| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༣. ནགྒཝགྒོ
3. Naggavaggo
༡. པཋམསིཀྑཱཔདཾ
1. Paṭhamasikkhāpadaṃ
༨༨༣. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན སམྦཧུལཱ 1 བྷིཀྑུནིཡོ ཨཙིརཝཏིཡཱ ནདིཡཱ ཝེསིཡཱཧི སདྡྷིཾ ནགྒཱ ཨེཀཏིཏྠེ ནཧཱཡནྟི། ཝེསིཡཱ ཏཱ བྷིཀྑུནིཡོ ཨུཔྤཎྜེསུཾ – ‘‘ཀིཾ ནུ ཁོ ནཱམ ཏུམྷཱཀཾ, ཨཡྻེ, དཧརཱནཾ 2 བྲཧྨཙརིཡཾ ཙིཎྞེན, ནནུ ནཱམ ཀཱམཱ པརིབྷུཉྫིཏབྦཱ ! ཡདཱ ཛིཎྞཱ བྷཝིསྶཐ ཏདཱ བྲཧྨཙརིཡཾ ཙརིསྶཐ། ཨེཝཾ ཏུམྷཱཀཾ ཨུབྷོ ཨཏྠཱ པརིགྒཧིཏཱ བྷཝིསྶནྟཱི’’ཏི། བྷིཀྑུནིཡོ ཝེསིཡཱཧི ཨུཔྤཎྜིཡམཱནཱ མངྐཱུ ཨཧེསུཾ། ཨཐ ཁོ ཏཱ བྷིཀྑུནིཡོ ཨུཔསྶཡཾ གནྟྭཱ བྷིཀྑུནཱིནཾ ཨེཏམཏྠཾ ཨཱརོཙེསུཾ། བྷིཀྑུནིཡོ བྷིཀྑཱུནཾ ཨེཏམཏྠཾ ཨཱརོཙེསུཾ། བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཏེན ཧི, བྷིཀྑཝེ, བྷིཀྑུནཱིནཾ སིཀྑཱཔདཾ པཉྙཔེསྶཱམི དས ཨཏྠཝསེ པཊིཙྩ – སངྒྷསུཊྛུཏཱཡ…པེ॰… ཝིནཡཱནུགྒཧཱཡ། ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
883. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā 3 bhikkhuniyo aciravatiyā nadiyā vesiyāhi saddhiṃ naggā ekatitthe nahāyanti. Vesiyā tā bhikkhuniyo uppaṇḍesuṃ – ‘‘kiṃ nu kho nāma tumhākaṃ, ayye, daharānaṃ 4 brahmacariyaṃ ciṇṇena, nanu nāma kāmā paribhuñjitabbā ! Yadā jiṇṇā bhavissatha tadā brahmacariyaṃ carissatha. Evaṃ tumhākaṃ ubho atthā pariggahitā bhavissantī’’ti. Bhikkhuniyo vesiyāhi uppaṇḍiyamānā maṅkū ahesuṃ. Atha kho tā bhikkhuniyo upassayaṃ gantvā bhikkhunīnaṃ etamatthaṃ ārocesuṃ. Bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhunīnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya…pe… vinayānuggahāya. Evañca pana, bhikkhave, bhikkhuniyo imaṃ sikkhāpadaṃ uddisantu –
༨༨༤. ‘‘ཡཱ པན བྷིཀྑུནཱི ནགྒཱ ནཧཱཡེཡྻ, པཱཙིཏྟིཡ’’ནྟི།
884.‘‘Yāpana bhikkhunī naggā nahāyeyya, pācittiya’’nti.
༨༨༥. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
885.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ནགྒཱ ནཧཱཡེཡྻཱཏི ཨནིཝཏྠཱ ཝཱ ཨཔཱརུཏཱ ཝཱ ནཧཱཡཏི, པཡོགེ དུཀྐཊཾ། ནཧཱནཔརིཡོསཱནེ ཨཱཔཏྟི པཱཙིཏྟིཡསྶ།
Naggā nahāyeyyāti anivatthā vā apārutā vā nahāyati, payoge dukkaṭaṃ. Nahānapariyosāne āpatti pācittiyassa.
༨༨༦. ཨནཱཔཏྟི ཨཙྪིནྣཙཱིཝརིཀཱཡ ཝཱ ནཊྛཙཱིཝརིཀཱཡ ཝཱ, ཨཱཔདཱསུ, ཨུམྨཏྟིཀཱཡ, ཨཱདིཀམྨིཀཱཡཱཏི།
886. Anāpatti acchinnacīvarikāya vā naṭṭhacīvarikāya vā, āpadāsu, ummattikāya, ādikammikāyāti.
པཋམསིཀྑཱཔདཾ ནིཊྛིཏཾ།
Paṭhamasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༡. པཋམསིཀྑཱཔདཝཎྞནཱ • 1. Paṭhamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༣. ནགྒཝགྒཝཎྞནཱ • 3. Naggavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༡-༢. པཋམདུཏིཡསིཀྑཱཔདཝཎྞནཱ • 1-2. Paṭhamadutiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡. པཋམསིཀྑཱཔད-ཨཏྠཡོཛནཱ • 1. Paṭhamasikkhāpada-atthayojanā
