| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā |
၅. စိတ္တာဂာရဝဂ္ဂော
5. Cittāgāravaggo
၁. ပဌမသိက္ခာပဒဝဏ္ဏနာ
1. Paṭhamasikkhāpadavaṇṇanā
၉၇၈. စိတ္တာဂာရဝဂ္ဂသ္သ ပဌမသိက္ခာပဒေ – ရာဇာဂာရန္တိ ရညော ကီဠနဃရံ။ စိတ္တာဂာရန္တိ ကီဠနစိတ္တသာလံ။ အာရာမန္တိ ကီဠနဥပဝနံ။ ဥယ္ယာနန္တိ ကီဠနုယ္ယာနံ။ ပောက္ခရဏီန္တိ ကီဠနပောက္ခရဏိံ။ တသ္မာယေဝ ပဒဘာဇနေ ‘‘ယတ္ထ ကတ္ထစိ ရညော ကီဠိတု’’န္တိအာဒိ ဝုတ္တံ။ ဒသ္သနာယ ဂစ္ဆတိ အာပတ္တိ ဒုက္ကဋသ္သာတိ ဧတ္ထ ပဒဝာရဂဏနာယ ဒုက္ကဋံ။ ယတ္ထ ဌိတာ ပသ္သတီတိ ဧတ္ထ ပန သစေ ဧကသ္မိံယေဝ ဌာနေ ဌိတာ ပဒံ အနုဒ္ဓရမာနာ ပဉ္စပိ ပသ္သတိ, ဧကမေဝ ပာစိတ္တိယံ။ တံ တံ ဒိသာဘာဂံ ဩလောကေတ္ဝာ ပသ္သန္တိယာ ပန ပာဋေက္ကာ အာပတ္တိယော။ ဘိက္ခုသ္သ ပန သဗ္ဗတ္ထ ဒုက္ကဋံ။
978. Cittāgāravaggassa paṭhamasikkhāpade – rājāgāranti rañño kīḷanagharaṃ. Cittāgāranti kīḷanacittasālaṃ. Ārāmanti kīḷanaupavanaṃ. Uyyānanti kīḷanuyyānaṃ. Pokkharaṇīnti kīḷanapokkharaṇiṃ. Tasmāyeva padabhājane ‘‘yattha katthaci rañño kīḷitu’’ntiādi vuttaṃ. Dassanāya gacchati āpatti dukkaṭassāti ettha padavāragaṇanāya dukkaṭaṃ. Yattha ṭhitā passatīti ettha pana sace ekasmiṃyeva ṭhāne ṭhitā padaṃ anuddharamānā pañcapi passati, ekameva pācittiyaṃ. Taṃ taṃ disābhāgaṃ oloketvā passantiyā pana pāṭekkā āpattiyo. Bhikkhussa pana sabbattha dukkaṭaṃ.
၉၈၁. အာရာမေ ဌိတာတိ အဇ္ဈာရာမေ ရာဇာဂာရာဒီနိ ကရောန္တိ, တာနိ ပသ္သန္တိယာ အနာပတ္တိ။ ဂစ္ဆန္တီ ဝာ အာဂစ္ဆန္တီ ဝာတိ ပိဏ္ဍပာတာဒီနံ အတ္ထာယ ဂစ္ဆန္တိယာ မဂ္ဂော ဟောတိ, တာနိ ပသ္သတိ, အနာပတ္တိ။ သတိ ကရဏီယေ ဂန္တ္ဝာတိ ရညော သန္တိကံ ကေနစိ ကရဏီယေန ဂန္တ္ဝာ ပသ္သတိ, အနာပတ္တိ။ အာပဒာသူတိ ကေနစိ ဥပဒ္ဒုတာ ပဝိသိတ္ဝာ ပသ္သတိ, အနာပတ္တိ။ သေသံ ဥတ္တာနမေဝ။
981.Ārāme ṭhitāti ajjhārāme rājāgārādīni karonti, tāni passantiyā anāpatti. Gacchantī vā āgacchantī vāti piṇḍapātādīnaṃ atthāya gacchantiyā maggo hoti, tāni passati, anāpatti. Sati karaṇīye gantvāti rañño santikaṃ kenaci karaṇīyena gantvā passati, anāpatti. Āpadāsūti kenaci upaddutā pavisitvā passati, anāpatti. Sesaṃ uttānameva.
ဧဠကလောမသမုဋ္ဌာနံ – ကိရိယံ, နောသညာဝိမောက္ခံ, အစိတ္တကံ, လောကဝဇ္ဇံ, ကာယကမ္မံ, အကုသလစိတ္တံ, တိဝေဒနန္တိ။
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, lokavajjaṃ, kāyakammaṃ, akusalacittaṃ, tivedananti.
ပဌမသိက္ခာပဒံ။
Paṭhamasikkhāpadaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ဘိက္ခုနီဝိဘင္ဂ • Bhikkhunīvibhaṅga / ၁. ပဌမသိက္ခာပဒံ • 1. Paṭhamasikkhāpadaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၅. စိတ္တာဂာရဝဂ္ဂဝဏ္ဏနာ • 5. Cittāgāravaggavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၁. ပဌမသိက္ခာပဒဝဏ္ဏနာ • 1. Paṭhamasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. ပဌမာဒိသိက္ခာပဒဝဏ္ဏနာ • 1. Paṭhamādisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁. ပဌမသိက္ခာပဒ-အတ္ထယောဇနာ • 1. Paṭhamasikkhāpada-atthayojanā
