| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. பட²மஸிக்கா²ஸுத்தவண்ணனா
6. Paṭhamasikkhāsuttavaṇṇanā
87. ச²ட்டே² அத்தகாமாதி அத்தனோ ஹிதகாமா. யத்தே²தங் ஸப்³ப³ங் ஸமோதா⁴னங் க³ச்ச²தீதி யாஸு ஸிக்கா²ஸு ஸப்³ப³மேதங் தி³யட்³ட⁴ஸிக்கா²பத³ஸதங் ஸங்க³ஹங் க³ச்ச²தி. பரிபூரகாரீ ஹோதீதி ஸமத்தகாரீ ஹோதி. மத்தஸோ காரீதி பமாணேன காரகோ, ஸப்³பே³ன ஸப்³ப³ங் காதுங் ந ஸக்கோதீதி அத்தோ². கு²த்³தா³னுகு²த்³த³கானீதி சத்தாரி பாராஜிகானி ட²பெத்வா ஸேஸஸிக்கா²பதா³னி. தத்ராபி ஸங்கா⁴தி³ஸேஸங் கு²த்³த³கங், து²ல்லச்சயங் அனுகு²த்³த³கங் நாம. து²ல்லச்சயஞ்ச கு²த்³த³கங், பாசித்தியங் அனுகு²த்³த³கங் நாம, பாசித்தியஞ்ச கு²த்³த³கங், பாடிதே³ஸனியது³க்கடது³ப்³பா⁴ஸிதானி அனுகு²த்³த³கானி நாம. இமே பன அங்கு³த்தரமஹானிகாயவளஞ்ஜனகஆசரியா ‘‘சத்தாரி பாராஜிகானி ட²பெத்வா ஸேஸானி ஸப்³பா³னிபி கு²த்³தா³னுகு²த்³த³கானீ’’தி வத³ந்தி. தானி ஆபஜ்ஜதிபி வுட்டா²திபீதி எத்த² பன கீ²ணாஸவோ தாவ லோகவஜ்ஜங் நாபஜ்ஜதி, பண்ணத்திவஜ்ஜமேவ ஆபஜ்ஜதி. ஆபஜ்ஜந்தோ ச காயேனபி வாசாயபி சித்தேனபி ஆபஜ்ஜதி. காயேன ஆபஜ்ஜந்தோ குடிகாரஸஹஸெய்யாதீ³னி ஆபஜ்ஜதி, வாசாய ஆபஜ்ஜந்தோ ஸஞ்சரித்தபத³ஸோத⁴ம்மாதீ³னி, சித்தேன ஆபஜ்ஜந்தோ ரூபியபடிக்³க³ஹணங் ஆபஜ்ஜதி. ஸெக்கே²ஸுபி ஏஸேவ நயோ. ந ஹி மெத்த², பி⁴க்க²வே, அப⁴ப்³ப³தா வுத்தாதி, பி⁴க்க²வே, ந ஹி மயா எத்த² ஏவரூபங் ஆபத்திங் ஆபஜ்ஜனே ச வுட்டா²னே ச அரியபுக்³க³லஸ்ஸ அப⁴ப்³ப³தா கதி²தா. ஆதி³ப்³ரஹ்மசரியகானீதி மக்³க³ப்³ரஹ்மசரியஸ்ஸ ஆதி³பூ⁴தானி சத்தாரி மஹாஸீலஸிக்கா²பதா³னி. ப்³ரஹ்மசரியஸாருப்பானீதி தானியேவ சதுமக்³க³ப்³ரஹ்மசரியஸ்ஸ ஸாருப்பானி அனுச்ச²விகானி. தத்தா²தி தேஸு ஸிக்கா²பதே³ஸு. து⁴வஸீலோதி நிப³த்³த⁴ஸீலோ. டி²தஸீலோதி பதிட்டி²தஸீலோ. ஸோதாபன்னோதி ஸோதஸங்கா²தேன மக்³கே³ன ப²லங் ஆபன்னோ. அவினிபாதத⁴ம்மோதி சதூஸு அபாயேஸு அபதனஸபா⁴வோ. நியதோதி ஸோதாபத்திமக்³க³னியாமேன நியதோ. ஸம்போ³தி⁴பராயணோதி உபரிமக்³க³த்தயஸம்போ³தி⁴பராயணோ.
