| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. පඨමසොචෙය්‍යසුත්‌තං
8. Paṭhamasoceyyasuttaṃ
121. ‘‘තීණිමානි, භික්‌ඛවෙ, සොචෙය්‍යානි. කතමානි තීණි? කායසොචෙය්‍යං, වචීසොචෙය්‍යං, මනොසොචෙය්‍යං. කතමඤ්‌ච, භික්‌ඛවෙ, කායසොචෙය්‍යං? ඉධ, භික්‌ඛවෙ, එකච්‌චො පාණාතිපාතා පටිවිරතො හොති, අදින්‌නාදානා පටිවිරතො හොති, කාමෙසුමිච්‌ඡාචාරා පටිවිරතො හොති. ඉදං වුච්‌චති, භික්‌ඛවෙ, කායසොචෙය්‍යං.
121. ‘‘Tīṇimāni, bhikkhave, soceyyāni. Katamāni tīṇi? Kāyasoceyyaṃ, vacīsoceyyaṃ, manosoceyyaṃ. Katamañca, bhikkhave, kāyasoceyyaṃ? Idha, bhikkhave, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti. Idaṃ vuccati, bhikkhave, kāyasoceyyaṃ.
‘‘කතමඤ්‌ච, භික්‌ඛවෙ, වචීසොචෙය්‍යං? ඉධ, භික්‌ඛවෙ, එකච්‌චො මුසාවාදා පටිවිරතො හොති, පිසුණාය වාචාය පටිවිරතො හොති, ඵරුසාය වාචාය පටිවිරතො හොති, සම්‌ඵප්‌පලාපා පටිවිරතො හොති. ඉදං වුච්‌චති භික්‌ඛවෙ, වචීසොචෙය්‍යං.
‘‘Katamañca, bhikkhave, vacīsoceyyaṃ? Idha, bhikkhave, ekacco musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti. Idaṃ vuccati bhikkhave, vacīsoceyyaṃ.
‘‘කතමඤ්‌ච, භික්‌ඛවෙ, මනොසොචෙය්‍යං? ඉධ, භික්‌ඛවෙ, එකච්‌චො අනභිජ්‌ඣාලු හොති අබ්‍යාපන්‌නචිත්‌තො සම්‌මාදිට්‌ඨිකො. ඉදං වුච්‌චති, භික්‌ඛවෙ, මනොසොචෙය්‍යං. ඉමානි ඛො, භික්‌ඛවෙ, තීණි සොචෙය්‍යානී’’ති. අට්‌ඨමං.
‘‘Katamañca, bhikkhave, manosoceyyaṃ? Idha, bhikkhave, ekacco anabhijjhālu hoti abyāpannacitto sammādiṭṭhiko. Idaṃ vuccati, bhikkhave, manosoceyyaṃ. Imāni kho, bhikkhave, tīṇi soceyyānī’’ti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8. පඨමසොචෙය්‍යසුත්‌තවණ්‌ණනා • 8. Paṭhamasoceyyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8. පඨමසොචෙය්‍යසුත්‌තවණ්‌ණනා • 8. Paṭhamasoceyyasuttavaṇṇanā
