| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
५. पठमसीलसुत्तं
5. Paṭhamasīlasuttaṃ
३२. वुत्तञ्हेतं भगवता, वुत्तमरहताति मे सुतं –
32. Vuttañhetaṃ bhagavatā, vuttamarahatāti me sutaṃ –
‘‘द्वीहि, भिक्खवे, धम्मेहि समन्नागतो पुग्गलो यथाभतं निक्खित्तो एवं निरये। कतमेहि द्वीहि? पापकेन च सीलेन, पापिकाय च दिट्ठिया। इमेहि खो, भिक्खवे, द्वीहि धम्मेहि समन्नागतो पुग्गलो यथाभतं निक्खित्तो एवं निरये’’ति। एतमत्थं भगवा अवोच। तत्थेतं इति वुच्चति –
‘‘Dvīhi, bhikkhave, dhammehi samannāgato puggalo yathābhataṃ nikkhitto evaṃ niraye. Katamehi dvīhi? Pāpakena ca sīlena, pāpikāya ca diṭṭhiyā. Imehi kho, bhikkhave, dvīhi dhammehi samannāgato puggalo yathābhataṃ nikkhitto evaṃ niraye’’ti. Etamatthaṃ bhagavā avoca. Tatthetaṃ iti vuccati –
‘‘पापकेन च सीलेन, पापिकाय च दिट्ठिया।
‘‘Pāpakena ca sīlena, pāpikāya ca diṭṭhiyā;
एतेहि द्वीहि धम्मेहि, यो समन्नागतो नरो।
Etehi dvīhi dhammehi, yo samannāgato naro;
कायस्स भेदा दुप्पञ्ञो, निरयं सोपपज्जती’’ति॥
Kāyassa bhedā duppañño, nirayaṃ sopapajjatī’’ti.
अयम्पि अत्थो वुत्तो भगवता, इति मे सुतन्ति। पञ्चमं।
Ayampi attho vutto bhagavatā, iti me sutanti. Pañcamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ५. पठमसीलसुत्तवण्णना • 5. Paṭhamasīlasuttavaṇṇanā
