| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
4. පඨමසික්‌ඛාපදසුත්‌තං
4. Paṭhamasikkhāpadasuttaṃ
235. ‘‘චත්‌තාරිමානි, භික්‌ඛවෙ, කම්‌මානි මයා සයං අභිඤ්‌ඤා සච්‌ඡිකත්‌වා පවෙදිතානි. කතමානි චත්‌තාරි? අත්‌ථි , භික්‌ඛවෙ, කම්‌මං කණ්‌හං කණ්‌හවිපාකං; අත්‌ථි, භික්‌ඛවෙ, කම්‌මං සුක්‌කං සුක්‌කවිපාකං; අත්‌ථි, භික්‌ඛවෙ, කම්‌මං කණ්‌හසුක්‌කං කණ්‌හසුක්‌කවිපාකං ; අත්‌ථි, භික්‌ඛවෙ, කම්‌මං අකණ්‌හඅසුක්‌කං අකණ්‌හඅසුක්‌කවිපාකං කම්‌මක්‌ඛයාය සංවත්‌තති. කතමඤ්‌ච, භික්‌ඛවෙ, කම්‌මං කණ්‌හං කණ්‌හවිපාකං? ඉධ, භික්‌ඛවෙ, එකච්‌චො පාණාතිපාතී හොති, අදින්‌නාදායී හොති, කාමෙසුමිච්‌ඡාචාරී හොති, මුසාවාදී හොති, සුරාමෙරයමජ්‌ජපමාදට්‌ඨායී හොති. ඉදං වුච්‌චති, භික්‌ඛවෙ, කම්‌මං කණ්‌හං කණ්‌හවිපාකං.
235. ‘‘Cattārimāni, bhikkhave, kammāni mayā sayaṃ abhiññā sacchikatvā paveditāni. Katamāni cattāri? Atthi , bhikkhave, kammaṃ kaṇhaṃ kaṇhavipākaṃ; atthi, bhikkhave, kammaṃ sukkaṃ sukkavipākaṃ; atthi, bhikkhave, kammaṃ kaṇhasukkaṃ kaṇhasukkavipākaṃ ; atthi, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati. Katamañca, bhikkhave, kammaṃ kaṇhaṃ kaṇhavipākaṃ? Idha, bhikkhave, ekacco pāṇātipātī hoti, adinnādāyī hoti, kāmesumicchācārī hoti, musāvādī hoti, surāmerayamajjapamādaṭṭhāyī hoti. Idaṃ vuccati, bhikkhave, kammaṃ kaṇhaṃ kaṇhavipākaṃ.
‘‘කතමඤ්‌ච, භික්‌ඛවෙ, කම්‌මං සුක්‌කං සුක්‌කවිපාකං? ඉධ, භික්‌ඛවෙ, එකච්‌චො පාණාතිපාතා පටිවිරතො හොති, අදින්‌නාදානා පටිවිරතො හොති, කාමෙසුමිච්‌ඡාචාරා පටිවිරතො හොති, මුසාවාදා පටිවිරතො හොති, සුරාමෙරයමජ්‌ජපමාදට්‌ඨානා පටිවිරතො හොති. ඉදං වුච්‌චති, භික්‌ඛවෙ, කම්‌මං සුක්‌කං සුක්‌කවිපාකං.
‘‘Katamañca, bhikkhave, kammaṃ sukkaṃ sukkavipākaṃ? Idha, bhikkhave, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti. Idaṃ vuccati, bhikkhave, kammaṃ sukkaṃ sukkavipākaṃ.
‘‘කතමඤ්‌ච, භික්‌ඛවෙ, කම්‌මං කණ්‌හසුක්‌කං කණ්‌හසුක්‌කවිපාකං? ඉධ, භික්‌ඛවෙ, එකච්‌චො සබ්‍යාබජ්‌ඣම්‌පි අබ්‍යාබජ්‌ඣම්‌පි කායසඞ්‌ඛාරං අභිසඞ්‌ඛරොති…පෙ.… ඉදං වුච්‌චති, භික්‌ඛවෙ, කම්‌මං කණ්‌හසුක්‌කං කණ්‌හසුක්‌කවිපාකං.
‘‘Katamañca, bhikkhave, kammaṃ kaṇhasukkaṃ kaṇhasukkavipākaṃ? Idha, bhikkhave, ekacco sabyābajjhampi abyābajjhampi kāyasaṅkhāraṃ abhisaṅkharoti…pe… idaṃ vuccati, bhikkhave, kammaṃ kaṇhasukkaṃ kaṇhasukkavipākaṃ.
‘‘කතමඤ්‌ච, භික්‌ඛවෙ, කම්‌මං අකණ්‌හඅසුක්‌කං අකණ්‌හඅසුක්‌කවිපාකං කම්‌මක්‌ඛයාය සංවත්‌තති? තත්‍ර, භික්‌ඛවෙ, යමිදං කම්‌මං කණ්‌හං කණ්‌හවිපාකං…පෙ.… ඉදං වුච්‌චති, භික්‌ඛවෙ, කම්‌මං අකණ්‌හඅසුක්‌කං අකණ්‌හඅසුක්‌කවිපාකං කම්‌මක්‌ඛයාය සංවත්‌තති. ඉමානි ඛො, භික්‌ඛවෙ, චත්‌තාරි කම්‌මානි මයා සයං අභිඤ්‌ඤා සච්‌ඡිකත්‌වා පවෙදිතානී’’ති. චතුත්‌ථං.
‘‘Katamañca, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati? Tatra, bhikkhave, yamidaṃ kammaṃ kaṇhaṃ kaṇhavipākaṃ…pe… idaṃ vuccati, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati. Imāni kho, bhikkhave, cattāri kammāni mayā sayaṃ abhiññā sacchikatvā paveditānī’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 4-9. සික්‌ඛාපදසුත්‌තාදිවණ්‌ණනා • 4-9. Sikkhāpadasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3-9. සොණකායනසුත්‌තාදිවණ්‌ණනා • 3-9. Soṇakāyanasuttādivaṇṇanā
