| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၆. ပဌမသိက္ခာသုတ္တဝဏ္ဏနာ
6. Paṭhamasikkhāsuttavaṇṇanā
၈၇. ဆဋ္ဌေ အတ္တကာမာတိ အတ္တနော ဟိတကာမာ။ ယတ္ထေတံ သဗ္ဗံ သမောဓာနံ ဂစ္ဆတီတိ ယာသု သိက္ခာသု သဗ္ဗမေတံ ဒိယဍ္ဎသိက္ခာပဒသတံ သင္ဂဟံ ဂစ္ဆတိ။ ပရိပူရကာရီ ဟောတီတိ သမတ္တကာရီ ဟောတိ။ မတ္တသော ကာရီတိ ပမာဏေန ကာရကော, သဗ္ဗေန သဗ္ဗံ ကာတုံ န သက္ကောတီတိ အတ္ထော။ ခုဒ္ဒာနုခုဒ္ဒကာနီတိ စတ္တာရိ ပာရာဇိကာနိ ဌပေတ္ဝာ သေသသိက္ခာပဒာနိ။ တတ္ရာပိ သင္ဃာဒိသေသံ ခုဒ္ဒကံ, ထုလ္လစ္စယံ အနုခုဒ္ဒကံ နာမ။ ထုလ္လစ္စယဉ္စ ခုဒ္ဒကံ, ပာစိတ္တိယံ အနုခုဒ္ဒကံ နာမ, ပာစိတ္တိယဉ္စ ခုဒ္ဒကံ, ပာဋိဒေသနိယဒုက္ကဋဒုဗ္ဘာသိတာနိ အနုခုဒ္ဒကာနိ နာမ။ ဣမေ ပန အင္ဂုတ္တရမဟာနိကာယဝဠဉ္ဇနကအာစရိယာ ‘‘စတ္တာရိ ပာရာဇိကာနိ ဌပေတ္ဝာ သေသာနိ သဗ္ဗာနိပိ ခုဒ္ဒာနုခုဒ္ဒကာနီ’’တိ ဝဒန္တိ။ တာနိ အာပဇ္ဇတိပိ ဝုဋ္ဌာတိပီတိ ဧတ္ထ ပန ခီဏာသဝော တာဝ လောကဝဇ္ဇံ နာပဇ္ဇတိ, ပဏ္ဏတ္တိဝဇ္ဇမေဝ အာပဇ္ဇတိ။ အာပဇ္ဇန္တော စ ကာယေနပိ ဝာစာယပိ စိတ္တေနပိ အာပဇ္ဇတိ။ ကာယေန အာပဇ္ဇန္တော ကုဋိကာရသဟသေယ္ယာဒီနိ အာပဇ္ဇတိ, ဝာစာယ အာပဇ္ဇန္တော သဉ္စရိတ္တပဒသောဓမ္မာဒီနိ, စိတ္တေန အာပဇ္ဇန္တော ရူပိယပဋိဂ္ဂဟဏံ အာပဇ္ဇတိ။ သေက္ခေသုပိ ဧသေဝ နယော။ န ဟိ မေတ္ထ, ဘိက္ခဝေ, အဘဗ္ဗတာ ဝုတ္တာတိ, ဘိက္ခဝေ, န ဟိ မယာ ဧတ္ထ ဧဝရူပံ အာပတ္တိံ အာပဇ္ဇနေ စ ဝုဋ္ဌာနေ စ အရိယပုဂ္ဂလသ္သ အဘဗ္ဗတာ ကထိတာ။ အာဒိဗ္ရဟ္မစရိယကာနီတိ မဂ္ဂဗ္ရဟ္မစရိယသ္သ အာဒိဘူတာနိ စတ္တာရိ မဟာသီလသိက္ခာပဒာနိ။ ဗ္ရဟ္မစရိယသာရုပ္ပာနီတိ တာနိယေဝ စတုမဂ္ဂဗ္ရဟ္မစရိယသ္သ သာရုပ္ပာနိ အနုစ္ဆဝိကာနိ။ တတ္ထာတိ တေသု သိက္ခာပဒေသု။ ဓုဝသီလောတိ နိဗဒ္ဓသီလော။ ဌိတသီလောတိ ပတိဋ္ဌိတသီလော။ သောတာပန္နောတိ သောတသင္ခာတေန မဂ္ဂေန ဖလံ အာပန္နော။ အဝိနိပာတဓမ္မောတိ စတူသု အပာယေသု အပတနသဘာဝော။ နိယတောတိ သောတာပတ္တိမဂ္ဂနိယာမေန နိယတော။ သမ္ဗောဓိပရာယဏောတိ ဥပရိမဂ္ဂတ္တယသမ္ဗောဓိပရာယဏော။
87. Chaṭṭhe attakāmāti attano hitakāmā. Yatthetaṃ sabbaṃ samodhānaṃ gacchatīti yāsu sikkhāsu sabbametaṃ diyaḍḍhasikkhāpadasataṃ saṅgahaṃ gacchati. Paripūrakārī hotīti samattakārī hoti. Mattaso kārīti pamāṇena kārako, sabbena sabbaṃ kātuṃ na sakkotīti attho. Khuddānukhuddakānīti cattāri pārājikāni ṭhapetvā sesasikkhāpadāni. Tatrāpi saṅghādisesaṃ khuddakaṃ, thullaccayaṃ anukhuddakaṃ nāma. Thullaccayañca khuddakaṃ, pācittiyaṃ anukhuddakaṃ nāma, pācittiyañca khuddakaṃ, pāṭidesaniyadukkaṭadubbhāsitāni anukhuddakāni nāma. Ime pana aṅguttaramahānikāyavaḷañjanakaācariyā ‘‘cattāri pārājikāni ṭhapetvā sesāni sabbānipi khuddānukhuddakānī’’ti vadanti. Tāni āpajjatipi vuṭṭhātipīti ettha pana