| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
2. அந்த⁴காரவக்³க³வண்ணனா
2. Andhakāravaggavaṇṇanā
1. பட²மஸிக்கா²பத³வண்ணனா
1. Paṭhamasikkhāpadavaṇṇanā
839. ‘‘தி³வாபி அந்த⁴காரங் அத்தி², தப்படிஸேத⁴னத்த²ங் ‘ரத்தந்த⁴காரே’தி வுத்த’’ந்தி வத³ந்தி போராணா. ஸந்திட்டெ²ய்யாதி எத்த² டா²னாபதே³ஸேன சதுப்³பி³தோ⁴பி இரியாபதோ² ஸங்க³ஹிதோ, தஸ்மா புரிஸஸ்ஸ ஹத்த²பாஸே தேன ஸத்³தி⁴ங் சங்கமனாதி³ங் கரொந்தியா பாசித்தியமேவ. ‘‘ஸல்லபெய்ய வா’’தி கேவலங் நிதா³னவஸேன வுத்தங் விஸேஸாபா⁴வதோ. ‘‘ஸல்லபெய்யவாதி புரிஸஸ்ஸ ஹத்த²பாஸே டி²தா ஸல்லபதி, ஆபத்தி பாசித்தியஸ்ஸா’’தி ஹி வுத்தங், தங் ந யுத்தந்தி ஏகே. கஸ்மா? யஸ்மா தஸ்ஸ புரிஸஸ்ஸ ஹத்த²பாஸே டி²தேனேவ ஏகங் பாசித்தியங். ஸல்லபனேனபி அபரம்பி ஏகங் ஆபஜ்ஜதீதி நாபஜ்ஜதி, கத²ங் பஞ்ஞாயதீதி? அங்க³வஸேன. இமஸ்ஸ ஹி ரத்தந்த⁴காரதா, புரிஸஸ்ஸ ஹத்த²பாஸே டா²னங் வா ஸல்லபனங் வா, ஸஹாயாபா⁴வோ, ரஹோபெக்க²தாதி இமானி சத்தாரி அங்கா³னி வுத்தானி. தத்த² யதி³ டா²னபச்சயா ஏகா ஆபத்தி விஸுங் ஸியா, தஸ்ஸா சத்தாரி அங்கா³னி ஸியுங். யதி³ ஸல்லபனபச்சயா ஏகா, தஸ்ஸாபி பஞ்ச அங்கா³னி ஸியுங். தஸ்மா மாதிகாட்ட²கதா²யங் ‘‘சத்தாரி வா பஞ்ச வா அங்கா³னீ’’தி வத்தப்³ப³ங் ஸியா, ந ச வுத்தங், தஸ்மா ஸல்லபனபச்சயா விஸுங் நத்தீ²தி. அத்தி²யேவ, மாதிகாட்ட²கதா²வசனஞ்ச தத³த்த²மேவாதி ஏகே. கத²ங்? ஸஹுப்பத்திதோ த்³வின்னங் ஆபத்தீனங். கிங் வுத்தங் ஹோதி? ஸல்லபனே ஸதி டா²னபச்சயா ஆபஜ்ஜிதப்³ப³ங் சதுரங்கி³கங், ஸல்லபனபச்சயா ஆபஜ்ஜிதப்³ப³ங் சதுரங்கி³கந்தி த்³வே பாசித்தியானி ஸஹுப்பன்னானி ஏகதோ ஆபஜ்ஜந்தீதி. இத³ங் அயுத்தங் பாளிவிரோத⁴தோ. பாளியஞ்ஹி ‘‘ஸல்லபெய்ய வாதி புரிஸஸ்ஸ ஹத்த²பாஸே டி²தா ஸல்லபதி, ஆபத்தி பாசித்தியஸ்ஸா’’தி வுத்தங். யதி³ த்³வே ஸியுங், ‘‘ஆபத்தி த்³வின்னங் பாசித்தியான’’ந்தி ந வத்தப்³ப³தா ஸியாதி. அயங் நயோ து³தியாதீ³ஸுபி யதா²யோக³ங் வேதி³தப்³போ³. எத்த² து³தியேனாபி ஸத்³தி⁴ங் யதி³ பி⁴க்கு²னியா ரஹோபெக்க²தா அத்தி², ஸோ சே புரிஸோ, ந து³தியோ, புரிஸக³ணனாய ஆபத்தியோ. அத² து³தியா பி⁴க்கு²னீ ஹோதி, தஸ்ஸா ச தேன புரிஸேன ஸத்³தி⁴ங் ரஹோபெக்க²தா அத்தி², ஸா ச பி⁴க்கு²னீ ந து³தியா ஹோதி. உபி⁴ன்னம்பி ஆபஜ்ஜதீதி ஏகே, விசாரெத்வா பன க³ஹேதப்³ப³ங். போராணக³ண்டி²பதே³ பன வுத்தங் ‘‘ஹத்த²பாஸே டா²னேன து³க்கட’’ந்தி, தங் பாளியா விருஜ்ஜ²தி. ‘‘புரிஸஸ்ஸ ஹத்த²பாஸே திட்ட²தி, ஆபத்தி பாசித்தியஸ்ஸா’’தி ஹி பாளி, கிங்ப³ஹுனா. சதுத்த²ஸிக்கா²பதே³ மாதிகாட்ட²கதா²யங் (கங்கா²॰ அட்ட²॰ து³தியிகஉய்யோஜனஸிக்கா²பத³வண்ணனா) ‘‘ஸந்திட்ட²னாதீ³ஸு தீணி பாசித்தியானீ’’திஆதி³வசனதோ வத்து²க³ணனாய ஆபத்தி வேதி³தப்³பா³. ‘‘அங்கா³னி செத்த² சத்தாரி பஞ்ச வா’’தி வத்தப்³ப³ந்தி ஸன்னிட்டா²னங்.
