| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৯. পঠমসিক্খত্তযসুত্তং
9. Paṭhamasikkhattayasuttaṃ
৯০. ‘‘তিস্সো ইমা, ভিক্খৰে, সিক্খা। কতমা তিস্সো? অধিসীলসিক্খা, অধিচিত্তসিক্খা, অধিপঞ্ঞাসিক্খা।
90. ‘‘Tisso imā, bhikkhave, sikkhā. Katamā tisso? Adhisīlasikkhā, adhicittasikkhā, adhipaññāsikkhā.
‘‘কতমা চ, ভিক্খৰে, অধিসীলসিক্খা? ইধ, ভিক্খৰে, ভিক্খু সীলৰা হোতি…পে॰… সমাদায সিক্খতি সিক্খাপদেসু। অযং ৰুচ্চতি, ভিক্খৰে, অধিসীলসিক্খা।
‘‘Katamā ca, bhikkhave, adhisīlasikkhā? Idha, bhikkhave, bhikkhu sīlavā hoti…pe… samādāya sikkhati sikkhāpadesu. Ayaṃ vuccati, bhikkhave, adhisīlasikkhā.
‘‘কতমা চ, ভিক্খৰে, অধিচিত্তসিক্খা? ইধ, ভিক্খৰে, ভিক্খু ৰিৰিচ্চেৰ কামেহি…পে॰… চতুত্থং ঝানং উপসম্পজ্জ ৰিহরতি। অযং ৰুচ্চতি, ভিক্খৰে, অধিচিত্তসিক্খা।
‘‘Katamā ca, bhikkhave, adhicittasikkhā? Idha, bhikkhave, bhikkhu vivicceva kāmehi…pe… catutthaṃ jhānaṃ upasampajja viharati. Ayaṃ vuccati, bhikkhave, adhicittasikkhā.
‘‘কতমা চ, ভিক্খৰে, অধিপঞ্ঞাসিক্খা? ইধ, ভিক্খৰে, ভিক্খু ‘ইদং দুক্খ’ন্তি যথাভূতং পজানাতি…পে॰… ‘অযং দুক্খনিরোধগামিনী পটিপদা’তি যথাভূতং পজানাতি। অযং ৰুচ্চতি, ভিক্খৰে, অধিপঞ্ঞাসিক্খা। ইমা খো, ভিক্খৰে, তিস্সো সিক্খা’’তি। নৰমং।
‘‘Katamā ca, bhikkhave, adhipaññāsikkhā? Idha, bhikkhave, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Ayaṃ vuccati, bhikkhave, adhipaññāsikkhā. Imā kho, bhikkhave, tisso sikkhā’’ti. Navamaṃ.
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭-১০. দুতিযসিক্খাসুত্তাদিৰণ্ণনা • 7-10. Dutiyasikkhāsuttādivaṇṇanā