khīṇāsavo tāva lokavajjaṃ nāpajjati, paṇṇattivajjameva āpajjati. Āpajjanto ca kāyenapi vācāyapi cittenapi āpajjati. Kāyena āpajjanto kuṭikārasahaseyyādīni āpajjati, vācāya āpajjanto sañcarittapadasodhammādīni, cittena āpajjanto rūpiyapaṭiggahaṇaṃ āpajjati. Sekkhesupi eseva nayo. Na hi mettha, bhikkhave, abhabbatā vuttāti, bhikkhave, na hi mayā ettha evarūpaṃ āpattiṃ āpajjane ca vuṭṭhāne ca ariyapuggalassa abhabbatā kathitā. Ādibrahmacariyakānīti maggabrahmacariyassa ādibhūtāni cattāri mahāsīlasikkhāpadāni. Brahmacariyasāruppānīti tāniyeva catumaggabrahmacariyassa sāruppāni anucchavikāni. Tatthāti tesu sikkhāpadesu. Dhuvasīloti nibaddhasīlo. Ṭhitasīloti patiṭṭhitasīlo. Sotāpannoti sotasaṅkhātena maggena phalaṃ āpanno. Avinipātadhammoti catūsu apāyesu apatanasabhāvo. Niyatoti sotāpattimagganiyāmena niyato. Sambodhiparāyaṇoti uparimaggattayasambodhiparāyaṇo.
တနုတ္တာတိ တနုဘာဝော။ သကဒာဂာမိနော ဟိ ရာဂာဒယော အဗ္ဘပဋလံ ဝိယ မစ္ဆိကာပတ္တံ ဝိယ စ တနုကာ ဟောန္တိ, န ဗဟလာ။ ဩရမ္ဘာဂိယာနန္တိ ဟေဋ္ဌာဘာဂိယာနံ။ သံယောဇနာနန္တိ ဗန္ဓနာနံ။ ပရိက္ခယာတိ ပရိက္ခယေန။ ဩပပာတိကော ဟောတီတိ ဥပ္ပန္နကော ဟောတိ။ တတ္ထ ပရိနိဗ္ဗာယီတိ ဟေဋ္ဌာ အနောတရိတ္ဝာ ဥပရိယေဝ ပရိနိဗ္ဗာနဓမ္မော။ အနာဝတ္တိဓမ္မောတိ ယောနိဂတိဝသေန အနာဂမနဓမ္မော။
Tanuttāti tanubhāvo. Sakadāgāmino hi rāgādayo abbhapaṭalaṃ viya macchikāpattaṃ viya ca tanukā honti, na bahalā. Orambhāgiyānanti heṭṭhābhāgiyānaṃ. Saṃyojanānanti bandhanānaṃ. Parikkhayāti parikkhayena. Opapātiko hotīti uppannako hoti. Tattha parinibbāyīti heṭṭhā anotaritvā upariyeva parinibbānadhammo. Anāvattidhammoti yonigativasena anāgamanadhammo.
ပဒေသံ ပဒေသကာရီတိအာဒီသု ပဒေသကာရီ ပုဂ္ဂလော နာမ သောတာပန္နော စ သကဒာဂာမီ စ အနာဂာမီ စ, သော ပဒေသမေဝ သမ္ပာဒေတိ။ ပရိပူရကာရီ နာမ အရဟာ, သော ပရိပူရမေဝ သမ္ပာဒေတိ။ အဝဉ္ဈာနီတိ အတုစ္ဆာနိ သဖလာနိ သဥဒ္ရယာနီတိ အတ္ထော။ ဣဓာပိ တိသ္သော သိက္ခာ မိသ္သကာဝ ကထိတာ။
Padesaṃ padesakārītiādīsu padesakārī puggalo nāma sotāpanno ca sakadāgāmī ca anāgāmī ca, so padesameva sampādeti. Paripūrakārī nāma arahā, so paripūrameva sampādeti. Avañjhānīti atucchāni saphalāni saudrayānīti attho. Idhāpi tisso sikkhā missakāva kathitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၆. ပဌမသိက္ခာသုတ္တံ • 6. Paṭhamasikkhāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. ပဌမသိက္ခာသုတ္တဝဏ္ဏနာ • 6. Paṭhamasikkhāsuttavaṇṇanā