839. ‘‘Divāpi andhakāraṃ atthi, tappaṭisedhanatthaṃ ‘rattandhakāre’ti vutta’’nti vadanti porāṇā. Santiṭṭheyyāti ettha ṭhānāpadesena catubbidhopi iriyāpatho saṅgahito, tasmā purisassa hatthapāse tena saddhiṃ caṅkamanādiṃ karontiyā pācittiyameva. ‘‘Sallapeyya vā’’ti kevalaṃ nidānavasena vuttaṃ visesābhāvato. ‘‘Sallapeyyavāti purisassa hatthapāse ṭhitā sallapati, āpatti pācittiyassā’’ti hi vuttaṃ, taṃ na yuttanti eke. Kasmā? Yasmā tassa purisassa hatthapāse ṭhiteneva ekaṃ pācittiyaṃ. Sallapanenapi aparampi ekaṃ āpajjatīti nāpajjati, kathaṃ paññāyatīti? Aṅgavasena. Imassa hi rattandhakāratā, purisassa hatthapāse ṭhānaṃ vā sallapanaṃ vā, sahāyābhāvo, rahopekkhatāti imāni cattāri aṅgāni vuttāni. Tattha yadi ṭhānapaccayā ekā āpatti visuṃ siyā, tassā cattāri aṅgāni siyuṃ. Yadi sallapanapaccayā ekā, tassāpi pañca aṅgāni siyuṃ. Tasmā mātikāṭṭhakathāyaṃ ‘‘cattāri vā pañca vā aṅgānī’’ti vattabbaṃ siyā, na ca vuttaṃ, tasmā sallapanapaccayā visuṃ natthīti. Atthiyeva, mātikāṭṭhakathāvacanañca tadatthamevāti eke. Kathaṃ? Sahuppattito dvinnaṃ āpattīnaṃ. Kiṃ vuttaṃ hoti? Sallapane sati ṭhānapaccayā āpajjitabbaṃ caturaṅgikaṃ, sallapanapaccayā āpajjitabbaṃ caturaṅgikanti dve pācittiyāni sahuppannāni ekato āpajjantīti. Idaṃ ayuttaṃ pāḷivirodhato. Pāḷiyañhi ‘‘sallapeyya vāti purisassa hatthapāse ṭhitā sallapati, āpatti pācittiyassā’’ti vuttaṃ. Yadi dve siyuṃ, ‘‘āpatti dvinnaṃ pācittiyāna’’nti na vattabbatā siyāti. Ayaṃ nayo dutiyādīsupi yathāyogaṃ veditabbo. Ettha dutiyenāpi saddhiṃ yadi bhikkhuniyā rahopekkhatā atthi, so ce puriso, na dutiyo, purisagaṇanāya āpattiyo. Atha dutiyā bhikkhunī hoti, tassā ca tena purisena saddhiṃ rahopekkhatā atthi, sā ca bhikkhunī na dutiyā hoti. Ubhinnampi āpajjatīti eke, vicāretvā pana gahetabbaṃ. Porāṇagaṇṭhipade pana vuttaṃ ‘‘hatthapāse ṭhānena dukkaṭa’’nti, taṃ pāḷiyā virujjhati. ‘‘Purisassa hatthapāse tiṭṭhati, āpatti pācittiyassā’’ti hi pāḷi, kiṃbahunā. Catutthasikkhāpade mātikāṭṭhakathāyaṃ (kaṅkhā. aṭṭha. dutiyikauyyojanasikkhāpadavaṇṇanā) ‘‘santiṭṭhanādīsu tīṇi pācittiyānī’’tiādivacanato vatthugaṇanāya āpatti veditabbā. ‘‘Aṅgāni cettha cattāri pañca vā’’ti vattabbanti sanniṭṭhānaṃ.
பட²மஸிக்கா²பத³வண்ணனா நிட்டி²தா.
Paṭhamasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 1. பட²மஸிக்கா²பத³ங் • 1. Paṭhamasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 1. பட²மஸிக்கா²பத³வண்ணனா • 1. Paṭhamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பட²மஸிக்கா²பத³-அத்த²யோஜனா • 1. Paṭhamasikkhāpada-atthayojanā
