṃ dhārenti. Manussā ujjhāyanti khiyyanti vipācenti – ‘‘kathañhi nāma bhikkhuniyo chattupāhanaṃ dhāressanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo chattupāhanaṃ dhāressantī’’ti…pe… saccaṃ kira, bhikkhave, chabbaggiyā bhikkhuniyo chattupāhanaṃ dhārentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo chattupāhanaṃ dhāressanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘යා පන භික්‌ඛුනී ඡත්‌තුපාහනං ධාරෙය්‍ය, පාචිත්‌තිය’’න්‌ති.
‘‘Yā pana bhikkhunī chattupāhanaṃ dhāreyya, pācittiya’’nti.
එවඤ්‌චිදං භගවතා භික්‌ඛුනීනං සික්‌ඛාපදං පඤ්‌ඤත්‌තං හොති.
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
1179. තෙන ඛො පන සමයෙන අඤ්‌ඤතරා භික්‌ඛුනී ගිලානා හොති. තස්‌සා විනා ඡත්‌තුපාහනං න ඵාසු හොති…පෙ.… භගවතො එතමත්‌ථං ආරොචෙසුං…පෙ.… අනුජානාමි, භික්‌ඛවෙ, ගිලානාය භික්‌ඛුනියා ඡත්‌තුපාහනං. එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1179. Tena kho pana samayena aññatarā bhikkhunī gilānā hoti. Tassā vinā chattupāhanaṃ na phāsu hoti…pe… bhagavato etamatthaṃ ārocesuṃ…pe… anujānāmi, bhikkhave, gilānāya bhikkhuniyā chattupāhanaṃ. Evañca pana, bhikkhave, bhikkhuniyo imaṃ sikkhāpadaṃ uddisantu –
1180. ‘‘යා පන භික්‌ඛුනී අගිලානා ඡත්‌තුපාහනං ධාරෙය්‍ය, පාචිත්‌තිය’’න්‌ති.
1180.‘‘Yā pana bhikkhunī agilānā chattupāhanaṃ dhāreyya, pācittiya’’nti.
1181. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
1181.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
අගිලානා නාම යස්‌සා විනා ඡත්‌තුපාහනං ඵාසු හොති.
Agilānā nāma yassā vinā chattupāhanaṃ phāsu hoti.
ගිලානා නාම යස්‌සා විනා ඡත්‌තුපාහනං න ඵාසු හොති.
Gilānā nāma yassā vinā chattupāhanaṃ na phāsu hoti.
ඡත්‌තං නාම තීණි ඡත්‌තානි – සෙතච්‌ඡත්‌තං, කිලඤ්‌ජච්‌ඡත්‌තං, පණ්‌ණච්‌ඡත්‌තං මණ්‌ඩලබද්‌ධං සලාකබද්‌ධං. ධාරෙය්‍යාති සකිම්‌පි ධාරෙති, ආපත්‌ති පාචිත්‌තියස්‌ස.
Chattaṃ nāma tīṇi chattāni – setacchattaṃ, kilañjacchattaṃ, paṇṇacchattaṃ maṇḍalabaddhaṃ salākabaddhaṃ. Dhāreyyāti sakimpi dhāreti, āpatti pācittiyassa.
1182. අගිලානා අගිලානසඤ්‌ඤා ඡත්‌තුපාහනං ධාරෙති, ආපත්‌ති පාචිත්‌තියස්‌ස. අගිලානා වෙමතිකා ඡත්‌තුපාහනං ධාරෙති, ආපත්‌ති පාචිත්‌තියස්‌ස. අගිලානා ගිලානසඤ්‌ඤා ඡත්‌තුපාහනං ධාරෙති, ආපත්‌ති පාචිත්‌තියස්‌ස.
1182. Agilānā agilānasaññā chattupāhanaṃ dhāreti, āpatti pācittiyassa. Agilānā vematikā chattupāhanaṃ dhāreti, āpatti pācittiyassa. Agilānā gilānasaññā chattupāhanaṃ dhāreti, āpatti pācittiyassa.
ඡත්‌තං ධාරෙති න උපාහනං, ආපත්‌ති දුක්‌කටස්‌ස. උපාහනං ධාරෙති න ඡත්‌තං, ආපත්‌ති දුක්‌කටස්‌ස . ගිලානා අගිලානසඤ්‌ඤා, ආපත්‌ති දුක්‌කටස්‌ස. ගිලානා වෙමතිකා, ආපත්‌ති දුක්‌කටස්‌ස. ගිලානා ගිලානසඤ්‌ඤා, අනාපත්‌ති.
Chattaṃ dhāreti na upāhanaṃ, āpatti dukkaṭassa. Upāhanaṃ dhāreti na chattaṃ, āpatti dukkaṭassa . Gilānā agilānasaññā, āpatti dukkaṭassa. Gilānā vematikā, āpatti dukkaṭassa. Gilānā gilānasaññā, anāpatti.
1183. අනාපත්‌ති ගිලානාය, ආරාමෙ ආරාමූපචාරෙ ධාරෙති, ආපදාසු, උම්‌මත්‌තිකාය, ආදිකම්‌මිකායාති.
1183. Anāpatti gilānāya, ārāme ārāmūpacāre dhāreti, āpadāsu, ummattikāya, ādikammikāyāti.
පඨමසික්‌ඛාපදං නිට්‌ඨිතං.
Paṭhamasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 1. පඨමසික්‌ඛාපදවණ්‌ණනා • 1. Paṭhamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 1. පඨමසික්‌ඛාපද-අත්‌ථයොජනා • 1. Paṭhamasikkhāpada-atthayojanā