87. Chaṭṭhe attakāmāti attano hitakāmā. Yatthetaṃ sabbaṃ samodhānaṃ gacchatīti yāsu sikkhāsu sabbametaṃ diyaḍḍhasikkhāpadasataṃ saṅgahaṃ gacchati. Paripūrakārī hotīti samattakārī hoti. Mattaso kārīti pamāṇena kārako, sabbena sabbaṃ kātuṃ na sakkotīti attho. Khuddānukhuddakānīti cattāri pārājikāni ṭhapetvā sesasikkhāpadāni. Tatrāpi saṅghādisesaṃ khuddakaṃ, thullaccayaṃ anukhuddakaṃ nāma. Thullaccayañca khuddakaṃ, pācittiyaṃ anukhuddakaṃ nāma, pācittiyañca khuddakaṃ, pāṭidesaniyadukkaṭadubbhāsitāni anukhuddakāni nāma. Ime pana aṅguttaramahānikāyavaḷañjanakaācariyā ‘‘cattāri pārājikāni ṭhapetvā sesāni sabbānipi khuddānukhuddakānī’’ti vadanti. Tāni āpajjatipi vuṭṭhātipīti ettha pana khīṇāsavo tāva lokavajjaṃ nāpajjati, paṇṇattivajjameva āpajjati. Āpajjanto ca kāyenapi vācāyapi cittenapi āpajjati. Kāyena āpajjanto kuṭikārasahaseyyādīni āpajjati, vācāya āpajjanto sañcarittapadasodhammādīni, cittena āpajjanto rūpiyapaṭiggahaṇaṃ āpajjati. Sekkhesupi eseva nayo. Na hi mettha, bhikkhave, abhabbatā vuttāti, bhikkhave, na hi mayā ettha evarūpaṃ āpattiṃ āpajjane ca vuṭṭhāne ca ariyapuggalassa abhabbatā kathitā. Ādibrahmacariyakānīti maggabrahmacariyassa ādibhūtāni cattāri mahāsīlasikkhāpadāni. Brahmacariyasāruppānīti tāniyeva catumaggabrahmacariyassa sāruppāni anucchavikāni. Tatthāti tesu sikkhāpadesu. Dhuvasīloti nibaddhasīlo. Ṭhitasīloti patiṭṭhitasīlo. Sotāpannoti sotasaṅkhātena maggena phalaṃ āpanno. Avinipātadhammoti catūsu apāyesu apatanasabhāvo. Niyatoti sotāpattimagganiyāmena niyato. Sambodhiparāyaṇoti uparimaggattayasambodhiparāyaṇo.
தனுத்தாதி தனுபா⁴வோ. ஸகதா³கா³மினோ ஹி ராகா³த³யோ அப்³ப⁴படலங் விய மச்சி²காபத்தங் விய ச தனுகா ஹொந்தி, ந ப³ஹலா. ஓரம்பா⁴கி³யானந்தி ஹெட்டா²பா⁴கி³யானங். ஸங்யோஜனானந்தி ப³ந்த⁴னானங். பரிக்க²யாதி பரிக்க²யேன. ஓபபாதிகோ ஹோதீதி உப்பன்னகோ ஹோதி. தத்த² பரினிப்³பா³யீதி ஹெட்டா² அனோதரித்வா உபரியேவ பரினிப்³பா³னத⁴ம்மோ. அனாவத்தித⁴ம்மோதி யோனிக³திவஸேன அனாக³மனத⁴ம்மோ.
Tanuttāti tanubhāvo. Sakadāgāmino hi rāgādayo abbhapaṭalaṃ viya macchikāpattaṃ viya ca tanukā honti, na bahalā. Orambhāgiyānanti heṭṭhābhāgiyānaṃ. Saṃyojanānanti bandhanānaṃ. Parikkhayāti parikkhayena. Opapātiko hotīti uppannako hoti. Tattha parinibbāyīti heṭṭhā anotaritvā upariyeva parinibbānadhammo. Anāvattidhammoti yonigativasena anāgamanadhammo.
பதே³ஸங் பதே³ஸகாரீதிஆதீ³ஸு பதே³ஸகாரீ புக்³க³லோ நாம ஸோதாபன்னோ ச ஸகதா³கா³மீ ச அனாகா³மீ ச, ஸோ பதே³ஸமேவ ஸம்பாதே³தி. பரிபூரகாரீ நாம அரஹா, ஸோ பரிபூரமேவ ஸம்பாதே³தி. அவஞ்ஜா²னீதி அதுச்சா²னி ஸப²லானி ஸஉத்³ரயானீதி அத்தோ². இதா⁴பி திஸ்ஸோ ஸிக்கா² மிஸ்ஸகாவ கதி²தா.
Padesaṃ padesakārītiādīsu padesakārī puggalo nāma sotāpanno ca sakadāgāmī ca anāgāmī ca, so padesameva sampādeti. Paripūrakārī nāma arahā, so paripūrameva sampādeti. Avañjhānīti atucchāni saphalāni saudrayānīti attho. Idhāpi tisso sikkhā missakāva kathitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. பட²மஸிக்கா²ஸுத்தங் • 6. Paṭhamasikkhāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. பட²மஸிக்கா²ஸுத்தவண்ணனா • 6. Paṭhamasikkhāsuttavaṇṇanā
